Jehova—Makkalilo Eesu

‘O Jehova, nduwe makkalilo eesu mumazyalani oonse.’—INT. 90:1.

INO INGA MWAINGULA BUTI?

Mbuti Jehova mbwaakaba ‘cikkalilo cini-cini’ cabaalumi bakaindi basyomeka?

Ncinzi ncotukonzya kwiiya kukusyomeka kwa Abrahamu?

Mbuti mbotukonzya kutondezya kuti Jehova ‘ncikkalilo’ cesu?

1, 2. Mbuti babelesi ba Leza mbobalimvwa kujatikizya bweende bwazyintu bwamazuba aano, alimwi muunzila nzi mobajisi munzi?

 SENA mulimvwa kwaanguluka munyika iino? Kuti naa pe, mujisi balongwe babotu. Kuzwa kaindi, boonse ibakali kumuyanda ncobeni Jehova bakali kulimvwa mbuli beenzu naa bamuzwakule mubweende bwazyintu obuno. Mucikozyanyo, ciindi nobakali kweenda kuzwa mubusena bumwi kuya kubusena bumbi mucisi ca Kanana, bakombi basyomeka ba Leza ‘bakaambilizya caantangalala kuti bakali beenzu alimwi bamuzwakule batakkalilili munyika iilya.’—Heb. 11:13.

² Mbubwenya buyo, basikutobela Kristo bananike ‘ibajisi busicisi bwakujulu,’ balibona kuti ‘mbaamuzwakule batakkalilili’ mubweende bwazyintu obuno. (Flp. 3:20; 1 Pe. 2:11) Abalo “[ba]mbelele zimbi” ba Kristo ‘tabali banyika mbubonya Jesu mbwaatakali wanyika.’ (Joh. 10:16; 17:16) Nokuba boobo, tacaambi kuti bantu ba Leza tabajisi “munzi.” Mubwini, tulakkomana alukwabililo lupati lwamunzi waluyando, walo uubonwa ameso aalusyomo. Musa wakalemba kuti: ‘O Mwami Jehova, nduwe cikkalilo cesu, mumazyalani oonse.’ * (Int. 90:1) Mbuti Jehova mbwaakasinizya kuba ‘cikkalilo’ cabantu bakwe basyomeka mumazuba aakaindi? Mbuti mbwali ‘cikkalilo’ kubantu baitwa azyina lyakwe mazuba aano? Alimwi mbuti mbwayakusinizya kuba cikkalilo cini-cini kumbele?

JEHOVA—‘CIKKALILO CINI-CINI’ CABANTU BAKWE BAKAINDI

3. Mulugwalo lwa Intembauzyo 90:1, ino kaambo kabandikwa, cifwanikiso alimwi akukozyanya kuliko ninzi?

³ Mbubwenya mbuli zikozyanyo zinji zyamu Bbaibbele, amwalo mulugwalo lwa Intembauzyo 90:1 muli  kaambo kabandikwa, cifwanikiso alimwi akukozyanya. Kaambo kabandikwa ngu Jehova. Cifwanikiso ncikkalilo. Kuli kukozyanya kuliko akati ka Jehova abusena buli boobo. Mucikozyanyo, Jehova ulabakwabilila bantu bakwe. Aaka kaambo nkamasimpe nkaambo walo mwini nduyando. (1 Jo. 4:8) Alimwi ngu Leza waluumuno, walo uupa bantu bakwe basyomeka ‘kukkala cakuliiba.’ (Int. 4:8) Mucikozyanyo, amulange-lange mbwaakeendelezya bantu bansiku basyomeka kutalikila kuli Abrahamu.

4, 5. Mbuti Leza mbwaakaba ‘cikkalilo cini-cini’ ca Abrahamu?

⁴ Tulakonzya kuyeeyela Abrahamu ciindi eeco iwakali kwiitwa kuti Abramu, mbwaakalimvwa ciindi Jehova naakamwaambila kuti: “Kozwa munyika yako akucisi cabuzyale bwako . . . ukainke kucisi ncenti kutondezye.” Kuti naa Abrahamu wakali kulibilika, cakutadooneka kulibilika kwakwe kwakamana ciindi Jehova naakaamba majwi aatobela aakuti: “Njoocita kuti ube musyobo mupati. Njookupa coolwe akulemya izina lyako . . . Kufumbwa muntu uukulongezya njoomulongezya, ayooyo uukusampaula njoomusampaula.”—Matl. 12:1-3.

