Amube Basicamba Jehova Ulaandinywe!

“Koyuma akuba mukozu. . . . Jehova Leza wako uli ayebo.”—JOS. 1:9.

INO INGA MWAINGULA BUTI?

Ncinzi Joshua ncaakeelede kucita kutegwa azumanane kuba alusyomo abusicamba?

Nzikozyanyo zili zyabusicamba izyamukkomanisya?

Ncikozyanyo cani icitondezya lusyomo abusicamba icikonzya kumugwasya kutegwa mucikonzye kuucita mulimo wakukambauka?

1, 2. (a) Mbube nzi ibuyakutugwasya kuliyumya mumasunko? (b) Ino inga mwalupandulula buti lusyomo? Amupe cikozyanyo.

MULIMO wa Jehova ulatuletela lukkomano. Nokuba boobo, tulajana buyumuyumu busikila bantu boonse, alimwi tulakonzya “kupenga akaambo kabululami.” (1 Pe. 3:14; 5:8, 9; 1 Ko. 10:13) Kutegwa twaazunde masunko aali boobo, tuyandika lusyomo abusicamba.

² Ino lusyomo ninzi? Mwaapostolo Paulo wakalemba kuti: “Lusyomo mbulangizi businizyidwe bwaceeco cilangilwa, mbumboni busalede bwazyintu zini-zini zitanabonwa.” (Heb. 11:1) Busanduluzi bumwi bwa Bbaibbele bwaamba kuti: “Lusyomo ncisinizyo cazyintu nzyotulangila. Lusyomo nkuba masimpe azyintu nzyotutakonzyi kubona.” Ikuti busena bwesu kabujisi mapepa aalusinizyo (title-deed), inga katujisi lusyomo lwakuti busena oobo mbubwesu ncobeni. Mbwaanga tulijisi lusyomo lwakuti Leza lyoonse ulazuzikizya jwi lyakwe, cili mbuli kuti tujisi cipepa calusinizyo iciyandika kapati. Lusyomo lwesu lutupa kuba masimpe kuti tuyakukubona kuzuzikizyigwa kwazisyomezyo zyamu Bbaibbele nzyotulangila, alimwi tuli masimpe azyintu zyamuuya nokuba kuti tatuziboni.

3, 4. (a) Ino busicamba ninzi? (b) Ninzila nzi imwi iikonzya kutugwasya kuyumya lusyomo abusicamba bwesu?

³ Busicamba bupandululwa kuti “nkuyuma mubukkale boonse, kumuuya, mumizeezo, alimwi amukulilemeka kutegwa twaambe alimwi akucita zyintu kakunyina kuyoowa nokuba kuti kuli buyumuyumu antenda.” Ikuti katuli basicamba, nkokuti tuli bayumu, tulazumanana, zimwi ziindi tulakakatila.—Mk. 6:49, 50; 2 Ti. 1:7.

⁴ Lusyomo abusicamba mbube bubotu kapati. Mbuti kuti katulimvwa kuti tuyandika lusyomo lunji alimwi tulimvwa kuti tatuli basicamba? Kuli bantu banji ibaambidwe mu Bbaibbele ibakapa zikozyanyo zibotu kapati mukutondezya bube oobu. Aboobo, nzila imwi iikonzya kutugwasya kuyumya lusyomo lwesu abusicamba nkulanga-langa zikozyanyo zyabantu aaba.

