Amubamvwide Beembezi Ba Jehova

“Kamubamvwida aabo basololela akati kanu alimwi kamulibombya, nkaambo balanganya buumi bwanu.” —HEB. 13:17.

INO INGA MWAINGULA BUTI?

Mbuti baalu mumbungano mbobeembela mbelele zya Leza?

Nkaambo nzi mbelele ncozyeelede kubamvwida beembezi mumbungano?

Nkaambo nzi ncotuteelede kulekela kutalondoka kwabaalu kutupa kubatongooka akusulaika lulayo lwamu Magwalo ndobapa?

1, 2. Nkaambo nzi Jehova ncalikozyanisya kumweembezi?

JEHOVA ulikozyanisya kumweembezi. (Ezk. 34:11-14) Kaambo aaka kalayandika kapati mbwaanga katugwasya kumvwisya Jehova mbwabede. Mweembezi muntu siluyando, ulabubikkila kapati maano buumi bwambelele nzyalanganya. Ulazitola kubusena ikuli mweemvwe amaanzi (Int. 23:1, 2); ulazilanganya masiku amasyikati (Lk. 2:8); ulazikwabilila kubanyama (1 Sam. 17:34, 35); tubelele itwazyalwa ino-ino ulatunyamuna (Is. 40:11); ulazilangaula eezyo zyasweeka alimwi zityokede ulazilanganya kabotu-kabotu.—Ezk. 34:16.

² Mbwaanga bantu ba Jehova banji bakaindi bakali beembezi alimwi abalimi, tiicakali kubayumina kumvwisya kaambo kakukozyanisya Jehova Leza kumweembezi siluyando. Bakalizyi kuti mbelele ziyandika kubikkilwa maano kutegwa kazijisi buumi bubotu akuzumanana kupona. Mbubwenya buyo, abalo bantu bayandika kulanganizyigwa abusolozi buzwa kuli Jehova. (Mk. 6:34) Ikuti bantu tiibalanganizyigwa kabotu akusololelwa kumuuya, balapenga. Inga tabajisi bukwabilizi alimwi balaalilwa kuzyiba ciluzi acitaluzi—baba mbuli “mbelele zitakwe mweembeli” izimwaikide. (1 Bam. 22:17) Nokuba boobo, Jehova caluyando ulabapa nzyobayandika bantu bakwe.

3. Ino tulabandika nzi mucibalo eeci?

³ Andiswe tulamvwisya Jehova mbwali mbuli mweembezi. Jehova ucizumanana kubalanganya bantu bakwe ibali mbuli mbelele. Atubone mbwatweendelezya ambwalanganya nzyotuyandika. Mpoonya tulabandika ncotweelede kucita kutegwa tugwasyigwe abusolozi bwa Jehova akulanganizyigwa anguwe.

MWEEMBEZI MUBOTU WASALA BAMWI KUTI BAMUGWASYE

4. Mulimo nzi Jesu ngwajisi mukulanganya mbelele zya Jehova?

⁴ Jehova wasala Jesu kuba Mutwe wambungano ya Bunakristo. (Ef. 1:22, 23) Mbwali “mweembezi  mubotu,” Jesu ulatondezya nzyobayanda ba Usyi, makanze aabo, alimwi abube bwabo. Jesu ulaziyanda kapati mbelele cakuti ‘wakazituulila buumi bwakwe.’ (Joh. 10:11, 15) Eelo kaka cipaizyo cacinunuzyo ca Kristo ncipego cibotu kubantu! (Mt. 20:28) Kayi makanze aa Jehova ngakuti ‘muntu uuli woonse uusyoma Jesu atakanyonyoonwi pele akabe abuumi butamani’!—Joh. 3:16.

5, 6. (a) Mbaani Jesu mbaasala kuti balanganye mbelele zyakwe? Kutegwa mbelele zigwasyigwe abubambe oobu, ncinzi ncozyeelede kucita? (b) Nkaambo nzi kapati keelede kutupa kumvwida baalu mumbungano?

⁵ Ino mbelele zitondezya buti kuti Jesu Kristo Mweembezi Mubotu? Jesu wakaamba kuti: “Imbelele zyangu zilaliswiilila ijwi lyangu, ndilizizyi alimwi zilanditobela.” (Joh. 10:27) Kuswiilila kujwi lya Mweembezi Mubotu caamba kutobela busolozi bwakwe muzyintu zyoonse. Eeci cilabikkilizya akumvwida beembezi mbaasala kuti bamugwasye. Jesu wakatondezya kuti baapostolo alimwi abasikwiiya bakwe bakali kuyakuzumanana amulimo ngwaakatalisya. Mulimo wabo wakali kuyakuba ‘wakuyiisya’ alimwi ‘akusanina tubelele twa Jesu.’ (Mt. 28:20; amubale Johane 21:15-17.) Mulimo wakukambauka makani mabotu nowakali kuyaabukomena alimwi amweelwe wabasikwiiya nowakali kuyaabuvwula, Jesu wakabikka bubambe bwakuti Banakristo basimide beembele mbungano.—Ef. 4:11, 12.

