“Bamuzwakule Batakkalilili” Balikamantene Mubukombi Bwakasimpe

‘Bamuzwakule bayakuba balimi banu abasimuunda banu, pele inywe muyakwaambwa kuti bapaizi ba Jehova.’—IS. 61:5, 6.

INO INGA MWAINGULA BUTI?

Mbuti bantu bamwi mbobababona bamuzwakule, pele ino ncinzi Bbaibbele ncolyaamba?

Nkutamba nzi kulimukucitwa kubantu bamisyobo yoonse?

Muunzila nzi motuli munyika iitakwe bamuzwakule neliba lino?

1. Ino bantu bamwi bababona buti bamuzwakule, pele nkaambo nzi ncocitali kabotu?

KWEELANA ambokutondezyedwe mucibalo cainda, bantu babelesya bbala lyakuti ‘bamuzwakule’ munzila yakufwubaazya, kutondezya kuti balibasulide, naa kutondezya kuti balabanyansya. Nkubula bulemu kubona bantu bazwa muzisi zimbi kuti tabali bantu kweelana abantu bamucisi muntu mwazwa. Kuyungizya waawo, muzeezo uuli boobo utondezya kubula luzyibo lwatwaambo twamasimpe. Bbuku litegwa The Races of Mankind lyaamba kuti: “Bbaibbele lyaamba kuti bantu bamisyobo yoonse—mbabunyina.” Banabunyina kanji-kanji baliindene, pele nokuba kuti ciliboobo, mbaanabunyina.

2, 3. Ino Jehova ubabona buti bamuzwakule?

² Kufwumbwa nkotukkala, bamuzwakule nkobali akati kesu. Mbocakabede oobo akuli bana Israyeli bansiku, balo ibakali mucilongwe cilibedelede a Jehova Leza kwiinda mucizuminano ca Mulawo. Lwaanguluko lwabamasi lwakali lusyoonto, pele bana Israyeli bakeelede kubalanganya cabulemu alimwi kakunyina kubadyaaminina. Eelo kaka ncikozyanyo cibotu ncotweelede kutobela! Kusalulula takuyandiki naaceya akati ka Banakristo bakasimpe. Nkaambo nzi? Mwaapostolo Petro wakaamba kuti: “Lino ndazyiba ncobeni kuti Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Mil. 10:34, 35.

³ Bamuzwakule mu Israyeli kaindi bakali kugwasyigwa akaambo kakuyanzana kapati abana Israyeli. Eeci cakali kutondezya mbwaakali kuzibona zyintu Jehova. Nokwakainda myaka, mwaapostolo Paulo wakabuzya boobu kujatikizya Jehova: “Sena ngu Leza waba Juda balikke na? Sena abalo bamasi tali Leza wabo? Inzya, abalo bamasi ngu Leza wabo.”—Lom. 3:29; Joel. 2:32.

4. Nkaambo nzi ncokukonzya kwaambwa kuti taakwe bamuzwakule mucisi ‘caba Isilayeli ba Leza’?

 ⁴ Kwiinda mucizuminano cipya, cisi cabana Israyeli bakumubili calo cakeelede kuba mucilongwe cilibedelede a Leza cakanjililwa mubusena ambungano ya Banakristo bananike. Aboobo, ciitwa kuti: “iba Isilayeli ba Leza.” (Gal. 6:16) Alimwi kweelana a Paulo mbwaakapandulula, mucisi cipya eeci, “kunyina mu Giliki, naba mu Juda, nobuba bupalule naa kutapalulwa, muzwamasi, mu Sikuti, muzike naa muntu waangulukide, pele Kilisito ngozyintu zyoonse alimwi uli muli boonse.” (Kol. 3:11) Munzila eeyo nkokuti tiikwakali kuyakuba bamuzwakule mumbungano ya Banakristo.