 JEHOVA WAKALI AA JOSHUA

5. Kutegwa Joshua azwidilile mumulimo wakwe, ncinzi ncaakali kuyandika kucita?

⁵ Atulange-lange zyakacitika myaanda yamyaka iili 35 yainda. Eeci cakali ciindi nokwakaindide myaka iili 40 kuzwa ciindi janza lyanguzu lya Jehova nolyakafwutula bana Israyeli kuzwa mubuzike kubana Egepita. Musinsimi Musa nguwakali kubasololela. Lino kajisi myaka yakuzyalwa iili 120, wakaide kubona Nyika Yakasyomezyegwa kali alamfwu kumane wakafwa atala lya Cilundu ca Nebo. Muntu iwakanjila mubusena bwakwe wakali Joshua, muntu “[iwa]kazwide muuya wabusongo.” (Dt. 34:1-9) Kwakaceede buyo asyoonto kuti bana Israyeli bakone nyika ya Kanana. Kutegwa Joshua azwidilile kali musololi wabo, wakali kuyandika busongo buzwa kuli Leza. Alimwi wakeelede kutondezya lusyomo muli Jehova akutondezya kuti wakali muyumu alimwi sicamba.—Dt. 31:22, 23.

6. (a) Ino lugwalo lwa Joshua 23:6 lukulwaizya kuba basicamba mukucita nzi? (b) Ino twiiya nzi kuzwa kumajwi aalembedwe mulugwalo lwa Milimo 4:18-20 alimwi a Milimo 5:29?

⁶ Busongo, busicamba, alimwi alusyomo ndwaakatondezya Joshua ciindi nobakali kulwana bana Kanana zyeelede kuti zyakabakulwaizya kapati bana Israyeli. Nokuba kuti bakali basongo munkondo, bana Israyeli alimwi bakeelede kuba basicamba kutegwa bacite nzyaakali kubaambila Joshua. Mumajwi aakwe aamamanino kalaafwaafwi akufwa Joshua wakaamba kuti: “Amuliyumye loko kuti mujatisye akucita zyoonse zilembedwe mubbuku lyamulao wa-Musa. Mutaleyi kuzwa kulinzizyo, nikuba kululyo nikuba kulumwensi.” (Jos. 23:6) Andiswe tuyandika busicamba kutegwa katumvwida Jehova ciindi coonse. Eeci cibikkilizya aciindi bantu buyo nibayanda kuti tucite zyintu ziimpene akuyanda kwa Leza. (Amubale Milimo 4:18-20; 5:29.) Ikuti twamusyoma Jehova cakumaninina akupaila kulinguwe, uyakutugwasya kubweza ntaamu eeyo cabusicamba.

MBOTUKONZYA KUZWIDILILA

7. Ncinzi cakali kuyandika kutegwa Joshua acite zyintu cabusicamba alimwi akuzwidilila?

⁷ Kutegwa tube abusicamba ibuyandika mukucita kuyanda kwa Leza, tweelede kwiiya akutobela ncolyaamba Jwi lyakwe. Eeco ncencico ncaakaambilwa kucita Joshua ciindi naakanjila mubusena bwa Musa, wakaambilwa kuti: “Koyuma akuba mukozu loko kuti mubambe kabotu mulao woonse Musa mulanda wangu ngwaakamulailila. . . . Eli ibbuku lyamulao talyeelede kutantamuka kumulomo wako, pe, uleelede kubika miyeeyo yako kulindilyo lyoonse buyo, isikati amasiku, kuti ubambe kabotu makani oonse aalembedwe mumo, nkaambo kucita obo nkokukonzya kubotya inzila yako akukuletela coolwe.” (Jos. 1:7, 8) Joshua wakalutobela lulayo oolo, kucita oobo kwakapa kuti ‘azwidilile.’ Ikuti twacita oobo andiswe, tuyakuba basicamba alimwi tuyakuzwidilila mumulimo wa Leza.

