Sena Muyakupa Zipaizyo Akaambo ka Bwami?

“Leza uyanda muntu uupa kumwi kakkomene.”—2 KO. 9:7.

MAGWALO AAKUZINZIBALA KUYEEYA

Mbuti magwalo aatobela mbwaakonzya kumugwasya kulanga-langa zituuzyo nzyomupa akaambo ka Bwami?

1 Makani 29:9

1 Bakolinto 16:1, 2

2 Bakolinto 8:12

1. Nkulyaaba kuli buti nkobacita bantu banji, alimwi nkaambo nzi?

CAKULIYANDILA bantu balalyaaba kucita zyintu nzyobabona kuti zilayandika kulimbabo. Mucikozyanyo, bazyali balaaba ciindi cabo, mali, anguzu kutegwa bagwasye bana babo. Ciindi beenzinyina bamisela yabo nobacita zyintu zyakulikondelezya, balo aabo ibayanda kuyakwiiminina cisi cabo mumuzundano wa Olympics balatola ciindi cilamfwu kutegwa balibambile muzundano. Jesu awalo wakalyaaba kucita zyintu nzyaakali kubona kuti zilayandika kapati kulinguwe. Kunyina naakali kulikondelezya mwini pe, alimwi tanaakajisi bana. Muciindi caboobo, wakasala kubikkila maano kusumpula ziyandika zya Bwami. (Mt. 4:17; Lk. 9:58) Basikumutobela abalo bakazileka zyintu zimwi nzyobakali kucita kutegwa bagwasyilizye Bwami bwa Leza. Mulimo wakusumpula Bwami wakali kuyandika kapati kulimbabo kwiinda zyintu zimbi zyoonse, aboobo bakalyaaba kutegwa batole lubazu mumulimo wakugwasyilizya Bwami kusikila mpobagolela. (Mt. 4:18-22; 19:27) Aboobo, tulakonzya kulibuzya kuti, ‘Ncinzi ncondibona kuti nceciyandika kapati mubuumi bwangu?’

2. (a) Ino nkulyaaba kuli buti nkobeelede kucita Banakristo boonse bakasimpe? (b) Ino nkulyaaba kuli buti kumbi nkobacita bamwi?

² Toonse Tobanakristo bakasimpe tweelede kulyaaba munzila imwi nkaambo kucita boobo kuyakupa kuti tuzumanane kuba acilongwe cibotu a Jehova. Kulyaaba kuli boobo kulabikkilizya akubelesya ciindi cesu anguzu kutegwa tupaile, tubale Bbaibbele, tukombe mumukwasyi, tujanike kumiswaangano, alimwi akuti tutole lubazu mumulimo wakukambauka. * (Jos. 1:8; Mt. 28:19, 20; Heb. 10:24, 25) Kwiinda mukusoleka kwesu akulongezyegwa aa Jehova, mulimo wakukambauka uyaabuya ambele,  alimwi banji bazumanana kuboola ‘kucilundu caŋanda ya Jehova.’ (Is. 2:2) Kutegwa bagwasyilizye mulimo wa Bwami, banji balyaaba kuyakubelekela ku Bbeteli, mumulimo wakuyaka Maanda aa Bwami a Maanda Aakucitila Miswaangano Mipati, kubamba miswaangano, naa kugwasyilizya ciindi nokwacitika ntenda zilicitikila. Eeci tacaambi kuti mulawo buya kucita milimo eeyi kutegwa muntu akajane buumi butamani, nokuba boobo ilayandika mukugwasyilizya ziyandika zya Bwami.

3. (a) Ino tugwasyigwa buti ciindi notupa zipaizyo akaambo ka Bwami? (b) Mibuzyo nzi njotweelede kulanga-langa?

³ Cilayandika kapati lino kugwasyilizya mumulimo wa Bwami kwiinda kaindi. Cilakkomanisya kapati kaka kubona kuti banji balyaaba cakuliyandila mumulimo wa Jehova! (Amubale Intembauzyo 54:6.) Muuya uuli boobu wabwaabi utupa kukkomana kapati notulindila kuti Bwami bwa Leza buboole. (Dt. 16:15; Mil. 20:35) Nokuba boobo, toonse buyo tweelede kulilingula cakusitikila. Sena kuli nzila zimbi motukonzya kupa zipaizyo akaambo ka Bwami? Ino tubelesya buti ciindi cesu, mali, nguzu alimwi aluzyibo ndotujisi? Ino nkucenjezya kuli nkotweelede kubikkila maano? Atulange-lange cikozyanyo ncotukonzya kwiiya notupa zipaizyo cakuliyandila kutegwa tuzumanane kukkomana.

