Amwaacenjelele Makanze aa Moyo

Bbaibbele lyaamba kuti: “Moyo wamuntu uleena kwiinda zintu zyoonse, ulijisi bulwazi bukaka kupona.” (Jer. 17:9) Ciindi moyo wesu noulombozya kapati cintu cimwi, sena tatubi atwaambo ncotweelede kuzuzikizya makanze aamoyo ooyo?

Magwalo atucenjezya kuti: “Mumoyo mulazwa mizeezo mibi, bujayi, bumambe, bwaamu, bubbi, bumboni bwakubeja akusampaula.” (Mt. 15:19) Moyo wesu wacikozyanyo ulakonzya kutwaaba akutupa kubona nzila iindene akuyanda kwa Leza kuti nimbotu. Alimwi andiza tatukonzyi kuzyiba icacitika kusikila twacita cintu citali kabotu. Ncinzi cikonzya kutugwasya kuzyiba makanze aamoyo wesu notutanatobela nzila iilubide?

AMWAAZYIBE MAKANZE AANU—MUNZILA NZI?

Amubale Bbaibbele abuzuba akuzinzibala kuyeeya ncolyaamba. Mwaapostolo Paulo wakalemba kuti: “[I]jwi lya Leza lili abuumi alimwi lili anguzu alimwi lilabosya kwiinda panga lili lyoonse likwengedwe koonse-koonse alimwi lilayasa mane kukwaandaanya buumi amuuya.” Mulumbe wa Leza uujanwa mu Bbaibbele ‘ulakonzya kuzyiba mizeezo amakanze aamumoyo.’ (Heb. 4:12) Kuzyiba ncaamba Magwalo kulakonzya kugwasya kapati mukuzyiba makanze aamoyo. Eelo kaka cilayandika kubala Jwi lya Leza abuzuba akuzinzibala kuyeeya ncolyaamba, calo cipa kuti tube amizeezo ya Jehova akubona zyintu mbwazibona!

Kutambula lulayo alimwi akubelesya njiisyo zyamu Bbaibbele kulakonzya kwaajatikizya manjezyeezya eesu—buntu bwamukati ibuli “ngokamboni.” (Lom. 9:1) Ijwi lyamanjezyeezya eesu lilakonzya kutukasya kubona nzila iilubide kuti nimbotu. Kuyungizya  waawo, Bbaibbele lilijisi zikozyanyo izikonzya “kutucenjezya.” (1 Ko. 10:11) Kwiiya kulinzizyo kulakonzya kutukasya kutola nzila iilubide. Aboobo, ncinzi umwi aumwi wesu ncaelede kucita?

Amupaile kuli Leza kuti amugwasye kuzyiba makanze aamoyo wanu. Jehova ‘ulalingula myoyo.’ (1 Mak. 29:17) Walo “mupati kwiinda myoyo yesu alimwi ulizyi zyintu zyoonse.” (1 Jo. 3:20) Leza takonzyi kweenwa. Kuti twaamba camoyo woonse nzyotulibilika, mbotulimvwa alimwi anzyotulombozya mumupailo, Jehova ulakonzya kutugwasya kuzyiba makanze aamoyo wesu. Alimwi buya tulakonzya kulomba Leza kuti ‘alenge moyo uusalala mukati kesu.’ (Int. 51:10) Aboobo, kutegwa tuzyibe makanze aamoyo wesu, tweelede kubikkila maano kububambe bwamupailo.

Amubikkile maano ciindi camiswaangano ya Bunakristo. Kubikkila maano kumakani aabandikwa kumiswaangano ya Bunakristo kulakonzya kutugwasya kulilingula buntu bwesu bwamukati—moyo wesu. Nokuba kuti tatukonzyi kutambula makani mapya amuswaangano uuliwoonse, kwiinda mukujanika tulagwasyigwa kumvwisya njiisyo zyamu Bbaibbele alimwi tulayeezyegwa zyintu ziyandika izikonzya kutugwasya kulanga-langa makanze aamoyo wesu. Bwiinguzi bwabakwesu abacizyi abwalo bulayandika mukulanga-langa buntu bwesu bwamukati. (Tus. 27:17) Kulizandula muciindi cakukkomana lyoonse akuyanzana kwa Bunakristo kumiswaangano kulakonzya kutunyonganya. Cilakonzya kusololela ‘kukuyandaula zisusi zyesu tobeni.’ (Tus. 18:1) Aboobo, ncamaano kulibuzya kuti, ‘Sena ndijisi cilengwa cakujanika lyoonse kumiswaangano alimwi akugwasyigwa anjiyo?’—Heb. 10:24, 25.

