MAKANI EESU AAKAINDI

“Ndakali Mbuli Nondo Iili Mucipapa Cayo”

CIINDI camulimo wakukambauka waalubazu iwakacitwa kwamazuba aali fwuka mu August/September 1929, bakambausi bainda ku 10,000 cabusungu bakacita mulimo ooyu mucisi ca United States. Bakaabila bantu mabbuku alimwi atubbuku tusika ku 250,000. Akati kabasikumwaya ba Bwami aaba kwakali bapainiya babalilwa ku 1,000. Eelo kaka bakali banji! Ipepa litegwa Bulletin * lyakaamba kuti: “Cilagambya kapati” kubona kuti mweelwe wabapainiya wakayungizika ziindi zyotatwe kuzwa mu 1927 kusika mu 1929.

Kumamanino aamwaka wa 1929, kwakabbuka penzi lyamali. Buzuba oobu zyintu nozyakanyongana—October 29, 1929—makwebo mu New York akanyongana kapati cakuti bweende bwamali nyika yoonse bwakayaansi kapati. Mabbanki manji akanyina mali. Milimo iyakali kucitwa mumafaamu yakaima. Makkampani mapati-pati akajalwa. Mamiliyoni aabantu bakatandwa milimo. Mu 1933, mucisi ca United States, mweelwe wabantu ibakali kunyangwa zyintu akaambo kazikwelete wakatanta kusika ku 1,000 abuzuba.

Ino bakambausi baciindi coonse bakacikonzya buti mumapenzi aaya? Cintu cimwi icakabagwasya maanda aakajisi mavwili ngobakajisi. Maanda aaya aakajisi mavwili kunyina naakali kubbadelelwa alimwi kwakanyina kutela, mootokala uujisi ŋanda naa maanda aakwelwa akabagwasya bapainiya banji kutegwa bacite mulimo kakunyina zyintu zinji zyakubbadelela. * Mpoonya ciindi camuswaangano wacooko, maanda aaya aakali kukwelwa akali kubelesyegwa mbuli maluumu aamu hotela aatabbadelelwi. Mu 1934, ipepa lya Bulletin lyakaamba zyabubambe bwakupanga ŋanda iijisi zyintu zinji pele iili kabotu, zyintu mbuli aakubikka maanzi, citofwu, bulo bwakupeta alimwi azyintu zimwi izyakali kunga zyagwasya ciindi campeyo.

Bakambausi bamwi mumasena aasiyene-siyene bakali kuyaka maanda aakajisi mavwili. Mukwesu Victor Blackwell wakaamba kuti: “Nowa tanaakajisi luzyibo lwakuyaka bwato, andime tiindakajisi luzyibo lwakuyaka ŋanda iijisi mavwili.” Nokuba boobo, bakacikonzya kuyaka.

Ba Avery aba Lovenia Bristow bakalijisi mootokala iwakajisi ŋanda. Ba Avery bakaamba kuti: “Ndakali mbuli nondo iili mucipapa cayo—ŋanda yangu ndakali kweenda ayalo.” Bana Bristow bakali kucitila antoomwe bupainiya aba Harvey Conrow abakaintu babo ba Anne, ibakajisi ŋanda yakajisi mavwili iyakanamatikidwe zipepa zyakubwaanda ataala. Zipepa zyakali kuloka kufwumbwa ciindi balonga buyo. Ba Avery bakaamba kuti: “Kunyina wakabwene kale ŋanda iijisi mavwili iili mbuli yabo, alimwi kunyina wakaibona kale kumbi kuzwa leelyo!” Nokuba boobo, ba Avery bakaamba boobu kujatikizya bana Conrow abana babo basankwa bobilo, bakati: “Wakali mukwasyi uukkomene kapati.” Ba Harvey Conrow bakalemba kuti: “Kunyina cintu ncotwakabula, alimwi twakali kulimvwa kwaanguluka ncobeni mumulimo wa Jehova akulanganizyigwa kabotu anguwe.” Bana Conrow aaba bone boonse bakanjila Cikolo ca Gileadi alimwi bakatumwa kuyakubelekela kucisi ca Peru mulimo wabumisyinali.

