1, 2. (a) Nguni iwakasaanguna kulengwa a Leza, alimwi ino Jehova wakamubelesya buti? (b) Ncinzi citondezya kuti bangelo balikamantene?

JEHOVA, Mulengi wabubumbo boonse, ulacita zintu kweelana abubambe buli kabotu. Wakasaanguna kulenga Mwanaakwe wamuuya simuzyalwaalikke, iwiitwa kuti “Ijwi” akaambo kakuti ngomwaambilizi mupati wa Leza. Ijwi wali kubelekela Jehova myaka minji, nkaambo Bbaibbele lyaamba kuti: “Kumatalikilo Ijwi wakaliko, alimwi Ijwi wakali a Leza.” Alimwi litwaambila kuti: “Zyintu zyoonse zyakaba kwiinda mulinguwe, alimwi kunyina cintu nociba comwe cakaba kakunyina nguwe.” Myaka iili 2,000 yainda musyule, Leza wakatuma Jwi anyika, walo iwakacita kuyanda kwa Usyi cakusyomeka kali Jesu Kristo muntu uulondokede.—Joh. 1:1-3, 14.

² Katanaba muntu, Mwana wa Leza wakali kubeleka cakusyomeka kali “mufuzi.” (Tus. 8:30, BT) Kwiinda mulinguwe, Jehova wakalenga mamiliyoni aazilenge zinji zyamuuya zyakujulu. (Kol. 1:16) Kujatikizya bangelo aabo, cibalo cimwi camu Bbaibbele caamba kuti: ‘Basimilimo ba Jehova bakali cuulu cazyuulu, abaabo ibakaimvwi kubusyu bwakwe bakali zyuulu zili ikumi zyazyuulu zili ikumi.’ (Dan. 7:10) Zilenge zyamuuya zinji zya Leza zyaambwa kuti “makamu” aakamantene aa Jehova.—Int. 103:21.

3. Ino mupati buti mweelwe wanyenyeezi amapulaneti, alimwi mbuti mbozibambidwe?

 ³ Mbuti kujatikizya zilenge izitali zyamuuya, mbuli nyenyeezi zitakonzyi kubalwa alimwi amapulaneti? Kujatikizya nyenyeezi, pepa limwi lyakaamba boobu kujatikizya buvwuntauzyi bwakacitwa caino-ino ibwaamba kuti kuli nyenyeezi zisika ku “300 sekisitililiyoni, naa kuleta ziindi zyotatwe mweelwe ngobakali kuyeeyela basyaazibwene mumakani aasayansi.” Pepa lyakayungizya kwaamba kuti: “Eeci caamba 3 uujisi mazilo aali 23. Naa 3 tililiyoni x 100 bbiliyoni.” Nyenyeezi zili mumilalabungu, mulalabungu umwi aumwi ujisi mabbiliyoni naa matililiyoni aanyenyeezi, alimwi amapulaneti manji. Milalabungu ibambidwe mumakamu-makamu mpoonya makamu-makamu aamilalabungu abambidwe mumakamu-makamu mapati.

4. Nkaambo nzi ncotukonzya kwaamba kuti babelesi ba Leza bali kuyakuba abubambe mbobeelede kuccilila?

⁴ Mbubwenya mbuli zilenge zyamuuya ziluleme, alyalo julu ililibonya lilibambidwe kabotu-kabotu. (Is. 40:26) Aboobo, cileelela kuti Jehova abikke bubambe mbobakonzya kuccilila babelesi bakwe anyika. Uyanda kuti kabaccilila bubambe bubotu, eeci cilayandika kapati nkaambo bajisi mulimo uuyandika kapati ngobeelede kucita. Kulanga milimo yacitwa abakombi ba Jehova bakaindi abamazuba aano mbumboni busalede ibutondezya kuti wali aambabo alimwi akuti “tali Leza walupyopyongano pe, pele ngwaluumuno.”—Amubale 1 Bakolinto 14:33, 40.

