Zyintu Ziindilide Nzyobajisi Zizulizye Kubulizya

MUMWAKA wa 49 C.E. Petro, Jakobo alimwi a Johane—“aabo ibakali kuboneka kuti misemu” bakapa Paulo amubelesinyina Barnaba mulimo. Ciindi nibakali kukambaukila bamasi, bakeelede kuyeeya Banakristo bacete. (Gal. 2:9, 10) Ino mukuli ooyu wakazuzikizyigwa buti?

Magwalo Paulo ngaakalemba atondezya mbwaakali kwaabikkila maano makani aaya. Mucikozyanyo, ku Banakristo baku Korinto wakalemba kuti: “Lino kumakani aakuyobolola mali aakugwasya basalali, amutobele malailile ngondakapa mbungano zyaku Galatiya. Mubuzuba bwakusaanguna bwansondo imwi aimwi, umwi aumwi wanu abikke cimwi cintu ambali kweelana anzyajisi, kutegwa kutakabi kuyobolola mali ndaakusika. Pele ndaakusika ooko, ndiyootuma baalumi mbomuyakuzuminizya mumagwalo aanu ikutola cipego canu caluse ku Jelusalemu.”—1 Ko. 16:1-3.

Mulugwalo lwakwe lwabili kubana Korinto, Paulo wakaamba alimwi makanze aakuyobolola mali. Makanze aakwe akali aakuti ‘zyintu ziindilide nzyobakajisi lino zizulizye kubulizya kwabo.’—2 Ko. 8:12-15.

Ciindi Paulo naakalembela Banakristo ku Roma muma 56 C.E., kuyobolola mali kwakali afwaafwi kumana. Wakaamba kuti: “Ndili afwaafwi kuunka ku Jelusalemu kuyookutaukila basalali. Nkaambo aabo bali mu Makedoniya amu Akaya cakababotela kwaabila zyintu zyabo kwiinda mukusanga zyintu eezyo kubasalali bacete ibali mu Jelusalemu.” (Lom. 15:25, 26) Paulo wakauzuzikizya mulimo wakwe nikwakainda buyo ciindi cisyoonto kuzwa leelyo, nkaambo ciindi naakapiluka ku Jerusalemu alimwi akuyooangwa okuya, wakaambila Mweendelezi muna Roma Felike kuti: “Ndakasika kutegwa ndiletele bantu bamucisi cangu zipego zyaluse akutuula zituuzyo kuli Leza.”—Mil. 24:17.

Muuya ngobakatondezya Banakristo bamumwaanda wamyaka wakusaanguna wakalibonya kwiinda mumajwi Paulo ngaakaambila bana Makedoniya. Wakaamba kuti: “Bakazumanana kutulomba akutukombelezya kapati kuti bazumizyigwe kuba acoolwe cakupa.” Mwaapostolo Paulo wakakulwaizya bana Korinto kuti batobele cikozyanyo ncicona eeco. Wakabaambila kuti: “Umwi aumwi acite mbuli mbwaasala mumoyo wakwe, ikutali kupa kumoyo kakusiide naa cakusinikizyigwa, nkaambo Leza uyanda muntu uupa kumwi kakkomene.” Ncinzi cakakulwaizya mbungano kutondezya muuya wabwaabi uuli boobu? Makanze ngobakajisi tanaakali buyo ‘aakupa basalali zyintu zinji nzyobayandika pe, pele alimwi bakali kuyanda kuti bantu banji bamulumbe Leza.’ (2 Ko. 8:4; 9:7, 12) Bwaabi bwesu bulakonzya kuba amakanze aakozyenye. Cakutadooneka, Jehova Leza uyakuulongezya muuya uuli boobu mubotu wakulyaaba alimwi lulongezyo lwakwe—lupa muntu kuvwuba.—Tus. 10:22.

 [Kabbokesi kali apeeji 9]

NZILA BAMWI NZYOBABELESYA KUSANGA KUMULIMO WANYIKA YOONSE

Mbubwenya mbuli mumazuba aamwaapostolo Paulo, ibanji mazuba aano balabikka “cimwi cintu ambali” naa mali kutegwa bakaabikke mutubbokesi tulembedwe kuti: “Mulimo Wanyika Yoonse.” (1 Ko. 16:2) Amwezi mbungano zilatumina mali aaya kuofesi yamutabi ya Bakamboni ba Jehova iili mucisi eeco. Alimwi mulakonzya kusanga mali kwiinda mukwaatuma kumbunga iizumizyidwe amulawo iibelesyegwa a Bakamboni ba Jehova iili mucisi canu. Kutegwa muzyibe mbunga iizumizidwe amulawo iibelesyegwa a Bakamboni ba Jehova mucisi canu, mwalombwa kuti mwaambaule abakuofesi yamutabi mucisi canu. Kkeyala yakuofesi yamutabi ilakonzya kujanwa a www.pr418.com. Izyakusanga zilembedwe ansi aawa zilakonzya kutumwa kuofesi yamutabi mucisi canu:

ZYAKUSANGA ZYACIGAMININA

• Mali, ngale naa zyintu zimbi ziindene-indene zilakonzya kusangwa.

