Amukkale Mukkuti Mwakwabilila Jehova

‘Eelyo Jehova uyoolwisya masi aayo mbubonya mbwalwana mubuzuba bwalumamba.’—ZEK. 14:3.

SENA INGA MWAPANDULULA?

Ino ‘kwaanduka kwacilundu cazisamu zyamaolifa’ kwiiminina nzi?

Ino ‘kkuti lipati kapati’ liiminina nzi, alimwi mbuti mbotukonzya kukkala mulindilyo?

Ino ‘maanzi aabuumi’ aiminina nzi, alimwi mbaani bagwasyigwa angawo?

1, 2. Ino ninkondo nzi iili afwaafwi, alimwi ncinzi babelesi ba Leza ncobatakayandiki kucita munkondo eeyi?

MU October 30, 1938, mamiliyoni aabantu mucisi ca United States bakali kuswiilila cisobano icakadumide kapati awailesi. Mucisobano eeci, basicisobano ibakali kusobana cibeela cabasimubweza twaambo bakaambilizya kuti zilenge izyakali kuzwa kupulaneti ya Mars zyakali kulwana akunyonyoona nyika. Nokuba kuti cakalaambilizyidwe kuti pulogilamu eeyi yaawailesi yakali cisobano buyo, baswiilizi banji bakali kuyeeya kuti nkondo eeyi yakali yancobeni alimwi bakayoowa. Mane buya bamwi bakali kubweza ntaamu zimwi kutegwa balikwabilile kuli bamuzwakule aaba bakuyeeyela.

² Mazuba aano nkondo iini ilaafwaafwi. Nokuba boobo, bantu banji tabalibambilide pe. Nkondo eeyi yakasinsimwa ikutali mubbuku lyasayaansi, pele mu Jwi lya Leza lyakasololelwa amuuya, Bbaibbele. Ninkondo ya Amagedoni—nkondo ya Leza yakulwana bweende bwazyintu oobu bubyaabi. (Ciy. 16:14-16) Munkondo eeyi, babelesi ba Leza baanyika taakwe nobayakuyandika kulikwabilila kuli bamuzwakule bazwa kupulaneti iimbi. Nokuba boobo, bayakugambwa azyintu ziyakucitika alimwi akutondezyegwa kwanguzu zya Leza ziyoosya.

3. Mbusinsimi nzi mbotutiilange-lange, alimwi nkaambo nzi ncobuyandika kulindiswe?

³ Businsimi bwamu Bbaibbele mulugwalo lwa Zekariya caandaano 14, bulatwaambila makani aajatikizya nkondo ya Amagedoni. Nokuba kuti bwakalembwa myaka iili 2,500 yainda, businsimi oobu bulabujatikizya buumi bwesu. (Lom. 15:4) Makani manji aambidwe mubusinsimi oobu ngabukkale bubajatikizya bantu ba Leza kuzwa mu 1914, ciindi Bwami Bwabu Mesiya nobwakatalika kulela  kujulu alimwi azyintu ziyakucitika ino-ino. Businsimi butwaambila kujatikizya ‘kkuti lipati kapati’ alimwi akukunka ‘kwamaanzi aabuumi.’ (Zek. 14:4, 8) Ikkuti eeli lijisi mulimo uuyandika kapati mukukwabilila bakombi ba Jehova. Kuti twaamvwisya ncaapandulula maanzi aabuumi kulindiswe, tuyakuzyiba ncaayandika kwaanywa alimwi tuyakuyanda kwaanywa. Aboobo, ikuti twabikkila maano kubusinsimi oobu, tuyakugwasyigwa.—2 Pe. 1:19, 20.

‘BUZUBA BWAJEHOVA’ BWATALIKA

4. (a) Ndilili ‘buzuba bwa Jehova nobwakatalika? (b) Ncinzi bakombi ba Jehova ncobakali kukambauka myaka minji kaitanasika 1914, alimwi ino basololi bamunyika bakacita nzi?

