Ngazi Yamulindizi Ngubauba Nkaambo nzi Ncoyakatalisyigwa?

KWAMYAKA minji, bamaalumi abamakaintu nyika yoonse bazumanana kulumba alimwi akugwasyigwa amakani aamba zyamu Bbaibbele aamwaigwa mu Ngazi Yamulindizi. Mu July 2011, magazini yakwiiya yakusaanguna ngubauba yakatalika kumwaigwa mu Cingisi. Magazini eeyo yakapandulula kuti: “Magazini eeyi mpya ilasolwa kwamwaka omwe, alimwi ikuti yagwasya, iyakuzumanana kusimbwa.”

Aboobo lino cilakkomanisya kwaambilizya kuti twasala kuti izumanane kusimbwa. Kuyungizya waawo, mukuyakwaciindi magazini ngubauba iyakutalika kumwaigwa amumwaambo waci French, Portuguese, alimwi aci Spanish.

KAAMBO NCOBAIKKOMANINA

Nobakamana kutambula magazini ngubauba, bamwi ku South Pacific bakaamba kuti: “Bakwesu lino balamvwisya cini caambwa mu Ngazi Yamulindizi.” Alumwi lugwalo lwakaamba kuti: “Ciindi icakali kubelesyegwa kujana mabala akupandulula ncaamba, lino cibelesyegwa kumvwisya magwalo aatondezyedwe alimwi ambwaaswaangene aciiyo.”

Muntu umwi iwakamanizya lwiiyo lwakukkoleji ku United States wakaamba kuti: “Kwamyaka iili 18 ndakali kwaambaula akulemba kubelesya mwaambo wabaabo bajisi lwiiyo lwaatala. Ndakaba acilengwa cakwaambaula akuyeeya munzila iikatazya. Ndakabona kuti ndakeelede kucinca kapati mbondakali kuyeeya alimwi akwaambaula.” Lino kali mukambausi musungu wakalemba kuti: “Ngazi Yamulindizi ngubauba yagwasya kapati. Mwaambo uubelesyegwa wandipa cikozyanyo cibotu mbondikonzya kwaamba zyintu munzila ngubauba.”

 Kujatikizya Ngazi Yamulindizi ngubauba, mucizyi umwi ku England iwakabbapatizyigwa mu 1972, wakalemba kuti: “Nindakabala magazini yakusaanguna, ndakalimvwa mbuli kuti Jehova wakalikkede andime janza lyakwe kalindijatilide agwezyo mpoonya katubala antoomwe. Cakali mbuli usyi uubalila mwanaakwe cibalo ciindi cakoona.”

Mucizyi umwi waku Bbeteli mucisi ca United States iwakabbapatizyigwa myaka iili 40 yainda wakaamba kuti magazini ngubauba zimwi ziindi yamugwasya kumvwisya zyintu munzila mpya. Mucikozyanyo, kabbokesi kakuti “Some Expressions Explained” (Mabala Aamwi Apandululwa) mumagazini ya September 15, 2011, kakapandulula mabala aakuti ‘nkamu mpati yabakamboni’ mulugwalo lwa Bahebulayo 12:1 amajwi aakuti: “Bakali banji cakuti tiicakali kukonzyeka kubabala.” Mucizyi wakaamba kuti: “Eeci candigwasya kumvwisya kapango aaka.” Kujatikizya muswaangano wansondo ansondo, wakayungizya kuti: “Nokuba kuti bwiinguzi bwamwana bwazwa mumagazini ngubauba, majwi taayelene aali mu Ngazi Yamulindizi yakwiiya yalyoonse banji njobajisi. Aboobo bwiinguzi bwamwana bumvwika kabotu kubaswiilizi.”

Aumwi mucizyi waa Bbeteli wakalemba kuti: “Inga ndilangila kapati kumvwa bwiinguzi bwabana mumbungano. Ngazi Yamulindizi ngubauba yabagwasya kwaamba calusyomo. Majwi aabo alandiyumya-yumya.”

Mucizyi iwakabbapatizyigwa mu 1984 wakaamba majwi aakulumba akaambo kamagazini ngubauba kuti: “Ndilimvwa kuti yakalembelwa  ndime. Ilandigwasya kumvwisya ncondibala. Lino ndilakonzya kwiingula mu Ciiyo ca Ngazi Yamulindizi.”

CIBELESYO BAZYALI NCOBALUMBA KAPATI

Banyina mwana uujisi myaka yakuzyalwa iili ciloba bakaamba kuti: “Kupandulula mizila minji ncoyaamba ciindi notwakali kulibambila Ciiyo ca Ngazi Yamulindizi cakali kutola ciindi alimwi cakali kulemya.” Ino magazini ngubauba yabagwasya buti? Bakalemba kuti: “Cilandikkomanisya kuti ulatola lubazu mukubala mincali alimwi akumvwisya cini ncoyaamba. Mbwaanga mabala taakatazyi alimwi mizila mifwaafwi, taakwe ncayoowa. Watalika kulibambila bwiinguzi kumiswaangano kakunyina kumugwasya, alimwi ulabikkila kapati maano kumagazini muciiyo coonse.”

Banyina mwana musimbi uujisi myaka yakuzyalwa iili fwuka bakalemba kuti: “Kumatalikilo twakali kumugwasya kulibambila bwiinguzi. Pele lino, ulalibambila alikke. Kanji-kanji tatusowi ciindi kupandulula makani kuti aamvwisye. Akaambo kakuti ulamvwisya, lino ulimvwa kwaanguluka kutola lubazu mu Ciiyo ca Ngazi Yamulindizi.”

INO BANA BALIMVWA BUTI?

Bana banji balimvwa kuti Ngazi Yamulindizi ngubauba yakabambilwa mbabo. Rabecca mwana uujisi myaka yakuzyalwa iili 12 wakalomba kuti: “Ndalomba kaka kuti magazini mpya ngubauba izumanane!” Wakayungizya kuti: “Ndilaciyanda cibeela ca ‘Mabala Aamwi Apandululwa’ mbomucilemba. Ncuubauba kapati kubana.”

Nicolette mwana musimbi uujisi myaka yakuzyalwa iili ciloba awalo mbwalimvwa oobo, wakaamba kuti: “Ngazi Yamulindizi yakali kundiyumina kumvwa. Lino ndilacikonzya kupa bwiinguzi ziindi zinji kakunyina kugwasyigwa.” Emma mwana musimbi uujisi myaka yakuzyalwa iili fwuka wakalemba kuti: “Yandigwasya kapati alimwi amusyoonto wangu musankwa uujisi myaka yakuzyalwa iili cisambomwe. Tulakonzya kuzimvwisya kabotu zyintu zinji. Ndalumba.”

Cilasalala kuti banji bali mukugwasyigwa amagazini ya Ngazi Yamulindizi iibelesya mabala aatakatazyi kumvwa. Ilimukugwasya kapati alimwi ilazumanana kusimbwa antoomwe amagazini yalyoonse yalo iyagwasya kapati kuzwa mu 1879.

[Majwi aakwelelezya sikubala aali apeeji 30]

“Ciindi icakali kubelesyegwa kujana mabala akupandulula ncaamba, lino cibelesyegwa kumvwisya magwalo aatondezyedwe alimwi ambwaaswaangene aciiyo”

[Majwi aakwelelezya sikubala aali apeeji 31]

“Cilandikkomanisya kuti ulatola lubazu mukubala mincali alimwi akumvwisya cini ncoyaamba”