1. Mbwaanga twakalengwa mucinkozya ca Leza, ninguzu nzi nzyotujisi?

KAAMBYO kakuti “mwana aansya nje nsya,” nkaambyo kabelesyegwa kapati. Masimpe, bana banji balibakozyede kapati bazyali babo. Kayi, mbwabambidwe mwana ciyeeme aali bausyi alimwi abanyina. Jehova, Taateesu wakujulu, Ngokasensa kabuumi. (Int. 36:9) Mbwaanga tuli bana bakwe, twakakozya nguwe munzila zimwi. Akaambo kakuti twakalengwa mucinkozya cakwe, tulacikonzya kuyeeya, kusala, kubamba akukwabilila cilongwe ncotujisi abamwi.—Matl. 1:26.

2. Ino ciyeeme aanzi kutegwa Jehova abe Mulongwe wesu?

² Jehova ulakonzya kuba Mulongwe wesu uubainda boonse. Cilongwe cili boobo ciyeeme aaluyando ndwajisi Leza kulindiswe alimwi alusyomo ndotujisi mulinguwe amu Mwanaakwe. Jesu wakaamba kuti: “Nkaambo Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atakanyonyoonwi pele akabe abuumi butamani.” (Joh. 3:16) Kuli zikozyanyo zinji zyabantu ibakali balongwe ba Jehova. Atulange-lange zikozyanyo zyobilo izili boobo.

3, 4. Kujatikizya kuba acilongwe a Jehova, nkwiindana nzi kuliko akati ka Abrahamu abalunyungu lwakwe?

³ Kujatikizya sinsiku alimwi syaanene wabana Israyeli, Jehova wakaamba kuti ‘Abrahamu mulongwe wangu.’ (Is. 41:8) Lugwalo  lwa 2 Makani 20:7 alwalo lwaamba Abrahamu kuti mulongwe wa Leza. Ino cilongwe ciyumu icakali akati ka Mulengi amwaalumi ooyu iwakali kusyomeka cakayeeme aanzi? Cakayeeme alusyomo lwa Abrahamu.—Matl.15:6; amubale Jakobo 2:21-23.

⁴ Jehova wakali Usyi alimwi Mulongwe walunyungu lwa Abrahamu lwalo ilwakazikuba cisi ca Israyeli wansiku. Nokuba boobo, cilausisya kuti bakasweekelwa cilongwe cabo a Leza. Ino nkaambo nzi? Akaambo kakuti tiibakazumanana kutondezya lusyomo muzisyomezyo zya Jehova.

5, 6. (a) Mbuti Jehova mbwaaba Mulongwe wanu? (b) Mibuzyo nzi njotweelede kubikkila maano kapati?

⁵ Mbomuyaabwiiya zinji kujatikizya Jehova, ilusyomo lwanu alwalo lulayuma, alimwi aluyando ndomujisi kulinguwe lulakomena. Amuyeeye ciindi camusyule nomwakazyiba kuti Leza nkwali ncobeni, walo ngomukonzya kuba acilongwe anguwe. Alimwi mwakaiya kuti toonse twakazyalwa acibi akaambo kakutamvwida kwa Adamu. Mwakazyiba kuti bantu boonse balizandukide kuli Leza. (Kol. 1:21) Mpoonya mwakazyiba kuti Taateesu wakujulu siluyando tali kule andiswe akuti ulatubikkila maano. Ciindi notwakaiya bubambe bwacipaizyo cacinunuzyo ca Jesu alimwi akutondezya lusyomo mucinunuzyo, twakatalika kubamba cilongwe a Leza.

⁶ Notulanga musyule, inga twalibuzya kuti: ‘Sena cilongwe cangu a Leza ciyaambele? Sena lusyomo lwangu mulinguwe nduyumu, alimwi sena luyando lwangu mu Mulongwe wangu uuyandwa, Jehova, lulakomena buzuba abuzuba?’ Aumwi muntu wansiku iwakali acilongwe ciyumu a Jehova ngu Gideoni. Atulange-lange cikozyanyo cakwe cibotu akwiiya kuzwa kulincico.

