Cintu “Citalubiki” Cakaboola Muciindi Ceelede
Makani Eesu Aakaindi
Cintu “Citalubiki” Cakaboola Muciindi Ceelede
CINTU “Citalubiki!” Oobo mbombubo mbobakali kwiipandulula bantu banji “Creation Drama.” Yakaboola muciindi ceelede alimwi aabo ibakayeebelela kunyina nobakailuba pe. Cakutadooneka, “Creation Drama” yakapa bumboni bunji ibwakapa kuti Jehova atembaulwe nikwakainda buyo ciindi cisyoonto kuzwa ciindi Hitler naakaleka kupenzya kapati bantu bakwe bamu Europe. Pele ino “Creation Drama” yakali nzi?
Mu 1914, maofesi mapati aabantu ba Jehova ku Brooklyn, New York, mu U.S.A., bakamwaya “Photo-Drama of Creation.” “Photo-Drama of Creation” eeyi iyakali kutola mawoola aali lusele yakalijisi masilaidi azifwanikiso izyakali kutondezya zicitika, alimwi zifwanikiso eezyi izyakali zibotu zyakali kubikkilizya amajwi. “Photo-Drama” yakeebelelwa amamiliyoni aabantu nyika yoonse. Cibeela cifwaafwi citegwa “Eureka Drama”—cakamwaigwa mu 1914. Kuzikusika muma 1920, masilaidi, mafilimu, alimwi azibulo nzyobakali kubelesya zyakalifwide kapati. Nokuba boobo, bantu banji bakacili kuyanda kweebelela “Photo-Drama.” Mucikozyanyo, bantu ibakali kukkala mu Ludwigsburg, ku Germany, bakabuzya kuti: “Ndilili notuyakweebelela ‘Photo-Drama’ alimwi?” Ncinzi ncobakali kunga bacita?
Kutegwa kulomba kwabantu ooku kucitwe, muma 1920, baiminizi bamukwasyi wa Bbeteli baku Magdeburg, ku Germany, bakaula mafilimu kuzwa kuli basikulemba twaambo baku dolopo lya Paris, mu France, mpoonya masilaidi bakaaula kukkampani yazifwoto mu Leipzig alimwi amu Dresden. Eezyi nzyobakaula bakazibikka antoomwe amasilaidi aakaindi aa “Photo-Drama” aakacili kubeleka.
Mukwesu Erich Frost, iwakajisi cipego cakwiimba, wakaimba nyimbo izyakali kweendelena amafilimu amasilaidi. Filimu eeyi yakanyina majwi aanjiyo, aboobo majwi aakali kwaambwa akali kuzwida mubbuku lyesu lya Creation. Nkakaambo kaako eeyi “Photo-Drama” iyakalembululwa ncoyakapegwa zyina lipya lyakuti—“Creation Drama.”
Filimu eeyi mpya ayalo yakali kutola mawoola aali lusele mbubwenya mbuli “Photo-Drama”—yakali kutondezyegwa muzibeela-beela buzuba abuzuba. Yakali kutondezya makani aamba zyamazuba aakulenga, yakali kutondezya makani aakaindi aamu Bbaibbele alimwi aakunyika, akutondezya kuti bukombi bwakubeja kunyina nobwabagwasya bantu. “Creation Drama” yakeebelelwa mu Austria, Germany, Luxemburg, alimwi a Switzerland, alimwi akubantu baambaula mwaambo waci German ibakali kukkala mumasena aambi.
Mukwesu Erich Frost wakapandulula kuti: “Ciindi nitwakali kutondezya filimu eeyi, ndakali kubakulwaizya mbondakali kubelekalimwi, kwaambisya aabo mbotwakali kwiimbalimwi kutegwa kababelesya ciindi cakulyookezya kuzinguluka akwaabila baswiilizi mabbuku atubbuku twesu tubotu. Kwiinda mukucita oobo, twakamwaya mabbuku manji kwiinda yaayo ngotwakali kukonzya kumwaya kuŋanda aŋanda.” Mukwesu Johannes Rauthe, iwakapanga bubambe bwakweebelela filimu eeyi mucisi ca Poland alimwi amucisi ciitwa kuti Czech Republic mazuba aano, wakaamba kuti bantu banji bakali kusiya makkeyala aabo kutegwa tukabaswaye. Makkeyala aayo akatugwasya kapati mukucita nyendo zyakupilukila.