5, 6. (a) Ino mubuzyo nzi uukonzya kubuzyigwa kujatikizya Isaya 61:5, 6? (b) Ino “bapaizi ba Jehova” alimwi ‘abamuzwakule’ ibaambidwe a Isaya mbaani? (c) Ino mbunga zyoonse zyobilo zikozyenye buti?

⁵ Kulubazu lumwi, umwi ulakonzya kwaamba caandaano 61 cabbuku lya Isaya, calo cijisi businsimi ibuzuzikizyigwa mumbungano ya Banakristo. Kapango 6 mucaandaano eeci kaamba baabo ibayakubeleka kabali “bapaizi ba Jehova.” Nokuba boobo, kapango 5 kaamba ‘bamuzwakule’ balo ibakali kuyakukamantana akubelekela antoomwe “[a]bapaizi” aabo. Ino eeci ceelede kuteelelwa buti?

⁶ Tulizyi kuti aabo “bapaizi ba Jehova” Mbanakristo bananike balo ibayakubusyigwa “mububuke bwakusaanguna” alimwi “[i]bayooba bapaizi ba Leza aba Kilisito alimwi bayooba bami balela antoomwe anguwe kwamyaka iili 1,000.” (Ciy. 20:6) Kuyungizya waawo, kuli Banakristo banji basyomeka ibajisi bulangizi bwakupona anyika. Nokuba kuti aaba balabeleka alimwi akuyanzana kapati abaabo ibayakubelekela kujulu, mbaamuzwakule, mumaambilambali. Balakkomana kapati kugwasya akubelekela antoomwe “[a]bapaizi ba Jehova,” kubeleka kabali mbuli ‘balimi’ alimwi “abasimuunda.” Inzya, balagwasya kujana micelo yamuuya kutegwa Leza alemekwe, kugwasya alimwi akutebula bantu. Masimpe, bananike alimwi “[aba]mbelele zimbi” boonse buyo balajana alimwi akweembela caluyando bantu basyomeka ibayanda kubelekela Leza kukabe kutamani.—Joh. 10:16.

“BAMUZWAKULE BATAKKALILILI” MBULI ABRAHAMU

7. Muunzila nzi Banakristo mazuba aano mobali mbuli Abrahamu alimwi abaalumi bamwi basyomeka bakaindi?

⁷ Mbubwenya mbotwabona mucibalo  cainda, Banakristo bakasimpe bali mbuli bamuzwakule batakkalilili munyika ya Saatani mbyaabi. Aboobo, balikozyenye abaalumi basyomeka bakaindi—kubikkilizya a Abrahamu—balo ibaambwa kuti “bakali beenzu alimwi bamuzwakule batakkalilili munyika iilya.” (Heb. 11:13) Kufwumbwa naa bulangizi bwesu bwakumbele buli buti, tulijisi coolwe cakukkomana acilongwe a Jehova mbuli cakajisi Abrahamu. Jakobo upandulula kuti, “Abulahamu wakasyoma Jehova, eelyo wakabonwa kuti mululami, alimwi wakaitwa kuti ‘mulongwe wa Jehova.’”—Jak. 2:23.

8. Ncisyomezyo nzi Abraham ncaakapegwa, alimwi wakalimvwa buti kujatikizya kuzuzikizyigwa kwacisyomezyo eeci?

⁸ Leza wakasyomezya kuti kwiinda muli Abrahamu alimwi abaluzubo lwakwe, mikwasyi yoonse anyika—kutali buyo cisi comwe pe—yakali kuya kulongezyegwa. (Amubale Matalikilo 22:15-18.) Nokuba kuti kuzuzikizyigwa kwacisyomezyo eeci ca Leza kwakacili kumbele kapati, Abrahamu wakazumanana kusyoma kuti ciyakuzuzikizyigwa. Kwamyaka iinda acisela cabuumi bwakwe, walo alimwi amukwasyi wakwe bakatuntulika kuzwa mubusena bumwi kuya kubusena bumbi. Ciindi coonse eeci Abrahamu wakazumanana mucilongwe cakwe a Jehova.

