Mbuti Mbotukonzya Kuzumanana Kuba Amuuya ‘Wakulindila’?

“Njoolindila.”—MIK. 7:7.

INO INGA MWAINGULA BUTI?

Ncinzi ncotukonzya kwiiya kucikozyanyo ca Mika?

Nzyintu nzi nzyotulindila kubona kuti zicitike?

Ninzila nzi zimwi motukonzya kutondezya kulumba Jehova akaambo kakuti ulakkazyika moyo?

1. Ncinzi cikonzya kupa kuti tuleke kukkazyika moyo?

CIINDI Bwami bwabu Mesiya nobwakatalika kulela mu 1914, mamanino aabweende bwazyintu bwa Saatani akatalika. Akaambo kankondo yakacitika kujulu, Jesu wakawaala Diabolosi alimwi amadaimona aakwe anyika. (Amubale Ciyubunuzyo 12:7-9.) Saatani ulizyi kuti ujisi “buyo kaindi kaniini.” (Ciy. 12:12) Nokuba boobo, aako “kaindi kaniini” kaliko kwamyaka minji alimwi bantu bamwi balakonzya kulimvwa kuti mazuba aamamanino atola ciindi cilamfwu. Notulindila Jehova kuti abweze ntaamu, sena swebo kutugama twaleka kukkazyika moyo?

2. Ncinzi ncotutiilange-lange mucibalo eeci?

² Kutakkazyika moyo kulakonzya kuleta ntenda, nkaambo kulakonzya kutupa kucita zyintu cakutayeeya. Ino inga twazumanana buti kuba amuuya wakulindila? Cibalo eeci cilatugwasya kucita oobo kwiinda mukwiingula mibuzyo iitobela. (1) Ncinzi ncotukonzya kwiiya kujatikizya kukkazyika moyo kucikozyanyo camusinsimi Mika? (2) Nzyintu nzi iziyootondezya kuti ciindi cesu cakulindila casika kumamanino? (3) Ino inga twatondezya buti kulumba akaambo kakukkazyika moyo kwa Jehova?

NCINZI NCOTUKONZYA KWIIYA KUCIKOZYANYO CA MIKA?

3. Mumazuba aa Mika, ino bukkale bwakali buti mu Israyeli?

³ Amubale Mika 7:2-6. Musinsimi wa Jehova Mika, wakabona bukkale bwakumuuya mu Israyeli kabubija kusikila nobwakabija citaambiki mubweendelezi bubyaabi bwa Mwami Ahazi. Mika wakakozyanisya kutasyomeka kwabana Israyeli ‘kumamvwa’ alimwi ‘alubaya lwamamvwa.’ Mbubwenya mamvwa naa lubaya lwamamvwa mboluyasa muntu wiinda mpawo, abalo bana Israyeli ibakasofwaazyigwa bakanyonganya kufwumbwa muntu ngobakayanzana anguwe. Kusofwaala kwakavwula  kapati cakuti noiba mikwasyi yakanyongana. Akaambo kakuti wakalizyi kuti kunyina ncaakali kukonzya kucita kutegwa acince zyintu, Mika wakapaila camoyo woonse kuli Jehova. Mpoonya wakalindila cakukkazyika moyo kuti Leza abweze ntaamu. Mika wakalijisi lusyomo kuti Jehova ulabweza ntaamu aciindi ceelede.