MBOBAKALI KUPA ZIPAIZYO BANA ISRAYELI KAINDI

4. Mbuti bana Israyeli mbobakali kugwasyigwa kwiinda mukupa zipaizyo?

⁴ Mumazuba aabana Israyeli, kulekelelwa zibi kwakayeeme aakupa zipaizyo. Zipaizyo zyakali kuyandika kutegwa bantu kabakkomaninwa a Jehova. Zipaizyo zimwi zyakali kuyandika kweelana amulawo, pele zimwi zyakali zyakuliyandila. (Lev. 23:37, 38) Zituuzyo zyuumbulu zyakali kukonzya kupegwa kazili zituuzyo zyakuliyandila, naa zipego, kuli Jehova. Cikozyanyo ciinda kubota cakupa zituuzyo cakalibonya kujatikizya kwaabwa kwatempele mumazuba aa Solomoni.—2 Mak. 7:4-6.

5. Mbubambe nzi Jehova mbwaakabikkilide bacete?

⁵ Caluyando, Jehova wakali kumvwisya kuti bantu boonse tiibakali kukonzya kupa zyintu zyeelene, aboobo wakali kuyanda kuti muntu amuntu kapa kweelana anzyaakali kukonzya. Mulawo wa Jehova wakali kwaamba kuti kwakali kuyandika kutila bulowa bwamunyama, bwalo ibwakali kuyooba “cimvwule buyo cazyintu zibotu ziboola” kwiinda mu Mwanaakwe, Jesu. (Heb. 10:1-4) Nokuba boobo, Jehova wakali kunyoneka kujatikizya mulawo ooyu. Mucikozyanyo, Leza wakali kutambula nziba ikuti muntu katakonzyi kupa mbelele naa ŋombe. Aboobo, nobaba bantu bacete bakali  kukonzya kupa kuli Jehova cakukondwa. (Lev. 1:3, 10, 14; 5:7) Nokuba kuti banyama bakali kukonzya kuti kabaindene, kwakali zyintu zyobilo izyakali kuyandika kumuntu uuli woonse iwakali kupa zipaizyo zyakuliyandila.

6. Ncinzi icakali kuyandika kumuntu uuli woonse iwakali kupa zipaizyo, alimwi nkaambo nzi cakali kuyandika kutobela malailile aayo?

⁶ Cakusaanguna, muntu uupa wakali kuyandika kupa zyintu ziinda kubota. Jehova wakaambila bana Israyeli kuti muntu uuli woonse wakeelede kupa zyintu zili kabotu kutegwa ‘atambulwe.’ (Lev. 22:18-20) Ikuti munyama kajisi kampenda, cipaizyo eeco tiicakali kutambulwa kuli Jehova. Cabili, muntu iwakali kupa cipaizyo wakeelede kuti kasalala katasofweede. Ikuti muntu kali muciimo cakutasalala, wakeelede kupa cipaizyo cazibi naa cipaizyo camulandu kutegwa abambulule cilongwe cakwe a Jehova katanapa cipaizyo cakuliyandila. (Lev. 5:5, 6, 15) Aaka kakali kaambo kapati. Jehova wakaambide kuti, ikuti muntu uutasalali walya cipaizyo cakutontozya, calo icakali kubikkilizya azipaizyo zyakuliyandila, wakeelede kujaigwa kutegwa azwe akati kabantu ba Leza. (Lev. 7:20, 21) Kulubazu lumwi, ikuti muntu uupa cipaizyo kasalala mumeso aa Jehova alimwi cipaizyo kacitakwe kampenda, sikupa wakali kukonzya kusekelela.—Amubale 1 Makani 29:9.

MBOTUKONZYA KUPA ZIPAIZYO MAZUBA AANO

7, 8. (a) Ndukkomano nzi banji ndobajana kwiinda mukulyaaba akaambo ka Bwami? (b) Nzyintu nzi nzyotujisi nzyotukonzya kupa?

