Amujane Lukkomano Muziyeekezyo zya Jehova
Amujane Lukkomano Muziyeekezyo zya Jehova
‘Ziyeekezyo zyako ndukono lwangu lyoonse.’—INT. 119:111.
INO INGA MWAINGULA BUTI?
Nkaambo nzi ncotweelede kukkomana aziyeekezyo zya Jehova?
Mbuti mbotukonzya kuba alusyomo muli Jehova?
Nkaambo nzi ncociyandika kujata bubi mumilimo ya Bwami?
1. (a) Ino bantu bazitambula buti ziyeekezyo, alimwi nkaambo nzi? (b) Mbuti kulisumpula mbokukonzya kumujatikizya muntu mbwalubona lulayo?
BANTU baliindene mbobaatambula malailile. Ziyeekezyo kuzwa kumuntu uuli mubweendelezi zilakonzya kutambulwa kabotu, pele lulayo luzwa kumuntu ngobeelene limwi ciimo naa uujisi cuuno caansi lulakonzya kukakwa. Mbotulimvwa kujatikizya lulayo alimwi akucenjezyegwa akwalo kulaindana kapati. Bamwi bantu ikuti bapegwa lulayo naa kucenjezyegwa, balakonzya kuusa, naa kufwa nsoni. Pele bamwi balakonzya kukulwaizyigwa akuyuma akuba aamakanze aakuyanda kucita kabotu. Nkaambo nzi ncokuli kwiindana? Kaambo kamwi nkulisumpula. Masimpe, muuya wakulitukumuna ulakonzya kupa muntu kutasala kabotu, kupa kuti akake lulayo alimwi akutatambula malailile aayandika.—Tus. 16:18.
2. Nkaambo nzi Banakristo bakasimpe ncobalumba lulayo luzwa mu Jwi lya Leza?
2 Kulubazu lumwi, Banakristo bakasimpe balalumba lulayo lugwasya ikapati ikuti kaluyeeme mu Jwi lya Leza. Ziyeekezyo zya Jehova zitupa kuba aluzyibo, zilatuyiisya alimwi akutugwasya kweeleba zyintu mbuli kuyandisya lubono, kutalilemeka, alimwi akubelesya misamu iikola naa bukoko munzila iitaluzi. (Tus. 20:1; 2 Ko. 7:1; 1 Te. 4:3-5; 1 Ti. 6:6-11) Kunze lyaboobo, ‘tulakondwa mumoyo’ akaambo kakumvwida ziyeekezyo zya Leza.—Is. 65:14.
3. Ino sintembauzyo wakali kuzilanga buti zyintu alimwi ncinzi ncotukonzya kwiiya?
3 Kutegwa tuzumanane kuba acilongwe cibotu a Taateesu wakujulu, tweelede kuzumanana kutobela malailile aa Jehova mubuumi bwesu. Cilakkomanisya kaka ikuti zyintu twazilanga mbwaakali kuzilanga sintembauzyo walo iwakalemba kuti: ‘Ziyeekezyo zyako ndukono lwangu lyoonse; njenjiyo iibotezya moyo wangu’! (Int. 119:111) Sena andiswe tulaikkomanina milawo ya Jehova, naa zimwi ziindi twiibona kuti ilaminya? Nokuba kuti zimwi ziindi inga tatukkomani alulayo ndotwapegwa, tatweelede kutyompwa pe. Tulakonzya kubusyoma cakumaninina busongo bwa Leza ibusumpukide alimwi buteelanisyigwi. Atulange-lange nzila zyotatwe.
AMUYUMYE LUSYOMO KWIINDA MUMUPAILO
4. Ncinzi Davida ncaakazumanana kucita?
4 Talili lyoonse zyintu nozyakali kumweendela kabotu Mwami Davida, nokuba boobo wakazumanana kusyoma mu Mulengi wakwe cakumaninina. Wakaamba kuti: “Kulinduwe, O Jehova, nkumbikide moyo wangu; O Leza wangu, nduwe ngonsyomede.” (Int. 25:1, 2) Ncinzi cakagwasya Davida kuba alusyomo luli boobu muli Usyi wakujulu?
5, 6. Ino Jwi lya Leza litwaambila nzi kujatikizya cilongwe Davida ncaakajisi a Jehova?