4. Mbuyumuyumu nzi mbotujana?

⁴ Mbubwenya mbuli Mika, andiswe tupona akati kabantu ibaliyanda. Banji ‘tabalumbi, tabasyomeki, tabajisi luyando lwakuzyalwa andulo.’ (2 Ti. 3:2, 3) Tulapenga kapati ciindi mbotubeleka limwi, mbotwiiya limwi, alimwi abasimukoboma nobatondezya muuya wakuliyanda. Babelesi ba Leza bamwi bajisi buyumuyumu bupati kapati. Jesu wakaamba kuti basikumutobela bayakukazyigwa kuli banamukwasyi, alimwi wakabelesya majwi aakozyenye ayaayo aalembedwe mulugwalo lwa Mika 7:6 kutegwa apandulule mulumbe wakwe mbowakali kukonzya kugwasya. Jesu wakaamba kuti: “Ndakaboolela kuleta lwaandaano akati kamwana musankwa abausyi, mwana musimbi abanyina, amukamwana abanyinazyala. Masimpe, bantu bamuŋanda yakwe mbabayooba basinkondo bakwe.” (Mt. 10:35, 36) Eelo kaka cilakatazya kuliyumya ciindi banamukwasyi batasyomi nzyotusyoma nobatufwubaazya akutukazya! Ikuti katujisi penzi lili boobo kuzwa kumukwasyi, tatweelede kuleka kusyomeka. Muciindi caboobo, tweelede kuzumanana kusyomeka akulindila Jehova cakukkazyika moyo kuti alulamike zyintu. Ikuti twazumanana kulomba lugwasyo lwakwe, uyootupa nguzu abusongo mbotuyandika kutegwa tuliyumye.

5, 6. Ino Jehova wakamulongezya buti Mika, pele ncinzi Mika ncaatakabona?

⁵ Jehova wakamulongezya Mika akaambo kakukkazyika moyo kwakwe. Mika wakalibonena mamanino aa Mwami Ahazi alimwi abulelo bwakwe bubyaabi. Wakabona mwana wa Ahazi musankwa, Mwami mubotu Hezekiya, kakona bwami akupilusya bukombi busalala. Alimwi mulumbe walubeta wa Jehova ngwaakaamba kubana Samariya kwiinda muli Mika wakazuzikizyigwa ciindi bana Asuri nobakalwana bwami bwakunyika bwa Israyeli.—Mik. 1:6.

⁶ Nokuba boobo, Mika taakwe naakakubona kuzuzikizyigwa kwazyintu zyoonse Jehova nzyaakamusololela kuti asinsime. Mucikozyanyo, Mika wakalemba kuti: “Lino kumazuba aaciza, cilundu caŋanda ya-Jehova ciyooimikwa atala lyazilundu akusumpulwa kwiinda tulundulundu toonse, nkabela bantu bayookunka kulincico. Bantu bamisyobo minji bayooinka cakuti, amuboole, tutante kucilundu ca-Jehova.” (Mik. 4:1, 2) Mika wakafwa kakucili ciindi cilamfwu kuti businsimi oobo buzuzikizyigwe. Nokuba boobo, wakalikanzide kuzumanana kusyomeka kuli Jehova kusikila kulufwu, kunyina makani ancobakali kucita bantu bakamuzingulukide. Aboobo, Mika wakalemba kuti: “Misyobo yoonse ileenda muzina lyamizimu yayo, aswebo tuleenda muzina lya-Jehova Leza wesu lyoonse mane kukabe kutamani.” (Mik. 4:5) Mika wakalindila cakukkazyika moyo muciindi eeco camapenzi nkaambo wakalisyomede cakumaninina kuti Jehova wakali kuyakuzuzikizya zisyomezyo zyakwe zyoonse. Musinsimi ooyu uusyomeka, wakasyoma Jehova.

7, 8. (a) Nkaambo nzi ikatupa kuba alusyomo? (b) Ncinzi ciyakupa kuti ciindi cifwambaane kweenda?

⁷ Sena andiswe tulijisi lusyomo luli boobo muli Jehova? Kuli kaambo kamvwika ncotweelede kuba alusyomo luli boobo. Twalibonena kuzuzikizyigwa kwabusinsimi bwa Mika. ‘Kumamanino aamazuba,’ bantu banji bayookunka ‘kucilundu caŋanda ya-Jehova’ kuzwa mumisyobo yoonse mikowa yoonse amilaka yoonse. Nokuba kuti bazwa muzisi ziindene-indene, bakombi aaba bafwula “mapanga aabo abe maamba aakulimya” alimwi tabayandi ‘kwiiya nkondo limbi pe.’ (Mik. 4:3) Eelo kaka ncoolwe kubalilwa akati kabantu ba Jehova basiluumuno!

