Mibuzyo Yabasikubala

Katutanaiya kasimpe, mebo abakaintu bangu twakabelesya nzila ya in vitro fertilization (eeyi ninzila yakuswaanganya mayi aamukaintu abwaalumi) akaambo kakuyanda kuba amwana. Taali mayi oonse aakaswaanganizyigwa abwaalumi aakabelesyegwa pe; amwi akaile kubikkwa mufiliji akuyobolwa. Sena mayi aaya ayelede kuyobolwa, naa kusoogwa?

▪ Aaka nkamwi katwaambo tuyandika kapati ntobeelede kubikkila maano banabukwetene ikuti basala kuyobola mayi aakaswaanganizyigwa abwaalumi (IVF). Banabukwetene bayakulyaambilila kuli Jehova kweelana akusala kwabo. Nokuba boobo, cilakonzya kutugwasya kwiilanga-langa mubufwaafwi nzila eeyi iigwasya mukaintu kumita.

Nzila eeyi yakabelesyegwa ciindi cakusaanguna amukaintu wakucisi ca England mu 1978. Ooyu mukaintu tanaakali kukonzya kumita akaambo kakuti nzila mwiinda bwaalumi kutegwa buswaangane aji (mayi) zyakalisinkide. Bamadokota bakamwaandula akubweza iji lisimide akulibikka mucibikkilo cagilazi (glass dish) akuliswaanganya abwaalumi bwabalumi bakwe. Dowalowa eeli lyakabwezyegwa akupilusyigwa mwida lyamukaintu, mwalo molyakali kukomenena. Mazuba naakakkwana, mukaintu ooyu wakatumbuka mwana musimbi. Nzila eeyi, alimwi anzila zimbi zikozyenye ayeeyi zyakatalika kwiitwa kuti in vitro (glass) fertilization, naa (IVF).

Nokuba kuti bumpiyompiyo bumwi bujatikizyidwe bulakonzya kwiindana kweelana acisi, nzila ya IVF ijatikizya zyintu eezyi: Mukaintu ulapegwa mapiilusi kwansondo zili mbozibede kutegwa akajanike amayi manji. Mwaalumi ulakonzya kwaambilwa kuti alyoombe kutegwa babweze bwaalumi bwakwe. Mayi alimwi abwaalumi zilaswaanganizyigwa. Mayi aali mbwaabede alakonzya kuswaangana abwaalumi akutalika kucimbauka, akuba dowalowa. Kwainda buzuba bomwe madowalowa aaya alalingulwa kutegwa kubonwe akati kangawo aajisi butongo alimwi ayaayo aaboneka kuti ali kabotu alimwi aalangilwa kuti inga anamatila mwida akutalika kukomena. Kusika mubuzuba bwatatu, kanji-kanji mayi obilo naa otatwe aaswaanganizyidwe abwaalumi aali kabotu alalonzyegwa akubikkwa mwida lyamukaintu kutegwa ambweni oonse naa obilo naa lyomwe ape kumita. Kuti lyomwe naa kwiinda waawo anamatila mwida, mukaintu ulamita, alimwi kulangilwa kuti uyakutumbuka kwainda ciindi.

Ino ncinzi cicitwa kumadowalowa aatalonzyegwa kuya mwida lyamukaintu, kubikkilizya ayaayo atakali  kulibonya kabotu? Ikuti tanaayobolwa kabotu, madowalowa aayo inga anyonyooka. Pele kaatananyonyooka, madowalowa aayo aacaala alakonzya kubikkwa mufiliji mumusamu uutegwa liquid nitrogen. Nkaambo nzi? Ikuti nzila ya IVF tiiyazwidilila ciindi cakusaanguna, madowalowa aayo aayobolwa alakonzya kubelesyegwa ciindi cimbi amuulo uuli ansi kapati. Nokuba boobo, eeci ciletela twaambo tumbi tujatikizya manjezeezya. Mbubwenya mbuli banabukwetene ibakabuzya mubuzyo uuli kumatalikilo aacibalo eeci, banji balaalilwa kusala cakucita amadowalowa aayobwedwe mufiliji. Ambweni tabayandi kuba abana bambi. Ciimo cabazyali naa kubula mali kulakonzya kupa kuti bataabelesyi madowalowa aayo aaceede. Ambweni bayoowa ntenda ziboola akaambo kakumita ziindi zinji. * Alimwi lufwu, kukwata naa kukwatwa kumbi kulakonzya kuleta buyumuyumu. Kuli twaambo tunji tujatikizyidwe, nkakaambo kaako banabukwetene bamwi basala buyo kuzumanana kubbadela mali kutegwa kababayobweda madowalowa aayo.