5 Bantu banji balapaila kuli Leza lilikke buyo nobali mubuyumuyumu. Mbuti kuti kamubandika amweenzinyoko naa musazinyoko lilikke buyo nayanda mali kulindinywe naa kugwasyigwa? Mukuya kwaciindi, inga mwatalika kudooneka makanze ngajisi mukumvwana andinywe. Davida tanaakali boobo pe. Cilongwe cakwe a Jehova cakali kutondezya lusyomo alimwi aluyando ndwaakajisi kuli Leza wakwe mubuumi bwakwe—muziindi zibotu amuziindi zikatazya.—Int. 40:8.
6 Amubone Davida mbwaakamutembaula alimwi aakumulumba Jehova, naakati: “O Jehova Mwami wesu, izina lyako lilatembaulika munyika yoonse! Uwe uli abulemu buyandeele kujulu.” (Int. 8:1) Sena mwacibona cilongwe Davida ncaakajisi a Usyi wakujulu? Kulumba Davida nkwaakajisi kububotu bwa Leza kwakamukulwaizya kutembaula Jehova “buzuba boonse.”—Int. 35:28.
7. Ino nimpindu nzi njotujana kwiinda mukuswena kuli Leza mumupailo?
7 Mbubwenya mbuli Davida, andiswe tweelede kubandika a Jehova lyoonse kutegwa tuyumye lusyomo mulinguwe. Bbaibbele lyaamba kuti: “Amuswene kuli Leza, eelyo awalo uyooswena kulindinywe.” (Jak. 4:8) Kuswena kuli Leza mumupailo nenzila imwi iiyandika motukonzya kutambula muuya uusalala.—Amubale 1 Johane 3:22.
8. Nkaambo nzi ncotuteelede kwiinduluka mabala ngamunya mumipailo yesu?
8 Nomupaila, sena mubelesya mabala ngamunya ciindi aciindi? Ikuti naa mbocibede oobo, kamutanapaila amube aciindi cisyoonto cakuyeeya nzyomuyanda kwaamba mumupailo wanu. Ikuti katwiinduluka mabala ngamunya ciindi cili coonse notubandika amulongwe wesu naa musazima, sena inga wakkomana? Ambweni inga waleka kuswiilila. Cakutadooneka, Jehova takonzyi kukaka mupailo uuzwa ansi aamoyo wamubelesi wakwe uusyomeka. Pele inga twacita kabotu kutaba acilengwa cakwiinduluka mabala ngamunya ciindi notubandika anguwe.
9, 10. (a) Ncinzi ncotukonzya kubikkilizya mumipailo yesu? (b) Ncinzi cikonzya kutugwasya kupaila mipailo iizwa ansi aamoyo?
9 Cakutadooneka, mipailo yesu tayelede kuba yakwiinzya buyo mulawo ikuti katuyanda kuswena kuli Leza. Ikuti lyoonse katumwaambila Jehova izili mumoyo wesu, tuyooswena kulinguwe alimwi tunoomusyoma. Pele ncinzi ncotweelede kubikkilizya mumipailo yesu? Ijwi lya Leza liingula kuti: “Muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila.” (Flp. 4:6) Bwini mbwakuti, kufwumbwa makani aajatikizya cilongwe cesu a Leza naa buumi bwesu katuli mubelesi wakwe tulakonzya kwaabikkilizya mumupailo.
10 Cilagwasya kulanga-langa mipailo yabamaalumi abamakaintu basyomeka yalo iilembedwe mu Bbaibbele. (1 Sam. 1:10, 11; Mil. 4:24-31) Mubbuku lya Intembauzyo mulajanika mipailo minji alimwi anyimbo ziimbilwa Jehova. Mipailo eeyi alimwi anyimbo zilayubununa bantu mbobalimvwa, mbobapenga kapati mumoyo naa kukondwa kapati. Kulanga-langa majwi aakaambwa abantu basyomeka aali boobu kulakonzya kutugwasya kupaila mipailo iili kabotu kuli Jehova.
