1, 2. (a) Mbwiinga bwani ibuya kuleta kusekelela kujulu? (b) Mibuzyo nzi njotutiilange-lange?

LYOONSE cilatola ciindi kulibambila bwiinga. Pele tulabikkila maano kulanga-langa bwiinga bulibedelede—bwiinga bwamwami. Amuciyeeyele buyo eeco! Kulibambila kujatikizya bwiinga oobu kwatola myaka iitandila ku 2,000. Lino ciindi ciyaabuswena kapati cakuti sibwiinga akwatane anabwiinga wakwe. Ino-ino nyimbo zyakukondwa zilalimvwisya muŋanda ya Mwami, alimwi bangelo kujulu bayakwiimba kuti: “Amutembaule Ja, nkaambo Jehova Leza wesu, Singuzuzyoonse, watalika kulela kali Mwami. Atusekelele akukondwa kapati, alimwi atumupe bulemu, nkaambo lukwatano lwa Mwanaambelele lwasika alimwi mukaintu wakwe walibambila kale.”—Ciy. 19:6, 7.

² “Mwanaambelele” uunakujisi lukwatano iluyakupa kuti kube kukondwa kujulu ngu Jesu Kristo taakwe umbi. (Joh. 1:29) Kujatikizya bwiinga oobu, ino usamide buti? Ino nabwiinga wakwe nguni? Ino wagwasyigwa buti kulibambila bwiinga? Ino bwiinga bwakwe buyakuba lili? Lukwatano oolu luyakuleta lukkomano kujulu, pele sena aabo ibajisi bulangizi bwakupona  kukabe kutamani ano anyika abalo bayakusangana mukusekelela ooku? Caluyandisisyo, tulailanga-langa mibuzyo eeyi notuzumanana kulanga-langa Intembauzyo 45.

3, 4. (a) Ncinzi Bbaibbele ncolyaamba kujatikizya zisani zyabwiinga zya Sibwiinga, alimwi ncinzi cimbi cimupa kusekelela? (b) Ino “bana babami” a “namalelo” ibamusangana Sibwiinga mukusekelela mbaani?

³ Amubale Intembauzyo 45:8, 9. Sibwiinga, Jesu Kristo, wasama zisani zyakwe zyabwiinga bwamwami. Cakweelela, zisani zyakwe zilanunkila mbuli ‘mafwuta mabotu,’ mbuli muro alimwi akasiya, tununkilizyo itwakali kubikkilizyigwa mumafwuta aasalala aakali kubelesyegwa kunanika mwami mu Israyeli.—Kul. 30:23-25.

⁴ Nyimbo izilimvwisya kujulu kuŋanda yabwami azyalo zipa kuti Sibwiinga asekelele lukwatano lwakwe noluyaabuswena. Awalo “namalelo,” cibeela cakujulu cambunga ya Leza, icibikkilizya “bana babami,” nkokuti bangelo basalala, bayakumusangana Sibwiinga mukusekelela. Eelo kaka cilakkomanisya kumvwa majwi aakondelezya kaamba kuti: “Atusekelele akukondwa kapati . . . nkaambo lukwatano lwa Mwanaambelele lwasika”!

5. Ino “mukaintu wa Mwanaambelele” nguni?

⁵ Amubale Intembauzyo 45:10, 11. Sibwiinga twamuzyiba, pele ino nabwiinga wakwe nguni? Nabwiinga ooyu ninkamu ibambidwe abasimbungano iisololelwa a Jesu Kristo. (Amubale Baefeso 5:23, 24.) Bayakuba cibeela ca Bwami bwa Kristo bwabu Mesiya. (Lk. 12:32) Aaba iba 144,000 Banakristo bananikidwe amuuya, “bazumanana kutobela Mwanaambelele kufwumbwa ooko nkwaya.” (Ciy. 14:1-4) Baba “mukaintu wa Mwanaambelele,” alimwi balakkala antoomwe anguwe kujulu nkwakkala.—Ciy. 21:9; Joh. 14:2, 3.

6. Nkaambo nzi bananike ncobaambwa kuti “mwana musimbi wamwami,” alimwi nkaambo nzi ncobalaililwa ‘kuluba cisi cabo’?

⁶ Nabwiinga ooyu wakumbele taitwi buyo kuti “O mwana musimbi” pele alimwi wiitwa kuti “Mwana musimbi wamwami.” (Int. 45:13) Ino “mwami” ooyu nguni? Banakristo bananike baba “bana” ba Jehova. (Lom. 8:15-17) Mbwaanga bayakuba nabwiinga wakujulu, bananike balaililwa kuti: ‘Balube cisi cabo aluzubo lwakumubili lwabausyi.’ Beelede kuzumanana “kubikkila maano kuzyintu zili kujulu, ikutali kuzyintu zili anyika.”—Kol. 3:1-4.