⁵ Kwiinda mumajwi aaya, Jehova wakalipa mukuli wakuba cikkalilo ca Abrahamu alimwi abaluzubo lwakwe. (Matl. 26:1-6) Jehova wakazuzikizya cisyomezyo cakwe. Mucikozyanyo, wakalesya Farao waku Egepita alimwi a Mwami Abimeleki waku Gerari kuti atamusofwaazyi Sara alimwi akujaya Abrahamu. Wakakwabilila Izaka a Rabeka munzila njiyonya eeyo. (Matl. 12:14-20; 20:1-14; 26:6-11) Tubala kuti: “[Jehova] taakwe naakazumizya bantu kubapenzya. Wakatapatila bami nkaambo kabo. Wakati, ‘Mutagumi bananike bangu, mutabisizyi basinsimi bangu.’”—Int. 105:14, 15.

6. Ino Izaka wakaambila Jakobo kucita nzi, alimwi ino Jakobo weelede kuti wakalimvwa buti?

⁶ Basinsimi aabo bakali kubikkilizya a Jakobo, muzyukulu wa Abrahamu. Ciindi nocakasika cakuti Jakobo akwate, bausyi ba Izaka bakamwaambila kuti: “Toelede kukwata mwanakazi wabana ba-Kanana pe. Buka, ukainke ku-Padanaramu, kuŋanda ya-Betueli wisi banyoko, ukakwate mwanakazi nkuko, umwi wabana basimbi ba-Labani.” (Matl. 28:1, 2) Jakobo wakamvwida Izaka. Jakobo wakasiya bamukwasyi wakwe, ibakali kukkala mu Kanana, akuunka alikke ku Harani musinzo uulampa myaanda yamakkilomita. (Matl. 28:10) Ambweni wakali kuyeeya kuti: ‘Ino lweendo oolu luyoonditolela ciindi cilamfwu buti? Sena baayisya bayakunditambula kabotu akundipa mukaintu uuyoowa Leza?’ Kuti naa Jakobo wakali kulibilika zyintu zili boobo, cakutadooneka kulibilika ooku kwakamana ciindi naakasika ku Luzi, makkilomita aabalilwa ku 100 kuzwa ku Beereseba. Ncinzi cakacitika ku Luzi?

7. Kwiinda muciloto, mbuti Jehova mbwaakamuyumya-yumya Jakobo?

 ⁷ Ku Luzi, Jehova wakalibonya muciloto kuli Jakobo kati: “Ndi ayebo, njookubamba koonse nkoya, alimwi njookuboozya kunyika eyi. Nsikooyookulekelezya pe mane lumwi nkacite nceŋambide.” (Matl. 28:15) Eelo kaka majwi aayo ayelede kuti akamuyumya-yumya akumuumbulizya Jakobo! Sena inga mweezyeezya Jakobo mbwaakalimvwa kuzwa waawo keenda alikke akulangila Leza mbwaakali kuyakuzuzikizya jwi lyakwe? Kuti mwakasiya munzi wanu, ambweni akuunka kuyakubelekela kucisi cimbi, cakutadooneka mweelede kuti mulakumvwisya kulimvwa kwa Jakobo. Tacidoonekwi kuti mwabona Jehova mbwamulanganya.

8, 9. Muunzila nzi Jehova mwaakaba ‘cikkalilo cini-cini’ ca Jakobo, alimwi ncinzi ncotukonzya kwiiya kuli ceeci?