• Lugwalo lufwaafwi lusindikizya zyintu eezyi lulakonzya kulembwa kupandulula kuti eeci ncakusanga cacigaminina.

KUSANGA KWIINDA MUKUZUMINANA

• Kusanga mali kwiinda mukuzuminana asikusanga kuti ayakupiluka naa waayanda.

• Mwalombwa kuti musaangune kubandika abakuofesi yamutabi iili mucisi canu.

IKULIBAMBILA NZYOMUKONZYA KUSANGA

Kunze lyakusanga buyo mali azyintu zimbi ziindene-indene, kuli nzila zimbi nzyomukonzya kubelesya ikupa zyintu mukugwasyilizya mulimo wa Bwami uucitwa nyika yoonse. Nzila eezyi zilaambidwe mumincali iitobela. Kufwumbwa nzila nzyomuyanda kubelesya, amusaangune kubandika abakuofesi yamutabi iili mucisi canu kutegwa mubone naa ninzila nzi zizumizyidwe mucisi canu. Mbwaanga iziyandika alimwi amilawo yamitelo ziliindene kweelana acisi, cilayandika kapati ikubuzya basyaazibwene mumilawo yamitelo alimwi abaabo bagwasilizya mumakani aamilawo kamutanasala nzila mbotu njomuyanda kubelesya mukusanga.

Insyuwalansi: Imbunga iibelesyegwa a Bakamboni ba Jehova ilakonzya kulembwa kuti njiiyakubweza mali aabukwabilizi bwabuumi (life insurance policy) naa aalya aapegwa kumuntu iwasika aciimo cakuleka mulimo (retirement/pension plan).

Akkaunti Yakubbanki: Nkomo yamali aakubbanki, mapepa aatondezya mali ngaakabikka naa nkomo yamali ngapegwa muntu iwasika aciimo cakuleka mulimo alakonzya kupegwa kumbunga iibelesyegwa a Bakamboni ba Jehova muntu afwa kweelana aziyandika kubbanki lyakubusena nkwakkede.

Mali Ngomujisi Mukkampani (Stocks and Bonds): Mali ngomujisi mukkampani alakonzya kusangwa kumbunga iibelesyegwa a Bakamboni ba Jehova kacili cipego buyo naa kacili cizuminano kuti njiiyakwaabweza mali muntu aakufwa.

Nyika Amayake (Real Estate): Nyika amayake izikonzya kusambalwa zilakonzya kusangwa, ikuti naa muntu wasanga busena mpakkede inga wazumanana kukkala aawo ciindi nacipona.

Mali Aapegwa Amwaka (Gift Annuity): Oobu bubambe bulacitwa kwiinda mukupa mali kumbunga iibelesyegwa a Bakamboni ba Jehova, kwiinda mububambe mwalo muntu ooyu iwasanga mali aaya naa muntu uumbi buyo ngwaasala, mwapegwa mali amwaka kusikila akafwe. Iwasanga mali tapi mutelo kumali aayo mumwaka ooyo bubambe oobu nobwatalika.

Bwaapauzi Bwazyintu (Wills and Trusts): Zyintu naa mali alakonzya kupegwa kumbunga iibelesyegwa a Bakamboni ba Jehova kwiinda mukubelesya pepa lyamalailile aabwaapauzi bwazyintu ilizumizyidwe amulawo naa kuti imbunga iibelesyegwa a Bakamboni ba Jehova ilakonzya kulembwa kuti njiyeelede kupegwa mali aajanika mubwaapauzi bwazyintu. Izyintu naa mali aapegwa kugwasya mbunga yabukombi alakonzya kugwasya munzila iimwi mumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti uusanga alibambile kabotu. Aboobo, mweelede kubandika abaabo ibalanganya mitelo. Kwiinda mukubelesya nzila eeyi yakusangila, banji bacikonzya kugwasyilizya mulimo wesu wabukombi alimwi amilimo imbi yakugwasya banamaleya nyika yoonse alimwi bagwasyigwa kapati mumakani aamitelo.

Kutegwa muzyibe zinji, mulakonzya kubandika abaku Treasury (ibalanganya mali kuofesi yamutabi), inga mwatuma fooni naa kulemba lugwalo kwiinda mukubelesya kkeyala iili ansi aawa, naa kubandika abakuofesi yamutabi iili mucisi canu.

TREASURY

Watch Tower Bible and Tract Society of Pennsylvania

P.O. Box 33459

Lusaka 10101

Fooni: +0211 272062