“Mutafwambaani Kulekela Mizeezo Yanu Kunyonganizyigwa”!

“Bakwesu, . . . tumulomba kuti mutafwambaani kulekela mizeezo yanu kunyonganizyigwa”—2 TE. 2:1, 2.

TWAAMBO TWEELEDE KULANGWA-LANGWA

Ino nkucenjezya nzi kwakapegwa aciindi ceelede ikujanika mumagwalo Paulo ngaakalembela bana Tesalonika?

Ncinzi cikonzya kutugwasya kutegwa tuteenwi?

Ino kukambauka Bwami cabusungu kutukwabilila buti?

1, 2. Nkaambo nzi lweeno ncoluvwulide kapati mazuba aano, alimwi ntwaambo nzi tumwi twalweeno ituliko? (Amubone cifwanikiso icili kumatalikilo aacibalo.)

MAZUBA aano, lweeno abumpelenge bwavwula kapati. Eeci taceelede kutugambya pe. Bbaibbele lilasalazya kwaamba kuti Saatani Diabolosi ngusikweena uucibwene kapati, akuti nguweendelezya nyika. (1 Ti. 2:14; 1 Jo. 5:19) Mbotuyaabuswena kumamanino aabweende bwazyintu oobu bubyaabi, Saatani uyaabwiindila kunyema nkaambo “ujisi buyo kaindi kaniini.” (Ciy. 12:12) Aboobo, aabo bayungwa a Diabolosi balalangilwa kapati kweena baabo basumpula bukombi bwakasimpe.

² Zimwi ziindi twaambo tunyongene alimwi atwaambo twakubeja itujatikizya babelesi ba Jehova azyintu nzyobasyoma zilaambwa muli sikapepele. Mitwe yamakani mumiteende, muzipeku-peku, alimwi aa Intaneti ilabelesyegwa kumwaya twaambo twakubeja. Akaambo kaceeci, bantu bamwi balanyongana akufwambaana kusyoma twaambo twakubeja tuli boobu.

3. Ncinzi cikonzya kutugwasya kutegwa tulwane lweeno?

³ Tulikkomene kapati nkaambo tulijisi Ijwi lya Leza ‘iligwasya . . . mukululamika’ kutegwa tulwane nzila eeyi njabelesya sinkondoma. (2 Ti 3:16) Cilayandika kapati kuti twiiye nzyaakalemba mwaapostolo Paulo ku Banakristo bamwi bamumwaanda wamyaka wakusaanguna baku Tesalonika balo ibakeenwa, akuzumina twaambo twakubeja. Wakabakulwaizya kuti ‘batafwambaani kulekela mizeezo yabo kunyonganizyigwa.’ (2 Te. 2:1, 2) Ncinzi ncotukonzya kwiiya kukukulwaizya kwa Paulo kwaluyando, alimwi mbuti mbotukonzya kuzibelesya nzyaakaamba mubukkale bwesu?

 KUCENJEZYEGWA ACIINDI CEELEDE

4. Mbuti Banakristo baku Tesalonika mbobakagwasyigwa kupakamana kujatikizya kuboola ‘kwabuzuba bwa Jehova,’ alimwi mbuti mbotugwasyigwa kupakamana mazuba aano?

⁴ Mulugwalo lwakwe lwakusaanguna ndwaakalembela mbungano yaku Tesalonika, Paulo wakabikkila maano kukuboola ‘kwabuzuba bwa Jehova.’ Tanaakali kuyanda kuti Banakristonyina kabali mumudima alimwi kabatalibambilide. Muciindi caboobo, mbuli “bana bamumuni” wakabakulwaizya ‘kupakamana akubatama.’ (Amubale 1 Batesalonika 5:1-6.) Mazuba aano tulindila kunyonyoonwa kwa Babuloni Mupati, bukombi bwakubeja bwanyika yoonse. Lunyonyooko oolu anooli ngamatalikilo aabuzuba bupati bwa Jehova. Tulalumba nkaambo tulazimvwisya zyintu zijatikizya kuzuzikizyigwa kwamakanze aa Jehova. Alimwi kwiinda mumbungano, ciindi aciindi tulatambula ziyeekezyo aciindi ceelede zyalo zitugwasya kubatama. Kubikkila maano kukucenjezya ooku kulakonzya kuyumya makanze eesu aakubelekela Leza “mulimo uusetekene . . . kwiinda mukubelesya maano.”—Lom. 12:1.