⁷ Aalo mazuba aano, bantu banji balalyaaba mumulimo wa Jehova, aboobo Jehova ulakkomana nobacita boobo. Kubelekela bakwesu kulaletela mpindu. Mukwesu umwi uubelekela mumayake aa Maanda aa Bwami alimwi akugwasyilizya baabo bacitikilwa ntenda wakaamba kuti cilakatazya kupandulula kukkutila nkwajana akaambo kakubelekela mumbazu eezi. Wakaamba kuti: “Kubona mbobakkomana alimwi akulumba bakwesu abacizyi nobamana kuyakilwa Ŋanda ya Bwami mpya naa nobatambula lugwasyo akaambo kantenda yakacitika cipa kuti mulimo woonse alimwi akusolekesya ikwakacitwa kube ampindu.”

⁸ Bantu ba Jehova mazuba aano lyoonse balalanga-langa nzila mobakonzya kugwasyilizya mulimo wa Jehova. Mumwaka wa 1904, Mukwesu C. T. Russell wakalemba kuti: “Umwi aumwi weelede kulibona kuti wakasalwa aa Mwami kuba mubanzi waciindi cakwe, nguzu, mali azimwi buyo alimwi umwi aumwi weelede kubona mbwakonzya kuzibelesya kabotu nzyajisi kutegwa Simalelo alemekwe.” Nokuba kuti tulajana zilongezyo zinji, tweelede kuliimya zyintu zimwi  kutegwa tupe kuli Jehova. (2 Sam. 24:21-24) Sena kuli mbotukonzya kubelesya zyintu nzyotujisi munzila iinda kubota?

9. Caboola kukubelesya ciindi cesu, ninjiisyo nzi njaakaamba Jesu iijanika mulugwalo lwa Luka 10:2-4 njotukonzya kubelesya?

⁹ Ciindi cesu. Citola ciindi cilamfwu alimwi akubeleka canguzu kusandulula mabbuku eesu akusimba, kuyaka masena eesu aakukombela, kubamba miswaangano, kugwasyilizya nokwacitika ntenda alimwi akutola lubazu mumilimo iimbi minji iiyandika. Tujisi buyo mawoola aagaminide abuzuba. Jesu wakapa njiisyo iikonzya kugwasya. Ciindi Jesu naakatuma basikwiiya bakwe mumuunda, wakabaambila kuti tiibakeelede “kwaanzyanya amuntu uuli woonse munzila.” (Lk. 10:2-4) Nkaambo nzi Jesu ncaakabapeda malailile aali boobu? Sikwiiya zyamu Bbaibbele umwi wakaamba kuti: “Bantu bakujwe tiibakali kwaanzyanya mbuli mbotucita swebo, kukotama asyoonto naa kwaanzyanya mumaanza, pele kwakali kucitwa kwiinda mukukumbatana ziindi zinji, kusintama, akufwugama buya mane mubili waakusika ansi. Kucita boobo kwakali kuyandika ciindi cinji.” Jesu tanaakali kukulwaizya basikwiiya bakwe kubula bulemu kubantu. Muciindi caboobo, wakali kubagwasya kutegwa babone kuti bakajisi buyo ciindi cisyoonto alimwi akuti bakeelede kucibelesya kucita zyintu ziyandika kapati. (Ef. 5:16) Andiswe tulakonzya kwiibelesya njiisyo eeyi kutegwa tube aciindi cinji cakubelesya mumulimo wa Bwami.

10, 11. (a) Muunzila nzi zimwi mbwaabelesyegwa mali ngotusanga kumulimo wanyika yoonse? (b) Ninjiisyo nzi yaambidwe mulugwalo lwa 1 Bakolinto 16:1, 2 iikonzya kutugwasya?

¹⁰ Mali eesu. Kuyandika mali manji aakugwasyilizya mumulimo wa Bwami. Mwaka amwaka mamiliyoni aamali alabelesyegwa kubbadelela nzyobayandika balangizi beendeenda, bapainiya baalubazu, abamisyinali. Kuzwa mumwaka wa 1999, Maanda aa Bwami aainda ku 24,500 ayakwa muzisi zitavwubide. Nokuba boobo, Maanda aa Bwami aatandila ku 6,400 aambi aciyandika kuyakwa. Mwezi amwezi mamagazini aa Ngazi Yamulindizi a Sinsimuka! aabalilwa ku 100 miliyoni alasimbwa. Mulimo woonse ooyu ulagwasyilizyigwa akusanga kwanu kwakuliyandila.