7. (a) Ncinzi Kristo ncaali kucita kubamba nabwiinga wakwe wakumbele? (b) Ino nabwiinga umubona buti Sibwiinga wakwe wakumbele?

⁷ Kwamyaka minji yainda, Kristo walikubamba nabwiinga wakwe wakumbele kujatikizya bwiinga ibuyakucitika kujulu. Mwaapostolo Paulo wakapandulula kuti Kristo ‘wakaiyanda mbungano akulyaaba akaambo kanjiyo, kuti aisalazye. Wakaisalazya kwiinda mukwiisanzya amaanzi aajwi lya Leza, kutegwa mbungano eeyo ibote mumeso aakwe, kaitakwe kabala naa kankwinya niciba cintu cimbi cili boobo, pele kuti kaisalala alimwi kainyina kampenda nokaba komwe.’ (Ef. 5:25-27) Paulo wakaambila Banakristo baku Korinto kuti: “Ndili aabuzuba kulindinywe mbubonya mbuli Leza, nkaambo mebo lwangu ndakamusyomezya lukwatano kumwaalumi omwe kutegwa ndikamupe kuli Kilisito kamuli nakalindu uusalala.” (2 Ko. 11:2) Sibwiinga, Mwami Jesu Kristo ulalumba “kweebeka” kwakumuuya kwanabwiinga wakwe wakumbele. Alimwi nabwiinga ulizyi kuti sibwiinga ngo “mwami” wakwe alimwi ‘ulamuvwuntamina’ mbwaanga nguuyakuba mulumaakwe.

8. Nkaambo nzi ncoceelela kuti nabwiinga upanduludwe kuti ‘usamide cabulemu’?

⁸ Amubale Intembauzyo 45:13, 14a. Nabwiinga watolwa ‘kasamide zyintu zyabulemu’ akaambo kabwiinga bwamwami.  Mulugwalo lwa Ciyubunuzyo 21:2, nabwiinga weezyanisyigwa kumunzi, Jerusalemu Mupya, alimwi “walisakatizyila mulumaakwe.” Munzi ooyu wakujulu ujisi “bulemu bwa Leza” alimwi ulamweka, ‘mbuli bbwe lidula kapati, mbuli bbwe lyajasipa liŋaima alimwi libalangalisya.’ (Ciy. 21:10, 11) Kweebeka kwa Jerusalemu Mupya kulapandululwa kabotu-kabotu mubbuku lya Ciyubunuzyo. (Ciy. 21:18-21) Nkakaambo kaako sintembauzyo ncaamba kuti nabwiinga ‘usamide cabulemu’! Kwiinda waawo, bwiinga oobu bwamwami buyakucitikila kujulu.

9. Ino nguni “mwami” nkwatolwa nabwiinga, alimwi ino usamide buti?

⁹ Ooko nkwatolwa nabwiinga nkuuli Sibwiinga—Mwami Mesiya. Sibwiinga wali kumugwasya nabwiinga kulibambila, ‘kumusanzya amaanzi kwiinda mukubelesya jwi.’ Nabwiinga ooyu ‘ulasalala alimwi tajisi kampenda nokaba komwe.’ (Ef. 5:26, 27) Alimwi weelede kuti kasamide zisani zyeelela bukkale oobo. Alimwi uleelela! Inzya, “zyakusama zyakwe zyasakatizigwa ingolida,” alimwi ‘uyootolwa kumwami kasamide zyamalengwa.’ Akaambo kalukwatano lwa Mwanaambelele, “wazumizyigwa kusama cisani cibotu cuuba-uba, ciŋaima, citakwe tombe—nkaambo eeco cisani cibotu cuuba-uba ciiminina milimo iiluleme yabasalali.”—Ciy. 19:8.

10. Ndilili lukwatano lwa Mwanaambelele nolweelede kucitika?

¹⁰ Amubale Ciyubunuzyo 19:7. Ino lukwatano lwa Mwanaambelele luyakucitika lili? Nokuba kuti “mukaintu wakwe walibambila kale” lukwatano, makani aatobela aalembedwe taapandululi bwiinga bwini. Muciindi caboobo, apa bupanduluzi busalala bwacibeela camamanino camapenzi mapati. (Ciy. 19:11-21) Sena eeci caamba kuti lukwatano lulacitika Mwami Sibwiinga katanamanizya kuzunda? Peepe. Zilengaano izili mubbuku lya Ciyubunuzyo tazilembedwe cakutobelana kweelana ambozyeelede kuzuzikizyigwa. Mu Intembauzyo 45, bwiinga bwamwami bulacitika ciindi Mwami, Jesu Kristo naamana kwaanga panga lyakwe alimwi ‘akuyabuzunda’ basinkondonyina.—Int. 45:3, 4.

