Bakalyaaba Amoyo Woonse—Kuyakubelekela mu Mexico

CILAKKOMANISYA kubona mweelwe uuyaabuyungizyika wabakubusi Bakamboni ibaubya-ubya bukkale bwabo kutegwa bayungizye mulimo wabo wa Bunakristo. (Mt. 6:22) Ino nkucinca nzi nkobacita? Mbuyumuyumu nzi mbobajana? Kutegwa tujane bwiinguzi, atubazyibe kabotu bamwi ibabelekela ku Mexico lino.

“KULI KUCINCA NKOTWAKACITA”

Ba Dustin aba Jassa ibakazwa kucisi ca United States bakakwatana mu January 2007. Ciindi cisyoonto kuzwa waawo bakacikonzya kujana bwato akukkala muli mbubo lyoonse—cintu ncobakali kuyanda kwaciindi cilamfwu. Bwato bwabo bakabwaangilila munsi-munsi adolopo lya Astoria, Oregon, mu U.S.A., dolopo lyeebeka alimwi likkomanisya lizingulukidwe amalundu aajisi masamu alimwi amalundu aajisi caanda, kuli buyo musinzo mufwaafwi kuzwa ku Pacific Ocean. Ba Dustin bakaamba kuti: “Kufwumbwa nkoolanga kwakali kuboneka kabotu kapati.” Banabukwetene aaba bakalimvwa kuti bakali kupona buumi buubauba, kusyoma Jehova. Bakali kuyeeya kuti, ‘kayi tukkala mubwato bulampa mamita aali 7.9, tubeleka mulimo uubelekwa mawoola masyoonto kutegwa tujane ziyandika, tuswaangana kumbungano iibelesya mwaambo wakunze aacisi, alimwi ciindi aciindi tulacita bupainiya bwakugwasyilizya.’ Pele nokwakainda ciindi, bakabona kuti bakali kulicenga. Ba Dustin bakaamba kuti: “Muciindi cakugwasyilizya mbungano, ciindi cinji twakajisi bubi kubamba bwato bwesu. Twakalizyi kuti kutegwa  tubikke Jehova mubusena bwakusaanguna mubuumi bwesu, twakeelede kucinca.”

Ba Jassa bakayungizya kuti: “Kanditanakwatwa, ndakali kukkala ku Mexico alimwi ndakali mumbungano iibelesya Cingisi. Ndakalikkomene kubelekela nkuko, alimwi ndakaliyandide kupiluka.” Kutegwa bayumye makanze aabo aakubelekela kucisi cili kulamfwu, ba Dustin aba Jassa bakatalika kubelesya ciindi cakukomba mumukwasyi, kubala zyakuluula zijatikizya bakwesu abacizyi ibakalongela kuzisi kwalo ikwakali myuunda yakeelede kutebulwa. (Joh. 4:35) Ba Dustin bakaamba kuti: “Twakali kuyanda kujana lukkomano luli boobo.” Ciindi nobakamvwa kubeenzinyina baku Mexico kuti kwabambwa kabunga kapya ikayandika lugwasyo, ba Dustin aba Jassa bakasala cakucita. Bakaleka milimo yabo, bakasambala bwato bwabo akuunka ku Mexico.

“CINTU CIINDA KUBOTA ICAKATUCITIKILA”

Ba Dustin aba Jassa bakakkala mudolopo lya Tecomán—mbubwenya buyo munsi aa Pacific Ocean pele makkilomita aali 4,345 kumusanza kwa Astoria. Ba Dustin bakaamba kuti: “Muciindi cakumvwa muuwo uutontola akubona malundu, kulapya kapati alimwi tubona buyo zisamu zyamalemoni kufwumbwa nkowalanga.” Kumatalikilo tiibakajana milimo. Akaambo kakubula mali, bakali kulya buyo mupunga anyabo ziindi zyobilo abuzuba, nsondo ansondo. Ba Jassa bakaamba kuti: “Pele cakulya cesu nocakatalika kutucima, basikwiiya Bbaibbele besu bakatalika kutupa mango, mabbanana, mapopo alimwi amalemoni.” Mukuya kwaciindi, banabukwetene aaba bakajana mulimo kucikolo ciyiisya mwaambo aa Intaneti icili ku Taiwan. Lino mali ngobavwola kumulimo ooyu alabagwasya kulanganya nzyobayandika abuzuba.