9, 10. (a) Muunzila nzi motukonzya kwiiya cikozyanyo ca Abrahamu? (b) Ino nkutamba nzi nkotukonzya kwaambila bamwi?

⁹ Nokuba kuti tanaakalizyi bulamfwu bwaciindi ncaakeelede kulindila kutegwa bulangizi buzuzikizyigwe, luyando lwa Abrahamu kuli Jehova alimwi akulyaaba kwakwe kunyina nokwakazungaana. Wakazumanana kugamika meso aakwe, kutali kukujana busena bwakuti abe sicisi uukkalilila mucisi cimwi pe. (Heb. 11:14, 15) Eelo kaka ncabusongo kutobela cikozyanyo ca Abrahamu, kwiinda mukupona buumi buuba-uba, alimwi akutalibilika kapati azyintu zyakumubili, mpuwo naa mbaakani zyalwiiyo! Sena ncibotu kupona buumi bwaambwa kuti mbubotu mubweende bwazyintu buyanda kumana ino-ino? Sena ncibotu kujata bubi muzyintu zyaciindi buyo cisyoonto? Mbubwenya mbocakabede kuli Abrahamu, tulangila cintu cimwi cibotu kapati. Tuliyandide kukkazyika moyo, kulindila kusikila bulangizi bwesu bukazuzikizyigwe.—Amubale Baloma 8:25.

¹⁰ Jehova ucizumanana kutamba bantu bamuzisi zyoonse kuti balongezyegwe kwiinda mulunyungu lwa Abrahamu. Alimwi bananike “bapaizi ba Jehova,” kubikkilizya abambelele zimbi ‘bamuzwakule,’ abalo baambila bamwi kutamba ooku munyika yoonse mumyaambo iinda ku 600.

AMUBIKKILE MAANO KUZISI ZYOONSE

11. Mbuti Solomoni mbwaakatondezya kuti tanaakali kulanga buyo bana Israyeli?

¹¹ Ciindi tempele nolyakali kwaabwa mu 1026 B.C.E., alimwi kweelana acisyomezyo ca Jehova kuli Abrahamu, Solomoni wakabona kuti bantu bamuzisi zyoonse bakali kukonzya kusangana kutembaula Jehova. Mumupailo ngwaakapaila camoyo woonse, wakaamba kuti: “Alakwe mweenzu uutali umwi wabantu bako ba-Israyeli, uuzwa kucisi cakule nkaambo kazina lyako, (nkaambo bantu bayooswiilila impuwo yazina lyako ipati ayajanza lyako lyanguzu ayakuboko kwako kutandabede) asika kukukomba kuŋanda okuno, koswiilila kumakalilo aako aakujulu, ukacite coonse mweenzu ncakukwiilila, kuti bantu boonse baansi bazibe izina lyako, akukulemeka mbubonya bantu bako ba-Israyeli mbubakulemeka.”—1 Bam. 8:41-43.

12. Nkaambo nzi bantu bamwi ncobakonzya kubona Bakamboni ba Jehova mbuli beenzu naa ‘bamuzwakule’?

¹² Kanji-kanji muzwakule muntu uuli mucisi citali cokwabo naa muntu uubola mucilawo naa uuzwa munkamu iimbi. Bupanduluzi oobu bubapandulula kabotu Bakamboni ba Jehova. Bayanda buyo kusyomeka  kumfwulumende yakujulu, Bwami bwa Leza mubweendelezi bwa Kristo. Aboobo, tabatoli lubazu naaceya mutwaambo twacisi, nokuba kuti bantu bamwi bababona kuti balisweekede.

13. (a) Muunzila nzi motukonzya kwaamba kuti mbolibelesyegwa bbala lyakuti “muzwakule” kanji-kanji ciya buyo muntu mbwalibona? (b) Sena makanze aa Jehova kumatalikilo akali kubikkilizya amuzeezo wabamuzwakule? Amupandulule.