Muma 1930, mumaanda mobakali kutondezyela “Creation Drama” lyoonse akalizwide, alimwi bantu boonse mumadolopo bakali kwaamba buyo zya Bakamboni ba Jehova. Kuzikusika mu 1933, bantu batandila ku 1 miliyoni bakaliyeebelede filimu eeyi iyakali kweendelezyegwa amutabi wesu wamucisi ca Germany. Ba Käthe Krauss bakaamba kuti: “Kutegwa tukaakweebelele filimu eeyi, mumazuba osanwe, twakali kweenda musinzo uulampa makkilomita aasika ku 20 kuunka akujoka abuzuba, kwiinda munzila zyamusyokwe amumalundu.” Ba Esle Billharz bakaamba kuti: “‘Creation Drama’ yakapa kuti nditalike kukayanda kasimpe.”
Ba Alfred Almendinger bakaamba kuti ciindi banyina nibakeebelela Creation Drama “bakakkomana kapati cakuti cakabapa kuula Bbaibbele akutalika kuyandaula bbala lyakuti ‘puligatoliyo’ mu Bbaibbele.” Mbwaanga kunyina nobakalijana mu Bbaibbele, bakacileka kuunka kucikombelo cabo, mpoonya bakabbapatizyigwa. Ba Erich Frost bakaamba kuti: “Bantu banji bakaboola mukasimpe kwiinda mu ‘Creation Drama.’”—3 Jo. 1-3.
Ciindi bantu banji nibakali kweebelela “Creation Drama,” mbunga ya Nazi yakatalika kuba ampuwo kapati alimwi yakatalika kuleta manyongwe. Kutalikila mu 1933, milimo ya Bakamboni mu Germany yakatalika kukasyigwa. Kuzwa ciindi eeco kuzikusika kumamanino aankondo yanyika yabili mu 1945, babelesi ba Jehova mu Europe bakapenzyegwa kapati. Ba Erich Frost bakaangwa kwamyaka iinda kuciloba. Nibakazwa bakabelekela aa Bbeteli mu Wiesbaden, ku Germany. Eelo kaka cilakkomanisya kuti cintu citalubiki, “Creation Drama,” yakaboola aciindi ceelede akuyumya busicamba bwa Banakristo banji ibakajana masunko manji aalusyomo ciindi ca Nkondo Yanyika Yabili!—Kuzwa mumakani eesu aakaindi ku Germany.
[Cifwanikiso icili apeeji 31]
Cikwankwani eeci cakali kwaambilizya zya “Creation Drama” mu 1932
[Cifwanikiso icili apeeji 31]
Zyina lyabbuku eeli litegwa Schöpfung (Cilenge) lyakazwida ku filimu eeyi mpya
[Zifwanikiso izili apeeji 32]
Ba Erich Frost amapepa aabo aanyimbo zya “Creation Drama”
Andiza Inga Mwaakkomanina Ayaaya
NGAZI YAMULINDIZI—YAKWIIYA
Filimu Iigwasya Kuba Alusyomo Yakkwanya Myaka Iili 100
Mwaka uuno filimu ya “Photo-Drama of Creation” iyakatondezyegwa ciindi cakusaanguna mu 1914 yakkwanya myaka iili 100 kuzwa noyakabambwa, filimu iibambilidwe kugwasya bantu kuba alusyomo mu Bbaibbele mbolili Jwi lya Leza.
NGAZI YAMULINDIZI—YAKWIIYA
Mbozyakasyangwa Mbuto zya Bwami Zyakusaanguna ku Portugal
Mbuyumuyumu nzi mbobakajisi basikumwaya ba Bwami bakaindi ku Portugal?
NGAZI YAMULINDIZI—YAKWIIYA
Makani Aabuleya Akamwaya Makani Mabotu mu Ireland
Ino ncinzi cakapa C. T. Russell kuti asyome kuti masena aayo wakali muunda “iwakayumide kale kuti utebulwe?”
NGAZI YAMULINDIZI—YAKWIIYA
“Ino Ndilili Notuyooba Amuswaangano Uumbi Alimwi?”
Ncinzi cakapa kuti muswaangano wacooko iwakacitilwa mudolopo lya Mexico, mu 1932, ube muswaangano uulibedelede kapati?
NGAZI YAMULINDIZI—YAKWIIYA
‘Twakaba Basungu Alimwi Twakazula Luyando Mumyoyo Yesu Kwiinda Kaindi’
Nowakamana muswaangano wabo mu 1922, mbuti Basikwiiya Bbaibbele mbobakalutobela lulayo ‘lwakwaambilizya Mwami a Bwami bwakwe’?
NGAZI YAMULINDIZI—YAKWIIYA
“Kunyina Nzila Mbi Alimwi Kunyina Nzila Ndamfwu”
Kumamanino amyaka yakuma 1920 alimwi akumatalikilo kwamyaka yakuma 1930, bapainiya basungu bakatondezya luyandisisyo lwabo lwakutola makani mabotu aa Bwami kuminzi yaku Australia iili kulamfwu kapati.