8. Ino lugwalo lwamwaka wa 2013 luzwa mulugwalo nzi, alimwi mbuti majwi aayo mbwaakonzya kumugwasya?

⁸ Kweelede kuti Joshua akamuyumya kapati majwi Jehova ngaakayungizya naakati: “Koyuma akuba mukozu. Utakankami nikuba kuyoowa, pe, nkaambo Jehova Leza wako uli ayebo koonse koonse nkoya.” (Jos. 1:9) Jehova uli aandiswe mazuba aano. Aboobo, “[t]utakankami nikuba kuyoowa, pe” nitujana masunko aali oonse. Majwi aakuti: “Koyuma akuba mukozu. . . . Jehova Leza wako uli ayebo” alakulwaizya  kapati. Nkakaambo kaako majwi aayo aajanika mulugwalo lwa Joshua 1:9 ncaakasalwa kuba lugwalo lwamwaka wa 2013. Majwi aayo ayakutuyumya ncobeni mumyezi iiboola mbubwenya mboziyakutugwasya zikozyanyo zimbi zyalusyomo abusicamba kwiinda mumajwi amilimo.

BAKABWEZA NTAAMU CABUSICAMBA

9. Muunzila nzi Rahabu mwaakatondezya lusyomo abusicamba?

⁹ Ciindi Joshua naakatuma basikutwela bobilo ku Kanana, Rahabu muvwuule wakabasisa, mpoonya basinkondo babo wakabatondezya nzila imbi. Akaambo kalusyomo abusicamba, walo alimwi abanamukwasyi wakwe bakafwutuka ciindi munzi wa Jeriko niwakanyonyoonwa abana Israyeli. (Heb. 11:30, 31; Jak. 2:25) Cakutadooneka, Rahabu wakaileka micito yakwe yakutalilemeka kutegwa akkomanisye Jehova. Bamwi ibakaba Banakristo lino bakatondezya lusyomo abusicamba alimwi bakacinca bukkale bwabo kutegwa bamukkomanisye Leza.

10. Muubukkale buli buti mwalo Rute mwaakasala kuba mukombi wakasimpe, alimwi ino wakalongezyegwa buti?

¹⁰ Joshua naakafwa, Rute muna Moabu cabusicamba wakabweza ntaamu akuba mukombi wakasimpe. Mbwaanga wakafwidwa mwaalumi iwakali muna Israyeli, kweelede kuti wakalizyi makani aamwi aamba zya Jehova. Banyinazyala ba Naomi ibakafwidwa, bakali kukkala mumunzi wa Moabu pele bakasalide kuti bapiluke kumunzi wabana Israyeli ku Betelehemu. Nibakali kupiluka, Naomi wakaambila Rute kuti apiluke kubantu bakwe, ooyu muna Moabu wakaamba kuti: “Utandisungilizyi kukusia nanka kuleka kukutobela . . . Bantu bako bayooba bantu bangu, a-Leza wako uyooba Leza wangu.” (Rut. 1:16) Rute wakacita kweelana ambwaakaamba. Mukuyakwaciindi, musankwa umwi wamukwasyi wa Naomi wakakwata Rute, akuzyala mwana musankwa iwakaba umwi wabamakaapanyina ba Davida a Jesu. Inzya, Jehova ulabalongezya aabo ibatondezya lusyomo alimwi abusicamba.—Rut. 2:12; 4:17-22; Mt. 1:1-6.