⁴ Caandaano 14 cabbuku lya Zekariya cilatalika akwaamba makani aajatikizya ‘buzuba bwa Jehova.’ (Amubale Zekariya 14:1, 2.) Ino buzuba oobu ninzi? “[M]buzuba bwa Mwami,” ibwakatalika ciindi “Ibwami bwanyika” nobwakaba “Bwami bwa Mwami wesu abwa Kilisito wakwe.” (Ciy. 1:10; 11:15) Buzuba oobo bwakatalika mu 1914, Bwami Bwabu Mesiya nobwakatalika kulela kujulu. Kwamyaka minji kaitanasika 1914, bakombi ba Jehova bakali kukambauka kuti mamanino “[aa]ciindi cibikkidwe cabamasi” akali kuyakusika mumwaka ngoonya ooyo alimwi akuti kuzwa ciindi eeco kwakali kuyakuba mapenzi aatanabwenwe munyika. (Lk. 21:24) Ino zisi zyakacita nzi? Muciindi cakubikkila maano kukucenjezya ooku, basitwaambo twacisi alimwi abasololi bazikombelo bakali kufwubaazya alimwi akupenzya bananike aaba ibakali kukambauka cabusungu. Mukucita boobo, basololi bamunyika aaba bakali kufwubaazya Leza Singuzuzyoonse, nkaambo baiminizi ba Bwami bananike baiminina “Jelusalemu wakujulu”—Bwami Bwabu Mesiya—mwalo mobali cibeela.—Heb. 12:22, 28.

5, 6. (a) Ino basinkondonyina Leza bakacita nzi? (b) Ino ‘bantu bamwi ibakasyaala’ mbaani?

⁵ Zekariya wakasinsima zisi ncozyakali kuyakucita naakati: “Munzi [Jerusalemu] uyoozundwa.” “Munzi” wiiminina Bwami bwa Leza Bwabu Mesiya. Aanyika bwiimininwa ‘abasicisi’ bambubo, Banakristo bananike baceede. (Flp. 3:20) Ciindi ca Nkondo Yanyika Yakusaanguna, balupati-pati mumbunga ya Jehova anyika ‘bakazundwa,’ naa kwaangwa, akutolwa muntolongo ku Atlanta, Georgia, mu U.S.A. ‘Maanda akamwayigwa’ mukuti basinkondo aaba bakabacitila cakutalulama alimwi calunya Banakristo bananike aaba alimwi abambi ibasyomeka batakajisi mulandu. Balwani aaba bakanyonyoona mpuwo bananike njobakajisi kwiinda mukunyonyoona alimwi akukasya milimo yabo mbuli bakambausi ba Bwami.

⁶ Nokuba kuti basinkondo aaba ibalaanguzu bakabapenzya bantu ba Leza alimwi akubabejelezya, taakwe nobakanyonyoona bukombi bwakasimpe. Kwakali ‘bantu bamwi ibakasyaala,’ aaba mbananike basyeede ibakasyomeka akukaka ‘kugwisyigwa mumunzi.’

7. Ncikozyanyo nzi Bakamboni ba Jehova bananike ncobasiila bakombi bakasimpe boonse mazuba aano?

⁷ Sena businsimi oobu bwakazuzikizyigwa cakumaninina kumamanino aa Nkondo Yanyika Yakusaanguna? Peepe. Zisi zyakali kuyakubalwana alimwi bananike basyeede alimwi abeenzyinyina basyomeka bajisi bulangizi bwakupona anyika. (Ciy. 12:17) Icisinizya kaambo aako ni Nkondo Yanyika Yabili. Kusyomeka kwa Bakamboni ba Leza bananike kulabakulwaizya babelesi ba Leza mazuba aano kuliyumya mumapenzi aaliwoonse ngobakonzya kujana, kubikkilizya akukazyigwa abanamukwasyi batasyomi, mbobabelekalimwi naa mbobaiyalimwi  ibabafwubaazya akaambo kazyintu nzyobasyoma. (1 Pe. 1:6, 7) Kufwumbwa nkobakkala, bakombi bakasimpe balikanzide kwiinda lyoonse ‘kwiima nji mumuuya omwe,’ kakunyina ‘kukongwa abasinkondonyina.’ (Flp. 1:27, 28) Pele nkookuli bantu ba Jehova nkobayakujana bukwabilizi munyika muzwide bantu babasulide?—Joh. 15:17-19.

