Mulwiimbo ndwaakali kutembaula Mulengi, Mwami Davida wa Israyeli yakaindi wakaimba kuti: “Ndakondwa kucita luyando lwako, O Leza wangu; mulao wako uli mumoyo wangu.” (Int. 40:8) Nokuba kuti wakali kulijana mubukkale bukatazya mubuumi bwakwe, Davida wakali kukondwa ncobeni kucita kuyanda kwa Leza. Cakutadooneka, Davida tali ngomukombi wa Jehova alikke iwakakkomana kubelekela Leza wakasimpe.

Kwiinda mukubelesya majwi aajanika mu Intembauzyo 40:8 kupandulula Mesiya, naa Kristo, mwaapostolo Paulo wakalemba kuti: ‘Jesu naakaboola munyika wakaamba kuti: “‘Zipaizyo alimwi azituuzyo tiiwakaziyanda pe, pele wakandibambila mubili. Tiiwakazikkomanina pe zituuzyo zyuumpwa zyuumbulu azituuzyo zyacibi.’ Mpoonya ndakati, ‘Bona! Ndaboola, (mubbuku lyakuvwunga kulilembedwe kujatikizya ndime) kuti ndicite kuyanda kwako, O Leza.’”’—Heb. 10:5-7.

Naakali waano anyika, Jesu wakali kukkomana kweebelela zilenge, kukkala antoomwe abalongwe, alimwi akulya cakulya abamwi. (Mt. 6:26-29; Joh. 2:1, 2; 12:1, 2) Nokuba boobo, cintu cipati ncaakali kubikkila maano kapati alimwi icakali kumukkomanisya, nkucita kuyanda kwaba Usyi bakujulu. Alimwi buya Jesu wakaamba kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:34; 6:38) Kuzwa kuli Simalelaabo, basikwiiya ba Jesu bakaiya cintu cini cipa kukkomana kwini-kwini. Kabakkomene, bakali kwaambila bamwi mulumbe wa Bwami caluyandisisyo.—Lk. 10:1, 8, 9, 17.

Jesu wakalailila basikwiiya bakwe kuti: “Kamuya mukagwasye bantu bamisyobo yoonse kuba basikwiiya, akubabbapatizya muzyina lya Taata alya Mwana alya muuya uusalala, kubayiisya kubamba zyintu zyoonse nzyondakamulailila. Alimwi amubone! Ndili andinywe mazuba oonse mane kusikila kumamanino aabweende bwazyintu oobu.” (Mt. 28:19, 20) Kuzuzikizya mulimo ooyu kubikkilizya kukambaukila bantu kufwumbwa nkobakonzya kujanika, kucita nyendo zyakupilukila, alimwi akusololela ziiyo zya Bbaibbele kubantu bali  boobo. Kucita mulimo ooyu kulakonzya kuba nenzila yakujanina lukkomano lunji.

Kufwumbwa naa bantu balaukkomanina mulumbe wesu naa pe, cilayandika kapati kuzilanga kabotu zintu kutegwa tujane lukkomano mumulimo wakukambauka. Nkaambo nzi ncotuzumanana kwaambilizya makani mabotu nokuba kuti tulakazyigwa? Nkaambo tulizyi kuti kutola lubazu kwesu mumulimo wakukambauka Bwami akugwasya bantu kuba basikwiiya ncitondezyo cakuti tulamuyanda Leza alimwi tulabayanda basimukoboma. Kuyungizya waawo, buumi buli muntenda—buumi bwesu alimwi abuumi bwabasimukoboma. (Ezk. 3:17-21; 1 Ti. 4:16) Atulange-lange twaambo tumwi itwagwasya basimilimoma kuzumanana naa kubukulusya busungu bwabo mumulimo wakukambauka muzilawo zikatazya.

Kubelesya mibuzyo yeelede ciindi notuli mumulimo wakukambauka kanji-kanji kupa kuti bantu batambule makani mabotu. Mucikozyanyo, buzuba bumwi mafwumofwumo, ba Amalia bakabona mwaalumi umwi kabala muteende mubusena bumwi bwakulyookezyela. Bakaswena afwaafwi kumwaalumi ooyo akumubuzya naa kuli makani mabotu ngaabala mumuteende. Mwaalumi ooyo naakaingula kuti kunyina, ba Amalia bakaamba kuti: “Ndamuletela makani mabotu aamba zya Bwami bwa Leza.” Eeci cakapa kuti mwaalumi ooyo abe aaluyandisisyo, alimwi wakazumina kwiiya Bbaibbele. Ba Amalia bakacikonzya kutalisya ziiyo zya Bbaibbele zyotatwe mubusena mbubwenya oobu.