7-9. (a) Ncintu nzi cipati icakamucitikila Gideoni, alimwi ncinzi cakatobela? (Amubone cifwanikiso icili kumatalikilo aacibalo.) (b) Ncinzi cikonzya kutugwasya kutegwa tube acilongwe a Jehova?

⁷ Mubetesi Gideoni wakabelekela Jehova mumazuba aakatazya aabuumi bwabana Israyeli ciindi nibakanjila mu Nyika Yakasyomezyedwe. Bbuku lya Babetesi caandaano 6 lyaamba mungelo wa Jehova iwakaswaya Gideoni ku Ofira. Aciindi eeco bana Israyeli bakali kubayoowa kapati bana Midyani ibakabazingulukide. Gideoni wakali mucipolelo camaila, kutali antangalala pe, pele mudindi lyakusinina masaansa mwalo mwaakali kukonzya kusisa bulotwe cakufwambaana. Kagambidwe kuti mungelo walibonya kulinguwe alimwi akumwaamba kuti “mwaalumi singuzu,” Gideoni wakabuzya naa Jehova, iwakavwuna bana Israyeli kuzwa mu Egepita wakali kuyakubagwasya alimwi. Kaiminina Mulengi, mungelo wakasyomezya Gideoni kuti masimpe Jehova wakali kuyakumugwasya.

⁸ Gideoni wakali kulibuzya kujatikizya mbocakali kukonzyeka kulinguwe ‘kuvwuna ba Israyeli kumaanza aaba Midyani.’ Bwiinguzi bwacigaminina mbwaakapegwa a Jehova bwakali bwakuti: “Ncobeni njooba ayebo, nkabela ba Midyani uyoobauma mbuli mbwaumwa muntu omwe buyo.” (Bab. 6:11-16) Kacidooneka mbuli mbocakali kuyakucitika, Gideoni wakalomba citondezyo. Amubone kuti mumubandi ooyo tacidoonekwi kuti Gideoni wakali kubona Jehova kuba mwini-mwini.

⁹ Icakacitika kuzwa waawo cakayumya lusyomo lwa Gideoni alimwi akumupa kuti aswene kapati kuli Leza. Gideoni wakabamba cakulya akupa mungelo. Ciindi mungelo naakaciguma cakulya ankoli yakwe, cakapya amulilo, aboobo Gideoni wakazyiba kuti mungelo wakali mwiiminizi ncobeni wa Jehova. Kagambidwe kapati Gideoni wakoompolola kuti: “Maawe, Mwami Jehova! Ndibwene angelo wa-Jehova cakulangana kumeso.” (Bab. 6:17-22) Pele sena eeco cakacitika cakapa kuti kube cisinkilizyo akati ka Gideoni alimwi a Leza wakwe? Peepe! Icakacitika ciliimpene aceeco. Gideoni wakamuzyiba Jehova cakuti wakalimvwa kuba muluumuno a Leza. Tulizyi oobo akaambo kazyina lyakapegwa cipaililo Gideoni ncaakayaka abusena oobo—“Jehova-siluumuno.” (Amubale Babetesi 6:23, 24) Notuzinzibala  kuyeeya kujatikizya nzyatucitila Jehova buzuba abuzuba, tulazyiba kuti Mulongwe ncobeni. Kupaila lyoonse kuli Leza kupa kuti tube aluumuno lunji alimwi akuyumya cilongwe cesu anguwe.