¹³ Bamuzwakule balazyibwa kwiinda mubube buboneka kapati akati kankamu yabo insyoonto. Cilakonzya kuba mwaambo ngobaambaula, zilengwa zyabo, mbobalibonya, noiba nsamino yabo. Nokuba boobo, zyintu ziyandika kapati zyeezyo izilibonya kapati akati kabo mbubwenya mbuli bantu bamwi, taciko makani acisi nkobazwa. Mubwini muzwakule muntu uubonwa boobo nkaambo uliindene munzila zimwi. Ciindi notutabikkili maano kukwiindana ooku naa kukwiindana kwakuyeeyela buyo, nkokuti ibbala lyakuti “muzwakule” lilaleka kuba abupanduluzi bwandilyo. Bantu boonse anyika nibali bankamu yatwaambo twacisi yomwe naa mfwulumende, nikwatali bbala lyakuti muzwakule caboola kutwaambo twacisi. Masimpe ngakuti, kuzwa kumatalikilo makanze aa Jehova ngakuti bantu boonse bakamantane mbuli mukwasyi omwe ansi aabweendelezi bomwe—bweendelezi bwakwe. Sena kuli bulangizi bwakuti cintu ciliboobo cilakonzya kucitika lino kubantu bamuzisi zyoonse nyika yoonse?

14, 15. Ncinzi Bakamboni ba Jehova kabali kabunga ncobaiya?

¹⁴ Munyika eeyi bantu mobaliyanda, cilakatalusya kujana bantu bakonzya kubikkila maano kubantu bazisi zyoonse. Nokuba boobo, kumana lusalululo kulakatazya. Iwakatalisya CNN aacipeku-peku, Ted Turner, wakaamba kujatikizya mulimo wakwe abantu bamwi bajisi luzyibo bazwa muzisi zisiyene-siyene. Wakati: “Cakandikkomanisya kapati kuswaangana abantu aaba. Aabo bazwa kuzisi zimwi ndakaleka kubabona kuti ‘mbaamuzwakule,’ pele ndakali kubabona kuti mbaasicisi. Ibbala lyakuti ‘muzwakule’ ndakatalika kulibona kuti talili kabotu alimwi ndakabikka mulawo wakuti talyeelede kubelesyegwa abasimilimo ba CNN nobabala makani naa nobabandika buyo mumaofesi. Muciindi caboobo, mabala aakuti ‘bazwa mumasi oonse’ ngaakeelede kubelesyegwa.”

¹⁵ Mumasi aali munyika, Bakamboni ba Jehova kabali kabunga, balikke mbobazibona mbwazibona zyintu Leza. Akaambo kakwiiya kubona zyintu mbwazibona Jehova, mumizeezo bacikonzya kubikkila maano bantu bakuzisi zimwi. Muciindi cakutabasyoma, kubayeeyela zibi naa kubasula buya ibazwa kumasi aamwi, baiya kubona bube azyintu nzyobakonzya kucita kuti ncintu cibotu. Sena kuli nomwakakayeeya kaambo aaka alimwi ambokamugwasya  nywebo kumugama nomweendelezya bamwi?

NYIKA IITAJISI BAMUZWAKULE

16, 17. Ino kuzuzikizyigwa kwalugwalo lwa Ciyubunuzyo 16:16 alwa Daniele 2:44, kuyakwaamba nzi kulindinywe kumugama?

¹⁶ Lino-lino Jesu Kristo ampi zyakwe zyakujulu uyakunyonyoona zisi zyoonse zikazya bulelo bwa Leza mazuba aano munkondo yamamanino, eeyo ‘mu Chihebulayo iitegwa Amagedoni.’ (Ciy. 16:14, 16; 19:11-16) Myaka iinda ku 2,500 yainda, musinsimi Daniele wakaambilalimwi iciyakucitika kumfwulumende zyabantu izikazyanya amakanze aa Leza, wakalemba kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Dan. 2:44.