INO MOYO WESU ULATUSOLOLELA KULI?

Moyo wesu iweena ulakonzya kutusowa mumbazu zinji mubuumi. Atulange-lange mbazu zyone: kuyandaula zyintu zyakumubili, kunywa bukoko, kusala balongwe, alimwi azyintu nzyotucita mukulikondelezya.

Kuyandaula zyintu zyakumubili. Ncilengwa buya kuyanda zyintu zyakumubili. Nokuba boobo, Jesu wakapa cikozyanyo cakucenjezya kujatikizya kubikkila kapati maano kuzyintu zyakumubili. Mucikozyanyo cakwe cimwi, Jesu utwaambila kulanga-langa makani aamuntu muvwubi iwakajisi matala aakazwide. Aboobo, taakajisi busena bwakubikka butebuzi bwakwe. Muntu ooyu wakakanzide kumwaya matala aakwe akuyaka aambi mapati. Wakaamba kuti: “Oomo monditiiyobwede maila aangu oonse azyintu zyangu zyoonse zibotu, mpoonya ndilalyaambila kuti: ‘Wayobola zyintu zinji zibotu zinooliko kwamyaka minji; koliiba, kolya, konywa, alimwi kosekelela.’” Nokuba boobo, muntu ooyu muvwubi wakaalilwa kubikkila maano kaambo aaka kamasimpe kakuti: Buumi bwakwe bulakonzya kumana ngoonya masiku aayo.—Lk. 12:16-20.

Notuyaabukomena, tulakonzya kutalika kulibilika kapati kujatikizya kulibambila lubono ndotuyakubelesya twaakucembaala cakuti inga twatalika kubeleka kwamawoola manji nociba ciindi camiswaangano naa munzila imwi kuleka kubikkila maano kumilimo yesu ya Bunakristo. Tweelede kutantamuka kuyeeya kuli boobu. Ndiza tucili bakubusi alimwi tulizyi kuti  taakwe mulimo mubotu kwiinda mulimo waciindi coonse. Nokuba boobo, sena inga tiitwacita bupainiya katuyeeya kuti tweelede kusaanguna kuba amali manji? Sena tatweelede kubeleka canguzu lino kutegwa tube bavwubi kuli Leza? Nguni uuzyi naa tunoocipona juunza?

Kunywa bukoko. Lugwalo lwa Tusimpi 23:20 lwaamba kuti: “Utakali akati kabacakolwa.” Ikuti muntu kabuyandisya kapati bukoko, ulakonzya kulipa cilitamizyo ncanywida lyoonse. Ulakonzya kwaamba kuti unywida kukatalukwa ikutali kukolwa pe. Ikuti katunywa kutegwa tukatalukwe, eecino nceciindi cakulingula makanze aamoyo wesu.

Kusala balongwe. Masimpe ngakuti, tacikonzyeki kuleka kuswaangana abantu batasyomi—mbuli kucikolo, kumulimo, alimwi aciindi notuli mumulimo wamumuunda. Pele eeci cilisiyene akutalika kuyanzana ambabo, mane buya akuba balongwe babo. Sena tulapa cakulitamizya kutegwa katuyanzana abantu bali boobo, akwaamba kuti balijisi bube bunji bubotu? Bbaibbele licenjezya kuti: “Muteenwi pe. Kuyanzana kubyaabi kunyonganya zilengwa zibotu.” (1 Ko. 15:33) Mbubwenya mbuli tombe lisyoonto buyo mbolikonzya kupa kuti maanzi aasalala abije, kumvwana abantu batakombi Leza kulakonzya kutunyonganya kumuuya alimwi akupa kuti tutalike kuyeeya, kusama, kwaambaula alimwi akulilemeka mbuli bantu banyika.