10. Kweelana alugwalo lwa Intembauzyo 15:3, 5, ncinzi ncayanda Jehova kulindiswe kutegwa tube balongwe bakwe?

¹⁰ Kutegwa Jehova abe Mulongwe wesu, tweelede kuzuzikizya zyeelelo zimwi. Mbubwenya mbokulembedwe mu Intembauzyo 15, Davida wakaimba kujatikizya iciyandika kulindiswe kutegwa ‘tusekelezyegwe mucilawo ca Jehova,’ nkokuti kuba mulongwe wa Leza. (Int. 15:1) Atubikkile maano kuzyeelelo eezyo zyobilo—kutalengelela alulimi akusyomeka muzyintu zyoonse nzyotucita. Kweelana atwaambo ootu, Davida wakaamba kujatikizya muntu uusekelezyegwa mucilawo ca Jehova kuti: ‘Talengeleli alulimi lwakwe . . . Kunyina natambula makulo kuti abisizye muntu uunyina mulandu.’—Int. 15:3, 5.

11. Nkaambo nzi ncotuteelede kubejelezya muntu uuli woonse?

¹¹ Muntembauzyo iimbi, Davida wakacenjezya kuti: “Kasya lulimi lwako kububi.” (Int. 34:13) Kwaalilwa kutobela lulayo oolu lwakasololelwa amuuya kulakonzya kupa kuti tutamvwani a Taateesu wakujulu mululami. Mubwini, kulengelela naa kubejelezya mbube bwa Saatani, sinkondonyina mupati wa Jehova. Izyina lyakuti “Diabolosi” lizwa kubbala lya Chigiliki ilipandulula “kubejelezya.” Kweendelezya mulaka wesu muzyintu nzyotwaamba kujatikizya bamwi kugwasya kukwabilila cilongwe cesu a Jehova. Eeci ncamasimpe kwaambisya kujatikizya muuya ngotutondezya kubaalumi basalidwe mumbungano.—Amubale Bahebulayo 13:17; Juda 8.

12, 13. (a) Nkaambo nzi ncotweelede kusyomeka muzyintu zyoonse? (b) Ino kusyomeka kwesu inga kwabajatikizya buti bamwi?

¹² Kusyomeka akwalo kulabonwa mubabelesi ba Jehova, kutali kudyaaminina. Mwaapostolo Paulo wakalemba kuti: “Amuzumanane kutupailila, nkaambo tusyoma kuti tujisi manjezyeezya aasalala, mbwaanga tuyanda kuti katusyomeka muzyintu zyoonse.” (Heb. 13:18) Akaambo kakuti “tuyanda kuti katusyomeka muzyintu zyoonse,” tulatantamuka kubalida masuku amutwe bakwesu Banakristo. Mucikozyanyo, kuti naa mbabelesi besu, tulasinizya kuti tulabalanganya kabotu alimwi akubavwozya kweelana ambotwakazuminana ambabo. Mbotuli Banakristo, tulacita zyintu cakusyomeka kubantu mbotwakalemba milimo alimwi abamwi buyo. Alimwi ikuti tulilembedwe mulimo a Munakristoma, tulabikkila maano kutegwa tutamulidi masuku amutwe kwiinda mukuyanda kulanganizyigwa munzila yaalubazu.

¹³ Cilakkomanisya kaka notumvwa majwi aakulumba kuzwa kubantu bamunyika ibabeleka a Bakamboni ba Jehova! Mucikozyanyo, mupati wakkampani imwi yamayake wakabona kuti Bakamboni ba Jehova balazuzikizya nzyobaamba. Wakaamba kuti: “Lyoonse mulakakatila kuli ceeco ncomwamvwana kucita.” (Int. 15:4) Kulilemeka boobo kulatugwasya kuzumanana kubamba cilongwe cesu a Jehova. Kuyungizya waawo, kupa kuti Taateesu wakujulu siluyando atembaulwe.

14, 15. Ino inga twabagwasya buti bantu kuba balongwe ba Jehova mumulimo wamumuunda?