AMUZINZIBALE KUYEEYA ZIYEEKEZYO ZYA LEZA
11. Nkaambo nzi ncotweelede kuzinzibala kuyeeya lulayo luzwa kuli Leza?
11 Davida wakaamba kuti: ‘Ziyeekezyo zya Jehova zilasyomeka, zilabasongwaazya batakwe luzyibo.’ (Int. 19:7) Inzya, nokuba kuti tatujisi luzyibo tulakonzya kuba basongo ikuti twatobela milawo ya Leza. Pele lulayo lumwi lwamu Magwalo luyandika kuzinzibala kuyeeya kutegwa tugwasyigwe kapati. Mucikozyanyo, kuzinzibala kuyeeya njiisyo zyamu Bbaibbele kulakonzya kutugwasya kusyomeka ciindi notusunkwa kucita cintu cibyaabi kucikolo naa kumulimo. Kuzinzibala kuyeeya njiisyo zyamu Bbaibbele alimwi kulakonzya kutugwasya kutobela milawo ya Leza iijatikizya bulowa akutatola lubazu mutwaambo twacisi, alimwi aciindi notusala zyakusama. Kuzyiba mbwayeeya Leza mumakani aaya kulakonzya kutugwasya kulibambila mapenzi kaatanasika. Kumane tulakonzya kusalila limwi mumoyo ncotuyakucita ikuti twalijana mubukkale buli boobu. Kulibambilila limwi kuli boobu kulakonzya kutugwasya kutegwa tutanjili mumapenzi.—Tus. 15:28.
12. Mibuzyo nzi iikonzya kutugwasya kuzumanana kubamba ziyeekezyo zya Leza?
12 Notulindila kuzuzikizyigwa kwazisyomezyo zya Leza, sena buumi bwesu bulatondezya kuti tulipakamene kumuuya? Mucikozyanyo, sena tulasyoma ncobeni kuti Babuloni Mupati uyakunyonyoonwa ino-ino? Sena zilongezyo zyakumbele mbuli buumi butamani muparadaiso anyika, zicili zini-zini kulindiswe mbubwenya mbozyakabede ciindi cakusaanguna notwakaiya kujatikizya nzizyo? Sena twazumanana kuba basungu mumulimo wakukambauka naa twalekela milimo yesu kubweza busena bwakusaanguna mubuumi bwesu? Mbuti kujatikizya bulangizi bwabubuke, kusalazyigwa kwazyina lya Jehova, alimwi akusumpulwa kwabulelo bwakwe? Sena acili makani aayandika kapati kulindiswe? Kuzinzibala kuyeeya mibuzyo iili boobu kulakonzya kutugwasya kucita mbubwenya mbwaakaamba sintembauzyo kuti, amubambe ‘ziyeekezyo zya Leza mbuli lukono lwanu lyoonse.’—Int. 119:111.
13. Nkaambo nzi Banakristo bamumwaanda wamyaka wakusaanguna ncobakajana buyumuyumu kumvwisya zyintu zimwi? Amupe cikozyanyo.
13 Zimwi zyintu zyaambidwe mu Bbaibbele tatukonzyi kuzimvwisya cakumaninina lino nkaambo tacinasika ciindi cakuti Jehova ape kuti tuzimvwisye. Cakwiinduluka-induluka Jesu wakaambila baapostolo bakwe kuti cakali kuyandika kuti apenge alimwi akujaigwa. (Amubale Matayo 12:40; 16:21.) Pele baapostolo kunyina nobakamvwisya ncaakali kupandulula. Bakazikumvwisya ncaakali kwaamba ciindi naakafwa akubusyigwa, akulibonya kuli basikwiiya bali mbobabede, alimwi ‘akujalula mizeezo yabo kutegwa bamvwisye ncaamba Magwalo.’ (Lk. 24:44-46; Mil. 1:3) Mbubwenya buyo, basikutobela Kristo tiibakazyi kuti Bwami bwa Leza bwakali kuyakukkazikizyigwa kujulu kusikila muuya uusalala nowakasika aali mbabo mu Pentekoste 33 C.E.—Mil. 1:6-8.
14. Kumatalikilo aamwaanda wamyaka wa 20, ino ncikozyanyo nzi cibotu bakwesu banji ncobakatusiila nokuba kuti tiibakali kumvwisya kujatikizya mazuba aamamanino?
