Sena Mulijisi “Moyo Wakuziba” Jehova?

“Njoobapa moyo wakuziba kuti ndime Jehova, lino bayooba bantu bangu.”—JER. 24:7.

INO INGA MWAINGULA BUTI?

Mbuti ba Juda banji mumazuba aa Jeremiya ‘mbobatakapalwidwe mumoyo’?

Nkaambo nzi toonse buyo ncotuyandika kulingula myoyo yesu yacikozyanyo?

Mbuti mbotukonzya kuba “[a]moyo wakuziba” Jehova?

1, 2. Nkaambo nzi bamwi balaziyanda nkuyu?

SENA nkuyu mulaziyanda? Bantu banji balaziyanda, akaambo kaceeco nkuyu ziligwa zilalimwa mumasena manji. Ba Juda bakaindi bakali kuziyanda kapati nkuyu. (Nah. 3:12; Lk. 13:6-9) Nkuyu zilijisi busani bunji, bamwi baamba kuti busani bwazyo bulagwasya kapati kumoyo.

² Aciindi cimwi Jehova wakakozyanisya nkuyu kumyoyo. Leza aawa tanaakali kwaamba zyabubotu bwakulya nkuyu pe.Eeco ncaakaamba kwiinda mumusinsimi Jeremiya cilamujatikizya nywebo alimwi abayandwa banu. Aaya akali maambilambali. Notulanga-langa ncaakaamba, amubone ncocipandulula eeco ku Banakristo.

3. Ino nkuyu izyakaambwa mulugwalo lwa Jeremiya caandaano 24 ziiminina nzi?

³ Atusaangune kubona Leza ncaakaamba kujatikizya nkuyu mumazuba aa Jeremiya. Mu 617 B.C.E., cisi caba Juda cakali mupenzi lipati lyakumuuya. Leza wakapa cilengaano cakali kutondezya zyintu zyakali kuboola kumbele kwiinda mukupa cikozyanyo camisyobo yobilo yankuyu—nkuyu “zibotu loko” alimwi ankuyu “zibi loko.” (Amubale Jeremiya 24:1-3.) Nkuyu zibi zyakali kwiiminina Mwami Zedekiya alimwi abambi ibakali mbulinguwe ibakali kupenzyegwa kapati a Mwami Nebukadinezara abasikalumamba bakwe. Mbuti kujatikizya Ezekiele, Daniele alimwi abaalumi botatwe ibakali mu Babuloni kale, alimwi aba Juda bamwi ibakali kuyakuletwa ku Babuloni? Balo bakali mbuli nkuyu zibotu. Aabo bakaceede bakali kuyakupiluka akuyakulula Jerusalemu alimwi atempele yalyo. Eezyi zyakacitika nokwakainda ciindi.—Jer. 24:8-10; 25:11, 12; 29:10.

4. Nkukulwaizya kuli buti nkotukonzya kujana mumajwi Leza ngaakaamba kujatikizya nkuyu zibotu?

⁴ Jehova wakaamba boobu kujatikizya baabo ibakali kwiimininwa ankuyu zibotu, wakati: “Njoobapa moyo wakuziba kuti ndime Jehova, lino bayooba bantu bangu.” (Jer. 24:7) Oolu ndolugwalo aayeeme cibalo eeci, alimwi  eeci cilakulwaizya kapati kaka! Leza uliyandide kupa bantu ‘moyo wakumuzyiba.’ Aawa, “moyo” waamba mbwabede muntu. Cakutadooneka, muliyandide kuba amoyo uuli boobo alimwi akuba akati kabantu ba Leza. Aboobo, kutegwa eeci cikonzyeke, mweelede kubweza ntaamu eezyi, kwiiya akubelesya nzyolyaamba Jwi lyakwe, kweempwa akusanduka, kwaaba buumi bwanu kuli Leza, alimwi akubbapatizyigwa muzyina lya Taata, lya Mwana alya muuya uusalala. (Mt. 28:19, 20; Mil. 3:19) Andiza mwakacita kale oobo, andiza mulaswaangana a Bakamboni ba Jehova lyoonse alimwi muli mukucita oobo.

