1, 2. (a) Ncinzi cikonzya kupa koofwaala munzila imbi? (b) Ncinzi ncotukonzya kuba masimpe kujatikizya Bwami bwa Leza?

AMBWENI mwakabona kale kuti kanji-kanji bantu ibakalibonena ameso cintu cimwi kacicitika balaindana mbobaibaluka zyintu zijatikizya cintu eeco. Mbubwenya buyo, muntu cilakonzya kumukatazya kwiibaluka zyintu zyoonse dokota nzyaakaamba naakamana kumupima. Ambweni muntu umwi inga waalilwa kujana makkii naa magilazi aakumeso nokuba kuti inga kaali afwaafwi anguwe. Bukkale oobu boonse inga kabujatikizya ipenzi basyaazibwene ndyobaamba kuti koofwaala—kwaalilwa kubona cintu cimwi, naa kuluba cintu cimwi, akaambo kakubikkila maano kucintu cimbi. Oobu mbobubeleka bongo bwesu.

² Bantu banji mazuba aano mboofwu munzila imwi caboola kuzyintu zicitika munyika. Balakozya kuzumina kuti nyika yacinca kapati kuzwa mu 1914, nokuba boobo tabamvwisyi cini ncozyaamba zyintu eezyi. Mbotuli basikwiiya Bbaibbele, tulizyi kuti Bwami bwa Leza bwakaboola mu 1914 ciindi Jesu naakabikkwa kuba Mwami kujulu. Pele tulizyi kuti zinji zijatikizyidwe kubwiinguzi bwamupailo wakuti “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Mt. 6:10) Cakutadooneka,  eeci cilabikkilizya amamanino aabweende bwazyintu oobu bubyaabi. Lilikke caakucitika eeci nokuyakucitika kuyanda kwa Leza ano anyika mbubonya mbuli kujulu.

3. Ino mbubotu nzi mbotujisi akaambo kakwiiya Jwi lya Leza?

³ Akaambo kakuti lyoonse twiiya Jwi lya Leza, tulakonzya kubona kuti businsimi buli mukuzuzikizyigwa lino. Eelo kaka tuliindene abantu banji ibali munyika! Bantu banji bajisi bubi kucita zyintu zijatikizya buumi bwabo cakuti tababubikkili maano bumboni butondezya kuti Kristo ulalela kuzwa mu 1914 alimwi akuti lino-lino uyakuleta lubeta lwa Leza. Nokuba boobo, umwi aumwi weelede kulibuzya kuti: Sena ndicisyoma kuti mamanino aanyika eeyi alaafwaafwi kapati alimwi akuti zyintu zicitika munyika zilakasinizya kaambo aaka? Nokuba kuti mwakaba Kamboni caino-ino, ncinzi ncomubikkila maano kapati? Kufwumbwa mbotukonzya kwiingula, atwiinduluke twaambo totatwe tuyandika kapati itutondezya ncotukonzya kusinizya kuti Mwami wa Leza uunanikidwe uyakubweza ntaamu zimbi lino-lino kutegwa kuyanda kwa Leza kucitike cakumaninina anyika.

4, 5. (a) Ino Jesu walikucita nzi kutalikila mu 1914? (Amubone cifwanikiso icili kumatalikilo aacibalo.) (b) Ino basimbizi botatwe baiminina nzi? Ino businsimi oobu bwazuzikizyigwa buti?

⁴ Mu 1914, Jesu Kristo—iwaambidwe kuti utantide mbizi ituba wakaba Mwami kujulu. Aciindi nciconya eeco wakatalika kuyaabuzunda akuti amanizye kuzunda bweende bubyaabi bwa Saatani. (Amubale Ciyubunuzyo 6:1, 2.) Ibusinsimi bupanduludwe mubbuku lya Ciyubunuzyo caandaano 6 bwakapa bumboni bwakuti bwaakutalika kulela Bwami bwa Leza, kuyakuba zyintu ziyakunyongana munyika cakufwambaana—nkondo, nzala, malwazi, alimwi azyintu zimbi zileta lufwu. Zyintu eezyi zilitondezyedwe abasimbizi botatwe ibatobela Jesu Kristo munsi-munsi.—Ciy. 6:3-8.