Mu 2008, syaazibwene mulwiiyo lwansalalila wakalemba mumuteende uutegwa The New York Times kuti balwazi banji bakapenga kapati kusala cakucita kujatikizya madowalowa aabo aambi. Cibalo cakaamba kuti: “Madowalowa aataleli ku 400,000 alabikkwa mufiliji muzibbadela mucisi coonse, mpoonya abuzuba amwi alayungizyigwa . . . Madowalowa alakonzya kukkala kwamyaka minji kuti ayobolwa kabotu mufiliji, pele taali oonse aapona ciindi naagwisyigwa mubusena butontola.” Kaambo aaka kapa Banakristo bamwi kukkala aansi akuyeeya. Nkaambo nzi?

Banabukwetene Banakristo ibajatikizyidwe atwaambo tuboola akaambo kakubelesya nzila ya IVF balakonzya kulanga-langa cicitika mubukkale bwiindene bwabusilisi kucibbadela. Munakristo ulakonzya kusala cakucita kujatikizya muyandwa uuciswa kapati alimwi ambweni inga kaponena mumuncini, mbuli muncini uugwasya kuyoya. Banakristo bakasimpe balakaka busilisi butalemeki buumi; kweelana alugwalo lwa Kulonga 20:13 alwa Intembauzyo 36:9, balabulemeka  buumi. Sinsimuka! ya Cingisi yamu May 8, 1974, yakaamba kuti: “Akaambo kakuti balemeka mulawo wa Leza wakuti buumi bulisetekene, manjezeezya aabo alimwi akumvwida milawo yamfwulumende, aabo bayanda kweendelanya buumi bwabo anjiisyo zyamu Bbaibbele tabakonzyi kuzumina kujaya mulwazi acaali,” akaambo kakuti kunyina bulangizi bwakupona. Mubukkale bumwi, kubelesya nzila zimwi zyabusilisi zisumpukide mbuli muncini uugwasya kuyoya, nenzila ilikke iikonzya kugwasya mulwazi kuzumanana kupona. Banamukwasyi beelede kusala kuzumanana naa kuleka kubelesya nzila yakugwasyilizya buumi kwiinda mukubelesya muncini uuli boobo.

Masimpe, kucita boobo taceelene abukkale bwabanabukwetene ibakabelesya nzila ya IVF akuyobola dowalowa. Pele nzila yomwe iikonzya kubagwasya nkugwisya dowalowa ilili mufilifi imuli nitrogen, akulilekela kuti lisungunuke. Kuti lyagwisyigwa mubusena butontola, dowalowa lilakonzya kunyongana cakuti talikonzyi kubelesyegwa. Banabukwetene beelede kulisalila naa balakonzya kucizumizya eeco.—Gal. 6:7.

Akaambo kakuti banabukwetene bakazumina kubelesya nzila ya IVF kumita kabayanda kuba amwana, balakonzya kusala kubbadelela dowalowa akaambo kakuliyobola mufiliji naa balakonzya kusala kuyakulibelesya kumbele kutegwa bakabe amwana. Nokuba boobo, banabukwetene ibamwi balakonzya kusala kuti baleke kulibbadelela dowalowa lili mufiliji akulibona kuti likonzya buyo kubelesyegwa kwiinda mukubelesya nzila zyakucibbadela. Banakristo ibali mubukkale oobo beelede kucita ncaamba Leza kubelesya manjezeezya aabo aayiisyidwe njiisyo zyamu Bbaibbele. Ncobayanda nkuba amanjezeezya aasalala, kumwi kabatanyonganyi manjezeezya aabamwi.—1 Ti. 1:19.

Syaazibwene mulwiiyo lwakuzyala wakajana kuti banabukwetene banji “bakalinyongene akupenga akaambo kakuyeeya cakusala kucita kujatikizya madowalowa aabo aali [mufiliji].” Kumamanino wakaamba kuti: “Kubanabukwetene banji, kuboneka kuti tabasali kubotu pe.”

Cilasalala kuti Banakristo bakasimpe ibayeeya kubelesya nzila ya IVF beelede kulanga-langa makani mapati aakonzya kuboola akaambo kakubelesya nzila eeyi. Bbaibbele lyaamba kuti: “Muntu uucenjede, abona mapenzi, ulayuba, pele bataiyide balaindilila aboobo balapenga.”—Tus. 22:3.