5. Ino bubambe bwakubamba mukwasyi wabantu uuli kabotu anyika bwakanyonganizyigwa buti?

⁵ Ciindi Jehova naakalenga bantu bakusaanguna, wakabaambila kuti: “Amuzyalisye, muvule, muzuzye nyika akwiibombya. Amweendelezye inswi zyamulwizi abayuni bakujulu abanyama boonse baputauka ansi.” (Matl. 1:28) Mukwasyi wabantu wakaleelede kukomena kweelana abubambe buli kabotu kutegwa nyika izule alimwi akukomezya Paradaiso kusikila nyika yoonse yazula. Kuzuzikizyigwa kwabubambe oobu buli kabotu kwakanyonganizyigwa kwaciindi cisyoonto buyo ciindi ba Adamu a Eva nobakabisya. (Matl. 3:1-6) Mukuya kwaciindi, “Jehova wakabona kuti bubi bwa bantu baansi bulayoosya, amiyeeyo yoonse bantu njibayeeya mumyoyo yabo mibi luzutu mazuba oonse.” Akaambo kaceeci, “nyika yakabija kumeso aa-Leza, alimwi nyika yakazula luuni.” Aboobo, Leza wakasyomezya kuleta zambangulwe yanyika yoonse kutegwa anyonyoone bantu babi.—Matl. 6:5, 11-13, 17.

6, 7. (a) Nkaambo nzi Jehova wakamufwida luzyalo Nowa? (Amubone cifwanikiso icili kumatalikilo aacibalo.) (b) Ncinzi cakacitikila bantu boonse ibatakali kusyomeka mumazuba aa Nowa?

⁶ Nokuba boobo, “Nowa wakafwidwa luzyalo mumeso aa-Jehova” akaambo kakuti ‘wakali muntu uululeme akati kabasaanyina.’ Akaambo kakuti “Nowa wakali kweenda a-Leza,” Jehova wakamulailila kuti ayake bwato bupati. (Matl. 6:8, 9, 14-16) Mbobwakapangwa bwato oobo bwakali kukonzya kufwutula bantu alimwi abanyama. Kwiinda mukumvwida, “Nowa wakacita zyoonse Jehova nzyaakamulailila,” alimwi kakamantene amukwasyi wakwe, wakamaniizya kuyaka bwato kweelana abubambe. Ciindi naakamana kunjizya banyama mubwato, “Jehova wakamujalila.”—Matl. 7:5, 16.

⁷ Mu 2370 B.C.E. ciindi Zambangulwe nolyakaboola, Jehova ‘wakaziminganya boonse baumi bakali ansi,’ pele wakafwutula buyo Nowa amukwasyi wakwe ibakali mubwato. (Matl. 7:23) Bantu boonse ibali anyika mazuba aano, bakazwa kuli Nowa, kubana bakwe, alimwi akubamakaintu babo. Pele bantu batakali kusyomeka ibatakali mubwato bakanyonyoonwa akaambo kakukaka kumvwida Nowa, “imukambausi wabululami.”—2 Pe. 2:5.

8. Mbumboni nzi ibutondezya kuti kwakali bubambe bubotu mu Israyeli yansiku ciindi Leza naakabalailila kunjila mu Nyika Yakasyomezyedwe?

⁸ Nokwakainda myaanda yamyaka iili lusele  kuzwa zambangulwe nolyakacitika, Leza wakabikka bubambe bwakuti bana Israyeli babe cisi. Bubambe bubotu bwakali kuyakubikkilizya buumi bwabo boonse pele kwaambisya kukomba kwabo. Mucikozyanyo, kuyungizya kumweelwe wabapaizi banji bana Israyeli alimwi aba Levi, kwakali “banakazi ibakali kubungana kumulyango watente lyambunganino.” (Kul. 38:8) Nokuba boobo, ciindi Jehova Leza naakalailila bana Israyeli kuti banjile mu Kanana, izyalani eeli tiilyakasyomeka, mpoonya wakabaambila kuti: “Tamukooyoonjila munyika eyo njendakakonkezya kuti mukale mulinjiyo, cita Kalebe mwana wa-Jefune a-Joshua mwana wa-Nuni abalike” akaambo kakuti bakaleta makani aali kabotu nobakazwa kukutwela Nyika Yakasyomezyedwe. (My. 14:30, 37, 38) Kweelana amalailile aa Leza, Musa wakaambila Joshua kuba simulyazina wakwe. (My. 27:18-23) Ciindi Joshua naakali kuyanda kunjizya bana Israyeli mu Kanana, wakaambilwa kuti: “Koyuma akuba mukozu. Utakankami nikuba kuyoowa, pe, nkaambo Jehova Leza wako uli ayebo koonse koonse nkoya.”—Jos. 1:9.