¹¹ Mwaapostolo Paulo wakaamba njiisyo iikonzya kutugwasya notuyanda kusanga. (Amubale 1 Bakolinto 16:1, 2.) Kwiinda mukusololelwa amuuya uusalala, wakakulwaizya Banakristonyina baku Korinto kuti tiibakeelede kulindila mane buya nsondo yamana nobaya babone mali ngobakonzya kusanga, muciindi caboobo wakabaambila kuti bakeelede kubikka ambali mali aakusanga kumatalikilo aansondo kweelana anzyobakali kukonzya. Mbubwenya mbocakabede mumwaanda wamyaka wakusaanguna, amazuba aano bakwesu abacizyi balalibambila kakucili ciindi kutegwa batondezye bwaabi kweelana abukkale bwabo. (Lk. 21:1-4; Mil. 4:32-35) Jehova ulalumba kapati muuya wabwaabi uuli boobu.

12, 13. Ntwaambo nzi tumwi tukonzya kupa kuti bamwi bawayewaye kubelesya nguzu zyabo aluzyibo, pele mbuti Jehova mbwakonzya kubagwasya?

¹² Nguzu zyesu aluzyibo lwesu. Jehova ulatugwasyilizya notusoleka kubelesya nguzu zyesu aluzyibo lwesu mumulimo wakugwasyilizya Bwami. Usyomezya kutugwasya ikuti naa twakatala. (Is. 40:29-31) Sena tulimvwa kuti tatujisi luzyibo lunji lwakubelesya mumulimo ooyu? Sena tuyeeya kuti kuli bamwi ibeelela kwiinda ndiswe? Amuyeeye kuti, Jehova ulakonzya kugwasya muntu uuli woonse kusumpula luzyibo lwakwe mbubwenya mbwaakacita kuli Bezaleli a Oholiabu.—Kul. 31:1-6; amubone cifwanikiso icili kumatalikilo aacibalo.

¹³ Jehova utukulwaizya kuti katumupa zyintu ziinda kubota kutali kuwayawaya ciindi notumupa zyintu. (Tus. 3:27) Ciindi nobakali kuyakulula tempele, Jehova wakaambila ba Juda ibakali mu Jerusalemu kuti bazinzibale kuyeeya kujatikizya zyintu nzyobakali kucita mumulimo wakuyaka. (Hag. 1:2-5) Bakanyonganizyigwa akuleka  kubikkila maano kumulimo. Andiswe tweelede kulanga-langa zyintu nzyotubikkila maano kubona naa zileendelana azyintu nzyabikkila maano Jehova. ‘Atwaayeyeesye makani’ aajatikizya zyintu nzyotweelede kubikkila maano kutegwa tucikonzye kucita zyintu zinji mumulimo wa Bwami mumazuba aano aamamanino.

KUPA KWEELANA AZYINTU NZYOTUJISI

14, 15. (a) Mbuti mbotukulwaizyigwa acikozyanyo cabakwesu bamwi bacete? (b) Ncinzi ncotweelede kukanza kucita?

¹⁴ Bamwi bakkala mumasena imuli buyumuyumu kapati naa mumasena bantu mobali bacete. Mbunga yesu ilasoleka ‘kuzulizya’ kubulizya kwabakwesu ibakkala mumasena aali boobo. (2 Ko. 8:14) Nokuba boobo, nobaba bakwesu bacete balakkomana acoolwe cakupa. Cilamukkomanisya Jehova kubona bakwesu bacete nobapa cakukondwa.—2 Ko. 9:7.

