Mwami Wakakkomana Kapati!
MAKANI EESU AAKAINDI
Mwami Wakakkomana Kapati!
MU AUGUST 1936, ku Swaziland, Mumunzi Wamwami, ba Robert aba George Nisbet bakalizya nyimbo alimwi amakani aakalekkoodwa aakaambwa a Mukwesu J. F. Rutherford kababelesya mootokala iwakajisi zyakwaambawida. Mwami Sobhuza Wabili wakakkomana kapati. Ba George bakapandulula kuti: “Twakawayawaya naakaamba kuti wakali kuyanda kuula muncini wakubelesya kulekkooda, malekkoodi, alimwi amalaudi sipika ngotwakali kubelesya mukwaambilizya mulumbe wa Bwami.”
Ba Robert bakalilekelela akwaamba kuti eezyi zyintu tiizyakali zyakusambala pe. Nkaambo nzi? Akaambo kakuti mincini eeyi yakali yamuntu umwi. Mwami wakali kuyanda kumuzyiba mukamwini.
Ba Robert bakamwaambila kuti: “Zyoonse eezyi zyakali zya Mwami uumbi.” Mpoonya mwami Sobhuza wakabuzya kuti ino Mwami ooyo nguni? Ba Robert bakaingula kuti: “Ngu Jesu Kristo, Mwami wa Bwami bwa Leza.”
Mwami Sobhuza wakaingula ajwi lyabulemu kapati, wakati: “Oowo, ooyo Mwami mupati, tandiyandi kumubwezela cintu cili coonse.”
Ba Robert bakalemba kuti: ‘Ndakajatikizyigwa kapati abube bwa Mwami ooyu, Mwami Sobhuza. Wakalicizyi kwaambaula kabotu Cingisi kakunyina kulisumpula alimwi wakali kusikilika. Ndakakkala anguwe muofesi yakwe kwamaminiti asika ku 45, ciindi ba George nobakali kulizya nyimbo anze.
Ba Robert balazumanana kabati: ‘Nokwainda ciindi buzuba mbubwenya oobo, twakaswaya cikolo citegwa The Swazi National School kwalo kwakacitika cintu icakatukkomanisya kapati. Twakakambaukila mupati wacikolo, alimwi wakali kuswiilila kapati. Ciindi notwakaamba kujatikizya mincini alimwi akumwaambila kuti twakali kuyanda kuti basicikolo boonse baswiilile kunyimbo amakani aakalekkoodwa, wakakkomana kapati alimwi wakaita basicikolo batandila ku 100 kuti bakkale aansi akuswiilila. Twakaambilwa kuti kucikolo eeci casekondali bana basankwa bakali kuyiisyigwa bulimi, kubeza, kuyaka, Cingisi, alimwi anamba; mpoonya basimbi bakali kuyiisyigwa mulimo wabunesi, milimo yaaŋanda, alimwi amilimo iimwi iiyandika. Bakaapanyina Mwami ooyu mbebakatalisya cikolo eeci.’
Kutalikila mu 1933, Mwami Sobhuza wakali kuswiilila kubapainiya ibakali kumuswaya Mumunzi Wamwami. Aciindi cimwi, wakabunganya basikumugatela ibali 100 kutegwa baswiilile mulumbe wa Bwami. Wakalembya kuti katambula mamagazini eesu lyoonse alimwi wakali kutambula amabbuku. Kwakaceede buyo asyoonto kuti Mwami abe alaibbulali iikkwene yamabbuku eesu aapandulula Bbaibbele. Kuyungizya waawo, laibbulali yakwe taakwe noyakanyonganizyigwa nokuba kuti mabbuku eesu akali kukasyigwa ciindi cankondo yanyika yabili amfwulumende iyakali kulela iya Britain.
Mwami Sobhuza Wabili wakazumanana kubatambula Bakamboni Mumunzi Wamwami mu Lobamba, alimwi wakali kwiita abasololi bazikombelo kutegwa bazikuswiilile makani aamu Bbaibbele. Ciindi Kamboni wiitwa kuti Helvie Mashazi iwakubusena ooko naakali kubandika lugwalo lwa Matayo caandaano 23, basololi bacikombelo bakanyamuka cabukali akusola kumusinikizya kuti akkale ansi. Pele Mwami wakaanjilila makani akwaambila Mukwesu Mashazi kuti azumanane kubandika. Kuyungizya waawo, Mwami wakaambila baswiilizi kuti kabalemba tupango toonse twamu Bbaibbele itwakali kwaambwa mumakani.