5, 6. (a) Ncinzi Paulo ncaakaamba mulugwalo lwabili ndwaakalembela bana Tesalonika? (b) Ncinzi Leza ncayoocita ino-ino kwiinda mukubelesya Jesu, alimwi mibuzyo nzi njotweelede kulibuzya?

⁵ Naakamana buyo kutuma lugwalo lwakwe lwakusaanguna ku Banakristo baku Tesalonika, Paulo wakabatumina lugwalo lwabili. Mulugwalo oolu, wakabikkila maano kumapenzi aayakuboola ciindi Mwami Jesu nayakusubula “baabo batamuzyi Leza abaabo bataswiilili makani mabotu.” (2 Te. 1:6-8) Mucaandano 2 calugwalo oolu uyubununa kuti bamwi mumbungano ‘bakazwa moyo’ kujatikizya buzuba bwa Jehova cakuti bakasyoma kuti buzuba bwakali afwaafwi kapati kusika. (Amubale 2 Batesalonika. 2:1, 2.) Banakristo bakusaanguna aabo bakajisi buyo luzyibo lusyoonto lujatikizya kuzuzikizyigwa kwamakanze aa Jehova, mbubwenya Paulo mbwaakaamba kujatikizya businsimi bwakuti: “Tujisi luzyibo lutazulide alimwi tulasinsima cakutazulila; pele eelyo twaakuba aluzyibo luzulide akusinsima cakuzulila, eezyo zitazulide ziyoomana.” (1 Ko. 13:9, 10) Pele majwi aakucenjezya ngobakasololelwa amuuya kulemba ba Paulo, mwaapostolo Petro alimwi a Banakristo bananike basyomeka bamwi  bakuciindi eeco akali kukonzya kubagwasya kuti bazumanane kuba alusyomo.

⁶ Kutegwa alulamike twaambo, Paulo wakasololelwa kupandulula kuti luleyo lupati alimwi “amuntu mubi” zyakeelede kuboneka kabutanasika buzuba bwa Jehova. * Kuzwa waawo, muciindi ceelede Mwami Jesu wakali ‘kuyoobanyonyoona’ boonse aabo ibakeenwa. Cakutainda mumbali, mwaapostolo wakaamba kaambo lubeta oolu ncolwakali kweelela aali mbabo; “tiibakatondezya kuti balakayandisya kasimpe.” (2 Te. 2:3, 8-10) Aboobo, umwi aumwi weelede kulibuzya kuti: ‘Sena kasimpe ndilakayandisya? Sena kasimpe ndilakateelela kweelana ambokapandululwa mazuba aano mumamagazini alimwi amabbuku eesu aambi aapandulula Bbaibbele aapegwa mumbungano yabantu ba Leza nyika yoonse?’

AMUSALE BALONGWE BANU CABUSONGO

7, 8. (a) Ino nintenda nzi Banakristo bakusaanguna nzyobakeelede kulwana? (b) Ino nintenda nzi imwi mpati iiliko ku Banakristo bakasimpe mazuba aano?

⁷ Mubwini, Banakristo bakali kuyakujana ntenda zimbi kunze aazeezyo zyakali kukonzya kuletwa abasiluleyo alimwi anjiisyo zyabo. Paulo wakalembela Timoteo kuti “kuyandisya mali ngomuyanda wamisyobo yoonse yazyintu zibyaabi.” Mwaapostolo wakatondezya kuti “kwiinda mukuba aluyandisisyo luli boobu bantu bamwi baleya kulusyomo alimwi baliyasaula koonse-koonse amacise manji.” (1 Ti. 6:10) “Milimo yamubili” ayalo yakali kukonzya kuleta ntenda lyoonse.—Gal. 5:19-21.