Mbuti ba Dustin aba Jassa mbobalimvwa kujatikizya buumi bwabo bupya? Baamba kuti: “Cilongwe cesu a Jehova alimwi aakati kesu cayuma kapati kwiinda kaindi. Abuzuba tulacita zyintu zinji antoomwe—kuunka mumulimo wamumuunda, kubandika mbotukonzya kugwasya basikwiiya Bbaibbele besu akulibambila miswaangano. Kuyungizya waawo, tulaangulukide kuzyintu zinji zyamubuumi izyakali kutukatazya kaindi.” Bayungizya kuti: “Lino tulakamvwisya kapati kaambo nkotwatakali kumvwisya kaindi—mbocili camasimpe cisyomezyo cijanwa mulugwalo lwa Intembauzyo 34:8, ‘Amulabile, mubone kuti Jehova mubotu.’”

NCINZI CIBAKULWAIZYA BABELESI BANJI IBALYAABA?

Ibakwesu abacizyi bainda ku 2,900—banabukwetene abaabo batanakwata naa kukwatwa, bunji bwabo ibajisi myaka yakuzyalwa iili akati ka 20 a 30—balonga kutegwa bakabelekele muzyooko zyaku Mexico kwalo kuciyandika kapati basikukambauka Bwami. Nkaambo nzi Bakamboni aaba boonse ncobasala kucita mulimo ooyu uujisi buyumuyumu? Ciindi kabunga kamwi akati kabo nobakabuzyigwa mubuzyo ooyu, bakapa twaambo tupati totatwe. Ino ntwaambo nzi?

 Kutondezya kuti tulamuyanda Jehova alimwi abantuma. Leticia wakabbapatizyigwa naakajisi myaka yakuzyalwa iili 18. Waamba kuti: “Ciindi nondakalyaaba kuli Jehova, ndakalizyi kuti eeci caamba kumubelekela amoyo wangu woonse abuumi bwangu boonse. Aboobo, kutondezya luyando lwangu kuli Jehova camoyo woonse, ndakali kuyanda kubelesya ciindi cangu cinji anguzu mumulimo wakwe.” (Mk. 12:30) Ba Hermilo, balo lino bakwete ba Leticia, bakajisi myaka yakuzyalwa iinda buyo asyoonto a 20 ciindi nobakalonga kuyakubelekela kubusena kwakali kuyandika basikukambauka Bwami banji. Bakaamba kuti: “Ndakabona kuti kugwasya bantu kuzuzikizya nzyobayandika kumuuya ilakonzya kuba nzila iinda kubota yakutondezya luyando lwangu kuli simukoboma.” (Mk. 12:31) Aboobo, bakalonga kuzwa mudolopo libotu lya Monterrey kwalo nkobakali kupona buumi bwakuliiba kababeleka mubbanki akuunka kudolopo lisyoonto.

Kujana lukkomano lwini-lwini alimwi lutamani. Nokwakainda buyo ciindi cisyoonto kuzwa nobakabbapatizyigwa, ba Leticia bakasangana painiya mucizyi iwakatalika kaindi kuya kudolopo lili kulamfwu, kwalo nkobakakambauka kwamwezi omwe. Ba Leticia baamba kuti: “Ndakagambwa kubona bantu mbobakali kuukkomanina mulumbe wa Bwami ngotwakali kubaambila alimwi cakandipa kukkomana kapati. Kumamanino aamwezi ooyo, ndakalyaambauzya mumoyo kuti, ‘Eeci ncondiyanda kucita mubuumi bwangu!’” Mbubwenya buyo akuli ba Essly, mucizyi uutakwetwe lino uujisi myaka yakuzyalwa iinda buyo asyoonto a 20, ndukkomano ndwaakabona ilwakamupa kuti atalike mulimo ooyu wakubelekela kubusena kubulide kapati basikukambauka Bwami. Naakali kusekondali, wakaswaanganya Bakamboni bali mbobabede ibasungu ibakabelekela kubusena kwakabulide basikukambauka Bwami. Wakaamba kuti: “Kubona bakwesu abacizyi aabo mbobakakkomene cakapa kuti andime ndiyande kupona buumi mbobakali kupona.” Bacizyi banji bacita mbubonya mbuli ba Essly. Mubwini, ku Mexico kuli bacizyi batakwetwe ibainda ku 680 ibabelekela kubusena kubulide basikukambauka Bwami. Eelo kaka balapa cikozyanyo cibotu kubana-bana akubapati!