BUNJI BWABO BAKABIKKA BUUMI BWABO MUNTENDA

11. Mbuti Jehoyada alimwi a Jehoseba mbobakatondezya busicamba, alimwi mbubotu nzi ibwakajanwa?

¹¹ Lusyomo abusicamba bwesu bulayumizyigwa ciindi notubona Leza mbwaakabagwasya aabo ibakabikka ambele kuyanda kwakwe akugwasya bakombinyina kwiinda nzyobayanda. Mucikozyanyo, amubone ncaakacita Mupaizi Mupati Jehoyada amukaintu wakwe Jehoseba. Naakafwa Mwami Ahaziya, banyina ba Ataliya bakajaya bana boonse ibakali kuyakuba bami kuleka buyo Joasi akubweza cuuno cabwami. Jehoyada alimwi a Jehoseba bakabikka buumi bwabo muntenda kwiinda mukusisa mwana wa Ahaziya uutegwa Joasi kwamyaka iili cisambomwe. Mumwaka waciloba, Jehoyada wakabikka Joasi kuba mwami mpoonya akulailila kuti Ataliya ajaigwe. (2 Bam. 11:1-16) Nikwakainda ciindi Jehoyada wakamugwasya Mwami Joasi mumulimo wakubambulula tempele. Ciindi Jehoyada naakafwa kajisi myaka yakuzyalwa iili 130, wakazikkwa antoomwe abami “nkaambo wakacita bubotu mucisi ca-Israyeli akuli-Leza akuluzubo lwakwe.” (2 Mak. 24:15, 16) Kuyungizya waawo, busicamba bwa Jehoyada amukaintu wakwe bwakagwasya kutegwa mulongo wabami iwakali kuzwa kuli Davida kuzikusika kuli Mesiya ukwabililwe.

12. Nintaamu nzi yabusicamba njaakabweza Ebedi-meleki?

¹² Ebedi-meleki, muzibe wamuŋanda ya Mwami Zedekiya, wakabikka buumi bwakwe muntenda kutegwa afwutule Jeremiya. Mwami wakaabide Jeremiya mumaanza aabasilutwe bana Juda, ibakamubejelezya akumupa mulandu wakukulwaizya kuzangila mwami akumufwusila mumulindi iwakajisi ntimba kutegwa afwide mumo. (Jer. 38:4-6) Mbwaanga Jeremiya tiibakali kumuyanda, kwakali ntenda mpati mukusola kumufwutula, pele nokuba boobo, Ebedi-meleki wakamulomba Zedekiya kutegwa afwutule musinsimi. Zedekiya wakazumina kakunyina abubi buli boonse alimwi buya wakaambila baalumi bali 30 kutegwa bamusindikile Ebedi-meleki mukugwisya Jeremiya  mumulindi. Kwiinda mumusinsimi, Leza wakasyomezya Ebedi-meleki kuti uyakufwutuka ciindi cakunyonyoonwa kwa Jerusalemu abana Babuloni. (Jer. 39:15-18) Busicamba bwabunaleza bwakamuletela bulumbu.

13. Nintaamu nzi njobakabweza bana Hebrayo botatwe cabusicamba, alimwi mbuti mbotukonzya kugwasyigwa acakabacitikila?

¹³ Mumwaanda wamyaka waciloba B.C.E., babelesi ba Jehova botatwe bana Hebrayo bakalibonena caantangalala kuti Leza ulapa bulumbu kuli baabo ibatondezya lusyomo abusicamba. Mwami Nebukadinezara wakaita muswaangano wabapati-pati bamu Babuloni akubaambila kuti bakombe cikozyanyo cangolida. Kufwumbwa ooyo uutaciti oobo wakeelede kujaigwa kwiinda mukuwaalwa mubbibi lyamulilo uuvwilima. Cabulemu, bana Hebrayo botatwe bakaambila Nebukadinezara kuti: “Leza wesu ngotukomba ulijisi inguzu zyakutuvuna kuzwa kubbila lyamulilo wamabangabanga, uyootuvuna mumaanza aako, O mwami. Nekubaboobo na tacili boobo kuzibwe kulinduwe, O mwami, kuti twakaka kukomba baleza bako akukotamina cikozyano cangolida ncowakabika.” (Dan. 3: 16-18) Kufwutulwa kugambya kwabana Hebrayo botatwe aaba kulaambidwe kabotu-kabotu mulugwalo lwa Daniele 3:19-30. Nokuba kuti tatulangilwi kuwaalwa mubbibi lyamulilo uuvwilima, tulaswaanganya masunko aasunka kusyomeka kwesu alimwi tulakonzya kuba masimpe kuti Leza uyakutulongezya akaambo kalusyomo abusicamba bwesu.