⁸ Ciindi Jakobo naakasika ku Harani, baayisyanyina bakamutambula kabotu kumane bakamupa Leya a Rakele kuti babe bamakaintu bakwe. Nokuba boobo, mukuya kwaciindi Labani wakasoleka kudyaaminina Jakobo kwiinda mukucinca-cinca mweelwe wazyakuvwola zyakwe ziindi zili kkumi. (Matl. 31:41, 42) Pele Jakobo wakaliyumya mukutalulama ooku, kasyoma kuti Jehova uyoozumanana kumulanganya—alimwi wakacita oobo.Ciindi Leza naakaambila Jakobo kuti apiluke ku Kanana, sinsiku ooyu wakalijisi “imbelele zinji, abalanda baalumi abanakazi, ankamele ambongolo.” (Matl. 30:43) Kutondezya kulumba kapati, Jakobo wakapaila kuti: “Mebo nsielede abuniini milimo yako yaluzyalo ayalusyomo njowandicitila ndemulanda wako. Nkaambo ndazubuka oyu Jordano amufunko wangu buyo, lino sunu ndaba makoka obile.”—Matl. 32:10.

⁹ Eelo kaka ngwamasimpe mupailo wa Musa ngwaakaamba kuti: ‘O Mwami, nduwe cikkalilo cesu cini-cini, mumazyalani oonse’! (Int. 90:1) Majwi aaya alabeleka amazuba aano, nkaambo Jehova, walo “uutasanduki naa kucinca mbuli zimvwule zicinca-cinca,” wazumanana kutondezya luyando alimwi akuba cikkalilo cabantu bakwe basyomeka. (Jak. 1:17) Atubone mbwacita oobo.

JEHOVA—‘CIKKALILO’ CESU CINI-CINI MAZUBA AANO

10. Nkaambo nzi ncotukonzya kusinizya kuti Jehova ulazumanana kuba cikkalilo cababelesi bakwe?

¹⁰ Amweezyeezye kuti: Muli munkuta kupa bumboni bukazyanya amuntu uumwi uucenjede alimwi uulaanguzu kapati. Mubeji alimwi mujayi uunyina luse alimwi ulijisi bantu bamutobela nyika yoonse. Ino inga mwalimvwa buti ciindi nomwazwa munkuta? Sena inga mwalimvwa kukwabililwa? Peepe! Mubwini inga kamujisi twaambo tumvwikka twakulomba lukwabililo. Bukkale oobu butondezya babelesi ba Jehova, ibapa bumboni cabusicamba kwiiminina Jehova alimwi akuyubununa sinkondonyina mupati Saatani. (Amubale Ciyubunuzyo 12:17.) Pele sena Saatani wacikonzya kulesya bantu ba Leza? Peepe! Mubwini, twazumanana kucita kabotu kumuuya—aako nkaambo kamasimpe ikakonzya kupandululwa amajwi aakuti: Jehova ucili mayubilo eesu, ‘cikkalilo’ cesu cini-cini, kwaambisya mumazuba aano aamamanino. (Amubale Isaya 54:14, 17.) Nokuba boobo, Jehova takonzyi kuba cikkalilo cesu cikwabilidwe kapati ikuti twazumizya Saatani kutoongelezya kuzwa mucikkalilo cesu.

11. Ncinzi ncotukonzya kwiiya kuli basinsiku?

¹¹ Atubone alimwi ncotukonzya kwiiya kuli basinsiku. Nokuba kuti bakali kukkala munyika ya Kanana, bakazumanana kwaandaana abantu bamunyika eeyo, ibatakali kulilemeka. (Matl. 27:46) Bakali baalumi bakali kweendelezyegwa anjiisyo ibatakali kusyoma mulongo wazyintu zyeelede alimwi aziteelede kucitwa kuti ubasololele. Nzyobakazyi kujatikizya Jehova alimwi abube bwakwe zyakalizulide. Akaambo kakuti  wakali cikkalilo cabo, tiibakali kuyanda kujatana anyika munzila iili yoonse. Muciindi caboobo, bakaitantamuka nyika kusikila mpobakali kugolela. Eelo kaka bakatusiila cikozyanyo cibotu! Sena mulasolekesya kwiiya basinsiku basyomeka caboola kukusala balongwe alimwi azyakulikondelezya? Cuusisya ncakuti, bamwi mumbungano ya Bunakristo batondezya kuti munzila imwi balimvwa kwaanguluka munyika ya Saatani. Kuti kamulimvwa boobo nokuceya, amwaapailile makani aayo. Amuyeeye kuti nyika eeyi njiiya Saatani. Nyika itondezya kubula luyando, imuuya wakuliyanda.—2 Ko. 4:4; Ef. 2:1, 2.