9. Mbuti Rahabu mbwaakali kulimvwa kujatikizya Jehova abantu bakwe?

⁹ Masimpe, Jehova Leza wakali a Joshua kufwumbwa nkwaakali kuunka. Mucikozyanyo, amubone cakacitika ciindi bana Israyeli nobakakkede munsi-munsi aa Jeriko munzi wabana Kanana. Mu 1473 B.C.E., Joshua wakatuma basikutwela kuti batwele munzi wa Jeriko, mpoonya ooko bakayaanya mwanakazi muvwuule wazina lya Rahabu. Mwanakazi ooyu wakabasisa muciluli caŋanda yakwe kutegwa basikalumamba ibakatumidwe amwami wamunzi wa Jeriko batababoni. Rahabu wakaambila basikutwela kuti: “Ndizi kuti Jehova wamupa nyika . . . , nkaambo twakamvwa Jehova mbwaakamuyuminizizya maanzi aa-Lwizi Lusalala . . . ambumwakacitila bami bobile ba-Amori.” Alimwi wakayungizya kwaamba kuti: “Jehova Leza wanu ngu-Leza wakujulu awaansi ano.” (Jos. 2:9-11) Akaambo kakuti Rahabu wakaba kulubazu lwambunga ya Jehova yamuciindi eciya, Leza wakamufwutula abamukwasyi wakwe ciindi bana Israyeli nobakanyonyoona munzi wa Jeriko. (Jos. 6:25) Rahabu wakatondezya lusyomo,  wakali kumuyoowa Jehova, alimwi wakali kubalemeka bantu ba Leza.

10. Ino Jesu wakabaambila nzi basololi bazikombelo bamumazuba aakwe, alimwi nkaambo nzi ncaakaambila boobo?

¹⁰ Nobakali kweendelezyegwa aa Joshua, bana Israyeli bakali kuyaabuzunda minzi yakali munyika ya Kanana. Pele ncinzi cakacitika mukuya kwamazuba? Kwamyaanda yamyaka, bana Israyeli cakwiinduluka–induluka tiibakali kwiitobela milawo ya Leza. Kuzikusika ciindi Jehova naakatuma Mwanaakwe anyika, kwaalilwa kumvwida Leza alimwi amwaambilizi wakwe kwakali kulibonya kapati cakuti Jesu wakaamba munzi wa Jerusalemu kuti “oojaya basinsimi.” (Amubale Matayo 23:37, 38.) Leza wakabakaka basololi bazikombelo ba Juda akaambo kakutasyomeka kulinguwe. Aboobo, Jesu wakabaambila kuti: “Bwami bwa Leza buyoonyangwa kulindinywe akupegwa kumusyobo uuzyala micelo.”—Mt. 21:43.

11, 12. (a) Ncinzi citondezya kuti mumwaanda wamyaka wakusaanguna Jehova wakacinyanga zileleko zyakwe cisi caba Juda akupa mbunga iimbi? (b) Ino mbunga mpya njaakali kukkomanina Leza yakali kubikkilizya bani?