14. Kweelana alugwalo lwa Daniele caandaano 6, mbuti Daniele mbwaakacita zyintu cabusicamba, alimwi ncinzi cakacitika?

¹⁴ Daniele wakatondezya lusyomo abusicamba ciindi basinkondonyina nobakacikonzya koongelezya Mwami Dariyo kutegwa abikke mulawo wakuti: “Kufumbwa muntu uukumbila lukumbilo kuli leza naba omwe nekuba kumuntu naba omwe, cita kulinduwe olike, mumazuba aali makumi otatwe, uleelede kuwaalwa mubulyango bwabalavu.” Pele Daniele mbwaakazyibila buyo kuti mulawo wabikkwa, “wakaya kuŋanda yakwe, impulunguzyo zyakaanda kakujulu nkozyakajulwidwe cakulanga ku-Jerusalemu, nkabela kotatwe mubuzuba wakafugama amazwi aakwe, wakomba akulumba Leza, mbubonya mbwaakali kucita lyoonse mumazuba aakamana.” (Dan. 6: 6-10) Akaambo kakucita oobo, Daniele sicamba wakawaalwa mumulindi wabasyuumbwa—pele Jehova wakamuvwuna.—Dan. 6:16-23.

15. (a) Ncikozyanyo nzi Akula a Priska ncobakapa mumakani aalusyomo abusicamba? (b) Ino majwi aa Jesu aalembedwe mulugwalo lwa Johane 13:34 apandulula nzi, alimwi mbuti Banakristo banji mbobalutondezya luyando luli boobo?

¹⁵ Mubukkale butaambidwe mu Bbaibbele, Akula a Priska “bakalibambilide kukosolwa nsingo” akaambo kabuumi bwa Paulo. (Mil. 18:2; Lom. 16:3, 4) Bakacita kweelana amajwi aa Jesu, aakuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo.”  (Joh. 13:34) Mulawo wa Musa wakali kwaamba kuti, muntu weelede kuyanda simukobonyina mbubwenya mbwaliyanda. (Lev. 19:18) Pele mulawo wa Jesu wakali “mupya” nkaambo wakali kupandulula luyando ilukonzya kupa kuti muntu umwi afwe akaambo kabamwi, mbubwenya mbwaakacita walo. Banakristo banji batondezya luyando cabusicamba kwiinda ‘mukulibambila kukosolwa nsingo zyabo’ kutegwa bakwabilile bakombinyina kubantu ibayanda kubapenzya naa kubajaya.—Amubale 1 Johane 3:16.

16, 17. Masunko nzi aalusyomo ngobakajana basikutobela Kristo bakusaanguna, alimwi mbuti Banakristo bamazuba aano mbobatobela cikozyanyo cabo?

¹⁶ Mbubwenya mbuli Jesu, Banakristo bakusaanguna cabusicamba bakali kukomba buyo Jehova alikke. (Mt. 4:8-10) Bakali kukaka kuumpa tununkilizyo kutegwa bape bulemu kumweendelezi muna Roma. (Amubone cifwanikiso.) Mulembi umwi uutegwa Daniel P. Mannix, mubbuku lyakwe litegwa Those About to Die (Aabo Ibalangilwa Kujaigwa) wakalemba kuti: “Mbasyoonto kapati Banakristo ibakacita oobo, nokuba kuti cipaililo icakajisi mulilo cakali kubikkwa mubusena bukwabilidwe kutegwa cibaubaubile. Mwaange uuli woonse ncaakeelede kucita buyo nkufwusa tununkilizyo tusyoonto amulilo mpoonya wakali kupegwa cipepa citondezya kuti wapa cipaizyo alimwi wakali kwaangununwa. Mwaange uuli woonse wakali kupandulwidwa kabotu-kabotu kuti, kucita boobo tiikwakali kukomba mweendelezi pe; kucita oobo cakali kutondezya buyo kuti muntu ooyo wazumina kuti kuli muntu mupati weendelezya mu Roma. Nokuba kuti cakali boobo, mbasyoonto kapati Banakristo ibakazumina kucita oobo kutegwa baangununwe.”