⁸ Cakutadooneka, tuyanda kuti Jehova agwisye bweende bwazyintu oobu bubyaabi  cakufwambaana. Aboobo, ikuti katuyanda kulindila cakukkazyika moyo, tweelede kulanga zyintu mbuli mbwazilanga Jehova. Wabikka buzuba nayoobeteka bantu kwiinda ‘mumwaalumi ngwasalide,’ Jesu Kristo. (Mil. 17:31) Pele katanacita oobo, Leza wapa bantu boonse coolwe cakujana “luzyibo lwini-lwini lwakasimpe,” kuti babweze ntaamu kweelana aluzyibo oolo alimwi akufwutulwa. Buumi bwabantu buli muntenda. (Amubale 1 Timoteyo 2:3, 4.) Kuti katujisi bubi kugwasya bantu kuba aluzyibo lwini-lwini kujatikizya Leza, ciindi cisyeede cakuti Jehova alete lubeta ciyakufwambaana kapati kweenda. Ino-ino—cakutayeeyela—ciindi cilamana. Caakumana, tuyakukkomana kapati kuti twakajisi bubi mumulimo wakukambauka Bwami.

NZYINTU NZI IZIYOOTONDEZYA KUTI CIINDI CESU CAKULINDILA CASIKA KUMAMANINO?

9-11. Sena lugwalo lwa 1 Batesalonika.5:3 lwakazuzikizyigwa kale? Amupandulule.

⁹ Amubale 1 Batesalonika 5:1-3. Ino-ino masi ayakwaambilizya kuti “Luumuno akuliiba!” Kutegwa tutakeenwi akwaambilizya ooku, tweelede ‘kupakamana akubatama.’ (1 Te. 5:6) Kutegwa tuzumanane kupakamana kumuuya, atulange-lange mubufwaafwi zyintu zyeelede kucitika kwaambilizya ooku kakutanacitika.

¹⁰ Noyakainda nkondo yakusaanguna ayabili yanyika yoonse, masi akali kuyanda luumuno. Noyakainda nkondo yakusaanguna yanyika yoonse, Ciinga Calukamantano Lwazisi cakabambwa kakulangilwa kuti cilaleta luumuno. Mpoonya noyakainda nkondo yabili yanyika yoonse, mbunga ya Lukamantano Lwazisi yakaba ampuwo yakuti ilaleta luumuno anyika. Mfwulumende alimwi abasololi bazikombelo bali kulanga kumbunga eezyi kuti zilaletela bantu luumuno. Mucikozyanyo, mu 1986, mbunga ya Lukamantano Lwazisi yakazumizya kuti kube kwaambilizya kwa International Year of Peace. (Mwaka Waluumuno Lwamasi) Mumwaka ooyu, beendelezi kuzwa muzisi zinji alimwi amuzikombelo bakasangana musololi wa Cikombelo ca Katolika ku Assisi, mucisi ca Italy kutegwa bapailile luumuno.

¹¹ Nokuba boobo, kwaambilizya ooko kwaluumuno akuliiba naa kumbi buyo taakwe nokwazuzikizya businsimi bulembedwe  mulugwalo lwa 1 Batesalonika 5:3. Ino nkaambo nzi? Akaambo kakuti “lunyonyooko” ilwakaambilwa limwi talunacitika.

12. Ncinzi ncotuzyi kujatikizya kwaambilizyigwa kwa “Luumuno akuliiba”?

¹² Mbaani bayakwaambilizya “Luumuno akuliiba” kumbele? Mulimo nzi basololi ba Bunakristo Bwakubeja alimwi abazikombelo zimbi ngobayakucita? Ino beendelezi bazisi ziindene-indene banoojisi lubazu nzi mukwaambilizya ooku? Magwalo taatwaambili cili coonse kujatikizya makani aaya. Ncotuzyi ncakuti kufwumbwa naa kwaambilizya kunooli buti naa kunoomvwika kabotu buti, kwaambilizya ooku kunooli kwakweena. Bweende oobu buliko bulazumanana kweendelezyegwa aa Saatani. Bulibolede boonse alimwi bulazumanana kuba boobo. Eelo kaka inga caba cintu cuusisya kuti umwi wesu wasyoma makanze aa Saatani akunyonganya ciimo cesu ca Bunakristo cakutatola lubazu mutwaambo twacisi!