⁶ Ciindi mwaapostolo Paulo naakali kulembela balangizi bamumbungano yamumwaanda wamyaka wakusaanguna mu Efeso, wakaamba kuti: ‘Muuya uusalala wakamubikka kuba balangizi, kuti mweembele mbungano ya Leza.’ (Mil. 20:28) Mbocibede akubalangizi Banakristo mazuba aano, nkaambo abalo balasalwa kweelana azyeelelo zyakasololelwa amuuya uusalala zyamu Magwalo. Aboobo, kumvwida balangizi Banakristo kutondezya kuti tulamulemeka Jehova a Jesu, Beembezi bobilo bapati. (Lk. 10:16) Mubwini, aaka nkakaambo kapati ncotweelede kulibombya kubaalu. Nokuba boobo, kuli atumbi twaambo itondezya ncocili cabusongo kulibombya kulimbabo.

7. Ino baalu bamugwasya buti kutegwa muzumanane kuba acilongwe ciyumu a Jehova?

⁷ Ciindi baalu nobapa busolozi kubasyominyina, balabakulwaizya akubapa lulayo luzwa mu Magwalo naa kubelesya njiisyo zyamu Magwalo. Nobacita oobo makanze aabo taali aakusalila Banakristonyina mbobeelede kupona buumi bwabo. (2 Ko. 1:24) Muciindi caboobo, bayanda kupa Banakristonyina malailile aamu Magwalo kutegwa abagwasye kusala kabotu alimwi akuti kakuli lukamantano aluumuno mumbungano. (1 Ko. 14:33, 40) Ikaambo kakuti baalu “balanganya buumi” katugwasya kubona kuti baliyandide kugwasya umwi aumwi wesu mumbungano kutegwa tuzumanane kuba acilongwe ciyumu a Jehova. Aboobo, bayakufwambaana kubweza ntaamu kugwasya mukwesu naa mucizyi uuyanda kuleya, naa ‘iwaleya’ kale. (Gal. 6:1, 2; Jud. 22) Eelo kaka ootu ntwaambo tumvwika ncotweelede ‘kubamvwida aabo basololela’!—Amubale Bahebulayo 13:17.

8. Ino baalu babukwabilila buti butanga bwa Leza?

⁸ Mwaapostolo Paulo, mweembezi uubikkila maano, wakabacenjezya boobu Banakristonyina baku Kolose: “Amucenjele kutegwa kutabi muntu uumoongelezya kuti mucegwe kwiinda mubusongo bwabantu alweeno, kweelana atunsiyansiya twabantu azyintu zitakwe mulimo zyamunyika eeyi ikutali kweelana a Kilisito.” (Kol. 2:8) Kucenjezya ooku kutugwasya kubona kaambo kamwi ncotweelede kumvwida kululayo lwamu Magwalo lwabaalu. Balakwabilila butanga kwiinda mukubagwasya Banakristonyina  kupakamana akubacenjelela aabo ibayanda kunyonganya lusyomo lwabo. Mwaapostolo Petro wakacenjezya kujatikizya “basinsimi bakubeja” alimwi ‘abamayi bakubeja’ ibakonzya ‘koongelezya bantu batakkalikene’ kutegwa bacite cibi. (2 Pe. 2:1, 14) Mbubwenya buyo, abalo baalu bamazuba aano beelede kubacenjezya Banakristonyina nokuyandika. Mbwaanga baalumi aaba Mbaanakristo basimide, balijisi luzyibo lunji. Kuyungizya waawo, kabatanasalwa, bakatondezya kuti balaamvwisya Magwalo kabotu-kabotu alimwi akuti baleelela kuyiisya kasimpe kamu Bbaibbele. (1 Ti. 3:2; Tit. 1:9) Kusima kwabo, akuzilanga kabotu zyintu, alimwi abusongo bwamu Bbaibbele mbobajisi kubagwasya kupa busolozi bugwasya kubutanga.