5. Jeremiya naakalemba makani aamoyo, moyo wani ngwaakali kwaamba mubwini?

⁵ Kufwumbwa naa twakabweza kale ntaamu zyoonse eezyi naa pe, tweelede kubikkila maano kubukkale bwesu amicito. Mulakonzya kukabona kaambo ncocili boobo ikuti mwabona Jeremiya nzyaakalemba kujatikizya moyo. Zyaandaano zimwi zyabbuku lya Jeremiya zyakali kwaamba masi aakazingulukide, nokuba boobo cisi ca Juda ncecibikkilwa kapati maano ciindi cabulelo bwabami bosanwe. (Jer. 1:15, 16) Mubwini Jeremiya wakalemba kujatikizya bamaalumi, bamakaintu, alimwi abana ibakalyaabide kuli Jehova. Bamasyaanene babo cakuliyandila kabali cisi bakalisalide kuba mucilongwe eeci. (Kul. 19:3-8) Alimwi mumazuba a Jeremiya, bantu bakazuminizya kuti bakali bantu balyaabide kuli Leza. Bakaamba kuti: ‘Twaboola kulinduwe, nkaambo nduwe Jehova Leza wesu.’ (Jer. 3:22) Nokuba boobo, ino muyeeya kuti myoyo yabo yakali buti?

SENA MOYO WACIKOZYANYO ULEELEDE KUSILIKWA?

6. Nkaambo nzi ncotweelede kubikkila maano kapati kuzyintu Leza nzyaakaamba kujatikizya moyo?

⁶ Bamadokota bamazuba aano balakonzya kubelesya mincini imwi iisumpukide kutegwa babone mboubede moyo alimwi amboubeleka. Nokuba boobo, Jehova ulainda aawo mbubwenya mbwaakacita mumazuba a Jeremiya. Majwi ngaakaamba Leza alatondezya kuti walo alikke nguweelela, wakati: “Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede. Mebo nde-Jehova ndilalingula moyo, . . . kuti mbweedezye muntu bulumbu bweelede inzila zyakwe, bweelede micelo yamilimo yakwe.” (Jer. 17:9, 10) ‘Kulingula moyo’ munzila eeyi takweelene akulingula moyo wini uudunta kwaziindi zisika ku 3 bbiliyoni mumyaka iili 70 naa 80 ikucitwa abadokota. Muciindi caboobo, Jehova wakali kwaamba zyamoyo wacikozyanyo. “Moyo” caamba buntu bwamukati, kubikkilizya azyintu nzyotulombozya, nzyotuyeeya, nzyotukonzya kucita, mbotulilemeka, alimwi ambaakani zyesu. Mulijisi moyo uuli boobu. Leza ulakonzya kuulingula moyo uuli boobu, alimwi andinywe kuli mpomukonzya kusika mukuulingula.

7. Mbuti Jeremiya mbwaakapandulula myoyo yaba Juda banji bamumazuba aakwe?

⁷ Kutegwa tulibambile kulingulwa moyo, tulakonzya kubuzya kuti, ‘Ino moyo wacikozyanyo waba Juda banji wakali buti mumazuba aa Jeremiya?’ Kutegwa mujane bwiinguzi, amubone majwi aatayeeyelwi ngaakabelesya Jeremiya, wakati: “Luzubo loonse lwa-Israyeli abalo tabapalwidwe mumyoyo yabo.” Aawa tanaakali kwaamba kupalulwa kwabasankwa ba Juda pe, nkaambo wakaamba kuti: “‘Amubone! Mazuba alaboola,’ mbwaamba Jehova, ‘eelyo nendiyakumupa mulandu muntu uuli woonse uupaludwe pele uuzumanana kuba muciimo cakutapalulwa.’” Aboobo, nobaba bamaalumi ba Juda ibakapaludwe tiibakapaludwe “mumyoyo yabo.” (Jer. 9:25, 26) Ino eeci cakali kwaamba nzi?

8, 9. Ncinzi ba Juda banji ncobakali kuyandika kucita kujatikizya myoyo yabo?