JEHOVA WABAMBA ‘KKUTI LIPATI KAPATI’

8. (a) Ino malundu alakonzya kwiiminina nzi mu Bbaibbele? (b) Ino ‘cilundu cazisamu zyamaolifa’ ciiminina nzi?

⁸ Akaambo kakuti Jerusalemu—“munzi”—munzila yacikozyanyo wiiminina Jerusalemu wakujulu, nkokuti ‘cilundu cazisamu zyamaolifa, icilangene amunzi wa Jerusalemu,’ acalo ceelede kubonwa munzila yacikozyanyo. Ino cilundu eeci ciiminina nzi? Mbuti ‘mbociyakwaanduka akati’ alimwi akuba zilundu zyobilo? Nkaambo nzi Jehova ncaambila kuti ‘malundu aangu’? (Amubale Zekariya 14:3-5.) Mu Bbaibbele, malundu alakonzya kwiiminina mami naa mfwulumende. Alimwi zilongezyo akukwabililwa ziliswaangene amalundu aa Leza. (Int. 72:3; Is. 25:6, 7) Aboobo, cilundu cazisamu zyamaolifa alo Leza mpaimvwi kujwe aa Jerusalemu waanyika ciiminina bweendelezi bwa Jehova bwakoonse-koonse, bweendelezi bwakwe bupati.

9. Muunzila nzi ‘cilundu cazisamu zyamaolifa’ mozyakaandaana?

⁹ Ino ncinzi ciimininwa akwaanduka akati kwacilundu cazisamu zyamaolifa? Cilundu calo cili kujwe aa Jerusalemu, caanduka akati mukuti Jehova watalisya bweendelezi bumbi, ibwabili. Bweendelezi oobu bwabili Mbwami Bwabu Mesiya ibuli mumaanza a Jesu Kristo. Nkakaambo kaako Jehova waamba malundu obilo aakaandanizyigwa kuzwa ‘kucilundu cazisamu zyamaolifa’ kuti ‘malundu aakwe.’ (Zek. 14:4) Oonse obilo ngaakwe.

10. Ino ‘kkuti lipati kapati’ ilili akati kamalundu obilo liiminina nzi?

¹⁰ Ciindi cilundu cacikozyanyo nocakaandaana, cisela cimwi cakaya kunyika cimwi kumusanza, maulu aa Jehova akazumanana kulyata amalundu woonse obilo. Kunsi aamaulu aa Jehova kwakaba ‘kkuti lipati kapati.’ Kkuti eeli lyacikozyanyo liiminina bukwabilizi bwa Leza. Mbubwenya mbuli bantu mbobakwabililwa mukkuti lili akati kamalundu obilo, babelesi ba Jehova balakwabililwa abweendelezi bwakwe alimwi abwa Mwanaakwe. Jehova taakwe nayakuzumizya kuti bukombi bwakasimpe bunyonyoonwe. Ino kwaandaana ooku kwacilundu cazisamu zyamaolifa kwakacitika lili? Kwakacitika mu 1914 ciindi Bwami Bwabu Mesiya nobwakakkazyikwa kumamanino aa Ciindi Cabamasi. Ino bakombi bakasimpe bakatalika lili kutijila mukkuti lyacikozyanyo?

KUTIJILA KUKKUTI KWATALIKA

11, 12. (a) Ino kutijila kukkuti lyacikozyanyo kwakatalika lili? (b) Ncinzi citondezya kuti janza lya Jehova lyanguzu lili aabantu bakwe?