MWEEMBEZI MUBOTU ULAZISANINA AKUZIKWABILILA MBELELE

9. Mbuti Jesu mbweendelezya akusanina mbungano ya Bunakristo mazuba aano?

⁹ Kwiinda mumbunga yakwe, Jehova ulapa zyakulya zyakumuuya zinji kuciinga coonse cabakwesu nyika yoonse mbwiizulwa. Lulayo lunji lwamu Magwalo lulapegwa kwiinda mumabbuku eesu. Kuyungizya waawo, ziindi zimwi mbunga ilapa busolozi cacigaminina kubaalu bamumbungano kwiinda mumagwalo naa kwiinda mumalailile aapegwa abalangizi beendeenda. Munzila eezyi, mbelele zilatambula busolozi bugwasya.

10. Kujatikizya baabo ibakaleya kuzwa kubutanga, mukuli nzi ngobajisi beembezi babikkila maano?

¹⁰ Balangizi balijisi mukuli wakukwabilila  akulanganya buumi bwaumwi aumwi mumbungano, kwaambisya balababikkila kapati maano aabo ibatacisungweede naa aabo ibacita cibi cipati. (Amubale Jakobo 5:14, 15.) Bamwi andiza bakaleya kuzwa mubutanga alimwi bakacileka kutola lubazu mumilimo ya Bunakristo. Mubukkale buli boobu, mwaalu uubikkila maano uyakucita zyoonse nzyakonzya kutegwa ajane mbelele isweekede akwiikulwaizya kutegwa ipiluke kubutanga, nkokuti, mbungano. Jesu wakapandulula kuti: “Taata uuli kujulu tayandi kuti umwi wabasyoonto aaba alobe.”—Mt. 18:12-14.

INO TWEELEDE KUKUBONA BUTI KUTALONDOKA KWABAALU?

11. Nkaambo nzi bamwi ncocikonzya kubayumina kutobela busolozi bwabaalu?

¹¹ Jehova a Jesu Mbeembezi balondokede. Pele beembezi mbobabelesya kulanganya mbungano tabalondokede pe. Kaambo aaka kamasimpe kalakonzya kupa kuti cibayumine bamwi kutobela busolozi bwabaalu. Bantu bali boobo balakonzya kwaamba kuti: ‘Tabalondokede mbubwenya mbuli ndiswe. Nkaambo nzi ncotweelede kumvwida lulayo ndobatupa?’ Inzya, baalu tabalondokede. Nokuba boobo, kulezya kwabo alimwi akutalondoka kwabo tweelede kukulanga munzila iili kabotu.

12, 13. (a) Nkulubizya kuli buti nkobakacita babelesi ba Jehova bamwi mbaakali kubelesya kulanganya mikuli milemu? (b) Nkaambo nzi kulubizya kwabaalumi bakapedwe mikuli ncokulembedwe mu Bbaibbele?

¹² Cakutainda mumbali, Magwalo alaamba kulubizya kwabaalumi Jehova mbaakali kubelesya kaindi kuti basololele bantu bakwe. Mucikozyanyo, Davida wakananikwa akuba mwami amusololi wabana Israyeli. Nokuba boobo, wakaalilwa kulwana sunko, aboobo wakaba amulandu wabumambe abujayi. (2 Sam. 12:7-9) Alimwi amubone ncaakacita mwaapostolo Petro. Nokuba kuti wakapedwe mikuli milemu mumbungano ya Bunakristo yamumwaanda wamyaka wakusaanguna, wakalubizya kapati. (Mt. 16:18, 19; Joh. 13:38; 18:27; Gal. 2:11-14) Kuzwa ciindi ba Adamu a Eva nobakabisya, kunyina muntu iwakalondokede ccita buyo Jesu alikke.

¹³ Nkaambo nzi Jehova ncaakazumizya kuti kulubizya kwababelesi bakwe ibakali kubikkila maano kulembwe mu Bbaibbele? Kaambo kamwi nkakuti, Leza wakacita oobo kutegwa atondezye kuti ulakonzya kubelesya bantu batalondokede kusololela bantu bakwe. Alimwi wali kucita oobo kuzwa kaindi. Aboobo, tatweelede kulekela kutalondoka kwabaabo ibasololela akati kesu mazuba aano kutupa kubatongooka akukazya nguzu nzyobapedwe. Jehova uyanda kuti katubalemeka akubamvwida bakwesu aaba.—Amubale Kulonga 16:2, 8.

14, 15. Ncinzi ncotukonzya kwiiya kunzila Jehova njaakabelesya kupa malailile kubantu bakwe kaindi?