⁸ Tulajana cini ncaapandulula majwi aakuti “tabapalwidwe mumyoyo yabo” mumajwi Leza ngaakaambila ba Juda aakuti: ‘Amugusye lulomo lwamyoyo yanu, nobantu  ba Juda anywebo nomukede mu Jerusalemu, kutegwa bukali bwangu butayandilili akaambo kabubi bwamilimo yanu.’ Ino micito yabo mibi yakatalikila kuli? Mukati, mumyoyo yabo. (Amubale Maako 7:20-23.) Kwiinda muli Jeremiya, Leza wakasilika aakali penzi ilyakali kupa kuti ba Juda bacite zibi. Myoyo yabo yakali miyumu alimwi iikatazya. Makanze aabo alimwi anzyobakali kuyeeya tiizyakali kumukkomanisya Leza pe. (Amubale Jeremiya 5:23, 24; 7:24-26.) Leza wakabaambila boobu: “Amulipalule kuli-Jehova akugwisya lulomo lwamyoyo yanu.”—Jer. 4:4; 18:11, 12.

⁹ Aboobo, ba Juda bamumazuba aa Jeremiya bakali kuyandika kusilikwa moyo wacikozyanyo—‘kupalulwa myoyo yabo’—mbubwenya mbuli mbobakacita aabo bamumazuba aa Musa. (Dt. 10:16; 30:6) ‘Kugwisya lulomo lwamyoyo yabo’ cakali kwaamba kuti beelede kugwisya eezyo izyakali kupa kuti myoyo yabo iyume—mbobakali kuyeeya, nzyobakali kuyandisya, naa makanze aayo aakali kukazyanya a Leza.—Mil. 7:51.

“MOYO WAKUZIBA” LEZA MAZUBA AANO

10. Kweelana acikozyanyo ca Davida, ncinzi ncotweelede kucita?

¹⁰ Eelo kaka tulikkomene kuti Leza ulatugwasya kuuzyiba moyo wacikozyanyo! Pele bamwi balakonzya kubuzya kuti, ‘Nkaambo nzi eeci ncociyandika kuli Bakamboni ba Jehova mazuba aano?’ Eeci tacaambi kuti Banakristo banji mumbungano beendela muzibi naa kuti batalika kuba mbuli ‘nkuyu zibi,’ mbubwenya mbobakabede ba Juda kaindi. Kwiindana aba Juda, babelesi ba Leza mazuba aano, mbantu balyaabide basalala. Nokuba boobo, amubone kulomba kwa Davida kuli Jehova kwakuti: “Undilingule, O Leza, uzibe moyo wangu. Undisunke, uzibe miyeeyo yangu. Bona na muli inzila imbi mulindime.”—Int. 17:3; 139:23, 24.

11, 12. (a) Nkaambo nzi umwi aumwi wesu ncayelede kulingula moyo wakwe? (b) Ncinzi ncatakaciti Leza?

¹¹ Jehova uyanda kuti umwi aumwi wesu abe alimwi akuzumanana kuba abukkale bubotu ibumukkomanisya. Kujatikizya baluleme, Jeremiya wakaamba kuti: ‘O Jehova wamakamu oobeteka baluleme, ulalingula myoyo amiyeeyo.’ (Jer. 20:12) Ikuti Leza Singuzuzyoonse ulalingula myoyo noiba myoyo yabaluleme, tweelede kulilingula mukasimpe. (Amubale Intembauzyo 11:5.) Notucita oobo, tulakonzya kubona bube, makanze naa mizeezo iitali kabotu iiyandika kubikkila maano. Ikuti kacili boobo, tweelede kuzyiba kuti kuli cilubide icipa kuti moyo wesu kautabikkili maano, andiza ‘lulomo lwamoyo wesu’ wacikozyanyo luyandika kugwisya. Ooku nkusilika moyo wacikozyanyo. Ikuti kamuzumina kuti ncintu cibotu kulingula moyo wanu wacikozyanyo, ncinzi ncomweelede kucita? Alimwi mbuti mbomukonzya kucita oobo?—Jer. 4:4.

¹² Cintu comwe ncotweelede kuzyiba ncakuti: Tatweelede kulangila Jehova kutusinikizya kuti tucince. Wakaamba kuti: ‘Nkuyu zibotu uyakuzipa moyo wakumuziba.’ Tanaakaamba kuti uyakubasinikizya kuti bacince myoyo yabo. Bakali kuyandika luyandisisyo lwakuba amoyo uutondezya kuti balimuzyi Leza. Sena ooyo tauli moyo ngotuyanda?