⁸ Aboobo, mulakonzya kubona kaambo Paulo ncaakacenjezya bana Tesalonika cakukankaizya kujatikizya ntenda mpati njobakali kukonzya kuleta baalumi bali boobo balo mbaakaamba kuti “mbatumwa babeji.” Akati kabo kwakali baalumi ibakali kwaamba “zyintu zipilingene kutegwa balikwelele basikwiiya.” (2 Ko. 11:4, 13; Mil. 20:30) Nokwakainda ciindi, Jesu wakalumbaizya Banakristo bamumbungano yaku Efeso akaambo kakuti ‘tiibakabaleka buyo bantu babi.’ Bana Efeso aabo ‘bakabasunka’ aabo ibakali baapostolo bakubeja. (Ciy. 2:2) Cikkomanisya ncakuti mulugwalo lwabili ndwaakalembela bana Tesalonika, Paulo wakabakulwaizya kuti: “Lino tumupa malailile bakwesu, muzyina lya Mwami Jesu Kilisito, kuti mumutantamuke mukwesu uuli woonse weenda cakupilingana.” Mpoonya cacigaminina wakaamba Banakristo ‘ibatakali kuyanda kubeleka.’ (2 Te. 3:6, 10) Pele kuti naa bantu ibakali boobo bakali kubonwa kuti beenda cakupilingana, nkokuti aabo ibakali kulangilwa kuba basiluleyo bakali babi kapati. Inzya, kuyanzana kapati abantu bali boobo kuciindi eeco kwakali kuleta ntenda mpati alimwi kwakeelede kweelebwa—oobo mboceelede kuba amazuba aano.—Tus. 13:20.

9. Nkaambo nzi ncotweelede kupakamana kuti muntu umwi watalika kwaamba zyakuyeeyela naa kutongooka?

⁹ Tuyaabuswena kuciindi camapenzi mapati alimwi akumamanino aabweende oobu bubyaabi, aboobo ikucenjezya ikwakasololelwa amuuya ikwakapegwa mumwaanda wamyaka wakusaanguna kulayandika kapati lino. Cakutadooneka, tatuyandi kuti luzyalo lwa Jehova ‘lube lwabuyo’ alimwi akuti tusweekelwe cisyomezyo cabuumi butamani, kujulu naa anyika. (2 Ko. 6:1) Kuti kakuli muntu uujanika kumiswaangano yesu uusola kutoongelezya kubandika zyintu zyakuyeeyela naa kutongooka bamwi, tweelede kupakamana.—2 Tes. 3:13-15.

 ‘AMUJATISYE ZYINTU NZYOMWAKAYIISYIGWA’

10. Nzyintu nzi nzyobakayiisyigwa Banakristo baku Tesalonika nzyobakakulwaizyigwa kusyoma?

¹⁰ Paulo wakaambila Banakristonyina baku Tesalonika kuti ‘baime nji’ alimwi akukakatila kuzyintu nzyobakaiya. (Amubale 2 Batesalonika 2:15.) Ino “zyintu” nzyobakayiisyigwa zyakali zinzi? Tiizyakali zyeezyo izyakali kusumpulwa mubukombi bwakubeja akubonwa kuti zilayandika kwiinda zyeezyo zyakali kujanwa mu Magwalo. Muciindi caboobo, Paulo wakali kwaamba njiisyo walo abamwi nzyobakatambula kuli Jesu alimwi azyeezyo Leza nzyaakamusololela kwaambila bamwi, bunji bwanzizyo izyakazyooba cibeela ca Magwalo aakasololelwa amuuya. Paulo wakalumbaizya Banakristonyina mumbungano yaku Korinto naakabalembela kuti: “Mulandiyeeya muzyintu zyoonse alimwi mulazitobelesya zilengwa mbubonya mbondakamwaambila nzizyo.” (1 Ko. 11:2) Njiisyo zili boobo zyakali kukonzya kusyomwa nkaambo zyakali kuzwa kubantu basyomeka.