¹⁴ Cilayandika kapati kubamvwida aabo ibasololela akati kesu mazuba aano. Amuyeeye Jehova mbwaakali kubapa malailile bantu bakwe muziindi zikatazya kaindi. Ciindi bana Israyeli nobakazwa mu Egepita wakaindi, Leza wakapa malailile kwiinda muli Musa a Aroni. Kutegwa bafwutuke cipenzyo cakkumi, bana Israyeli bakeelede kumvwida malailile aakubamba cakulya caalubazu alimwi akusansaila bulowa bumwi bwambelele kumisende yamilyango alimwi aatala amilyango yamaanda. Sena Leza wakabandika ambabo bantu cacigaminina? Peepe, bantu bakeelede kuswiilila kubaalumi bapati bana Israyeli, balo ibakapegwa malailile aayo kuzwa kuli Musa. (Kul. 12:1-7, 21-23, 29) Mubukkale oobo, Jehova wakabelesya Musa abapati ba Israyeli kupa malailile kubantu. Mazuba aano, Jehova ubelesya baalu Banakristo kucita mulimo uukozyene ayooyo.

 ¹⁵ Cakutadooneka, mulakonzya kuyeeya ziindi zimwi zilembedwe mu Bbaibbele mwalo Jehova mwaakabelesya bantu naa bangelo kupa malailile kubantu bakwe. Mubukkale boonse oobo, Leza wakacibona kuti cileelela kubelesya bamwi. Baiminizi aabo bakali kwaamba muzyina lyakwe, alimwi bakaambila bantu ncobakeelede kucita kutegwa bafwutuke bukkale bukatazya. Tulakonzya kulangila kuti Jehova uyakucita mbubwenya oobo ciindi ca Amagedoni. Cakutadooneka, mwaalu uuli woonse mazuba aano uupedwe mukuli wakwiiminina Jehova naa mbunga yakwe, weelede kubikkila kapati maano kubona kuti ulazibelesya bweelede nguzu nzyapedwe.

‘TANGA LYOMWE, MWEEMBEZI OMWE’

16. Ino “jwi” ndyotweelede kubikkila maano ninzi?

¹⁶ Bantu ba Jehova ‘nditanga lyomwe’ ilyeendelezyegwa “amweembezi omwe,” Jesu Kristo. (Joh. 10:16) Jesu wakaamba kuti unooli abasikwiiya bakwe “mane kusikila kumamanino aabweende bwazyintu oobu.” (Mt. 28:20) Mbwaanga ngo Mwami wakujulu, nguuzyeendelezya zyintu zyoonse iziyakupa kuti nyika ya Saatani inyonyoonwe. Kutegwa tuzumanane kukamantana akukwabililwa mutanga lya Leza, tweelede kuswiilila ‘kujwi lili kusule lyesu,’ ilitwaambila nzila njotweelede kweendela. “Ijwi” eeli lilabikkilizya azyintu nzyatuyiisya Jehova kwiinda mu Bbaibbele alimwi amuzyintu walo a Jesu nzyobaamba kwiinda mubeembezi mbobasala.—Amubale Isaya 30:21; Ciyubunuzyo 3:22.

17, 18. (a) Ino butanga buli muntenda nzi, pele ncinzi ncotusinizyide? (b) Ino tuyakubandika nzi mucibalo citobela?

¹⁷ Ibbaibbele lyaamba kuti Saatani uyaabweendeenda “mbuli syuumbwa uuvwuluma, uyandaula muntu ngwatiimene buumbulu.” (1 Pe. 5:8) Mbuli munyama wamusyokwe uufwide nzala, uyanda butanga, ulindila ciindi ceelede kutegwa ajate mbelele zitajisi nguzu alimwi azisweekede. Kaambo aaka keelede kutugwasya kuswena kapati kubutanga alimwi ‘akumweembezi amulangizi wabuumi bwesu.’ (1 Pe. 2:25) Kujatikizya baabo ibayakufwutuka mapenzi mapati, lugwalo lwa Ciyubunuzyo 7:17 lwaamba kuti: ‘Mwanaambelele, Jesu, uyoobeembela alimwi uyoobasololela kutusensa twamaanzi aabuumi. Mpoonya Leza uyoosindula misozi yoonse kumeso aabo.’ Eelo kaka eeci ncisyomezyo cibotu kapati!

¹⁸ Mukuli wabaalu Banakristo wakweembela mbungano ulayandika kapati. Mbuti baalumi aaba basalidwe mbobakonzya kuzilanganya kabotu mbelele zya Jesu? Bwiinguzi bulabandikwa mucibalo citobela.

[Mibuzyo yaciiyo]

[Cifwanikiso icili apeeji 23]

Mbubwenya mbuli mweembezi mbwakwabilila butanga bwakwe, baalu balazilanganya mbelele nzyobapedwe (Amubone muncali 8)

[Cifwanikiso icili apeeji 25]

Baalu balalangaula nzila mobakonzya kukwabilila mikwasyi iijisi muzyali uuli alikke kukuyanzana kubyaabi (Amubone muncali 17 a 18)