Bana Battainos abalo bakali kucitila antoomwe mulimo wabupainiya kabali mukwasyi. Ciindi ba Giusto aba Vincenza nobakazyiba kuti bayakuba aamwana, bakacinca mootokala wabo wamusyobo wa 1929 Model A Ford kuba ŋanda iyakali kulibonya “mbuli hotela mbotu”  ikuti yeezyanisyigwa amatente mobakali kukkala kaindi. Antoomwe amwanaabo musimbi, bakazumanana mumulimo ngobakali kuyanda kapati, kukambaukila bantu bazwa mucisi ca Italy ibakali kukkala mucisi ca United States.

Bantu banji bakali kwaatambula kabotu makani mabotu, nokuba boobo bantu bacete alimwi batabeleki ziindi zinji tiibakali kucikonzya kusanga mali kumabbuku aapandulula Bbaibbele ngobakali kubweza. Muciindi caboobo, bakali kucincanisya mabbuku azyintu. Bapainiya bamwi bobilo bakalemba mulongo wazyintu zisika ku 64 ziindene-indene nzyobakali kupegwa kuzwa kubantu bakajisi luyandisisyo. Mulongo ooyu wakalembedwe kuti: “Mbuli mulongo wazyintu zyuulwa mucintoolo.”

Ba Fred Anderson bakaswaanganya mulimi iwakali kuyanda mabbuku eesu kwiinda mukucincanisya amagilazi aakumeso aakali aabanyina. Afaamu iitobela, mwaalumi umwi wakatondezya luyandisisyo lwakutambula mabbuku eesu pele wakaamba kuti: “Tandijisi magilazi aakubelesya nondibala.” Pele kwiinda mukubelesya magilazi aakazwa kumulimi, bakali kucikonzya kubala kabotu alimwi calukkomano bakasanga akaambo kamabbuku alimwi amagilazi ngobakabweza.

Ba Herbert Abbott bakali kweenda acizangala cakunyamwida nkuku mumootokala wabo. Ikuti nkuku nzyobacincanisya zyakkwana zyotatwe naa zyone, bakali kuunka kumusika akuzisambala akuula mungwimba wamumootokala. Bakalemba kuti: “Sena zimwi ziindi akali kumana mali? Inzya, pele penzi eelyo tiilyakapa kuti tucileke mulimo pe. Ikuti katujisi mungwimba mumootokala, twakali kuzumanana kweenda, katusyomede muli Jehova.”

Kusyoma Jehova akuba aamakanze mayumu kwakabagwasya bakwesu mumazuba aayo aakali kukatazya. Bumwi buzuba nokwakali kuwa mvula yaguwo, ba Maxwell aba Emmy Lewis bakazwa muŋanda yabo yakajisi mavwili aciindi ceelede, nkaambo kwakainda buyo ciindi cisyoonto kwakawa cisamu akukosola ŋanda yabo muzibeela zyobilo. Ba Maxwell bakaamba kuti: “Zyintu eezyi tiizyakali kukonzya kutusinkila pe, zyakali buyo ntenda, alimwi kunyina notwakali kuyeeya zyakuleka mulimo ooyu. Kwakali mulimo mupati wakali kuyandika kucitwa, alimwi twakali kuyanda kuucita.” Kakunyina kuyoowa alimwi kwiinda mulugwasyo lwabalongwe, ba Maxwell aba Emmy bakabambulula ŋanda yabo yakajisi mavwili.

Mbubwenya buyo amazuba aano aakatazya, mamiliyoni aa Bakamboni ba Jehova basungu balautondezya muuya ooyu wakulyaaba. Kuyungizya waawo, mbubwenya mbuli bapainiya aaba bakusaanguna, tulikanzide kuzumanana mumulimo wesu wakukambauka kusikila mane Jehova akaambe kuti mwawoonda mulimo.

[Bupanduluzi buyungizidwe]

[Cifwanikiso icili apeeji 32]

Mootokala uujisi ŋanda uuyanda kutolwa kutala ciindi mvula noiwa kapati ku India