13. Nkaambo nzi bangelo ncobajisi myuuwo yalunyonyooko?

¹³ Amubale Ciyubunuzyo 7:1-4. Notulindila kuzuzikizyigwa kwalugwalo lwa 1 Batesalonika 5:3, bangelo basinguzu baliijisi canguzu myuuwo yalunyonyooko lwamapenzi mapati. Ino balindila nzi? Cintu cimwi iciyandika kapati iceelede kucitika cilipanduludwe amwaapostolo Johane—kugantwa kwamamanino kwabananike “bazike ba Leza wesu.” * Mbokuyoomanina buyo kugantwa ooku kwamamanino, bangelo bayoolekezya myuuwo yalunyonyooko. Mpoonya ncinzi ciyakucitika?

14. Ncinzi citondezya kuti lunyonyooko lwa Babuloni Mupati luli afwaafwi?

¹⁴ Babuloni Mupati, bukombi bwakubeja bwanyika yoonse buyakunyonyoonwa. “Mikowa yabantu, makamu aabantu, masi alimwi amilaka” tabakamugwasyilizyi pe. Twabona kale zitondezyo zyakuti kunyonyoonwa kwakwe kuli afwaafwi. (Ciy. 16:12; 17:15-18; 18:7, 8, 21) Mubwini kutamugwasyilizya ooku kulalibonya lino kuli basimubweza twaambo naa muli sikapepele mwalo bukombi alimwi abasololi bazikombelo mobali mukutongookwa. Nokuba boobo, basololi ba Babuloni Mupati tababwene kuti bali muntenda. Eelo kaka balisweekede mukuyeeya kwabo! Kwaakwiinda kwaambilizya kwakuti: “Luumuno akuliiba!” beendelezi bazisi mubweende bwa Saatani cakufwambaana bayakubukila bukombi bwakubeja alimwi akubunyonyoona. Babuloni Mupati takalibonyi limbi! Masimpe, cilagwasya kulindila cakukkazyika moyo zyintu eezyi zipati noziyakucitika.—Ciy. 18:8, 10.

INO INGA TWATONDEZYA BUTI KULUMBA AKAAMBO KAKUKKAZYIKA MOYO KWA LEZA?

15. Nkaambo nzi Jehova ncaatabweza ntaamu cakufwambaana?

¹⁵ Nokuba kuti bantu balisampaula zyina lyakwe, Jehova walindila cakukkazyika moyo ciindi ceelede cakuti abweze ntaamu. Jehova tayandi kuti muntu uuli woonse uusyomeka akanyonyoonwe. (2 Pe. 3:9, 10) Sena andiswe mbotulimvwa oobo? Buzuba bwa Jehova kabutanasika, tweelede kutondezya kulumba akaambo kakukkazyika moyo kwakwe munzila zitobela.

16, 17. (a) Nkaambo nzi ncotweelede kubagwasya aabo ibatacisungweede? (b) Nkaambo nzi ibatacisungweede ncobeelede kufwambaana kupiluka kuli Jehova?

¹⁶ Amubagwasye aabo ibatacisungweede. Jesu wakaamba kuti kuli kukondwa kujulu ciindi mbelele yakasweekede noyajanwa. (Mt. 18:14; Lk. 15:3-7) Cakutadooneka, Jehova ulababikkila maano kapati boonse ibatondezya luyando kuzyina lyakwe, nokuba kuti tabasungweede kumubelekela ecino ciindi. Notubagwasya bali boobo kupiluka kumbungano, tupa kuti Jehova abangelo bakkomane.