Aciindi cimwi, nobakamana kuswiilila kumakani aakaambwa amukwesu umwi mupainiya, basololi bazikombelo bone ibakajanika bakaamba kuti: “Tatucili basololi bacikombelo, pele lino twaba Bakamboni ba Jehova.” Kumane bakalomba mupainiya mabbuku aaliwoonse mbuli ngaakajisi Mwami.
Kuzwa muma 1930 kusikila naakafwa mu 1982, Mwami wakali kubalemeka kapati Bakamboni ba Jehova alimwi kunyina naakazumizya kuti bapenzyegwe akaambo kakutatobela tunsiyansiya twabana Swaziland. Aboobo, Bakamboni bakajisi kaambo kabotu kakumulumba, alimwi bakamulila kuzwa aansi aamoyo.
Kuzikusika kumatalikilo aa 2013, kwakali basikumwaya ba Bwami bainda ku 3,000 mu Swaziland. Mweelwe wabantu boonse ulainda a 1 miliyoni, mucisi eeci akati kabantu bali 384 kuli sikumwaya omwe. Mumwaka wa 2012, kwakali bapainiya bali 260 mumbungano zili 90, alimwi bantu bali 7,496 bakajanika kuciibalusyo. Kulalangilwa kuti mulimo ulazumanana kuyaambele. Cakutadooneka, kwakali ntalisyo mbotu iyakabikkwa abaabo ibakali kuswaya cisi ca Swaziland muma 1930.—Makani eesu aakaindi kuzwa ku South Africa.
[Cifwanikiso icili apeeji 31]
Mwami Sobhuza Wabili wakakkopwa mu 1936 aba Robert Nisbet alimwi cifwoto eeci cakapegwa kuli ba Watch Tower Society
[Cifwanikiso icili apeeji 32]
(Atala) Basicikolo bakusekondali ibakajanika kumakani aabuleya ku Swaziland mu 1936
[Cifwanikiso icili apeeji 32]
(Kululyo) Ba George Nisbet amootokala wabo iwakajisi zyakwaambawida
Andiza Inga Mwaakkomanina Ayaaya
NGAZI YAMULINDIZI—YAKWIIYA
Mbozyakasyangwa Mbuto zya Bwami Zyakusaanguna ku Portugal
Mbuyumuyumu nzi mbobakajisi basikumwaya ba Bwami bakaindi ku Portugal?
NGAZI YAMULINDIZI—YAKWIIYA
Makani Aabuleya Akamwaya Makani Mabotu mu Ireland
Ino ncinzi cakapa C. T. Russell kuti asyome kuti masena aayo wakali muunda “iwakayumide kale kuti utebulwe?”
NGAZI YAMULINDIZI—YAKWIIYA
“Ino Ndilili Notuyooba Amuswaangano Uumbi Alimwi?”
Ncinzi cakapa kuti muswaangano wacooko iwakacitilwa mudolopo lya Mexico, mu 1932, ube muswaangano uulibedelede kapati?
NGAZI YAMULINDIZI—YAKWIIYA
‘Twakaba Basungu Alimwi Twakazula Luyando Mumyoyo Yesu Kwiinda Kaindi’
Nowakamana muswaangano wabo mu 1922, mbuti Basikwiiya Bbaibbele mbobakalutobela lulayo ‘lwakwaambilizya Mwami a Bwami bwakwe’?
NGAZI YAMULINDIZI—YAKWIIYA
“Kunyina Nzila Mbi Alimwi Kunyina Nzila Ndamfwu”
Kumamanino amyaka yakuma 1920 alimwi akumatalikilo kwamyaka yakuma 1930, bapainiya basungu bakatondezya luyandisisyo lwabo lwakutola makani mabotu aa Bwami kuminzi yaku Australia iili kulamfwu kapati.
NGAZI YAMULINDIZI—YAKWIIYA
“Nobasikumwaya ba Bwami mu Britain—Amusinsimuke!!”
Kwakanyina kuyaambele kujatikizya mweelwe wabasikumwaya ba Bwami mu Britain kwamyaka iili 10! Ino ncinzi cakapa kuti kube kuyaambele?