⁵ Mbubwenya mbokwakaambilwa limwi, luumuno ‘lwakagwisyigwa anyika,’ nokuba kuti bantu bakali kusyomezya kuti zisi zyamunyika ziyakukamantana. Nkondo Yakusaanguna Yanyika Yoonse ilakonzya kubonwa kuti ngamatalikilo aankondo zipati kweelana ambozisinizya zyintu zyalikucitika munyika caino-ino. Alimwi nokuba kuti kuli kuyaambele kapati mumakani aamakwebo asayansi kuzwa mu 1914, nzala yazumanana kupenzya bantu. Kuyungizya waawo, taakwe muntu uukonzya kukazya kuti malwazi aamisyobo iindene-indene alimwi antenda zilicitikila zyazumanana kujaya mamiliyoni aabantu mwaka amwaka. Zyintu eezyi nzibi kapati, zilacitika kanji-kanji, alimwi zijaya bantu banji kwiinda mbocakabede kaindi. Sena mulizyi ncozyaamba zyintu eezyi?

6. Ino mbaani ibakamvwisya kuzuzikizyigwa kwabusinsimi bwamu Bbaibbele, alimwi ino eeci cakabakulwaizya kucita nzi?

⁶ Bantu banji bakanyonganizyigwa ciindi Nkondo Yakusaanguna Yanyika Yoonse noyakatalika alimwi abulwazi bwa Spanish influenza. Pele Banakristo bananike bakali kuulangila mwaka wa 1914 kuti wakali kuyooba ngamamanino aa “ciindi cibikkidwe cabamasi.” (Lk. 21:24) Tiibakalizyi cini cakali kuyakucitika. Nokuba boobo, bakalizyi kuti mumwaka wa 1914, cintu ciyandika kapati kujatikizya Bwami bwa Leza cakali kuyakucitika. Mbobakamvwisya kuzuzikizyigwa kwabusinsimi bwamu Bbaibbele, cabusicamba bakaambilizya kubantu kuti Bwami bwa Leza bwakalitalikide kulela. Kukambauka kwabo kujatikizya Bwami bwa Leza kwakapa kuti bapenzyegwe kapati. Kupenzyegwa kwabakambausi ba Bwami ooku akwalo kwakali kuzuzikizyigwa kwabusinsimi. Mumyaka yakatobela, basinkondo ba Bwami bakatalika kubelesya milawo, kubacisa, kubaanga, naa kubajaya kutegwa bakwesu baleke kukambauka.—Int. 94:20; Ciy. 12:15.

7. Nkaambo nzi bantu banji ncobatamvwisyi ncozyaamba zyintu zicitika munyika?

⁷ Nokuba kuti kuli bumboni bunji ibutondezya  kuti Bwami bwa Leza bwakatalika kale kulela kujulu, nkaambo nzi bantu banji ncobatazumini ncobwaamba bumboni oobu? Nkaambo nzi ncobataboni kuti zyintu zicitika munyika zizuzikizya businsimi bwamu Bbaibbele mbubwenya mbobali kwaamba bantu ba Leza kwamyaka minji? Sena balacita oobo akaambo kakuti bantu banji babikkila buyo maano kuzyintu nzyobakonzya kubona ameso aabo? (2 Ko. 5:7) Sena kujata bubi nkobacita bantu muzyintu zijatikizya bantu kulaboofwaazya kuti bataboni nzyacita Leza? (Mt. 24:37-39) Sena bantu bamwi balanyonganizyigwa atwaambo twakubeja ituzwa kuli Saatani? (2 Ko. 4:4) Kuyandika kuba alusyomo alimwi akumvwisya zyintu zyakumuuya kutegwa bazibone zyintu zicitika kujulu. Eelo kaka tulikkomene kuti tulizizyi zyintu zicitika!