12. (a) Ino Jehova ubalanganya buti bamuŋanda yakwe yakumuuya? (b) Ino mulimvwa buti kujatikizya bubambe oobu?

¹² Kutegwa tulwane bucenjezu bwa Saatani, tweelede kububelesya kabotu bubambe bwakumuuya Jehova mbwaabikkila bamuŋanda yakwe yalusyomo, aabo ibamubona kuti ncikkalilo cabo. Bubambe oobu bulabikkilizya amiswaangano ya Bunakristo, kukomba kwamumukwasyi alimwi “[a]zipego zyabantu”—beembezi basalidwe a Leza kutuumbulizya akutugwasya notuliyumya mumapenzi aamubuumi. (Ef. 4:8-12) Mukwesu George Gangas, iwakali umwi wamu Kabunga Keendelezya myaka yamusyule wakalemba kuti: “Ciindi nondili akati [kabantu ba Leza] ndilimvwa kwaanguluka amukwasyi wangu muparadaiso yakumuuya.” Sena mbomulimvwa oobo?

13. Nciiyo nzi ciyandika ncotujana mulugwalo lwa Bahebulayo 11:13?

¹³ Abumwi bube bwabasinsiku ibuyandika kwiiya nduyandisisyo lwabo lwakwaandaana abantu bakabazingulukide. Mbubwenya mbotwabona  mumuncali 1, bakali “kwaambilizya caantangalala kuti bakali beenzu alimwi bamuzwakule batakkalilili munyika iilya.” (Heb. 11:13) Sena mulikanzide kwaandaana anyika? Kuti naa mbocibede, kucita boobo tacili cuubauba. Pele kwiinda mulugwasyo lwa Leza alimwi a Banakristonyoko, mulakonzya kuzwidilila. Amuyeeye kuti, tamuli molikke. Boonse bayanda kubelekela Jehova bali munkondo. (Ef. 6:12) Nokuba boobo, tulakonzya kuzunda kuti twasyoma Jehova alimwi akumubona kuti ncikkalilo cesu citukwabilila.

14. Ino babelesi ba Jehova bakali kulindila “munzi” nzi?

¹⁴ Acimwi ciyandika nceeci: Amwiiye Abrahamu kwiinda mukugamika meso aanu kubulumbu. (2 Ko. 4:18) Mwaapostolo Paulo wakalemba kuti Abrahamu “wakali kulindila munzi uujisi ntalisyo zini-zini, imunzi ooyo wakaanzwa akuyakwa a Leza.” (Heb. 11:10) “Munzi” ooyo wakazikuba Bwami bwabu Mesiya. Cakutadooneka, Abrahamu wakeelede kuulindila “munzi” ooyo. Munzila imwi tatuulindili. Ulalela lino kujulu.  Kuyungizya waawo, kuli bumboni bunji butondezya kuti ino-ino buyootalika kweendelezya nyika. Sena Bwami oobo mulabusyoma kuti nkobuli? Sena bulamujatikizya mbomuzibona zyintu mubuumi, bweende bwamunyika iino alimwi azyintu nzyomubikkila kapati maano?—Amubale 2 Petulo 3:11, 12.

‘CIKKALILO’ CESU CINI-CINI MAMANINO MBWAAYAABUSWENA

15. Ncinzi ciyakucitika kulibaabo basyoma bweende bwazyintu obuno?

¹⁵ Mamanino aanyika ya Saatani mbwaayaabuswena, “mapenzi aali mbuli kumyongwa kwamukaintu uuyanda kutumbuka” ayakwiindila. (Mt. 24:7, 8) Zyintu ziyakwiindila kubija ciindi camapenzi mapati. Mayake ayakukolomoka alimwi bantu bayakuyoowa kujatikizya buumi bwabo. (Hab. 3:16, 17) Akaambo kakulibilika kapati, bayakuyandaula maccijilo “mumampangala amumyala yamumalundu.” (Ciy. 6:15-17) Pele kunyina mampangala aayakubakwabilila pe, alimwi kunyina mbunga yatwaambo twacisi naa mbunga yamakwebo iyaakubakwabilila.