Bantu bobilo batakwetene mumulawo ibayanda kukwatana mumulawo ibaiya Bbaibbele bayanda kubbapatizyigwa, pele tabakonzyi kulembya cikwati cabo akaambo kakuti musankwa tazumizyidwe amulawo kukkala mucisi. Mfwulumende taizumizyi muzwakule uutazumizyidwe amulawo kukwata mucisi. Sena beelede kusaina Cipepa Caamba zya Kusyomeka (Declaration Pledging Faithfulness) bamana babbapatizyigwe?

▪ Eeci cilibonya mbuli kuti inga cagwasya, pele taili nzila yamu Magwalo yakumana penzi lyabo. Kutegwa tumvwisye kabotu, atusaangune kulanga-langa mulimo wa Cipepa Caamba zya Kusyomeka, kaambo nceciliko, mbocikonzya kubelesyegwa alimwi akubusena nkocikonzya kubeleka.

Cipepa eeci cilasainwa kumbele lya bakamboni abantu bobilo ibakasyigwa kukwatana akaambo kakaambo ikaambwa mumincali iitobela. Mucipepa eeci balakonka kuti banoosyomeka kuli umwi amweenzinyina akuyakukwatana mumulawo kuti naa eeco cakonzyeka. Mbungano inga yababona kuti balembya kuli Leza akubantu kuti banoosyomeka kuli umwi amweenzinyina kutegwa cikwati cabo cibonwe kuti cakazumizyigwa amfwulumende.

Nkaambo nzi alimwi ndilili Cipepa Caamba zya Kusyomeka noceelede kubelesyegwa? Jehova nguwakatalisya cikwati alimwi ulacilemeka kapati. Mwanaakwe wakaamba kuti: “Leza ncaakaswaanganya kutabi muntu uucaandaanya.” (Mt. 19:5, 6; Matl. 2:22-24) Alimwi  wakayungizya kuti: “Kufwumbwa uuleka mukaintu wakwe iwatacita bwaamu, amane wakwata umbi, wacita bumambe.” (Mt. 19:9) Aboobo, “bwaamu,” nkakaambo kakulekana kalikke kamu Magwalo ikakonzya kupa kuti cikwati cimane. Mucikozyanyo, kuti mwaalumi woona amukaintu ngwatakwetenelimwi, mukaintu wakwe uunyina mulandu ulakonzya kusala kulekana anguwe naa pe. Kuti wamuleka mulumi, nkokuti ulaangulukide kukwatwa kumbi.

Nokuba boobo, mumasi amwi, kwaambisya kaindi, cikombelo icakajisi nguzu kapati tiicakali kukazumina kaambo kamu Bbaibbele aaka ikatakatazyi kumvwa. Muciindi caboobo, cakali kuyiisya kuti bantu tabakonzyi kulekana akaambo kalikoonse. Aboobo, mumasena amwi mwalo cikombelo mocakajisi nguzu kapati, milawo yacisi taijisi bubambe bwakulekana noliba leelyo nokwakali kaambo Jesu nkaakaamba. Mumasi amwi, kulekana kulazumizyigwa, pele izyeelede kucitwa zilatola ciindi cilamfwu, zilakatazya alimwi ziyanda kucita zyintu zinji. Cilakonzya kutola myaka minji kapati kulekana. Cili mbuli kuti cikombelo naa mfwulumende ‘isinkilila’ ncaakaamba Leza.—Mil. 11:17.

Mucikozyanyo, ndiza banabukwetene bakkala mucisi nkocitakonzyeki naa nkocikatazya kapati kulekana, ambweni kutola myaka minji kuti kuzumizyigwe. Kuti basolekesya kumana cikwati cabo cakaindi camumulawo alimwi baleelela kukwatana kweelana a Leza, balakonzya kusaina Cipepa Caamba zya Kusyomeka. Kubazumizya kusaina cipepa Caamba zya Kusyomeka mbubambe bwalubomba bwambungano ya Bunakristo muzisi zili boobo. Nokuba boobo, bubambe oobu tabweelede kubelesyegwa mumasi manji mwalo kulekana mokuzumizyigwa, nokuba kuti nzila iyeelede kucitwa iladula kapati naa kukatazya.

Akaambo kakutaciteelelesya Cipepa Caamba zya Kusyomeka, bamwi ibakkala mumasena mocikonzyeka kulekana babuzya kuti naa balakonzya kusaina cipepa cili boobo muciindi cakunjila mubuyumuyumu.