¹⁷ Banakristo bamazuba aano ibakaangidwe muntolongo zyaba Nazi, bakali kupegwa zyoolwe cakwiinduluka-induluka kutegwa basale akati kalufwu akumukaka Jehova. Basyoonto bakamukaka Jehova. Ciindi nokwakali kujayana mucisi ca Rwanda akati kaba Tutsi aba Hutu, Bakamboni ba Tutsi aba Hutu bakali kukwabililana. Masunko aali boobo ayandika busicamba alusyomo.

MUTALUBI KUTI JEHOVA ULAANDISWE!

18, 19. Nzikonzyanyo nzi zyamu Bbaibbele zyalusyomo abusicamba izikonzya kutugwasya kutegwa tuzumanane mumulimo wesu wakukambauka?

¹⁸ Tulijisi coolwe cipati cakutola lubazu mumulimo mupati uutanapedwe kubabelesi ba Leza baanyika—kwaambilizya mulumbe wa Bwami akugwasya bantu kuba basikwiiya. (Mt. 24:14; 28:19, 20) Eelo kaka tulalumba kapati kucikozyanyo ca Jesu iciinda kubota! Jesu wakali “kuyaabweenda muminzi amutunzi kakambauka akwaambilizya makani mabotu aa Bwami bwa Leza.” (Lk. 8:1) Mbubwenya mbuli nguwe, tuyandika lusyomo abusicamba kutegwa tucikonzye kukambauka mulumbe wa Bwami. Kwiinda mulugwasyo lwa Leza, tulakonzya kuba mbuli Nowa sicamba, “mukambausi wabululami” uucenjede iwakali kukambaukila ‘nyika iilya yabantu ibakali kusampaula Leza,’ nyika iyakali kulangilwa kunyonyoonwa azambangulwe.—2 Pe. 2:4, 5.

¹⁹ Mupailo ulagwasya kutegwa tucikonzye kuucita mulimo wakukambauka. Ciindi basikutobela Kristo bamwi ibakali kupenzyegwa nobakapaila kutegwa bacikonzye ‘kukanana jwi lya Leza cabusicamba,’ kulomba kwabo kwakaingulwa. (Amubale Milimo 4:29-31.) Ikuti naa cilamuyumina kukambauka kuŋanda aŋanda, Jehova uyakuyiingula mipailo yanu njomupaila kulomba lusyomo luyumu abusicamba.—Amubale Intembauzyo 66:19, 20. *

20. Ndugwasyo nzi ndotujisi swebo tobabelesi ba Jehova?

²⁰ Nciyumu kubelekela Leza akaambo kamasunko aatusikila munyika iino mbyaabi iikatazya. Nokuba boobo, tatuli tolikke pe. Leza ulaandiswe. Awalo Mwanaakwe walo uuli ngo Mutwe wambungano ulaandiswe. Alimwi tulijisi Bakambonima ba Jehova ibainda ku 7,000,000 nyika yoonse mboizulwa. Antoomwe ambabo, toonse atuzumanane kutondezya lusyomo akwaambilizya makani mabotu kumwi katuyeeya lugwalo lwamwaka wa 2013 ilwaamba kuti: “Koyuma akuba mukozu. . . . Jehova Leza wako uli ayebo.”—Jos. 1:9.

[Bupanduluzi buyungizidwe]

[Mibuzyo yaciiyo]

[Majwi aakwelelezya sikubala aali apeeji 8]

Lugwalo lwesu lwamwaka wa 2013: “Koyuma akuba mukozu. . . . Jehova Leza wako uli ayebo.”—Joshua 1:9

[Cifwanikiso icili apeeji 10]

Ku Banakristo bakusaanguna, kukaka kuba Munakristo tiiyakali njenzila yakufwutukila pe