11. Muunzila nzi zimwi bantu bamwi mobakonzya kujatikizyigwa alweeno?

¹¹ Ciindi naakali kulembela bana Hebrayo, Paulo wakabikkila maano kuzyintu zyobilo izikonzya kupa kuti Munakristo asweekelwe lusyomo alimwi akwaalilwa kwiima nji. (Amubale Bahebulayo 2:1; 3:12.) Wakaamba kujatikizya ‘kuleya’ alimwi ‘akulizandula.’ Kuti bwato bwaleya kuzwa kunkomwe, kumatalikilo tabukonzyi kulibonya kuti bwaleya. Mukuya kwaciindi musinzo ulatalika kulampa. Kulubazu lumwi, mwaalumi uukwasula bwato kuzwa kunkomwe ulabutantamuna kwiinda mukukwasula. Nzila zyoonse zyobilo zilatondezya kabotu bukkale bantu bamwi mbobeenwa, calo cipa kuti lusyomo ndobajisi mukasimpe luceye.

12. Ino nzyintu nzi zyamazuba aano izikonzya kutunyonyoona kumuuya?

¹² Kweelede kuti oobo mbocakabede kubana Tesalonika bamwi. Mbuti mazuba aano? Zyintu zikonzya kutumanina ciindi zyavwula. Amuyeeye buyo ciindi cibelesyegwa kubandika abamwi a Intaneti, kubala akulemba tugwalo, kusumpula zyintu nzyotuyandisya naa kuyanda kuzyiba zicitika mumakani aazisobano lyoonse. Zyintu zili boobu zilakonzya kunyonganya Munakristo akupa kuti aleke kusungwaala. Ncinzi cikonzya kucitika? Ulakonzya kuleka kupaila kuzwa aansi aamoyo, kwiiya Jwi lya Leza, kujanika kumiswaangano alimwi akukambauka makani mabotu. Ncinzi ncotukonzya kucita kutegwa tutafwambaani kunyonganizyigwa mumizeezo?

MBOTUKONZYA KUKWABILILWA KUTEGWA TUTANYONGANIZYIGWI

13. Kweelana ambokwakaambilwa limwi, muuya nzi ngobatondezya bantu banji, alimwi ncinzi cikonzya kutugwasya kutegwa lusyomo lwesu lutanyonganizyigwi?

¹³ Cintu cimwi ncotweelede kucita nkuzumanana kuyeeya ciindi ncotupona alimwi akuziba mbotukonzya kunyonganizyigwa abantu aabo bakaka kuzumina kuti aano “mazuba aamamanino.” Kujatikizya ciindi eeci, mwaapostolo Petro wakalemba kuti: “Kuyooboola basikasampusampu akusampaula kwabo, ibayootobela zisusi zyabo beni kabaamba kuti: ‘Ino nkuli ikubako kwakwe ooko kwakasyomezyegwa? Kayi, kuzwa buzuba bamatata nobakoona mulufwu, izyintu zyoonse zilazumanana mbubonya mbozyakabede kuzwa kumatalikilo aazilenge.’” (2 Pe. 3:3, 4) Kubala alimwi akwiiya Jwi lya Leza lyoonse kuyakutugwasya kubikkila maano kuciindi mpotweendela—kutugwasya kuzumanana kubona kuti tupona “kumazuba aamamanino.” Luleyo ilwakaambilwa limwi lwakalibonya kaindi alimwi lwazumanana amumazuba aano. “Muntu mubi” wazumanana kubako akukazya babelesi ba Leza. Aboobo, tweelede kuzumanana kupakamana kubona mbobwaswena buzuba bwa Jehova.—Zef. 1:7.

14. Ino kujata bubi lyoonse mumulimo wa Leza kutukwabilila buti?

¹⁴ Kweelana azyintu zicitika, nzila iiyandika kapati iikonzya kutupa kupakamana lyoonse alimwi akutupa kutanyonganizyigwa mumizeezo, nkukambauka makani mabotu aa Bwami lyoonse. Aboobo, ciindi Kristo Jesu, Mutwe wambungano, naakalailila basikumutobela kugwasya bantu kuba basikwiiya  kuzwa mumisyobo yoonse akubayiisya kubamba zyintu zyoonse nzyaakalailila, wakali kubapa lulayo ilwakali kuyakubakwabilila. (Mt. 28:19, 20) Kutegwa tutobele busolozi bwakwe tweelede kusungwaala mumulimo wakukambauka. Sena Banakristonyoko mu Tesalonika nibakakkutila kukambauka akuyiisya cakwiinzya buyo mulawo? Amuyeeye majwi Paulo ngaakabalembela aakuti: “Mutazimi mulilo wamuuya. Mutasampauli majwi aabusinsimi.” (1 Te. 5:19, 20) Eelo kaka bulakkomanisya businsimi mbotwiiya alimwi akwaambila bantu!

