Nobazyali—Amubayiisye Bana Banu Kuzwa Kubuvwanda

IBBAIBBELE lyaamba kuti: “Bana ndukono luzwa kuli Jehova, micelo yabuntu mbulumbu bwakwe.” (Int. 127:3) Aboobo, tacigambyi pe kubona bazyali Banakristo kabakkomana kapati ciindi mwana naazyalwa.

Nokuba kuti kuli lukkomano luboola ciindi mwana naazyalwa, kuli mukuli mupati alimwi. Kutegwa mwana akomene akuba abuumi bubotu, uyandika kulya zyakulya zijisi busani lyoonse. Kutegwa mwana akacikonzye kwiima nji mubukombi bwakasimpe, uyandika busani bwakumuuya alimwi abusolozi bwabazyali balo ibayandisisya kumuyiisya njiisyo zya Leza. (Tus. 1:8) Ndilili kuyiisya ooko nokweelede kutalika, alimwi kweelede kubikkilizya nzi?

 BAZYALI BAYANDIKA MALAILILE

Amuyeeye Manowa waluzubo lwa Dani iwakali kukkala mumunzi wa Zora mu Israyeli yansiku. Mungelo wa Jehova wakaambila mukaintu wa Manowa iwatakali kuzyala kuti wakali kuyakuzyala mwana musankwa. (Bab. 13:2, 3) Cakutadooneka, Manowa iwakali kusyomeka alimwi amukaakwe bakakkomana kapati abulangizi oobo. Nokuba boobo, kwakali zyintu izyakali kubalibilisya kapati. Aboobo, Manowa wakapaila kuti: “O Mwami, ndakumbila kuti muntu wa-Leza nguwakatuma aboole kulindiswe alwabili, kuti atwiisye mbutweelede kucitila mwana uuti zyalwe.” (Bab. 13:8) Manowa amukaintu wakwe bakali kulibilika mbobakonzya kumukomezya mwanaabo. Cakutadooneka mwanaabo Samsoni bakamuyiisya mulawo wa Leza alimwi kusoleka kwabo kwakazwidilila. Ibbaibbele lyaamba kuti: ‘Lino muuya wa Jehova wakatalika kubeleka ali Samsoni.’ Aboobo, Samsoni wakacita milimo mipati minji naakali umwi wababetesi mu Israyeli.—Bab. 13:25; 14:5, 6; 15:14, 15.

Ndilili mwana nayelede kutalika kuyiisyigwa? Timoteo wakayiisyigwa ‘kuzwa kubuvwanda malembe aasalala’ kuzwa kuli banyina ba Eunike alimwi abakaapanyina ba Loidi. (2 Ti. 1:5; 3:15) Masimpe, lwiiyo lwa Timoteo lwamu Magwalo lwakatalika naakali muvwanda.

Inga caba cabusongo kubazyali Banakristo kulomba busolozi alimwi akulibambilida limwi kutegwa batalike kuyiisya mwanaabo “kuzwa kubuvwanda.” Lugwalo lwa Tusimpi 21:5 lwaamba kuti: “Makanze aabasungu alaleta zilyo zinji.” Cakutadooneka, mwana katanazyalwa, bazyali beelede kulibambila kabotu. Balakonzya kuba amulongo uutondezya zyintu nzyayakuyandika mwana muvwanda. Cilayandika alimwi kuti balibambilida limwi kujatikizya zyintu zyakumuuya. Makanze aabo ayelede kuba aakufwambaana kutalika kuyiisya mwana muvwanda mubuumi bwakwe.

Ibbuku limwi ilyaamba zyakukomezya bana lyakaamba kuti: “Myezi yakumatalikilo kuzwa mwana naazyalwa ilayandika kapati caboola kumakani aakusima kwabongo. Muciindi eeci, kutambikizyanya akati kamaseelo kwalo kupa kuti muntu aiye kulatola busena—kulayungizyika ziindi zili 20.” Eelo kaka ncabusongo kubazyali kubelesya ciindi eeci cifwaafwi mwanaabo natalika kukomena mumizeezo kutalika kumuyiisya zyintu zyakumuuya!

Kujatikizya mwanaakwe musimbi, muzyali umwi mukaintu alimwi imupainiya waciindi coonse wakaamba kuti: “Kuzwa ciindi naakaba amwezi omwe wakuzyalwa, ndilamutoleezya mumulimo wamumuunda. Nokuba kuti tanaakalicizyi cakali kucitika, ndisyoma kuti kumutoleezya aciindi eeci naakali muniini kwakamugwasya. Ciindi naakaba amyaka yobilo yakuzyalwa, wakali kukonzya kwaabila matulakiti cakulikwaya kubantu mbotwakali kuswaanganya mumulimo wamumuunda.”