¹¹ Jesu wakacenjezya basikutobela bakwe kuti: “Muyoosulwa amisyobo yoonse akaambo kazyina lyangu.” (Mt. 24:9) Mumazuba aamamanino aabweende bwazyintu oobu, kuzwa mu 1914, kusulwa ooku kwaindila. Nokuba kuti bananike baceede bakali kulwanwa abasinkondonyina ciindi ca Nkondo Yanyika Yakusaanguna, ibakabunga aaka kasyomeka taakwe nobakajaigwa pe. Mu 1919 bakaangununwa mumaanza a Babuloni Mupati—bwami bwanyika yoonse bwabukombi bwakubeja. (Ciy. 11:11, 12) * Eeci nceciindi kutijila kukkuti lyamalundu aa Jehova nokwakatalika.

 ¹² Kuzwa mu 1919, Jehova wazumanana kukwabilila bakombi bakwe bakasimpe munyika yoonse. Pele mumyaka yainda mumasena manji aanyika, mulimo alimwi amabbuku aa Bakamboni ba Jehova akasyigwa. Kukasyigwa kuli boobo nkokucili muzisi zimwi. Nokuba kuti zisi zyasola kulesya mulimo kusikila mpobagolela, taakwe nobayakuzwidilila kunyonyoona bukombi bwakasimpe. Ijanza lya Jehova lyanguzu liyakuzumanana kuba abantu bakwe.—Dt. 11:2.

13. Mbuti mbotukonzya kukkala mukkuti lyabukwabilizi bwa Jehova, alimwi nkaambo nzi lino ncociyandika kapati kucita oobo kwiinda lyoonse?

¹³ Ikuti twakakatila kuli Jehova alimwi akuzumanana mukasimpe, walo a Mwanaakwe, Jesu Kristo bayakucita lubazu lwabo, Leza takazumizyi muntu uuli woonse naa cintu cili coonse ‘kutukwempa kujanza lyakwe.’ (Joh. 10:28, 29) Jehova ulilibambilide kutugwasya kutegwa katumumvwida mbuli Mwami Wabubumbo Boonse alimwi akuzumanana kusyomeka katuli balelwa ba Bwami Bwabu Mesiya. Cilayandika kuti tuzumanane kukkala mukkuti lyabukwabilizi, nkaambo kkuti eeli liyakuyandika kapati kubakombi bakasimpe ciindi camapenzi mapati alo aali afwaafwi kapati.

‘BUZUBA BWAKULWANA’ BWASIKA

14, 15. Ncinzi ciyakucitika kuli baabo banooli anze aakkuti ‘mubuzuba bwa Leza bwakulwana’?

¹⁴ Mamanino aabweende bwazyintu oobu naayabuswena, Saatani uyakubalwana canguzu babelesi ba Jehova. Kumane buyakusika ‘buzuba bwa Leza bwakulwana’ basinkondonyina. Jehova uyakusinizya kuti kulwana kwa Saatani nkwayakucita ino-ino nkwamamanino. Mubuzuba oobo, Mwami wabubumbo boonse uyakulitondezya kuti walo Ngusilumamba kwiinda mbwaakacitide “mubuzuba bwalumamba” buli boonse.—Zek. 14:3.