Kweelana akaambo ikabandikwa mumubuzyo iwabuzyigwa, mwaalumi amukaintu ibakkala antoomwe kabatakwetene mumulawo bayanda kukwatana. Aumwi ulaangulukide kweelana a Magwalo; alimwi taangidwe kumuntu ngwaakakwetenelimwi kaindi. Pele mwaalumi tali sicisi kweelana amulawo, alimwi mfwulumende taizumizyi cikwati camuzwakule uutazumizyidwe amulawo. (Mumasi manji mfwulumende zilazumizya cikwati nokuba kuti omwe naa boonse bobilo kabatajisi mapepa aabazumizya kukkala mucisi.) Kweelana akaambo kabandikwa, cisi cilijisi bubambe bwakulekana. Aboobo, kusaina Cipepa Caamba Kusyomeka tacili cakulisalila. Takuli kuti boonse bobilo bayanda kulekana pele tabazumizyigwi kulekana akaambo kamulawo wamfwulumende. Boonse bobilo balaangulukide kukwatana. Aboobo, mbwaanga mwaalumi tazumizyidwe amulawo kukkala mucisi, mbuti mbobakonzya kukwatana? Balakonzya kuunka kucisi cimbi kwalo mulawo wakukkala mucisi nkoutakonzyi kubasinkilila. Kunze lyaboobo, ambweni cilakonzyeka kuti bakwatane mucisi mobakkala lino kuti mwaalumi watola ntaamu kutegwa atobele milawo iimuzumizya kukkala mucisi.

Inzya, bantu aaba bobilo balakonzya kweendelanya buumi bwabo azyeelelo zya Leza alimwi amulawo wa Kaisara. (Mk. 12:17; Lom. 13:1) Kuti bacita oobo, bayakweelela kubbapatizyigwa.—Heb. 13:4.

[Bupanduluzi buyungizidwe]

[Majwi aakwelelezya sikubala aali apeeji 14]

Banakristo ibali mubukkale oobo beelede kucita ncaamba Leza kubelesya manjezeezya aabo aayiisyidwe njiisyo zyamu Bbaibbele

[Kabbokesi kali apeeji 15]

AZIMWI NZILA ZYA IVF

Kubelesya IVF kwapa kuti kutalisyigwe azimwi nzila zyalo cakutadooneka ziteendelani amizeezo ya Leza kweelana ambokutondezyedwe mu Magwalo. Mucikozyano, mayi aamukaintu alakonzya kuswaanganizyigwa abwaalumi bwamusankwa uutali mulumaakwe. Kumane ulakonzya kuzumizya madowalowa aapangwa kuti abikkwe mwida lyakwe. (Zimwi ziindi bamaalumi abamakaintu boonana mulicabo balaibelesya nzila eeyi.) Alimwi bwaalumi bwamulumi bulakonzya kuswaanganizyigwa amayi aazwa kumukaintu uutali wakwe. Kumane mukaintu wakwe ulakonzya kuzumina kuti dowalowa eelyo libikkwe mwida lyakwe.

Munzila imwi mabala aakuti “embryo adoption,” dowalowa ilyabikkwa mwida lyamukaintu lilapangwa amayi aamukaintu uumbi alimwi abwaalumi bwamusankwa uutali mulumaakwe. Aimbi nzila njakuti, mayi abwaalumi bwabanabukwetene zilaswaanganizyigwa kubelesya nzila iitegwa IVF. Kumane dowalowa ilyapangwa lilabikkwa mwida lyamukaintu uumbi walo uuyakubanyamwida mwana ooyu kusikila akatumbukwe. *

Nzila eezyi zyakuzyala tazyeelede kubelesyegwa ababelesi ba Leza nkaambo batobela malailile aakwe aakuti: “Utalaliki mukamweenzinyoko kukulisofwaazya anguwe.” (Lev. 18:20, 29; Tus. 6:29) Ciindi kuswaanganizyigwa nokujatikizya mayi naa bwaalumi (naa zyoonse zyobilo) bwamuntu uumbi ngobatakwetenelimwi, nkokuti cilaba ceeco Bbaibbele ncolyaamba kuti por·neiʹa, ibumambe. Kucita boobo, nkutazibelesya kabotu zizo zibelesyegwa mukoonana.—Mt. 5:32; 1 Ko. 5:11; 6:9, 18; Heb. 13:4.

[Bupanduluzi buyungizidwe]