8-10. (a) Ino lugwalo lwa 2 Timoteyo 3:1-5 lwazuzikizigwa buti? (b) Nkaambo nzi ncotukonzya kwaamba kuti bubi buyaabwiindila kubija?

⁸ Kuli kaambo kabili ikatupa kuzyiba kuti lino-lino Bwami bwa Leza buyakutalika kweendelezya nyika: Bubi bwaindila kubija lino munyika kwiinda kaindi. Kwamyaka iitandila ku 100 lino, zitondezyo izyaambidwe mulugwalo lwa 2 Timoteyo 3:1-5 zyalibonya. Zyintu eezyi zyavwula kapati, alimwi zilacitika kanji-kanji. Sena tamuboni kuti abwalo businsimi oobu bwazumanana kuzuzikizyigwa? Atubandike zikozyanyo zimwi zisinizya makani aaya.—Amubale 2 Timoteyo 3:1, 13.

⁹ Amuyeeye buyo kwiindana kuliko akati kazyintu bantu nzyobakali kubona kuti zilatondwa mumyaka yamuma 1940 naa muma 1950 azyintu zicitika mazuba aano kumilimo, mumakani aakulikondelezya, muzisobano, alimwi amunsamino. Kulwana akutalilemeka zyaindila kapati alimwi zilalibonya koonse-koonse. Bantu balayanda kugambya bamwi kwiinda mukutondezya bukali, kutalilemeka, naa kutondezya lunya. Zyintu zyakweebelela acipekupeku izyakali kubonwa kuti zyakali kutondwa muma1950, mazuba aano bantu bazibona kuti zili buyo kabotu kuzyeebelela mbuli mukwasyi. Bantu banji balizyi kuti nzyobaamba akucita bantu boonana abantu mbobakozyenye zizo balazibikkila maano kapati caboola kumakani aakulikondelezya alimwi amunsamino. Eelo kaka tulalumba kapati nkaambo tulizyi  mbwazibona zyintu Leza mumakani aaya!—Amubale Juda 14, 15.

¹⁰ Ambweni Munakristo ulakonzya kuyeeya makani bantu kaindi ngobakali kubona kuti atondezya muuya wabuzangi kubakubusi mumyaka yamuma 1950 kwiindana azyintu zicitika mazuba aano. Kaindi bazyali bakali kunga balalibilika—kabajisi twaambo tulimvwisya—kujatikizya bana babo kuti naa bakali kufweba tombwe, kunywa bukoko, naa kuzyana kuletela mizeezo mibyaabi. Mazuba aano, bantu bazyibila kumvwa makani aajatikizya zyintu zitondwa: Sicikolo uujisi myaka yakuzyalwa iili 15 wakalizya ntobolo akujaya basicikolonyina bobilo mpoonya ibali 13 bakalicisa. Bakubusi ibakakoledwe bakajaya mwana musimbi calunya iwakajisi myaka yakuzyalwa iili 9 akuuma bausyi alimwi amweeninyina. Mucisi cimwi caku Asia, bakubusi baambwa kuti mbibakali kucita milandu minji mumyaka iili kkumi yainda. Taakwe muntu uukonzya kukaka kuti zyintu zyaindila kubija.

11. Nkaambo nzi bantu banji ncobataboni kuti zyintu ziyaabwiindila kubija?

¹¹ Mwaapostolo Petro wakaamba kuti: “Kumazuba aamamanino kuyooboola basikasampusampu akusampaula kwabo, ibayootobela zisusi zyabo beni kabaamba kuti: ‘Ino nkuli ikubako kwakwe ooko kwakasyomezyegwa? Kayi, kuzwa buzuba bamatata nobakoona mulufwu, izyintu zyoonse zilazumanana mbubonya mbozyakabede kuzwa kumatalikilo aazilenge.’” (2 Pe. 3:3, 4) Ncinzi cikonzya kupa kuti bantu bamwi kabaamba munzila eeyi? Kulibonya kuti ciindi bukkale bumwi nobwazyibilwa, bantu inga tabacibubikkili maano. Tacigambyi kapati ciindi bantu nobaleka kulilemeka asyoonto-syoonto, pele cilagambya ciindi mweenzinyoko cakutayeeyela nacinca mbwalilemeka muciindi buyo cisyoonto. Nokuba boobo, kunyongana asyoonto-syoonto ooku mumakani aakulilemeka kulayoosya kapati.