Ba Janice bajisi bubambe bwakukambaukila kubusena nkobabelekela. Ciindi cimwi mulindizi amubelesinyina nobakacikkomanina cibalo cimwi icakali mu Ngazi Yamulindizi, ba Janice bakabaambila kuti balakonzya kunakubaletela mamagazini lyoonse. Bakacita mbubwenya oobo akumubelesinyina umbi, walo iwakakkomana kubona zibalo ziindene-indene mu Ngazi Yamulindizi amu Sinsimuka! Eeci cakapa kuti mubelesi umbi alombe mamagazini. Ba Janice bakaamba kuti: “Eeci ncilongezyo cipati kaka kuzwa kuli Jehova!” Mukuya kwaciindi, bakazikuba aabantu bali 11 mbobakeelede kunakutolela lyoonse mamagazini kumulimo.

Mulangizi wabbazu umwi wakakulwaizya kuti ciindi nomuli mumulimo wakukambauka kuŋanda aŋanda, basikumwaya tabeelede kumana mubandi wabo kwiinda mukwaamba buyo kuti bayakupiluka alimwi buzuba bumbi. Muciindi caboobo, balakonzya kumubuzya mubuzyo muntu ooyo, akwaamba kuti: “Sena inga ndamutondezya mbocicitwa ciiyo ca Bbaibbele?” naa, “Ndilili alimwi nciindi nzi nomunga mwayanda kuti ndikaboole alimwi kuzyi kuzumanana amubandi wesu ooyu?” Mulangizi weendeenda wakaamba kuti kwiinda mukubelesya nzila eeyi, bakwesu abacizyi bamumbungano imwi njaakali kuswaya bakacikonzya kutalisya ziiyo zya Bbaibbele zili 44 munsondo yomwe buyo.

Kucita nyendo zyakupilukila cakufwambaana—andiza kwainda buyo mazuba masyoonto kuzwa nomwakaswaya ciindi cakusaanguna—kulakonzya kugwasya kapati. Ino nkaambo nzi? Nkaambo kucita boobo kutondezya kuti tulakubikkila kapati maano kugwasya bantu balaaluyandisisyo lwakwiiya Bbaibbele. Mukaintu umwi naakabuzyigwa kuti aambe kaambo kakamupa  kuzumina kwiiya Bbaibbele a Bakamboni ba Jehova, wakaamba kuti: “Ndakatalika kwiiya akaambo kakuti bakali kundibikkila kapati maano alimwi bakali kundiyanda.”

Nokwakainda buyo ciindi cisyoonto kuzwa nobakanjila Cikolo Camulimo Wabupainiya, ba Madaí bakali kusololela ziiyo zya Bbaibbele zili 15 mpoonya zimbi zyosanwe bakapa basikumwaya bambi. Ziiyo zya Bbaibbele zyabo zinji zyakatalika kujanika kumiswaangano yesu lyoonse. Ncinzi cakabagwasya ba Madaí kutalisya ziiyo zinji boobu? Cikolo cakabagwasya kubona mbociyandika kupilukila kusikila mane babajana aabo ibakatondezya luyandisisyo mulweendo lwakusaanguna. Kamboni umwi iwakagwasya bantu banji kwiiya Bbaibbele wakaamba kuti: “Ndazyiba kuti kuzumanana kucita nyendo zyakupilukila kulayandika kapati mukugwasya bantu kumuzyiba Jehova.”

Kucita nyendo zyakupilukila akusololela ziiyo zya Bbaibbele kuyandika kubeleka canguzu. Pele kucita boobo kuletela zilongezyo zinji. Kwiinda mukubikkila maano kumulimo wakukambauka wa Bwami, tulakonzya kugwasya bantu banji “kuba aluzyibo lwini-lwini lwakasimpe,” calo icikonzya kupa kuti bakafwutulwe. (1 Ti. 2:3, 4) Mpoonya swebo tulakonzya kukkutila akukkomana kapati.