13, 14. Muunzila nzi moyo wa Munakristo moukonzya kumuletela ntenda?

¹³ Jesu wakaamba kuti: “Mumoyo mulazwa mizeezo mibi, bujayi, bumambe, bwaamu,  bubbi, bumboni bwakubeja akusampaula.” (Mt. 15:19) Cakutadooneka, ikuti moyo wamukwesu uutabikkili maano wamupa kuti acite bwaamu naa bumambe mpoonya kateempwi, Leza ulakonzya kulekelalimwi kumukkomanina. Nokuba boobo, naba muntu iwatacita cibi icili boobo ulakonzya kulekela kulombozya kubi mumoyo wakwe. (Amubale Matayo 5:27, 28.) Kulingula moyo wesu aciindi cili boobu kulakonzya kugwasya kapati. Ikuti mwaulanga-langa moyo wanu, sena mulakonzya kujana mizeezo iitali kabotu kujatikizya muntu umwi ngomwiindene zizo, kulombozya kwalo Leza nkwatakonzyi kuzumizya?

¹⁴ Andiza mukwesu kakunyina ‘kujaya’ ulakonzya kubijilwa mumoyo akumusula Munakristonyina. (Lev. 19:17) Sena uyakusolekesya kulwana kulimvwa kuli boobu kwalo ikukonzya kupa kuti moyo wakwe ucileke kubikkila maano?—Mt. 5:21, 22.

15, 16. (a) Amupe cikozyanyo citondezya Munakristo mbwakonzya kuba ‘amoyo uutapalwidwe.’ (b) Nkaambo nzi ncomuyeeya kuti ‘moyo uutapalwidwe’ taukonzyi kumukkomanisya Jehova?

¹⁵ Cikkomanisya ncakuti, Banakristo banji tabajisi ‘penzi eeli lyamoyo.’ Nokuba boobo, Jesu alimwi wakaamba “[zya]mizeezo mibi.” Eeyi, mizeezo naa bube ibukonzya kunyonganya buumi munzila zinji. Mucikozyanyo, muntu ulakonzya kuti kayanda kusyomeka kuli banamukwasyi munzila iiteelede. Cakutadooneka, Banakristo bayanda kutondezya “luyando lwakuzyalwa andulo” kubanamukwasyi, tabayandi kuba mbuli bantu banji ibatajisi bube oobu “[mu]mazuba aamamanino” aano. (2 Ti. 3:1, 3) Nokuba boobo, tulakonzya kuciindizya mukutondezya bube oobu. Bantu balimvwa kuti tabakonzyi kucileka kumvwana abanamukwasyi. Akaambo kaceeco, balakonzya kuba kulubazu lwabanamukwasyi ikuti umwi mumukwasyi walubizyilwa. Amuyeeye buyo ncobakacita banabokwabo a Dina akaambo kakulimvwa boobu. (Matl. 34:13, 25-30) Alimwi amuyeeye icakali mumoyo wa Abisalomu calo icakapa kuti ajaye munyina uutegwa Amnoni. (2 Sam. 13:1-30) Cakutadooneka, “mizeezo mibi” njiyakapa kuti bacite oobo!

¹⁶ Masimpe kuti Banakristo bakasimpe tabajayi. Nokuba boobo, sena balakonzya kubijilwa amukwesu naa mucizyi ngobayeeyela kuti wakalubizyila umwi wamumukwasyi wabo? Balakonzya kukaka kutamba kwamukombinyina ngobayeeyela kuti wakapenzya umwi wamumukwasyi wabo naa kukaka kumutamba mukombinyina ooyo. (Heb. 13:1, 2) Micito iili boobo mibi alimwi akutayanda kusamausya takweelede kulekwa buyo pe, nkaambo kutondezya kubula luyando. Sikulingula myoyo ulakonzya kwaamba kuti ‘myoyo eeyo taipalwidwe.’ (Jer. 9:25, 26)  Amuyeeye aabo Jehova mbaakaambila kuti: ‘Amugwisye lulomo lwamyoyo yanu.’—Jer. 4:4.