¹⁷ Sena muli akati kabaabo batacisungweede kubelekela Leza lino? Ambweni umwi mumbungano wakamufwumpula  aboobo mwakaleka kuyanzana ambunga ya Jehova. Mbwaanga kwainda ciindi, amulibuzye kuti: ‘Sena buumi bwangu lino bulaampindu kapati, alimwi sena ndilikkomene? Sena Jehova ngowakandilubizyila, naa muntu uutalondokede? Sena Jehova Leza kuli naakacitide cintu cimwi kutegwa ndifwumpulwe?’ Bwini mbwakuti, lyoonse wali kutucitila zyintu zibotu. Nokuba kuti tatuponi kweelana akulyaaba kwesu kulinguwe, ulatuzumizya kukkomana azyintu zibotu nzyatupa. (Jak. 1:16, 17) Ino-ino, buzuba bwa Jehova buyakusika. Ecino nceciindi cakupiluka kuli Taateesu wakujulu siluyando alimwi akumbungano yakwe—busena bulikke imuli lukwabililo mumazuba aano aamamanino.—Dt. 33:27; Heb. 10:24, 25.

18. Nkaambo nzi ncotweelede kubagwasyilizya aabo basololela?

¹⁸ Cakusyomeka amubagwasyilizye aabo basololela. Mbwali Mweembezi siluyando, Jehova ulatusololela akutukwabilila. Wasala Mwanaakwe kuba Mweembezi Silutwe wabutanga. (1 Pe. 5:4) Baalu mumbungano ziinda ku 100,000 baleembela mbelele zya Leza imwi aimwi kwiigama. (Mil. 20:28) Ciindi notubagwasyilizya cakusyomeka aabo basalidwe kusololela, tutondezya kulumba kwesu kuli Jehova alimwi a Jesu akaambo kazyintu zyoonse nzyobatucitila.

19. Ino inga twaswena buti kuli umwi amweenzinyina?

¹⁹ Amuswene kuli umwi amweenzinyina. Ino eeci caamba nzi? Ciindi impi yakayiisigwa kabotu noilwanwa abasinkondonyina, sikalumamba umwi aumwi ulaswena kumweenzinyina. Kucita boobo kupa kuti babe alukwabililo luyumu kapati. Saatani wayungizya nkondo yakwe kubantu ba Leza. Ecino tacili ciindi cakulwana muli cesu. Ecino nciindi cakuswena kuli umwi amweenzinyina, akutondezya lusyomo mubusolozi bwa Jehova muciindi cakubikkila maano kukutalondoka kwabamwi.

20. Ncinzi ncotweelede kucita lino?

²⁰ Aboobo, toonse atuzumanane kupakamana kumuuya alimwi akutondezya muuya wakulindila. Cakukkazyika moyo, atulindile kwaambilizyigwa kwa “Luumuno akuliiba!” alimwi akugantwa kwamamanino kwabaabo basalidwe. Kuzwa waawo, bangelo bone bayakulekezya myuuwo yalunyonyooko mpoonya Babuloni Mupati uyakunyonyoonwa. Notulindila zyintu eezi zipati kuti zicitike, tweelede kuzumina busolozi kuzwa kulibaabo basalidwe kusololela mumbunga ya Jehova. Atuswene kuli umwi amweenzinyina kutegwa tumukazye Diabolosi alimwi amadaimona. Ecino nceciindi cakutobela lulayo lwa sintembauzyo lwakuti: ‘Amuyume, amyoyo yanu ibe abukozu, nyoonse nomulindila Jehova.’—Int. 31:24.

[Bupanduluzi buyungizidwe]

[Mibuzyo yaciiyo]

[Zifwanikiso izili apeeji 12]

Bantu ba Jehova balasolekesya kapati kugwasya batacisungweede kupiluka kuli Jehova (Amubone muncali 16 a 17)

[Cifwanikiso izili apeeji 14]

Ecino nciindi cakuswena kuli umwi amweenzinyina kutegwa tumukazye Diabolosi alimwi amadaimona (Amubone muncali 19)