MIBUZYO YABASIKUBALA

Ino ‘bana ba Leza mwini-mwini’ ibaambidwe mulugwalo lwa Matalikilo 6:2, 4 kuti bakali kupona zambangulwe kalitanacitika mbaani?

▪ Bumboni butondezya kuti majwi aaya aamba bana ba Leza bamuuya. Pele ino mbumboni nzi oobo?

Kapango kakusaanguna kaamba kuti: ‘Bana ba-Leza mwini-mwini bakabona bana basimbi babantu kuti mbabotu, nkabela bakakwata kufwumbwa mbobakali kuyanda akati kabo.’—Matl. 6:2.

Mumagwalo aa Chihebrayo, majwi aakuti ‘bana ba Leza mwini-mwini’ alimwi aakuti ‘bana ba Leza’ mumwaambo wakusaanguna alajanika mulugwalo lwa Matalikilo 6:2, 4; Jobu 1:6; 2:1; 38:7; alimwi a Intembauzyo 89:6. Ino tupango ootu tutondezya nzi kujatikizya ‘bana ba Leza’ aaba?

Cakutadooneka, ‘bana ba Leza mwini-mwini’ mbotubala mulugwalo lwa Jobu 1:6 zyakali zilenge zyamuuya izyakaimvwi kumbele lya Leza. Akati kabo kwakali a Saatani walo ‘iwakali kweendeenda munyika.’ (Job. 1:7; 2:1, 2) Mbubwenya buyo, amulugwalo lwa Jobu 38:4-7, tubala kujatikizya ‘bana ba Leza’ balo ‘ibakoompolola mukusekelela’ ciindi Leza ‘naakabikka bbwe lyacooko’ lyanyika. Beelede kuti bakali bangelo, nkaambo bantu tiibakaningalengwa. ‘Bana ba Leza’ ibaambidwe mulugwalo lwa Intembauzyo 89:6 cakutadooneka nzilenge zyakujulu izili a Leza, ikutali bantu pe.

Aboobo, ino ‘bana ba Leza mwini-mwini’ ibaambidwe mucibalo cili mulugwalo lwa Matalikilo 6:2, 4 mbaani? Kweelana atwaambo twamasimpe twamu Bbaibbele ntotwalanga-langa, cileelela kwaamba kuti cibalo eeci caamba bana ba Leza bamuuya ibakaboola anyika.

Bamwi cilabayumina kuzumina kuti bangelo balakonzya kukukkomanina koonana. Majwi aa Jesu aalembedwe mulugwalo lwa Matayo 22:30 atondezya kuti cikwati alimwi akoonana taziko kujulu pe. Pele ziindi zimwi bangelo bakasama mibili yanyama, alimwi buya akulya alimwi akunywa abantu. (Matl. 18:1-8; 19:1-3) Aboobo, cileelela kwaamba kuti muciimo eeco cakuba amibili yanyama, bakali kukonzya koonana abamakaintu.

Kuli twaambo twamu Bbaibbele itutupa kusyoma kuti bangelo bamwi bakacita oobo. Lugwalo lwa Juda 6, 7 lweezyanisya cibi cabaalumi baku Sodoma, balo ibakatobela zisusi zyanyama zitondwa kucibi ‘cabangelo ibatakazumanana mubusena bwabo bwakusaanguna pele ibakasiya busena bwabo bwakukkala bubeelede.’ Cintu cikozyenye akati kabangelo alimwi abana Sodoma ncakuti boonse ‘bakacita bwaamu butaambiki akutobela zisusi zyanyama zitondwa.’ Cibalo cikozyenye aceeci nciceeco cili mulugwalo lwa 1 Petulo 3:19, 20, icaamba bangelo ibatakamvwida ‘mumazuba aa Nowa.’ (2 Pe. 2:4, 5) Aboobo, ncobakacita bangelo ibatakamvwida mumazuba aa Nowa cilakonzya kukozyanisyigwa acibi camu Sodoma a Gomora.

Kumvwisya twaambo ootu munzila eeyi kulagwasya kuti twazumina kuti ‘bana ba Leza mwini-mwini’ ibaambidwe mulugwalo lwa Matalikilo 6:2, 4 bakali bangelo balo ibakasama mibili yanyama akucita bwaamu abamakaintu.

 Bbaibbele lyaamba kuti Jesu ‘wakakambaukila myuuya muntolongo.’ (1 Pe. 3:19) Ino eeci caamba nzi?

▪ Mwaapostolo Petro wakaamba myuuya eeyi kuti njiyeeyo “yatakali kuswiilila ciindi Leza naakali kulindila cakukkazyika moyo kumazuba aa Nowa.” (1 Pe. 3:20) Cilasalala kuti Petro wakali kwaamba zilenge zyamuuya eezyo izyakasala kusangana Saatani mukuzanga. Juda wakaamba bangelo balo “batakazumanana mubusena bwabo bwakusaanguna pele ibakasiya busena bwabo bwakukkala bubeelede,” kuti Leza “ulibayobwede kabaangidwe nketani lyoonse mumudima uusiya mbi kusikila nobayoobetekwa mubuzuba bupati.”—Jud. 6.

Muunzila nzi zilenge zyamuuya eezyi mozyatakamvwida mumazuba aa Nowa? Kalitanacitika Zambangulwe, myuuya mibi eeyi yakasama mibili yabantu—cintu Leza ncaatakakanzide kuti kaicita. (Matl. 6:2, 4) Kuyungizya waawo, bangelo aabo bakoonana abamakaintu, bakacita cintu citondwa. Leza taakwe naakalenga zilenge zyamuuya kuti kazyoonana abamakaintu. (Matl. 5:2) Bangelo aaba babi alimwi ibatakamvwida bayakunyonyoonwa ciindi Leza ncabikkide caakusika. Juda waamba kuti, calino bali mubukkale bwaambwa kuti “mumudima uusiya mbi”—naa ntolongo yakumuuya.

Ndilili alimwi mbuti Jesu mbwaakakambaukila “myuuya muntolongo”? Petro wakalemba kuti eeci cakacitika ciindi Jesu ‘naakabusyigwa amubili wamuuya.’ (1 Pe. 3:18, 19) Amubone alimwi kuti Petro wakabelesya majwi aakuti Jesu ‘wakakambaukila.’ Majwi ngaakabelesya Petro aakuti wakakambaukila, apa muzeezo wakuti kukambauka ooku kwakacitika Petro katanalemba lugwalo lwakwe lwakusaanguna. Aboobo, ciboneka kuti aciindi cimwi kabusyidwe kale, Jesu wakaambila myuuya mibi eeyi kujatikizya cisubulo ceelede ncoiya kutambula. Tiikwakali kukambauka kupa bulangizi kumyuuya eeyi. Pele kwakali kukambauka lubeta. (Jon. 1:1, 2) Jesu wakalitondezyede kale lusyomo lwakwe alimwi akumvwida kusikila kulufwu alimwi wakabusyigwa—kutondezya ncobeni kuti Diabolosi wakanyina nguzu alinguwe, aboobo Jesu wakalijisi nguzu zyakwaamba majwi aakusinganya.—Joh. 14:30; 16:8-11.

Kumbele, Jesu uyakwaanga alimwi akusowa Saatani abangelo aaba mumulindi uutagoli. (Lk. 8:30, 31; Ciy. 20:1-3) Kusikila ciindi eeco, bangelo aaba ibatakamvwida banooli mumudima uusiya mbi munzila yakumuuya alimwi kunyonyoonwa kwabo kulisinizyidwe.—Ciy. 20:7-10.