¹⁵ Mucisi cimwi camu Africa bantu mobali bacete kapati, bakwesu bamwi balasala kabeela kamwi kasyoonto mugaadeni yabo mpoonya mali aazwa mukabeela aako alasangwa kugwasyilizya mulimo wa Bwami. Mucisi ncimunya eeco, kwakabikkwa bubambe bwakuyaka Ŋanda ya Bwami iyakali kuyandika kapati. Bakwesu bamubusena oobo bakali kuyanda kugwasyilizya. Nokuba boobo, mulimo ooyo wakali kuyakucitwa ciindi cakusyanga. Mbwaanga bakalikanzide kugwasyilizya, bakali kugwasyilizya mumulimo wakuyaka Ŋanda ya Bwami masyikati mpoonya kumangolezya bakali kuunka kuyakubelekela mumyuunda yabo kutegwa basyange zisyango. Ooyu wakali muuya wakulyaaba ncobeni! Eeci cituyeezya bakwesu bamumwaanda wamyaka wakusaanguna baku Makedoniya. Nokuba kuti bakali “kusunkwa kapati mumapenzi,” bakakombelezya kutegwa bapegwe coolwe cakugwasyilizya mumulimo iwakali kucitwa eeco ciindi. (2 Ko. 8:1-4) Andiswe ‘atupe kweelana ambwatulongezya Jehova.’—Amubale Deuteronomo 16:17.

16. Ncinzi ncotweelede kucita kutegwa zituuzyo zyesu kazitambulika kuli Jehova?

¹⁶ Nokuba boobo, kucenjezya nkooku. Mbubwenya mbocakabede kubana Israyeli bakaindi, tweelede kubikkila maano kubona kuti zituuzyo zyesu zyakuliyandila zilatambulwa a Leza. Tweelede kuzilanga kabotu zyintu kutegwa tutalubi kubikkila maano kumukuli wesu ngotupedwe wakulanganya mikwasyi yesu akukomba Jehova. Kwaaba ciindi cesu alimwi azyintu nzyotujisi kutegwa tugwasye bamwi takweelede kutupa kuleka kubikkila maano kuzyintu zyakumuuya naa zyintu zyakumubili nzyouyandika mukwasyi wesu. Kucita boobo inga kwaba kupa zyintu nzyotutajisi. (Amubale 2 Bakolinto 8: 12.) Kuyungizya waawo, swebo lwesu tweelede kupakamana kumuuya. (1 Ko. 9: 26, 27) Nokuba boobo, amuzyibe kuti, ikuti twapona kweelana azyeelelo zyamu Bbaibbele, tuyakukkomana akukkutila azituuzyo nzyotupa, alimwi ‘zilatambulika ikapati’ kuli Jehova.

ZIPAIZYO NZYOTUPA ZILAYANDIKA KAPATI

17, 18. Ino tulimvwa buti kujatikizya baabo boonse ibalyaaba akaambo ka Bwami, alimwi ncinzi ncotweelede kulanga-langa toonse?

¹⁷ Bunji bwabakwesu abacizyi ‘balyaaba beni mbuli cituuzyo cakunywa citilwa’ kwiinda mumilimo yabo yakugwasyilizya milimo ya Bwami iiyandika. (Flp. 2:17) Tulabalumba kuzwa ansi aamoyo aabo ibatondezya muuya uuli boobu wabwaabi. Abalo bamakaintu alimwi abana babakwesu aabo ibasololela mumulimo wa Bwami balalumbwa akaambo kamuuya wabo wabwaabi alimwi awakulyaaba.

¹⁸ Kuyandika kubeleka canguzu kapati kutegwa tugwasyilizye ziyandika zya Bwami. Aboobo, toonse atubikkile maano kulanga-langa mbotukonzya kutola lubazu kusikila mpotugolela. Mulakonzya kusinizya kuti bulumbu mbupati lino alimwi kumbele “mubweende bwazyintu buboola” bulumbu buyakuba bupati kwiinda.—Mk. 10:28-30.

[Bupanduluzi buyungizidwe]

[Mibuzyo yaciiyo]

[Cifwanikiso icili apeeji 12, 13]

Zituuzyo zinji zyakali zyakuliyandila mbubwenya mbuli zituuzyo nzyotupa mazuba aano (Amubone mincali 7 kusika ku 13)

[Cifwanikiso icili apeeji 12]

Basikumwaya ba Bwami a Ŋanda ya Bwami ku Kenya, mu Africa

[Cifwanikiso icili apeeji 12, 13]

Sikugwasyilizya uubelekela mu Kkomiti Yakuyaka Yacooko mu Tuxedo, New York, mu U.S.A.

[Cifwanikiso icili apeeji 13]

Bamukwasyi wa Bbeteli ku Australia