14 Mbubwenya buyo, kumatalikilo amwaanda wamyaka wa 20, kwakali kulangila kutaluzi akati ka Banakristo bakasimpe kujatikizya “mazuba aamamanino.” (2 Ti. 3:1) Mucikozyanyo, mu 1914 bamwi bakali kuyeeya kuti kutolwa kwabo kujulu kwakali afwaafwi. Ciindi cintu ncobakali kulangila nocatakacitika mpoonya-mpoonya, kwaalanga-langa alimwi Magwalo kwakatondezya kuti mulimo mupati wakukambauka wakeelede kucitwa. (Mk. 13:10) Nkakaambo kaako mu 1922, mukwesu J. F. Rutherford, walo aciindi eeco iwakali kusololela mumulimo wakukambauka wakaambila baswiilizi kumuswaangano wamasi ku Cedar Point, Ohio, U.S.A. kuti: “Ngooyo Mwami ulalela! Nywebo ndinywe baambilizi bakwe. Aboobo mwaambilizye, mwaambilizye, mwaambilizye Mwami abwami bwakwe.” Kuzwa ciindi eeco, kwaambilizya “makani mabotu aa Bwami” wali ngomulimo uuyandika kapati wababelesi ba Jehova bamazuba aano.—Mt. 4:23; 24:14.
15. Ino tugwasyigwa buti akuzinzibala kuyeeya nzila njabelesya Leza kweendelezya bantu bakwe?
15 Kuzinzibala kuyeeya nzila mbotu njabelesya Jehova kweendelezya bantu bakwe kuzwa kaindi kusika mazuba aano, kutupa kuba alusyomo munguzu zyakwe zyakucita kuyanda kwakwe alimwi amakanze. Aciindi nciconya eeco, ziyeekezyo zya Leza zilatugwasya kuyeeya lyoonse mumizeezo amumoyo wesu businsimi bwakwe mbotulindila kuzuzikizyigwa. Tulakonzya kuba masimpe kuti kucita boobo kuyakutugwasya kuba alusyomo muzisyomezyo zyakwe.
AMUYUMYE LUSYOMO KWIINDA MUKUKOMBA
16. Nzilongezyo nzi ziboola akaambo kakuzumanana kuba basungu mumulimo wakukambauka?
16 Leza wesu, Jehova, ngu Leza singuzu, ngu Leza wamilimo. Sintembauzyo wakabuzya kuti: “Ngwani singuzu uuli mbuli nduwe, O Jehova?” Wakayungizya akwaamba kuti: “Ijanza lyako ndijumu, ijanza lyako lyalulyo lilisumpukide.” (Int. 89:8, 13) Kweelana amajwi aaya, Jehova ulalumba alimwi ulakulongezya kusoleka nkotucita mukutolaambele ziyandika zya Bwami. Ulabona kwaamba kuti babelesi bakwe—bamaalumi naa bamakaintu, bana naa bapati—tabakkali buyo akulya “cilyo cabutolo.” (Tus. 31:27) Akaambo kakuti twiiya Mulengi wesu, tujisi bubi kubeleka milimo yakumuuya. Kubelekela Leza camoyo woonse kulatugwasya swebo kutugama, alimwi kupa kuti Jehova akkomane akulongezya mulimo wesu wakukambauka.—Amubale Intembauzyo 62:12.
17, 18. Nkaambo nzi ncotukonzya kwaamba kuti milimo njotucita cakusyomeka ilatugwasya kuba alusyomo mululayo lwa Jehova? Amupe cikozyanyo.
17 Muunzila nzi kucita zyintu cakusyomeka mbokutugwasya kuyumya lusyomo muli Jehova? Atulange-lange cibalo camu Magwalo cabana Israyeli nobakali kunjila mu Nyika Yakasyomezyedwe. Jehova wakalailila bapaizi ibakanyamwide bbokesi lyacizuminano kuti bakanjile mu Mulonga wa Jordano. Pele bantu nobakali kuyaabuswena kumulonga, bakabona mulonga wakalipaide akaambo kamvwula yamupeyo. Ncinzi ncobakali kuyakucita bana Israyeli? Sena bakali kuyakuyaka zilabba kunkomwe yamulonga akukkala kulindila kwansondo zili mbozibede naa kwiinda waawo kuti maanzi aceye-ceye? Peepe, bakasyoma muli Jehova cakumaninina akwaatobela malailile aakwe. Ncinzi cakacitika? Cibalo caamba kuti: ‘Indyato zyamaulu aabapaizi babwezede ibbokesi mbuzyakatompa buyo mumaanzi, ndilyonya maanzi akaimikila, mpoonya bapaizi bakaimikila anyika injumu aboobo bantu bakazubukila mpoonya awo aalangene a Jeriko.’ (Jos. 3:12-17) Amuyeeye buyo mbocakali kukulwaizya kubona maanzi kaimikila! Inzya, lusyomo lwabana Israyeli muli Jehova lwakayumizyigwa nkaambo bakasyoma malailile aakwe.