Kupona buumi bujisi mpindu alimwi bukkomanisya. Naakamana lwiiyo lwakusekondali, kuli bakalisungula kubbadelela ba Essly mali aalwiiyo lwakucikolo cipati. Bamusela wabo bakabakulwaizya kuzumina akuzumanana “abuumi bwakulikondelezya”—kujana digili, mulimo waatala, kuba aamootokala alimwi akujana ciindi cakulikondelezya kumasena aambi. Nokuba boobo, tiibakalutobela lulayo lwabo. Ba Essly bakaamba kuti: “Beenzuma bamwi Banakristo bakatobela zyintu eezyo aboobo ndakabona kuti mbaakani zyakumuuya kulimbabo tiizyakacili cintu ciyandika kapati. Alimwi ndakabona kuti bakatyompwa amapenzi ngobakajana ciindi nobakali kuyaabunjila kapati muzyintu zicitika munyika eeyi. Ndakali kuyanda kubelesya bukubusi bwangu kubelekela Jehova kusikila mpondigolela.”

 Ba Essly bakatola lwiiyo lumbi ilwakabagwasya kujana mulimo kutegwa kabakonzya kujana mali aakuligwasya kumwi kabacita mulimo wabupainiya, mpoonya bakalongela kubusena basikukambauka Bwami nkobakali kuyandika cakufwambaana. Bakalisungula kwiiya myaambo yamucisi iyaambwa abantu baitwa kuti Otomi a Tlapaneco. Lino nobalanga musyule myaka yotatwe yainda yakukambaukila mumasena aakulamfwu, baamba kuti: “Kubelekela kubusena kubulide basikukambauka Bwami kwandiletela lukkomano alimwi akuba abuumi bulaampindu. Pele ciinda zyoonse, cilongwe cangu a Jehova cayuma kapati.” Ba Phillip aba Racquel, banabukwetene ibajisi myaka yakuzyalwa iibalilwa kuma 30 ibazwa ku United States balaazuminizya majwi aayo. Bakaamba kuti: “Nyika iyaabucinca cakufwambaana cakuti banji balimvwa kuti buumi bwabo tabukwabilidwe. Pele kubelekela kubusena nkotucijana bantu banji ibaswiilila kumulumbe wamu Bbaibbele citupa kulimvwa kuti buumi bwesu bulaampindu. Eeci cilakkomanisya kapati.”

MBOBACIKONZYA KUMANA BUYUMUYUMU

Masimpe kuti kubelekela kubusena kubulide basikukambauka Bwami kuli buyumuyumu. Buyumuyumu bumwi buliko nkujana mali aakuligwasya. Kutegwa mucikonzye kucita oobo, mweelede kulisungula kucinca bukkale kweelana akubusena nkomubede. Ba Verónica, bapainiya ibabeleka kwaciindi cilamfwu bakapandulula kuti: “Mubusena bumwi nkondakabelekela, ndakali kujika akusambala zyakulya zitaduli. Mucilawo cimbi, ndakali kusambala zyakusama alimwi akugela masusu. Lino ndibeleka mulimo wakusalazya muŋanda alimwi akuyiisya bazyali bapya, kubayiisya mbobakonzya kubandika abana babo.”

Kucinca bukkale kweelana azilengwa zyamucisi cimbi alimwi ziindene cilakonzya kukatazya kapati ciindi nokkala abantu bamucilawo cakubusena buli kulamfwu. Mbocakabede kuli ba Phillip aba Racquel ciindi nobakali kubelekela mumbungano iibelesya mwaambo waci Nahuatl. Ba Phillip bakaamba kuti: “Kwiindana kwazilengwa kwakali kupati.” Ncinzi cakabagwasya kucinca? Bakaamba kuti: “Twakabikkila maano kuzyintu zibotu nzyotwakabona akati kabantu babelesya mwaambo waci Nahuatl—kukamantana mumikwasyi yabo, kusyomeka muzyintu nzyobakali kucita umwi amweenzinyina alimwi abwaabi bwabo.” Ba Racquel bakayungizya kuti: “Twakaiya zinji notwakali kukkala kokuya alimwi akubakwesu abacizyi mbotwakali kubeleka limwi bamucilawo eeciya.”