¹⁴ Nokuba kuti balakonzya kusyoma kuti Leza nkwali, bantu banji mbotujana mumulimo wamumuunda tabamuboni kuba Mulongwe wabo uubainda boonse. Ino inga twabagwasya buti? Amuyeeye malailile Jesu ngaakapa basikwiiya bakwe ibali 70 ciindi naakabatuma bobilo-bobilo kutegwa bakakambauke. Wakati: “Kufwumbwa nkomuyoonjila muŋanda, amukasaangune  kwaamba kuti: ‘Akube luumuno muŋanda iino.’ Alimwi ikuti muŋanda oomo kakuli muntu uuyandisya luumuno, luumuno lwanu luyooba alinguwe. Pele kuti kakunyina, luyoopiluka kulindinywe.” (Lk. 10:5, 6) Tulakonzya kubakwelelezya bantu kukasimpe kwiinda mukubandika ambabo cabulongwe. Kuli basikukazya, eeci cilakonzya kugwasya kumana bukali akujalula nzila yakubandika kabotu ambabo ciindi cimbi.

¹⁵ Ciindi notujana bantu ibali mubukombi bwakubeja naa ibatobela zilengwa izitali zyamumagwalo, tulazumanana kuba balongwe alimwi basiluumuno. Tulabatambula amaanza obilo kumiswaangano yesu aabo ibatakkomani abukkale bwamunyika mazuba aano bwalo ibubapa kuti bayandisisye kwiiya zyintu zinji kujatikizya Leza ngotukomba. Zibalo zyakuti “Ibbaibbele Lilakonzya Kubacinca Bantu” zilatupa zikozyanyo zinji zibotu.

16. Muunzila nzi motukonzya kwaambwa kuti tuli balongwe ba Jehova alimwi ‘abasimilimonyina’?

¹⁶ Bantu babelekela antoomwe kanji-kanji balaba acilongwe ciyumu. Boonse ibalyaabide kuli Jehova balijisi coolwe cakuba balongwe bakwe alimwi ‘abasimilimonyina.’ (Amubale 1 Bakolinto 3:9.) Masimpe notutola lubazu mumulimo wakukambauka alimwi akugwasya bantu kuba basikwiiya, tulabumvwisya bube bubotu kapati bwa Taateesu wakujulu. Tulabona muuya wakwe uusalala mboutugwasya kubeleka mulimo wesu wakukambauka makani mabotu.

17. Muunzila nzi cakulya cakumuuya cipegwa lyamiswaangano yaalubazu, yabbazu alimwi ayacooko mbocitondezya kuti Jehova Mulongwe wesu?

¹⁷ Kwiinda mukuzumanana mumulimo wakugwasya bantu kuba basikwiiya, tulaswena kuli Jehova. Mucikozyanyo, tulabona Jehova mbwajaya makanze aabasikukazya. Amuyeeye myaka yamusyule misyoonto yainda. Twabona kabotu-kabotu Leza mbwatusololela. Tulakkomana kapati acakulya cakumuuya ncotuzumanana kutambula. Mapulogilamu eesu aamiswaangano yacooko, miswaangano yaalubazu ayabbazu atondezya luyando ndwajisi Taateesu siluyando uumvwisya mapenzi eesu alimwi anzyotuyandika. Mulugwalo lwakulumba akaambo kamuswaangano wacooko, mukwasyi umwi wakalemba kuti: “Mubwini, pulogilamu yatunjila mumyoyo. Twabona Jehova mbwatuyanda umwi aumwi alimwi ambwayanda kuti tuzwidilile.” Nobakamana kuswaangana kumuswaangano wacooko waalubazu mucisi ca Ireland, banabukwetene bakucisi ca Germany bakaamba majwi aakulumba akaambo kakutambulwa kabotu alimwi akulanganizyigwa. Bakayungizya kuti: “Pele kulumba kwesu kupati kuya kuli Jehova alimwi a Mwami wakwe Jesu Kristo. Batutamba kuti tube cibeela cacisi eeci cikamantene ncobeni. Tatwaambi buyo aamulomo kujatikizya lukamantano, pele tulalubona  mubuumi buzuba abuzuba. Zyintu zyatucitikila kujatikizya muswaangano wacooko mu Dublin lyoonse zinakutuyeezya coolwe caalubazu ncotujisi cakubelekela Leza wesu antoomwe andinywe nyoonse.”