18 Masimpe kuti Jehova tabacitili maleele aali boobu bantu bakwe mazuba aano, pele ulailongezya milimo yabo yalusyomo. Inguzu zibeleka zya Leza zilabagwasya kucita mulimo ngobapedwe iwakukambauka mulumbe wa Bwami munyika yoonse. Alimwi Kamboni mupati wa Jehova, Kristo Jesu, wakabasyomezya basikwiiya bakwe kuti wakali kuyakuba ambabo mumulimo ooyu uuyandika naakati: “Aboobo kamuya mukagwasye bantu bamisyobo yoonse kuba basikwiiya . . . Ndili andinywe mazuba oonse mane kusikila kumamanino aabweende bwazyintu oobu.” (Mt. 28:19, 20) Bakamboni banji ibakali kuyoowa naa kufwa nsoni balazumina kuti muuya uusalala wa Leza wabagwasya kuti bacikonzye kwaambaula cabusicamba kubantu mbobatazyi ciindi nobali mumulimo wamumuunda.—Amubale Intembauzyo 119:46; 2 Bakolinto 4:7.
19. Kufwumbwa naa mbuyumuyumu nzi mbotujisi, ncinzi ncotukonzya kuba masimpe?
19 Bakwesu abacizyi bamwi balaamapenzi manji aakumubili akaambo kakuciswa naa kucembaala. Nokuba boobo, balakonzya kuba alusyomo lwakuti “Taata siluse a Leza siluumbulizyo loonse” ulabumvwisya bukkale bwa Munakristo umwi aumwi wakasimpe. (2 Ko. 1:3) Ulalumba zyoonse nzyotucita mukutolaambele ziyandika zya Bwami. Toonse tweelede kuzyiba kuti iciyandika kapati kutegwa tufwutule buumi bwesu ndusyomo lwesu mububambe bwacinunuzyo ca Kristo kumwi katucita kufwumbwa ncotukonzya kweelana abukkale bwesu.—Heb. 10:39.
20, 21. Muunzila nzi zimwi motukonzya kutondezya lusyomo muli Jehova?
20 Bukombi bwesu bubikkilizya kubelesya ciindi cesu, nguzu, alimwi alubono kusikila mpotugolela. Inzya, tuyanda ‘kucita mulimo wamukambausi’ amoyo wesu woonse. (2 Ti. 4:5) Masimpe ngakuti, tulikkomene kucita boobo nkaambo cigwasya bamwi “kuba aluzyibo lwini-lwini lwakasimpe.” (1 Ti. 2:4) Cakutadooneka, kutembaula alimwi akulemeka Jehova kutupa kuvwuba kumuuya. (Tus. 10:22) Alimwi citugwasya kuyumya lusyomo lutakonzyi kwaandanizyigwa mu Mulengi wesu.—Lom. 8:35-39.
21 Mbubwenya mbotwabandika, kusyoma malailile aa Jehova takulicitikili buyo kulikke; tweelede kubeleka kutegwa tube alusyomo luli boobo. Aboobo, amusyome muli Jehova kusikila mpomugolela kwiinda mumupailo. Amuzinzibale kuyeeya Jehova mbwaali kucita kuyanda kwakwe musyule alimwi ambwayakucita oobo kumbele. Alimwi amuzumanane kuba alusyomo muli Jehova kwiinda mumilimo yabukombi. Inzya, ziyeekezyo zya Jehova zinooliko lyoonse. Andinywe inga mwapona lyoonse ikuti mwaswiilila kuziyeekezyo eezyo.
[Mibuzyo yaciiyo]
[Cifwanikiso icili apeeji 12]
[Cifwanikiso icili apeeji 15]
Sena muyootondezya lusyomo mbuli lwabantu ba Jehova mumazuba aa Joshua? (Amubone muncali 17 a 18)