¹⁵ Mubuzuba bwa Leza bwakulwana, ncinzi ciyakucitika kuli baabo bali anze ‘aakkuti lipati’ lyabukwabilizi? Tabakabi ‘amumuni uumwekesya’ wa Leza uumunikila aali mbabo. Mubuzuba oobo bwakulwana, “mbizi amabbiza ankamela ambongolo abanyama boonse bali muzilao”—izitondezyo zyazibelesyo zyankondo zyamasi—ziyakujatikizyigwa. Zibelesyo zili boobu ‘ziyakwaangana,’ ziyakuleka kubeleka mbuli kuti zyaangana akaambo kakutontola. Jehova alimwi uyakubelesya zilwazi ‘acuumyo.’ Kufwumbwa naa zinooli zini naa pe, cuumyo eeco taakwe nociya kutukonga. Mubuzuba oobo, “meso aabo . . . azyalo indimi zyabo ziyoobola” mukuti basinkondo aaba tabakamuboni ngobalwanalimwi alimwi majwi aabo mabi ayakulesyegwa. (Zek. 14:6, 7, 12, 15) Taakwe cibeela canyika citakajatikizyigwi. Impi izinooli kulubazu lwa Saatani munkondo zinooli zinji. (Ciy. 19:19-21) ‘Bajayidwe aa Jehova bayoojanwa moonse munyika kuzwa kumagolelo amwi akusikila kumagolelo amwi.’—Jer. 25:32, 33.

16. Kweelana abuzuba bwa Leza bwakulwana ibuli afwaafwi, mibuzyo nzi njotweelede kuyeeya, alimwi ino tuyakuyandika kucita nzi?

¹⁶ Nkondo lyoonse iletela mapenzi, nokuba kuli baabo bazwidilila munkondo eeyo. Zyakulya zilakonzya kumana. Lubono lulakonzya kusweeka. Buumi bulakonzya kukatazya. Nguzu zyakulisalila nzyotujisi lino zilakonzya kumana. Ikuti twasikilwa mapenzi aali boobu, ino inga twacita buti? Sena tuyakulibilika? Sena tuyakuleka kusyomeka akaambo kamapenzi? Sena tuyakutyompwa akubula bulangizi? Cilayandika kapati kuti ciindi camapenzi mapati tukazumanane kusyoma munguzu zya Jehova zyakufwutula alimwi akuzumanana kukkala mukkuti lya  Jehova lyabukwabilizi.—Amubale Habakuku 3:17, 18.

‘KUYAKUKUNKA MAANZI AABUUMI’

17, 18. (a) Ino ‘maanzi aabuumi’ ninzi? (b) Ino “lwizi lwakujwe” alimwi “[a]lwizi lwakumbo” lwiiminina nzi? (c) Ino mukanzide kucita nzi ciindi nomulangila kuzyintu ziboola kumbele?

¹⁷ Yaakwiinda Amagedoni, ‘maanzi aabuumi’ ayakuzumanana kukunka kuzwa kucuuno ca Bwami Bwabu Mesiya. ‘Maanzi aabuumi’ aaya aiminina bubambe bwa Jehova bwabuumi. “Lwizi lwakujwe” lwiiminina Lwizi Lutajisi Buumi, alimwi “lwizi lwakumbo” lwiiminina Lwizi lwa Mediterranean. Oonse obilo alabelesyegwa kwaamba bantu. Lwizi Lutajisi Buumi lwiiminina baabo bali mucuumbwe cabantu boonse. Akaambo kakuti mu Lwizi lwa Mediterranean kuli zyintu zipona zinji, kweelede kuti lwiiminina “nkamu mpati” iiyakufwutuka lya Amagedoni. (Amubale Zekariya 14:8, 9; Ciy. 7:9-15) Aboobo, tubunga toonse tobilo tulagwasyigwa akaambo kakwaangununwa kulufwu luboola akaambo kacibi ca Adamu ciindi nobazumanana kunywa maanzi aabuumi aacikozyanyo naa “mulonga wamaanzi aabuumi.”—Ciy. 22:1, 2.

¹⁸ Ansi aabukwabilizi bwa Jehova tuyakufwutuka mamanino aabweende oobu bwazyintu alimwi akunjila munyika ya Leza mpya yabululami. Nokuba kuti zisi zyoonse zilitusulide, atube amakanze aakuzumanana kuba basicisi ba Bwami bwa Leza basyomeka, bakanzide kukkalilila mukkuti lya Jehova lyabukwabilizi.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 21]

Amube amakanze aakukkala mukkuti lya Jehova lyabukwabilizi