MBOMUKONZYA KUJANA AKUZUMANANA KUBA ‘AMOYO WAKUZYIBA’ LEZA

17. Mbuti kuyoowa Jehova mbokukonzya kutugwasya kuba amoyo uubikkila kapati maano?

¹⁷ Ncinzi ncomukonzya kucita ikuti nomwalingula moyo wanu wacikozyanyo mwabona kuti taubikkili maano kapati kululayo lwa Jehova alimwi mwabona kuti munzila imwi moyo wanu ‘taupalwidwe’? Andiza nomwalingula, mwajana kuti moyo wanu uyoowa muntu, uyandisya mpuwo naa kulikkomanisya, andiza umuyunga kuti muyumye moyo naa muyandisye kulyeendelezya. Ikuti kacili boobo, tamuli muntu wakusaanguna kucitikilwa zyintu zili boobu pe. (Jer. 7:24; 11:8) Jeremiya wakalemba kuti ba Juda ibatakali kusyomeka mumazuba aakwe bakajisi “moyo muyumu uukataazya.” Alimwi wakayungizya akwaamba kuti: “Tabana kwaamba mumyoyo yabo kuti, atuyoowe Jehova Leza wesu uutuwisizya imvula, imvula yakutanga amvula yamiyoba.” (Jer. 5:23, 24) Eeci citondezya kuti, kutegwa tugwisye “lulomo lwamyoyo” yesu, tweelede kuyoowa Jehova kwiinda zyintu zyoonse alimwi akumulumba. Kuyoowa kuli boobu kulakonzya kutugwasya kuba amoyo uubikkila kapati maano kutegwa tube mbuli mbwayanda Leza.

18. Ncinzi Jehova ncaakasyomezya baabo ibali mucizuminano cipya?

¹⁸ Alimwi tulakonzya kubeleka antoomwe a Jehova ciindi natugwasya kuba ‘amoyo wakumuzyiba.’ Mubwini, eeci ncencico ncaakasyomezya kucitila bananike mucizuminano cipya naakati: “Nzoobika Mulao wangu mukati kabo, nzooulemba amyoyo yabo, nkabela nzoobabeda Leza wabo, abalo bazoondibeda bantu bangu.” Mbuti kujatikizya kumuzyiba ncobeni? Wakaamba kuti: “Nkabela tabakooyooiisya umwi aumwi mweenzinyina, aumwi aumwi mwanaakwabo, kuti, Koziba Jehova, nkaambo bazoondiziba boonse buyo, nibaba baniini nibaba bapati . . . Nkaambo nzoobalekelela milandu yabo, azyalo zibi zyabo nsikoozooziibalukwa limbi.”—Jer. 31:31-34. *

19. Mbulangizi nzi butaliboteli mbobajisi Banakristo bakasimpe?

¹⁹ Kufwumbwa naa mulangila kuyakutambula bulumbu ibuboola kwiinda mucizuminano cipya kujulu naa anyika, mweelede kumuzyiba Jehova alimwi akuba cibeela cabantu bakwe. Kamutanatambula zilongezyo eezyo, mweelede kulekelelwa zibi zyanu kwiinda mucinunuzyo ca Kristo. Kaambo kakuti mulakonzya kulekelelwa zibi keelede kumupa kuti kamulekelela bamwi, nobaba baabo bamupenzya. Luyandisisyo lwanu lwakugwisya zyintu zyoonse zibi zili kumoyo kuyakugwasya kapati kumoyo wanu. Kucita oobo kuyakutondezya kuti mulayanda kumubelekela Jehova alimwi kuyakutondezya kuti mwatalika kumuzyiba kabotu lino. Muyakuba mbuli baabo Jehova mbaakaamba kwiinda muli Jeremiya naakati: “Muyoondiyandaula nkabela muyoondijana, nkokuti na mwandiyandaula camoyo woonse. Njoojanwa ndinywe.”—Jer. 29:13, 14.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 11]

Kulingula moyo alimwi akugwisya mizeezo mibi kuyakupa kuti tukatambule zilongezyo