16. Ino mbungano ya Bunakristo tweelede kwiibona buti, alimwi nkaambo nzi?

¹⁶ Nokuba boobo, bantu ba Jehova bayakuzumanana kukkomana alukwabililo lwa ‘cikkalilo’ cabo cini-cini, Jehova Leza. Mbubwenya mbuli musinsimi Habakuku, ‘tabakaleki kubotelwa muli Jehova, banoocikondwa muli Leza walufutuko lwabo.’ (Hab. 3:18) Muunzila nzi Jehova mwayakuba ‘cikkalilo cini-cini’ ciindi camapenzi? Tweelede kulindila. Pele tulakonzya kuba masimpe akaambo aaka: Mbubwenya mbuli bana Israyeli aciindi ca Kulonga, “nkamu mpati” iyakuzumanana kutobela bubambe, akupakamana lyoonse kubusolozi buzwa kuli Leza. (Ciy. 7:9; amubale Kulonga 13:18.) Busolozi oobo buyakuboola kwiinda mubweendelezi bwa Leza, ambweni kwiinda mububambe bwambungano. Mubwini, zyuulu zinji zyambungano nyika yoonse inga zyaboneka kuti kuli mboziswaangene ‘amaanda aamukati’ aakaambilwalimwi mulugwalo lwa Isaya 26:20. (Amubale.) Sena miswaangano yambungano mulaibikkila maano? Sena mulabweza ntaamu cakufwambaana kubusolozi bupegwa a Jehova kwiinda mububambe bwambungano?—Heb. 13:17.

17. Muunzila nzi Jehova mwali ‘cikkalilo’ nokuba kubabelesi bakwe basyomeka ibafwide?

¹⁷ Nobaba baabo ibafwa kabasyomeka mapenzi mapati naatanatalika balikwabilidwe a Jehova, ‘cikkalilo’ cabo. Munzila nzi? Kaindi basinsiku basyomeka nobakamana kufwa, Jehova wakaambila Musa kuti: “Ndime Leza wabamauso, Leza wa-Abrahamu a-Leza wa-Isaka, a-Leza wa-Jakobo.” (Kul. 3:6) Naakamana kuzubulula majwi aaya, Jesu wakayungizya kuti: “Tali Leza wabafwu, pele ngwabaumi, nkaambo boonse mbaumi kulinguwe.” (Lk. 20:38) Inzya, kuli Jehova, babelesi bakwe ibakafwa kabasyomeka kulinguwe bali mbuli kuti balapona; bubuke bwabo bulisinizyidwe.—Muk. 7:1.

18. Munyika mpya, mbuti Jehova mbwayakuba ‘cikkalilo’ cabantu bakwe munzila iilibedelede?

¹⁸ Munyika mpya iiboola ambele ino-ino, Jehova uyakuba ‘cikkalilo cini-cini’ cabantu bakwe munzila iimbi. Lugwalo lwa Ciyubunuzyo 21:3 lwaamba kuti: “Amubone! Tente lya Leza lili aabantu, alimwi uyookkala ambabo.” Mubwini, Jehova uyookkala abalelwa bakwe baanyika kwiinda mumwiiminizi Kristo Jesu. Yaakumana myaka iili 1,000, Jesu uyakupilusya Bwami kuli Bausyi, aakumana kuzuzikizya makanze aa Leza anyika. (1 Ko. 15:28) Kuzwa waawo, bantu balondokede tabakayandiki kuti Jesu azumanane kuba simwiimaakati; Jehova unooli aambabo. Eelo kaka tulijisi bulangizi bubotu kumbele! Aboobo, muciindi eeci ciceede, atusolekesye kwiiya mazyalani aakaindi aasyomeka kwiinda mukubona Jehova kuba ‘cikkalilo’ cesu cini-cini.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 20]

“Nsikooyookulekelezya pe”

[Cifwanikiso icili apeeji 22]

Bangelo ba Leza balabagwasya akubakwabilila babelesi bakwe