¹¹ Mumwaanda wamyaka wakusaanguna C.E., Jehova wakacikaka cisi cabana Israyeli catakali kusyomeka. Nokuba boobo, eeci tiicakali kwaamba kuti takabi ambunga anyika yababelesi bakwe basyomeka. Jehova wakagwisya zileleko zyakwe akupa mbunga yakwe impya yakacita zintu zigambya iyeeme ali Jesu alimwi akuyiisya kwakwe. Mbunga eeyi yakatalika lya Pentekoste mu 33 C.E. Aciindi eeco, basikwiiya ba Jesu ibali 120 bakali bungene mubusena bumwi mu Jerusalemu ciindi ‘kujulu nokwakamvwugwa muzuzumo uuli mbuli waguwo lyuungisya iwakazuzya ŋanda yoonse oomo mobakakkede.’ “Mpoonya bakabona milaka iili mbuli mulilo yakamwaigwa akati kabo, alimwi muntu aumwi wakakkalwa mulaka, eelyo boonse bakazula muuya uusalala alimwi bakatalika kwaambaula mumyaambo yiindene-indene mbubonya muuya mbowakali kubazumizya kwaambaula.” (Mil. 2:1-4) Cintu eeci cigambya icakacitika bwakali bumboni bwatakali kukonzya kukazyigwa bwakuti Jehova wakali kwiigwasyilizya mbunga mpya yabasikwiiya ba Kristo.

¹² Mubuzuba mbubwenya oobo bukkomanisya, “kwakayungizyigwa bantu batandila ku 3,000” kumweelwe wabasikutobela Jesu. Kuyungizya waawo, “Jehova wakazumanana kuyungizya baabo bakali kufwutulwa kuli mbabo abuzuba.” (Mil. 2:41, 47) Bakambausi bamumwaanda wamyaka wakusaanguna bakali basungu mumulimo wabo cakuti “ijwi lya Leza lyakazumanana kuyaambele, eelyo mweelwe wabasikwiiya wakali kuyaabukomena kapati mu Jelusalemu.” Noiba “nkamu mpati yabapaizi abalo bakatalika kusyoma.” (Mil. 6:7) Bantu banji ibakali aluyandisisyo bakakatambula kasimpe ikakali kukambaukwa abantu ibakali kuzulilwa mumbunga eeyi mpya. Mukuya kwaciindi, Jehova wakapa bumboni ibwakatondezya kuti wakali kwiigwasyilizya mbunga eeyi ciindi naakatalika kubunganya “bantu bamasi” mumbungano ya Bunakristo.—Amubale Milimo 10:44, 45.

13. Mulimo nzi iwakali kucitwa ambunga ya Leza mpya?

¹³ Taakwe cakali kukonzya kudoonekwa kujatikizya mulimo Leza ngwaakapa basikutobela Kristo. Jesu wakapa cikozyanyo cibotu, mbwaakamanina buyo kubbapatizyigwa, wakatalika kukambauka kujatikizya “Bwami bwakujulu.” (Mt. 4:17) Jesu wakayiisya basikwiiya bakwe kubeleka mulimo nguwenya ooyu. Wakabaambila kuti: “Muyooba bakamboni bangu mu Jelusalemu, mu Judaya moonse amu Samaliya, alimwi mane akusikila kumagolelo aanyika.” (Mil. 1:8.) Cakutadooneka, basikutobela ba Kristo bakusaanguna bakacizyiba ncobakeelede kucita. Mucikozyanyo, mu Antiokeya mu Pisidiya, cabusicamba Paulo a Barnaba bakaambila basikubakazya kuti: “Kwakaleelede kuti jwi lya Leza lisaangune kwaambwa kulindinywe. Lino  mbwaanga mwalikaka alimwi mutondezya kuti tamweeleli buumi butamani, mbubo, tulamusiya tuye kuli bamasi. Nkaambo Jehova watulailila amajwi aaya aakuti, ‘Ndakubikka kuti ube mumuni wabamasi, kuti ube lufwutuko kusikila kumamanino aanyika.’” (Mil. 13:14, 45-47) Kuzwa mumwaanda wamyaka wakusaanguna, cibeela caanyika cambunga ya Leza cazumanana kuzyibya bubambe bwa Leza bwakufwutula bantu.