18. Ino mibuzyo nzi njotukonzya kulibuzya kujatikizya kubandika a Jehova?

¹⁸ Cilongwe cilayumya ciindi nokuli kubandika kubotu. Akaambo kakuyaambele kwasayaansi, kulanga-langa makani aa Intaneti alimwi akulembelana tugwalo kulidumide kapati. Aboobo, notweezyanisya makani aaya, ino swebo kutugama tucita buti mumakani aakubandika a Jehova Mulongwe wesu uubainda boonse? Masimpe, walo “Nguuswiilila zikombyo.” (Int. 65:2) Sena tulajana ciindi cakubandika anguwe lyoonse?

19. Ino ndugwasyo nzi ndotujisi ilukonzya kutugwasya ciindi notukakilwa kumwaambila izili mumyoyo yesu Taateesu wakujulu?

¹⁹ Babelesi ba Leza bamwi cilabayumina kujalula myoyo yabo akwaamba mbobalimvwa mukati. Pele ncencico Jehova ncayanda kulindiswe notupaila. (Int. 119:145; Malo. 3:41) Nokuba kuti inga catwaalila kujalula myoyo yesu kwaamba mbotulimvwa, tulijisi lugwasyo lumwi. Paulo wakalembela Banakristo baku Roma kuti: “Penzi ndyakuti nokuba kuti tuleelede kupaila tatuzyi pe mbotweelede kupaila, pele muuya wini ulatukombelezyezya kujatikizya kutongela nkotukakilwa kwaamba cakupozya. Nokuba boobo, ooyo uulingula myoyo ulizyizyi ncozyaamba zikombelezyegwa amuuya nkaambo ukombelezyezya basalali kweelana akuyanda kwa Leza.” (Lom. 8:26, 27) Kuzinzibala kuyeeya makani aalembedwe mumabbuku aamu Bbaibbele mbuli Jobu, Intembauzyo alimwi a Tusimpi, kuyakutugwasya kumwaambila Jehova mbotulimvwa mumyoyo yesu.

20, 21. Nduumbulizyo nzi lujanwa mumajwi aa Paulo aali mulugwalo lwa Bafilipi 4:6, 7?

²⁰ Ciindi notwanjila mubukkale bukatazya, tweelede kutobela lulayo Paulo ndwaakasololelwa kulembela bana Filipi lwakuti: “Mutalibiliki acintu niciba comwe, pele muzyintu zyoonse, kwiinda mumupailo akukombelezya antoomwe akulumba, amumuzyibye Leza nzyomukumbila.” Kwaanguluka kwaambaula kwamusyobo ooyu amulongwe wesu uubainda boonse kuyootupa luumbulizyo nkaambo Paulo ulayungizya kwaamba kuti: “Luumuno lwa Leza oolo lwiinda kumvwisya koonse luyookwabilila myoyo yanu amizeezo yanu kwiinda muli Kilisito Jesu.” (Flp. 4:6, 7) Atulubelesye “luumuno lwa Leza” lutakonzyi kweezyanisyigwa lwalo ilukwabilila myoyo alimwi amizeezo yesu.

²¹ Mupailo ulatugwasya kuba acilongwe a Jehova. Aboobo, tweelede ‘kupaila cakutaleka.’ (1 Te. 5:17) Atugwasyigwe aciiyo eeci kuyumya cilongwe cesu citaliboteli a Leza alimwi amakanze eesu aakutobela zyeelelo zyakwe ziluleme. Alimwi atujane ciindi cakuzinzibala kuyeeya zilongezyo nzyotujana nkaambo Jehova masimpe ngu Taateesu, Leza wesu alimwi Mulongwe wesu.