Bukkale bukatazya bulakonzya kutupenzya kapati. Bulakonzya kutunyonganya mumizeezo, kutumanina nguzu alimwi akutujatikizya mbotububona buumi. Mwami Davida wamu Israyeli yansiku wakanyongana kapati amapenzi manji. Ino wakacikonzya buti kwaalwana? Muntembauzyo iikulwaizya kapati, Davida wakaingula kuti: “Ndakumbila Jehova ajwi lyacikombyo cangu. Ndatula mapenzi aangu kubusyu bwakwe; ndaluula mafwabi aangu kulinguwe. Moyo wangu nuuwizuka, yebo ulizi inzila yangu.” Masimpe, Davida cakulicesya wakapaila kuli Leza kulomba lugwasyo.—Int. 142:1-3.

Muntembauzyo aimwi, Davida wakaimba kuti: “Nkocili cintu comwe ncenkumbila kuli Jehova—ncenjandaula—nkokuti nkale muŋanda ya-Jehova mazuba oonse aabuumi bwangu, kuti njeebele bubotu bwa Jehova akuliiya makani mucikombelo cakwe.” (Int. 27:4) Davida tanaakali mu Levi, pele amuyeeyele buyo kaimvwi anze mubusena busalala bwalubuwa lwacikombelo munsi-munsi atente lyakubunganina busena bwini bwakali kucitikila bukombi bwakasimpe. Moyo wa Davida uzwide kulumba cakuti uyanda kubelesya buumi bwakwe boonse ookuya kutegwa ‘ayebele bubotu bwa Jehova.’

Ibbala lyakuti “bubotu” lileendelana abube bwakutambulika naa bukkomanisya mumizeezo, mbolimvwa. Lyoonse Davida wakali kubotelwa kulanga bubambe bwa Leza bwakukomba. Tulakonzya kulibuzya kuti, ‘Sena ndilimvwa mbuli Davida mbwaakali kulimvwa?’

Mazuba aano, bubambe bwa Jehova bwakumusikila tabuyeeme aacintu cimwi cilibonya. Muciindi caboobo, bubikkilizya tempele lipati lyakumuuya lya Leza—bubambe busalala bwabukombi bwakasimpe. * Kuti ‘katubulanga cakubotelwa’ bubambe oobu, andiswe tulakonzya ‘kweebela bubotu bwa Jehova.’

Amuyeeye cipaililo camukuba cazipaizyo zyakuumpa icakali kumbele aamulyango watente. (Kul. 38:1, 2; 40:6) Cipaililo eeciya cakali kwiiminina kuyandisisya kwa Leza kwakutambula buumi bwa Jesu bwabuntunsi kacili cipaizyo. (Heb. 10:5-10) Amuyeeye buyo eeco ncocaamba kulindiswe! Mwaapostolo Paulo wakalemba kuti: “Notwakacili basinkondonyina twakayanzanisyigwa kuli Leza kwiinda mulufwu lwa Mwanaakwe.” (Lom. 5:10) Kwiinda mukutondezya lusyomo mubulowa bwa Jesu, tulakonzya kukkomana akaambo kakuyandwa alimwi akusyomwa katuli balongwe ba Leza. Akaambo kaceeci, tuba ‘alumvwano a Jehova.’—Int. 25:14.

Akaambo kakuti ‘zibi zyesu zilamwaigwa, ziindi zyakukatalukwa zilatusikila kuzwa kuli Jehova lwakwe.’ (Mil. 3:19) Bukkale bwesu bulikozyenye abwamwaange iwuusa akaambo kamicito yakwe yakaindi mpoonya akucinca kapati nalindila kujaigwa. Ciindi mubetesi mubotu moyo nabona kucinca ooko, ulakulwaizyigwa kumwaya milandu yamwaalumi ooyo—kugwisya cisubulo calufwu. Eelo kaka mwaange ooyo ulaanguluka akukkomana kapati! Mbubwenya mbuli mubetesi ooyo, awalo Jehova ulababikkila maano bantu beempwa alimwi ulagwisya cisubulo calufwu.

Akati kambazu zyabukombi bwakasimpe Davida nzyaakabona aŋanda ya Jehova, kwakali akubungana kwankamu mpati yabana Israyelinyina, kubalwa  alimwi akupandululwa kwa Mulawo, kuumpa tununkilizyo alimwi amulimo uusalala iwakali kucitwa aabapaizi alimwi aba Levi. (Kul. 30:34-38; My. 3:5-8; Dt. 31:9-12) Mbazu eezyi zyabukombi bwakasimpe mu Israyeli yansiku zilikozyenye ambazu zicitika mazuba aano.

Mbubwenya mbocakabede kaindi, aalo mazuba eesu aano, “ncintu cibotu cibotezya, na babunyina bakala kabotu antoomwe!” (Int. 133:1) Kwaba kuyungizyika kupati ‘muciinga cabakwesu’ nyika yoonse. (1 Pe. 2:17) Ijwi lya Leza lilabalwa alimwi akupandululwa mumiswaangano yesu. Kwiinda mumbunga yakwe, Jehova wapa pulogilamu iigwasya iipa malailile. Kuyungizya waawo, kuli cakulya cakumuuya cinji cisimbidwe ncotubelesya lwesu alimwi amuciiyo camukwasyi. Umwi wamu Kabunga Keendelezya wakaamba kuti: “Kuzinzibala kuyeeya Jwi lya Jehova, kuyeeya ncolipandulula alimwi akuyandaula kumvwisya kwandigwasya kuba alubono lwakumuuya alimwi akukkutila.” Masimpe, ‘luzibo lulakonzya kubotezya.’—Tus. 2:10.

Mazuba aano, mipailo iitambulika yababelesi ba Leza ilaunka kujulu kuli Jehova abuzuba. Kuli Jehova, mipailo iili boobo ili mbuli tununkilizyo tununkila kabotu. (Int. 141:2) Eelo kaka ncibotu kuzyiba kuti Jehova Leza ulatukkomanina kapati ciindi notupaila kulinguwe cakulicesya!

Musa wakapaila kuti: “Lubotezyo lwa Jehova Leza wesu alube alindiswe; milimo yamaanza esu ilondolwe kulinduwe.” (Int. 90:17) Notuzumanana kubeleka mulimo wesu cabusungu, Jehova ulaulongezya mulimo wesu. (Tus. 10:22) Ambweni kuli bantu mbotwakagwasya kwiiya kasimpe. Andiza twaliyumya mumulimo kwamyaka minji nokuba kuti kuli kukazyigwa, kuciswa, kupenga mumizeezo naa kupenzyegwa. (1 Te. 2:2) Nokuba boobo, twabubona “bubotu bwa Jehova” alimwi akuzyiba kuti Taateesu wakujulu ulakkomana kapati akusoleka kwesu.

Davida wakaimba kuti: “Jehova ncecaabilo cangu calukono ankomeki yangu; nduwe oobamba zyabuumi bwangu zyoonse. Zyeelesyo zyandeelekela kabotu.” (Int. 16:5, 6) Davida wakalumba akaambo ‘kacaabilo’ cakwe, nkokuti kuba acilongwe a Jehova alimwi acoolwe cakumubelekela. Mbubwenya mbuli Davida, andiswe tulajana buyumu-yumu, pele tulijisi zilongezyo zinji zyakumuuya. Aboobo, atuzumanane kubukkomanina bukombi bwakasimpe alimwi akuzumanana ‘kulanga cakubotelwa’ tempele lyakumuuya lya Jehova.