11. Kweelana azyintu mboziyakutobelana kucitika, ino Kristo uyoomanizya buti kuzunda kwakwe?

¹¹ Aboobo, tulakonzya kwaamba kuti zyintu iziyakucitika, mboobu mboziyakutobelana: Cakusaanguna, lubeta luyooletwa ‘kumuvuule imupati,’ Babuloni Mupati, bukombi bwakubeja bwanyika yoonse. (Ciy. 17:1, 5, 16, 17; 19:1, 2) Mpoonya, Kristo uyooleta lubeta lwa Leza kubweende bwa Saatani boonse akubunyonyoona ciindi ca Amagedoni, “buzuba bupati bwa Leza Singuzuzyoonse.” (Ciy. 16:14-16; 19:19-21) Camamanino, Mwami Sikalumamba uyoomanizya kuzunda kwiinda mukuwaala Saatani amadaimona aakwe mumulindi, kubabikka muciimo icili mbuli lufwu cakutakonzya kucita cintu cili coonse.—Ciy. 20:1-3.

12, 13. (a) Ndilili lukwatano lwa Mwanaambelele noluyakucitika? (b) Mbaani kujulu ibayakusekelela kujatikizya lukwatano lwa Mwanaambelele?

¹² Banakristo bananike nobamanizya buumi bwabo bwaanyika ciindi cakubako kwa Kristo, balabusyigwa akuba abuumi bwakujulu. Lwaakwiinda lunyonyooko lwa Babuloni Mupati, Jesu uyakubabunganya boonse bacibeela canabwiinga. (1 Te. 4:16, 17) Aboobo, nkondo ya Amagedoni kaitanatalika, boonse bacibeela ‘canabwiinga’ banakuli kujulu. Yaakwiinda nkondo eeyo, lukwatano lwa Mwanaambelele luyakucitika. Eelo kaka lukwatano oolo cinakuli ciindi cikkomanisya! Lugwalo lwa Ciyubunuzyo 19:9 lwaamba kuti: “Balikkomene aabo batambidwe kucilalilo calukwatano lwa Mwanaambelele.” Bayakukkomana ncobeni bacibeela canabwiinga iba 144,000. Alimwi Sibwiinga Mwami uyakukkomana kapati kuba amweelwe woonse wabaabo mbanakuli ambabo mubwami ‘kabalya akunywa atebulu lyakwe mu Bwami bwakwe’  munzila yacikozyanyo. (Lk. 22:18, 28-30) Nokuba boobo, kusekelela kujatikizya lukwatano lwa Mwanaambelele takunakuli buyo kwa Sibwiinga alimwi anabwiinga wakwe.

¹³ Mbubwenya mbutwabona kale, impi zyakujulu calukamantano zilaimba kuti: ‘Atusekelele akukondwa kapati, alimwi atumupe bulemu Jehova, nkaambo lukwatano lwa Mwanaambelele lwasika alimwi mukaintu wakwe walibambila kale.’ (Ciy. 19:6, 7) Pele mbuti kujatikizya babelesi ba Jehova baanyika? Sena abalo bayakutola lubazu mukusekelela ooko?

14. Mbuli mbokulembedwe ku Intembauzyo 45, ino “banakalindu beenzinyina” banabwiinga mbaani?

¹⁴ Amubale Intembauzyo 45:12, 14b, 15. Musinsimi Zekariya wakasinsima kuti kuciindi cakumamanino, bantu bazisi cakuliyandila bayakujatana aba Israyeli bakumuuya basyeede. Wakalemba kuti: “Mumazuba ayo bantu bali ikumi bazwa kumisyobo yoonse akumyaambo yoonse bayoojata cikobela camuntu mu-Juda, bayooti, Atweende anywebo, nkaambo twamvwa kuti Leza mpali akati kanu.” (Zek. 8:23) Ku Intembauzyo 45:12, aaba ibaiminina “bantu bali ikumi” baambwa kuti bali mbuli ‘musimbi waku Turo’ alimwi ‘bantu bavwubide kapati.’ Balaboola kubananike basyeede kabajisi zipego, kutegwa babe balongwe babo alimwi akugwasyigwa kumuuya. Kutalikila mu 1935, mamiliyoni aabantu bazumizya bananike basyeede ‘kubapilusya kubululami.’ (Dan. 12:3) Beenzinyina ibasyomeka aaba ba Banakristo bananike basalazya maumi aabo, akuba banakalindu bakumuuya. “Banakalindu beenzinyina” banabwiinga bakalyaaba kuli Jehova alimwi batondezya kuti mbalelwa basyomeka ba Mwami Sibwiinga.

