Did You Know?
SENA MULIZYI?
Sena tempele lyamu Jerusalemu kuli nolyakayakululwa kuzwa mu 70 C.E.?
JESU wakaamba kuti kunyina bbwe lyatempele lya Jehova lyakali kuyakucaala atala aabbwenyina—businsimi ibwakazuzikizyigwa ciindi basikalumamba bana Roma ansi aabweendelezi bwa Titus nobakanyonyoona Jerusalemu mu 70 C.E. (Mt. 24:2) Kumane mukuya kwaciindi, Mwami Julian wakapanga bubambe bwakuyakulula tempele.
Julian ngomwami wamamanino watakali kukomba iwakeendelezya mu Roma. Ooyu mujwa wa Constantine Mupati wakatambula lwiiyo ilwakali kwaambwa kuti ndwiiyo lwa Bunakristo. Pele naakabikkwa acuuno cabwami mu 361 C.E., caantangalala wakalukaka lwiiyo oolo alimwi a Bunakristo bwakuupaupa ameso bwakuciindi eeco akuyanda bukombi bwakubeja. Mabbuku aamba zyakaindi amwaamba kuti wakali “Siluleyo.”
Julian wakali busulide Bunakristo. Kaambo kamwi kakamupa kucita boobo nkakuti kacili amyaka iili cisambomwe yakuzyalwa, wakabona baiminizi ba Bunakristo kabajaya bausyi alimwi amusazinyina. Kweelana abasikulemba makani aakaindi aacikombelo, Julian wakakulwaizya ba Juda kuyakulula tempele lyabo, akaambo kakuti wakali kuyanda kutondezya kuti Jesu wakali musinsimi wakubeja. *
Tacidoonekwi kuti Julian wakalibikkide bubambe bwakuyakulula tempele. Basikulemba makani aakaindi balakazyanya kuti naa ngowakatalisya mulimo wakuyakulula tempele, alimwi akuti naa ngonguwe, bayanda kuzyiba cakapa mulimo kwiima. Nokuba boobo, kaambo komwe kalizyibidwe. Julian wakajaigwa mumyaka iitasiki kuli yobilo kuzwa ciindi naakaba mwami, alimwi mulimo wakuyakulula awalo wakaima ciindi naakafwa.
[Bupanduluzi buyungizidwe]
^ munc. 5 Jesu taakwe naakaamba kuti tempele talikayakululwi, pele wakaamba kuti liyakunyonyoonwa, alimwi cakacitika eeco mu 70 C.E.
[Cifwanikiso icili apeeji 32]
Ambweni mbolyakali kulibonya tempele mumazuba aa Jesu kalitananyonyoonwa mu 70 C.E.
[Cifwanikiso]
Aakali tempele lino kuli Bbwe libulungusene
[Kulumba]
Photo: Todd Bolen/BiblePlaces.com