12, 13. (a) Nkaambo nzi ncotuteelede kutyompwa akaambo kazyintu zicitika munyika? (b) Ino nkuzyiba nzi ikuyakutugwasya kuliyumya ‘muziindi zikatazya ncobeni’?

¹² Mwaapostolo Paulo wakatucenjezya kuti “kumazuba aamamanino,” bukkale bwakali ‘kuyookatazya ncobeni.’ (2 Ti. 3:1) Pele bukkale nobukatazya buti bulakonzya kumana aboobo tatweelede kukayumbila aambali kaambo aaka. Kwiinda mukugwasyigwa a Jehova, muuya wakwe alimwi ambungano ya Bunakristo, tulakonzya kuzwidilila kulwana kufwumbwa kutyompwa naa zyintu ziyoosya zikonzya kuboola. Tulakonzya kuzumanana kusyomeka. Bbaibbele lyaamba kuti: “Nguzu zigambya iziinda zyabantu nzyotujisi” nzizya Leza ikutali zyesu tobeni pe.—2 Ko. 4:7-10.

¹³ Cilakkomanisya kubona kuti Paulo wakatalika kwaamba zyabusinsimi ibujatikizya mazuba aamamanino amajwi aakuti “kozyiba kuti.” Majwi aaya atondezya kuti icitobela cilacitika ncobeni. Tacidoonekwi kuti bantu babyaabi balazumanana kubija akubijila limwi kusikila Jehova akabweze ntaamu kumanizya bubi. Basikwiiya zyakaindi bakaamba kuti ciindi zyeelelo zyacibi acibotu nozitatobelwi cisi coonse cilanyongana. Nokuba boobo, kuzwa kaindi, kunyina zyeelelo zyakulilemeka munyika yoonse nozyakanyongene boobu mbuli mbozibede mazuba aano. Bantu banji tabakonzyi kuzibikkila maano ncozyaamba zyintu zicitika, pele zyintu eezyi zilibedelede izyali kucitika kuzwa mu 1914 zyeelede kututondezya kuti tweelede kusyoma kuti Bwami bwa Leza lino-lino buyakugwisya bubi boonse.

14-16. Nkaambo nzi katatu ikatupa kusyoma kuti Bwami bwa Leza ‘bulaboola’ ino-ino?

¹⁴ Kuli kaambo akamwi katatu ikatupa kuba alusyomo. Zyintu izyali kucitika akati kabantu ba Leza zitondezya kuti mamanino alaafwaafwi ncobeni. Mucikozyanyo, Bwami bwa Leza kabutanatalika kulela kujulu, kabunga kabananike  basyomeka bakali kubelekela Leza. Ciindi zyintu zimwi nzyobakali kulangila mu 1914 nozyatakacitika, ino bakacita buti? Bunji bwabo bakasyomeka ciindi nobakali kusunkwa akupenzyegwa alimwi bakazumanana kubelekela Jehova. Mukuya kwamyaka, bunji bwabananike aabo naa boonse bakamanizya mulimo wabo waanyika cakusyomeka.

¹⁵ Mubusinsimi bwakwe ibujatikizya mamanino aabweende oobu bwazyintu, Jesu wakaamba kuti: “Izyalani eeli talikooyoomana kusikila zyintu zyoonse eezyi zikacitike.” (Amubale Matayo 24:33-35.) Tulizyi kuti ciindi naakaamba kuti “izyalani eeli,” Jesu wakali kwaamba tubunga tobilo twa Banakristo bananike. Bananike ibali mukabunga kakusaanguna bakaliko mu 1914, alimwi bakabona zitondezyo zyakubako kwa Kristo mumwaka uulya. Aabo ibakali mukabunga aaka tiibakali buyo kupona mu 1914, pele alimwi bakali bana ba Leza ibakananikwa amuuya mumwaka uulya naa kautanasika.—Lom. 8:14-17.