MBOMUKONZYA KULIBAMBILA

Kuti kamuyanda kubelekela kubusena buli kulamfwu ikubulide, ncinzi ncomukonzya kucita lino kutegwa mulibambile? Bakwesu abacizyi bajisi luzyibo mumulimo ooyu bakaamba boobu: Kamutanalonga, amutalike kuubyaubya buumi bwanu akwiiya kukkutila azyintu nzyomujisi. (Flp. 4:11, 12) Ncinzi cimbi ncomukonzya kucita? Ba Leticia bakaamba kuti: “Ndakali kukaka milimo yakumubili iyakali kuyandika kubeleka ciindi cilamfwu akukkala mubusena bomwe. Ndakali kuyanda kweenda kufwumbwa ciindi akuunka kufwumbwa nkondakali kuyandika.” Ba Hermilo bakaamba kuti: “Ndakaiya kujika, kuwasya zisani alimwi akuccisa.” Ba Verónica bakaamba kuti: “Nondakali kukkala kuŋanda abazyali alimwi abasyoonto bangu, ndakali kugwasyilizya kusalazya aŋanda alimwi ndakaiya kujika zyakulya zijisi busani pele zitaduli. Alimwi ndakaiya mbokuyobolwa mali.”

Ba Levi aba Amelia ibakazwa ku United States lino ibajisi myaka iili lusele mucikwati baluula mipailo iigaminide mboyakabagwasya kulibambila kuyakubelekela ku Mexico. Ba Levi bakaamba kuti: “Twakali kubalila mali ngotwakali kukonzya kubelesya kwamwaka omwe twaunka kucisi cili kulamfwu mpoonya twakali kulomba Jehova mumupailo kutegwa atugwasye kujana mweelwe ngweenya ooyo wamali.” Mumyezi buyo misyoonto bakali kukonzya kuyobola mweelwe wamali ngobakaambide mumupailo wabo, alimwi bakanyamuka kakunyina kuwayawaya. Ba Levi bakaamba kuti: “Jehova wakaingula kulomba kwesu kugaminide, aboobo lino cakali ciindi cesu kucita lubazu lwesu.” Ba Amelia bakayungizya kuti: “Twakali kuyeeya kuti inga twakkala buyo mwaka omwe, pele tuli kokuno kwamyaka iili ciloba lino, alimwi tatuyeeyi kupiluka. Kukkala kokuno catupa kubona Jehova mbwagwasya. Abuzuba tulabona bumboni butondezya bubotu bwakwe.”

Ba Adam aba Jennifer, banabukwetene ibakazwa ku United States ibabelekela mumbungano iibelesya Cingisi ku Mexico, abalo mupailo wakabagwasya kapati. Bakakulwaizya kuti: “Mutalindili bukkale bubotu kapati. Kulombozya kwanu kwakubelekela kucisi cili kulamfwu aabe makani ngomupailila, mpoonya amucite kweelana amipailo yanu. Amuubyeubye buumi bwanu, amulembele mutabi mucisi nkomuyanda kuyakubelekela, mpoonya mwamana kubalila mali, amubweze ntaamu.” * Kuti mwacita oobo, buumi bukkomanisya kapati kumuuya bunoomulindila.

[Bupanduluzi buyungizidwe]

[Cifwanikiso icili apeeji 3]

Ba Dustin aba Jassa

[Cifwanikiso icili apeeji 4]

Ba Amelia aba Levi

[Cifwanikiso icili apeeji 4]

Ba Racquel aba Phillip

[Cifwanikiso icili apeeji 4]

Ba Essly

[Cifwanikiso icili apeeji 5]

Ba Leticia aba Hermilo

[Cifwanikiso icili apeeji 5]

Ba Verónica

[Cifwanikiso icili apeeji 5]

Ba Adam aba Jennifer