15. Mbuti “banakalindu beenzinyina” mbobabelekela antoomwe abaabo baciinga canabwiinga ibacili anyika?

 ¹⁵ Bananike basyeede banabwiinga balalumba kapati kubona “banakalindu beenzinyina” kabali basungu mukugwasyilizya kukambauka “makani mabotu aa Bwami” nyika yoonse mbwiizulwa. (Mt. 24:14) Tauli buyo “muuya alimwi anabwiinga bazumanana kwaamba kuti: ‘Boola!’” pele abalo aabo bamvwa balaamba kuti: “Boola!” (Ciy. 22:17) Inzya, ‘bambelele zimbi’ bakabamvwa baciinga canabwiinga cabananike kabaamba kuti “Boola!” alimwi bamusangana nabwiinga mukwaamba kuti “Boola!” kuli baabo bakkala anyika.—Joh. 10:16.

16. Ncoolwe nzi Jehova ncaabapa bambelele zimbi?

¹⁶ Bananike baceede balabayanda kapati beenzinyina alimwi balikkomene kuzyiba kuti ba Usyi Sibwiinga, Jehova, wapa baaba bambelele zimbi coolwe cakusangana mukusekelela lukwatano oolu lwakujulu lwa Mwanaambelele. Kwakaambilwa limwi kuti aaba “banakalindu beenzinyina” “bayooletwa alutangalo akukondwa.” Aaba bambelele zimbi, ibajisi bulangizi bwakupona kukabe kutamani ano anyika, abalo bayakuba aacoolwe cakusekelela ooku kwamububumbo boonse ciindi lukwatano lwa Mwanaambelele lwaakucitika kujulu. Cakweelela, bbuku lya Ciyubunuzyo litondezya ‘bankamu mpati kabaimvwi kumbele lyacuuno cabwami akumbele lya Mwanaambelele.’ Babeleka milimo iisalala ya Jehova kabali mulubuwa lwatempele lyakumuuya anyika.—Ciy. 7:9, 15.

17, 18. Mbuti lukwatano lwa Mwanaambele mboluyakuleta mpindu, alimwi nkuuli bani Kristo nkwaya kuba usyi Mubulelo bwakwe bwa Myaka iili 1000?

¹⁷ Amubale Intembauzyo 45:16. “Banakalindu beenzinyina” banabwiinga wa Kristo kujulu bayakukkomana baakubona mpindu iyakuba munyika yoonse akaambo kalukwatano oolu. Mwami Sibwiinga uyakubikkila maano kunyika akubusya ‘bamausyi’ baanyika, balo ibayakuba ‘bana bakwe’ baanyika. (Joh. 5:25-29; Heb. 11:35) Kuzwa akati kabaaba, uyakusala “bami munyika yoonse.” Cakutadooneka, Kristo uyakusala bamwi akati kabaalu basyomeka mazuba aano kuti bakasololele munyika mpya.—Is. 32:1.

¹⁸ Mu Bulelo bwakwe bwa Myaka iili 1,000, Kristo uyakuba usyi wabantu abamwi. Bantu boonse ibanooli munyika bayakutambula buumi butamani akaambo kakuti batondezya lusyomo mucituuzyo ca Jesu cacinunuzyo. (Joh. 3:16) Aboobo, kulimbabo uyakuba “Taata Uuteeli.”—Is. 9:6, 7.

19, 20. Ino zyintu zikkomanisya izyaambidwe mubbuku lya Intembauzyo caandaano 45 zibajatikizya buti Banakristo bakasimpe boonse mazuba aano?

¹⁹ Amubale Intembauzyo 45:1, 17. Masimpe, izyintu zilembedwe mubbuku lya Intembauzyo caandaano 45 zilabajatikizya Banakristo boonse. Bananike basyeede anyika balabukkomanina bulangizi oobu bwakuti ino-ino bayakuba antoomwe abanabokwabo alimwi a Sibwiinga wabo kujulu. Bambelele zimbi balakulwaizyigwa kuzumanana kulibombya ku Mwami wabo uulemekwa alimwi balalumba kucoolwe cakuyanzana abasyeede banabwiinga anyika. Lukwatano lwabo lwaakwiinda, Kristo abasikulelanyina mu Bwami bayakuleta zilongezyo zitaambiki kubantu anyika.—Ciy. 7:17; 21:1-4.

²⁰ Notulanga kumbele kukuzuzikizyigwa kwa “makani mabotu” aajatikizya Mwami Mesiya, tulakulwaizyigwa ‘kwaambilizya izyina lyakwe.’ Atube akati kabaabo ‘ibayakumulumba lyoonse mane kukabe kutamani.’