Nzyotucita ciindi cakulikondelezya. Kuyaambele kwasayaansi kwapa kuti kube zyakulikondelezya zinji, bunji bwazyakulikondelezya eezyi tazili kabotu ku Munakristo. Paulo wakalemba kuti: ‘Busofwaazi bwamusyobo uuli oonse tabweelede nokuba kwaambwa akati kanu.’ (Ef. 5:3) Mbuti kuti moyo wesu kauyanda kweebelela naa kuswiilila kuzyintu zitasalali? Inga twayeeya kuti toonse tuyandika kukatalukwa naa kulikondelezya, alimwi muntu nzyasala kucita makani aakulisalila. Pele atubikkile maano kululayo lwa Paulo alimwi akutazumizya busofwaazi kutuyunga.

TULAKONZYA KUCINCA

Ikuti twakayungwa amoyo weena alimwi twazyibila kubona kulilemeka kutaluzi kuti kuli kabotu, tulakonzya kucinca. (Ef. 4:22-24) Amubone zikozyanyo zyobilo zyamazuba aano.

Miguel * wakeelede kucinca kuyeeya kwakwe kujatikizya zyintu zyakumubili. Wakaamba kuti: “Mebo, bakaintu bangu alimwi amwanaangu musankwa, tuzwa kucisi kwalo nkobabona kuti kuba azyintu zipya alimwi zibotu izikkomanisya kulayandika kapati. Aciindi cimwi, ndakabeleka canguzu kutegwa ndijane zyoonse nzyondakali kukonzya zyamunyika, kandiyeeya kuti ndilakonzya kucita oobo kakunyina kuyandisya lubono. Kakutanainda ciindi ndakabona kuti kuyandaula lubono lunji kwakali mbuli kutobela nzila iitagoli. Ndakapaila kuli Jehova kujatikizya mbondakali kuzibona zyintu alimwi amakanze aamoyo wangu. Ndakamwaambila kuti mbuli mukwasyi, twakali kuyanda kumubelekela kwaciindi coonse. Twakasala kuubya-ubya buumi akuunka kubusena kwakabulide basikumwaya ba Bwami. Muciindi cisyoonto buyo twakacikonzya kucita bupainiya. Twabona kuti tatuyandiki zyintu zinji zyakumubili kutegwa tukkomane mubuumi.”

Cakuluula ca Lee citondezya kulilingula kuzwa ansi amoyo mbokwakamugwasya kuleka kuyanzana abalongwe babi. Lee waamba kuti: “Akaambo kamulimo wangu, ziindi zinji ndakali kuswaangana abasikusambala zyintu bamuzwamasi. Ndakalizyi kuti bakali kuciindizya kunywa bukoko, pele kuswaangana ambabo cakali kundikkomanisya. Ziindi zinji kwakali kusyaala asyoonto kuti ndikolwe, eeci cakali kundipa kuusa. Ndakalingula moyo wangu kuzwa aansi aamoyo. Lulayo lwamu Bbaibbele alimwi amizeezo njobakandipa baalu yakandigwasya kubona kuti ncondakali kuyandaula mubwini nkuyanzana abantu batamuyandi Jehova. Lino makwebo aangu ndilaacita aafooni alimwi ndacesya kuyanzana abasikusambala zyintu.”

Tweelede kusyomeka alimwi akuzyiba makanze aamoyo wesu. Notucita oobo, tweelede kuyandaula lugwasyo lwa Jehova kwiinda mumupailo, katuyeeyede kuti “ulizi makani aasisidwe aamumoyo.” (Int. 44:21) Leza alimwi watupa Jwi lyakwe, lyalo ilikonzya kuba mbuli cimbonimboni cesu. (Jak. 1:22-25) Alimwi ciyandika nziyeekezyo alulayo ndotutambula kwiinda mumabbuku aa Bunakristo alimwi amiswaangano yesu. Kwiinda mububambe buli boobu, tulakonzya kusololela moyo wesu alimwi akuzumanana kweenda munzila yabululami.

[Bupanduluzi buyungizidwe]

[Cifwanikiso icili apeeji 23]

Mbuti kubala Bbaibbele abuzuba mbokukonzya kuujatikizya moyo wesu wacikozyanyo?

[Cifwanikiso icili apeeji 23]

Mipailo yesu ilatugwasya kuzyiba buntu bwesu bwamukati

[Cifwanikiso icili apeeji 23]

Miswaangano ya Bunakristo ilatugwasya kuzyiba makanze aamoyo wesu