¹⁶ Kabunga kabili ikabikkilizyidwe muzyalani eeli mbananike ibakapona ciindi bananike ibakali mukabunga kakusaanguna nobakacili kupona. Tiibakali kupona buyo ciindi nobakali kupona aabo ibakali mukabunga kakusaanguna, pele balo bakananikwa amuuya uusalala ciindi aabo ibakali mukabunga kakusaanguna nobakacili anyika. Aboobo, tabali bananike boonse mazuba aano ibabikkilizyidwe mu “izyalani eeli” ndyaakaamba Jesu. Mazuba aano, aabo ibali mukabunga kabili bacembaala. Nokuba boobo, majwi aa Jesu aali mulugwalo lwa Matayo 24:34 atupa kusyoma kuti bamwi ibabalilwa ‘muzyalani eeli tabakooyoomana’ kabatanabona matalikilo aamapenzi mapati. Eeci citupa kusyoma kuti kuceede ciindi cisyoonto kuti Mwami wa Bwami bwa Leza abweze ntaamu yakunyonyoona basizibi akuleta nyika mpya iiluleme.—2 Pe. 3:13.

17. Ino bumboni botatwe mbotwalanga-langa butugwasya kuzyiba nzi?

¹⁷ Ncinzi ncotukonzya kwaamba kujatikizya bumboni botatwe mbotwalanga-langa? Jesu wakacenjezya kuti tatukazyibi—alimwi tatuzyi buzuba bwini naa woola. (Mt. 24:36; 25:13) Pele tulakonzya kucizyiba alimwi tulicizyi “ciindi,” kweelana ambwaakaamba Paulo. (Amubale Baloma 13:11.) Lino tupona muciindi eeci, mazuba aamamanino. Kuti twabikkila maano kubusinsimi bwamu Bbaibbele alimwi akuzyintu Leza a Jesu Kristo nzyobacita, tatukonzyi kwaalilwa kubona bumboni bulimvwisya bwakuti tupona mumazuba eeni aamamanino aabweende bwazyintu oobu.

18. Ncinzi ncobalindila aabo ibakaka kuzumina Bwami bwa Leza?

¹⁸ Bantu aabo ibakaka kuzumina nguzu zigambya izyakapegwa kuli Jesu Kristo, Simbizi uutantide aambizi iituba uuyaabuzunda, ino-ino bayakukuzumina kulubizya kwabo nobatayandi. Tabakacikonzyi kutija pe. Aciindi eeco, bantu banji bayakulila akaambo kakuyoowa kabati: “Ino nguni uukonzya kwiima?” (Ciy. 6:15-17) Caandaano citobela cabbuku lya Ciyubunuzyo cilaingula. Bananike abaabo ibajisi bulangizi bwakupona anyika ‘bayakwiima’ mubuzuba oobo akaambo kakukkomaninwa a Leza. Mpoonya “nkamu mpati” yabaabo ibambelele zimwi bayakufwutuka mapenzi mapati.—Ciy. 7:9, 13-15.

19. Akaambo kakuti mujisi lusyomo lwakuti mamanino alaafwaafwi kusika, ino nzyintu nzi nzyomulangila kumbele?

¹⁹ Kwiinda mukubikkila maano lino kubusinsimi bwamu Bbaibbele ibuyaabuzuzikizyigwa muciindi eecino cikkomanisya, tatukanyonganizyigwi azyintu zicitika munyika ya Saatani; alimwi tuyakuzyiba ncozipandulula zyintu zicitika munyika. Lino-lino Kristo uyakumanizya kuzunda kwakwe bantu bacita zyintu zibi kwiinda mukulwana nkondo yamamanino mubululami. (Ciy. 19:11, 19-21) Amuyeeye buyo mbotunookkomene zyaakwiinda zyintu eezyi!—Ciy. 20:1-3, 6; 21:3, 4.