SENA MUCIYEEYEDE?

Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Ino ndilili Jesu ‘naakakambaukila myuuya muntolongo’? (1 Pe. 3:19)

Ciboneka kuti cakali ciindi Jesu kabusyidwe kale, wakaambila myuuya mibi kuti cisubulo iceelede cakali kuboola aalinjiyo.—6/15, peeji 23.

Ino mbuyumuyumu nzi botatwe bweelede kulwanwa kutegwa cikwati cabili cizwidilile?

Buyumuyumu oobo mboobu: kuluba cikwati canu cakusaanguna kutegwa citanyonganyi cikwati canu cipya; kuyanzana abalongwe bakaindi batanazyibilana angomukwetene limwi; kusyoma ngomukwetene limwi lino nokuba kuti ngomwakakwetene limwi kaindi taakasyomeka.—7/1, mapeeji 9-10.

Ndilili Jesu nayakubeteka bantu kuba mbelele naa mpongo? (Mt. 25:32)

Jesu uyakubeteka bantu bamuzisi zyoonse kuba mbuli mbelele naa mpongo aakuboola ciindi camapenzi mapati.—7/15, peeji 6.

Ndilili bantu bacita bubi ibaambidwe mucikozyanyo camaila ansaku nobayakulila akuluma ntwino? (Mt. 13:36, 41, 42)

Bayakucita oobo ciindi camapenzi mapati nobayakubona kuti taakwe busena bwakuyubila kutegwa batanyonyoonwi.—7/15, peeji 13.

Ino majwi aa Jesu aajatikizya muzike musyomesi uucenjede azuzikizyigwa lili? (Mt. 24:45-47)

Akatalika kuzuzikizyigwa, ikutali lya Pentekoste mu 33 C.E., pele nowakainda mwaka wa 1914. Mu 1919, muzike wakasalwa kutegwa alanganye lubono, oolu lubono lubikkilizya Banakristo boonse ibasaninwa kumuuya.—7/15, peeji 21-23.

Ndilili Jesu nayakusala muzike musyomesi kulanganya lubono lwakwe loonse?

Uyakucita oobo kumbele, lyamapenzi mapati ciindi muzike musyomesi uucenjede aakutambula bulumbu bwakujulu.—7/15, peeji 25.

Sena bantu bamwi bataambidwe mazyina mu Bbaibbele tiibakali kuyandika kapati?

Peepe, tatweelede kuyeeya boobo. Ibbaibbele talyaambi mazyina aabantu bamwi ibakali babotu alimwi aabantu bamwi ibakali babi. (Rut. 4:1-3; Mt. 26:18) Tupedwe buyo mazyina aabangelo bobilo basyomeka.—8/1, peeji 10.

Kunze aanguzu izizwa kuli Leza, ncinzi cakabagwasya Bakamboni ibali 230 kutegwa beende lweendo lulamfwu lwakuzwa kucilabba ca Sachsenhausen?

Nokuba kuti tiibakajisi nguzu akaambo kanzala akuciswa, bakali kukulwaizyanya lyoonse kutegwa bazumanane kuliyumya.—8/15, peeji 18.

Nkaambo nzi ncaatukulwaizya makani aajatikizya bana Israyeli mbobakazabuka Mulonga wa Jordano kunjila mu Nyika Yakasyomezyegwa?

Nokuba kuti mulonga wakalipaide, Jehova wakapa kuti maanzi aleke kweenda kutegwa bantu bakwe bakonzye kuzabuka. Eeci ceelede kuti cakayumya lusyomo lwabo muli nguwe, andiswe tulakonzya kukulwaizyigwa amakani aaya.—9/15, peeji 16.

Ino kwaambwa kwamubala cakwiinduluka-induluka mu Bbaibbele kutondezya nzi?

Ibbaibbele mbolibelesya mubala citondezya kuti Leza ulizyi kuti mubala ulakonzya kucinca mbwalimvwa muntu alimwi akuti mubala ulakonzya kutugwasya kwiibaluka zyintu.—10/1, mapeeji 14-15.

Ino businsimi ibuli kulugwalo lwa Mika 5:5 ibujatikizya beembezi abeendelezi buli mukuzuzikizyigwa buti mazuba aano?

Beembezi bali musanu ababili abeendelezi bali ciloba ibaambwa kulugwalo lwa Mika 5:5, baamba baalu basalidwe mumbungano, ibayumyayumya bantu ba Leza kujatikizya kulwanwa kwabantu ba Leza kumbele.—11/15, peeji 20.

Ntwaambo nzi tumwi tuliko ncotuyandika Leza?

Leza ulatupa busolozi bubotu alimwi abwiinguzi bubotu kumibuzyo iijatikizya mapenzi, izyintu zyalo nzyotuyandika mubuumi. Ulatugwasya kutegwa katupona kabotu akukkomana, alimwi kutegwa eezyi zikonzyeke, uyakuzizuzikizya zisyomezyo izili mu Jwi lyakwe.—12/1, mapeeji 4-6.