15. Nzyintu nzi zigwasya nzyotukonzya kulanga-langa ciindi cakukomba mumukwasyi?

¹⁵ Masimpe kuti tuyanda kugwasya banamukwasyi kuyaambele mumulimo wamumuunda. Bakwesu alimwi abacizyi banji bajana kuti nzila imwi iigwasya kutegwa bacite oobo nkubandika mulimo wakukambauka mucibeela cimwi cakukomba mumukwasyi. Inga cagwasya kubandika abanamukwasyi mbobakonzya kugwasya bantu ibakatondezya luyandisisyo mbobakajana. Ncinzi ncobayakubandika mukuswaya kwabo kutobela? Mitwe nzi yamakani iikonzya kubakkomanisya aabo baswaigwa kutegwa bazumanane kuba aluyandisisyo? Ndilili nocinga ceelela kapati kubaswaya? Bamwi alimwi balabelesya ciindi cimwi cakukomba mumukwasyi kulibambila miswaangano yambungano kutegwa kabazyi zyintu iziyooyiigwa kumiswaangano. Amulibambile kabotu kutegwa mukatole lubazu. Kutola lubazu kuyakuyumya lusyomo lwanu aboobo muyakugwasyigwa kutalekela mizeezo yanu kunyonganizyigwa. (Int. 35:18) Masimpe, kukomba mumukwasyi kuyakumugwasya kukwabililwa kuzyintu zyakuyeeyela alimwi akukudooneka.

16. Ncinzi cikulwaizya Banakristo bananike kuzumanana kubelesya kabotu maano aabo?

¹⁶ Ciindi notulanga Jehova mbwaalongezya bantu bakwe mumyaka yainda kwiinda mukumvwisya businsimi bwamu Bbaibbele, tulakonzya kubona ibubotu buboola kumbele. Bananike balijisi bulangizi bwakuba antoomwe a Kristo kujulu. Eelo kaka eeco cilabakulwaizya kuzumanana kubelesya maano aabo kabotu! Kujatikizya mbabo tulakonzya kwaamba majwi Paulo ngaakalembela bana Tesalonika aakuti: “Lyoonse tweelede kumulumba Leza akaambo kandinywe, bakwesu nomuyandwa a Jehova, nkaambo Leza wakamusala . . . kwiinda mukumusalazya amuuya wakwe alimwi akaambo kalusyomo lwanu mukasimpe.”—2 Te. 2:13.

17. Nkukulwaizya nzi nkomujana mulugwalo lwa 2 Batesalonika 3:1-5?

¹⁷ Alimwi abalo aabo ibalangila buumi butamani anyika beelede kubeleka canguzu kutegwa batafwambaani kulekela mizeezo yabo kunyonganizyigwa. Kuti bulangizi bwanu mbwakupona anyika, amubikkile maano kukukulwaizya kwa Paulo nkwaakalembela bananikenyina mu Tesalonika. (Amubale 2 Batesalonika 3:1-5.) Umwi aumwi wesu weelede kutondezya kulumba kumajwi aayo aaluyando. Masimpe, magwalo aakalembelwa bana Tesalonika alapa kucenjezya kuyandika kapati kujatikizya zyintu zyakuyeeyela buyo naa mizeezo iitali kabotu. Mbotuli Banakristo ibapona kumamanino kwini, tweelede kukubikkila maano kapati kucenjezya ooku mazuba aano.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 7]

Paulo wakalemba magwalo aakacenjezya Banakristo aciindi ceelede (Amubone muncali 4 a 5)

[Cifwanikiso icili apeeji 10]

Kulibambila kabotu alimwi akutola lubazu mumulimo wakukambauka kulakonzya kutugwasya kutegwa tutafwambaani kulekela mizeezo yesu kunyonganizyigwa (Amubone muncali 14 a 15)