Kuyiisya mwana kacili muvwanda cilagwasya kapati. Nokuba boobo, ciindi bazyali nobayiisya bana babo zyintu zyakumuuya, balajana abuyumuyumu.

“KAMUCIBELESYA KABOTU CIINDI”

Mbwanga bana balafwambaana kunyonganizyigwa, cilakonzya kubayumina bazyali kuyiisya bana babo. Bana baniini balaaluyandisisyo lwakuzyiba zyintu zibazingulukide. Ncinzi bazyali ncobakonzya kucita kugwasya mwanaabo kubikkila maano ciindi nobamuyiisya cintu cimwi?

Amulange-lange ncaakaamba Musa. Lugwalo lwa Deuteronomo 6:6, 7 lwaamba kuti: “Nkabela aya majwi ngendamulailila buzuba obuno abe amyoyo yanu. Muleelede kwaaiyisya bana banu, akwaambaula ngawo lyoonse, ciindi cakukala muŋanda aciindi cakweenda munzila, ciindi cakoona aciindi cakubuka.” Ibbala lyakuti “kwaaiyisya” lipa muzeezo wakuyiisya cakwiinduluka-induluka. Mwana muniini uli mbuli cisamu icicili cisyoonto ciyanda meenda lyoonse. Mbwaanga kwiinduluka-induluka kugwasya muntu mupati kuyeeya twaambo tuyandika, cakutadooneka abalo bana baniini kulakonzya kubagwasya.

Kutegwa bayiisye bana kasimpe ka Leza, bazyali bayandika ciindi cakwiizya abana babo. Munyika iino imuli zyintu zinji zyakucita, kuzandula ciindi cili boobo kulakonzya kukatazya kapati. Pele mwaapostolo Paulo wakakulwaizya ‘kucibelesya kabotu ciindi’ kumilimo iiyandika ya Bunakristo. (Ef. 5:15, 16) Ino eeci inga cacitwa buti? Mukwesu umwi mwaalu uukwete mukaintu uujisi bubi kali mupainiya waciindi coonse wakajisi buyumuyumu bwakucita zyintu cakutaciindizya akati kakuyiisya mwana, kulanganya mikuli yakumuuya alimwi amulimo wakumubili. Mbuti mbobakali kucikonzya kujana ciindi cakuyiisya mwanaabo musimbi? Bausyi bakaamba kuti: “Mafwumofwumo  lyoonse kanditanaunka kumulimo, mebo amukaangu tulamubalila mu Bbuku Lyangu Lya Makani Aamu Bbaibbele naa mukabbuku ka Kulingaula Magwalo Abuzuba. Kumangolezya, tulamubalila katanaunka kuyakoona alimwi notuunka mumulimo wakukambauka, tulamutoleezya. Tatuyandi kuti myaka yakwe yakumatalikilo mubuumi bwakwe itwiindile pe.”

‘BANA BALI MBULI MIVWI’

Cakutadooneka tuyanda kuti bana besu bakomene kabali bantu babikkila maano. Nokuba boobo, kaambo kapati ncotuyandila kubayiisya, nkubagwasya kuti kabamuyanda Leza amoyo wabo woonse.—Mk. 12:28-30.

Lugwalo lwa Intembauzyo 127:4 lwaamba kuti: “Mbuli mivwi mujanza lyasilumamba, mbobabede bana muntu mbazyala mubwanike bwakwe.” Aboobo, bana bakozyanisyigwa kumivwi yalo yeelede kugamikwa ambaakani iiyandika. Muntu uubelesya buta takonzyi kuupilusya muvwi kuti wazwa kale mubuta bwakwe. Bazyali balijisi “mivwi”—bana babo—kwaciindi cisyoonto buyo. Ciindi eeco ceelede kubelesyegwa kugwasya bana babo kuyanda njiisyo zya Leza amizeezo yabo alimwi amyoyo yabo yoonse.

Kujatikizya bana bakwe bakumuuya, mwaapostolo Johane wakalemba kuti: “Kunyina cintu cindipa kulumba kapati kunze lyaceeci, kuti kandimvwa kuti bana bangu balazumanana kweenda mukasimpe.” (3 Jo. 4) Bazyali Banakristo balakonzya kutondezya kulumba kuli boobo ciindi nobabona bana babo ‘kabazumanana kweenda mukasimpe.’

[Cifwanikiso icili apeeji 17]

Manowa wakalomba malailile aakali kukonzya kumugwasya kukomezya mwana iwakali kulangilwa kuzyalwa