¹⁷ Amuyeeye buyo kuzuzikizyigwa ooku ncokuyakwaamba kulindinywe kumugama! Minyinza bantu njobakalipangila, yalo mazuba aano munzila iimwi iipa kuti muntu uuliwoonse kali muzwakule, taicinooliko. Kwiindana kwabantu mbobaboneka naa kwiindana kwatulengwa tumwi tubotu kuyakutondezya mbokuli kubotu kusiyana-siyana kwazilenge zya Leza. Bulangizi buli boobu bweelede kutukulwaizya toonse kuzumanana kumutembaula akumulemeka Mulengi wesu, Jehova Leza, kusikila mpotugolela.

18. Nzyintu nzi zyacitika caino-ino zitondezya kuti muzeezo wakuti bamwi ‘mbaamuzwakule’ ulakozya kumanizyigwa?

¹⁸ Sena kuyeeya kuti kucinca kwanyika yoonse kuli boobu inga kwacitika takugwasyi? Peepe, tacili boobo. Mukwiimpana, ncamaano kuyeeya kuti kucinca kuliboobo kuyakucitika. Akaambo kakuti tababikkili kapati maano kuti akati kabo bamwi bazwa kuzisi zimbi, muzeezo wakuti bamwi ‘mbaamuzwakule’ tauciko akati ka Bakamboni ba Jehova. Mucikozyanyo, caino-ino maofesi aamitabi masyoonto-syoonto aali mbwaabede akajalwa akuba cibeela camutabi omwe kutegwa cuubye-ubye mulimo wabweendelezi alimwi akusumpula bweende bwazyintu mukuzuzikizya mulimo wakukambauka makani mabotu aa Bwami. (Mt. 24:14) Kweelana amulawo mbowakali kuzumizya, minyinza yazisi tiiyakali kubikkilwa maano ciindi nokwakali kucitwa boobu. Oobu mbumboni abumbi ibutondezya kuti Jesu Kristo kali Mweendelezi uusalidwe a Jehova wagwisya minyinza njobabikka bantu, alimwi ino-ino ngonguwe ‘uyakumanizya kuzunda.’—Ciy. 6:2.

19. Ncinzi cakonzyeka akaambo kamwaambo uusalala wakasimpe?

¹⁹ Mbwaanga bazwa muzisi zinji alimwi baamba myaambo minji iisiyene-siyene, Bakamboni ba Jehova balasola kusumpula mwaambo uusalala wakasimpe. Eeci cipa kuti kube lukamantano lutakonzyi kumanizyigwa. (Amubale Zefaniya 3:9.) Ooyu mukwasyi wanyika yoonse uli akati kabweende bwazyintu bubyaabi, pele tauli cibeela cabweende oobu. Mukwasyi ooyu uukamantene utondezya nyika mboiyakuba kumbele—nyika iitakwe bamuzwakule. Kuciindi eeco bantu boonse bapona, bayakukkomana kubona mbwaali aamasimpe majwi aabbuku lyazubululwa kumatalikilo aacibalo eeci kuti: “Bbaibbele lyaamba kuti bantu bamisyobo yoonse—mbabunyina.”—The Races of Mankind.

[Mibuzyo yaciiyo]

[Majwi aakwelelezya sikubala aali apeeji 28]

Sena mulangila kumbele kuciindi minyinza yazisi njobalibikkila bantu noitanooliko, alimwi “abamuzwakule” nobatanooliko?

[Cifwanikiso icili apeeji 25]

Sena muyakuzumanana kubikkila maano kukuzuzikizyigwa kwazisyomezyo zya Leza mbubwenya mbuli Abrahamu?

[Cifwanikiso icili apeeji 27]

Mumeso aa Jehova kunyina muzwakule