14. Ncinzi cakacitikila Jerusalemu wamumwaanda wamyaka wakusaanguna, pele mbaani bakafwutuka?

¹⁴ Ba Juda banji kunyina nobakatambula makani mabotu, alimwi lunyonyooko lwakali kuyakubasikila, nkaambo Jesu wakabacenjezya basikwiiya bakwe, naakati: “Mwaakubona Jelusalemu kazingulukidwe ampi, amukazyibe kuti kunyonyoonwa kwakwe kwaswena afwaafwi. Mpoonya aabo bali mu Judaya bakatalike kutijila kumalundu, aabo ibali mumunzi mwini abakazwe, abaabo bali muminzi iili anze aamunzi batakanjili mulinguwo.” (Lk. 21:20, 21) Jesu ncaakaambilila limwi cakacitika ncobeni. Akaambo kakuzanga kwaba Juda, basikalumamba bana Roma kwiinda mukusololelwa a Cestius Gallus, bakazinguluka Jerusalemu mumwaka wa 66 C.E. Nokuba boobo, basikalumamba aabo bakapiluka cakutayeeyela, aboobo eeco cakapa basikutobela Jesu coolwe cakuzwa mu Jerusalemu alimwi a Judeya. Kweelana ambwaakaamba mulembi wamakani aakaindi uutegwa Esusebius, banji bakatijila kutala aa Mulonga wa Jordano akuya ku Pella mu Pereya. Mu 70 C.E., basikalumamba bana Roma kwiinda mukusololelwa a Mupati wabasikalumba Titus bakapiluka akunyonyoona Jerusalemu. Nokuba boobo, Banakristo basyomeka bakafwutuka akaambo kakuti bakamvwida kucenjezya kwa Jesu.

15. Nokuba kuti Bunakristo bwakazumanana kuyaambele, mbuyumuyumu nzi bwakaliko?

¹⁵ Nokuba kuti kwakali buyumuyumu, kupenzyegwa, alimwi amasunko aambi ngobakali kusikilwa basikutobela Kristo, Bunakristo bwakazumanana kuyaambele mumwaanda wamyaka wakusaanguna. (Mil. 11:19-21; 19:1, 19, 20) Banakristo aabo bakazumanana kuyaambele kumuuya nkaambo bakali kulongezyegwa aa Leza.—Tus. 10:22.

16. Ncinzi ncaakali kuyandika kucita Munakristo umwi aumwi kutegwa azumanane kuyaambele kumuuya?

¹⁶ Kutegwa Munakristo umwi aumwi azumanane kuyaambele kumuuya, wakeelede kubeleka canguzu. Cakali kuyandika kapati kubikkila maano kwiiya Magwalo, kujanika kumiswaangano yakukomba, alimwi akusungwaala kutola lubazu mumulimo wakukambauka Bwami. Milimo iili boobu yakagwasya kapati kutegwa zintu kazyeenda kabotu kumuuya alimwi akuti kakuli lukamantano akati kabantu ba Jehova aciindi eeco, mbubwenya mbocibede amazuba aano. Aabo ibakali kuyanzana ambungano zyakusaanguna izyakali kutobela bubambe bakagwasyigwa kapati aluyandisisyo alimwi akusoleka kwabaalu abakutausi. (Flp. 1:1; 1 Pe. 5:1-4) Eelo kaka kweelede kuti cakali kukkomanisya ciindi baalu mbuli Paulo nobakali kuswaya mbungano! (Mil. 15:36, 40, 41) Kweendelana ikuliko akati kabukombi bwesu alimwi abwa Banakristo bamumwaanda wamyaka wakusaanguna kulakkomanisya kapati. Eelo kaka tulikkomene kubona kuti Jehova wakababikkila bubambe bwakuccilila babelesi bakwe bakaindi abamazuba aano! *

17. Ncinzi ciyakubandikwa mucibalo citobela?

¹⁷ Nyika yaa Saatani mboiyaabuswena kumamanino mumazuba aano aamamanino, cibeela caanyika cambunga ya Jehova yamububumbo boonse iyaabuyaambele. Sena mweendela antoomwe ambunga eeyi? Sena mwazumanana kuyaambele kumuuya? Cibalo citobela cilatondezya mbomukonzya kucita oobo.