CIINDI bantu ba Leza nobakazwa ku Babuloni mu 537 B.C.E., Jehova wakabikkila maano kunzila njobakali kuyakubelesya nobakali kuya ku Jerusalemu. Wakabaambila kuti: ‘Amubambile bantu bangu inzila. Amutuntumike, amutuntumike mitundulu, amugwisye mabwe mumugwagwa.’ (Is. 62:10) Amweezyeezye buyo ba Juda mbobakaucita mulimo ooyo. Kweelede kuti tubunga itwakali kumbele twakabamba nzila, andiza kuvwikila zilindi akwiibotya-botya. Kucita boobo kweelede kuti kwakali kuyakugwasya kapati banabokwabo ibakali kuboola musyule lyabo kupiluka kucisi cokwabo.

Icakacitika eeci tulakonzya kucibelesya kuba cikozyanyo canzila iisololela kumbaakani zyakumuuya. Jehova uyanda kuti babelesi bakwe boonse kabeendela munzila eeyi kakunyina kunyonganizyigwa azintu zitayi koomoonga. Ijwi lyakwe litukulwaizya kuti: “Cenjela kweenda kwamaulu aako, kuti inzila zyako zyoonse zibe kabotu.” (Tus. 4:26) Kufwumbwa naa muli mukubusi naa mucili mwana, mulakonzya kubona mboluli lwabusongo lulayo oolu.

Andiza mwakamvwa kale bantu kabaambila mukubusi kuti: ‘Uyakusika alamfwu.’ Bakubusi kanji-kanji tabaciswi-ciswi, balafwambaana kuyeeya, alimwi balayandisya kuzwidilila. Bbaibbele lililuzi nolyaamba kuti: “Bulemu bwabakubusi ninguzu zyabo.” (Tus. 20:29) Mukubusi uubelesya luzyibo lwakwe anguzu kubelekela Jehova ulakonzya kuzuzikizya mbaakani zyakumuuya akukkomana ncobeni.

Nokuba boobo, mbuli mbomuzyi, luzyibo lwabakubusi mbotujisi lulayandika kapati munyika. Ciindi Kamboni mukubusi naacita kabotu kucikolo, sikupa lulayo, mwiiyi, naa sicikolonyina ulakonzya kumusinikizya Kamboni kujana lwiiyo lwaatala kutegwa azwidilile mubweende bwazintu oobu. Andiza mukwesu  naa mucizyi mukubusi uucizyi kusobana cisobano mbuli cakubalika inga wajana kuti aabo ibamuyiisya cisobano eeco inga basola kumukulwaizya kuti cisobano cibe mbaakani yakwe. Sena kuli nomwakalijana kale mubukkale buli boobu, naa sena kuli muntu umwi ngomuzyi uusinikizyigwa kucita boobo? Ncinzi cikonzya kugwasya Munakristo kuti asale cabusongo?

Njiisyo zyamu Bbaibbele zilakonzya kugwasya umwi kutegwa ayendele munzila yiinda kubota mubuumi. Lugwalo lwa Mukambausi 12:1 lwaamba kuti: “Koyeeya Mulengi wako mumazuba aabulombe bwako.” Mbuti muntu umwi ngomuzyi naa nywebo mbomukonzya ‘kuyeeya Mulengi wanu’?

Amubone cakacitikila musankwa umwi wazina lya Eric * wamu Africa nkoili kumbo. Wakali kuyandisya kuuma bbola. Kusikila ciindi naakajisi myaka yakuzyalwa iili 15, wakasalidwe kale kuba mutiimu yabasibbola yacisi. Eeci cakali kwaamba kuti, wakali kulangila kuyiisyigwa kuuma kabotu bbola ku Europe, andiza akuba muntu uucibwene kapati kuuma bbola. Pele mbuti mbwaakali kukonzya kutobela lulayo lwakuti “koyeeya Mulengi wako”? Alimwi ncinzi ncomukonzya kwiiya nywebo alimwi abeenzyinyoko bamwi bakubusi kumakani aaya?

Ciindi naakacili kucikolo, Eric wakatalika kwiiya Bbaibbele a Bakamboni ba Jehova. Aboobo, wakatalika kuzyiba kuti Mulengi uyakwaamana mapenzi ngobajisi bantu. Eric wakabona bubotu buliko mukubelesya ciindi anguzu zyakwe kucita ncayanda Leza. Kajisi muzeezo ooyu wabusongo, Eric wakasala kutabikkila maano kumulimo wakuba sikuuma bbola uucibwene kapati. Muciindi caboobo, wakabbapatizyigwa akubikkila maano kuzintu zyakumuuya. Mukuya kwaciindi, wakazikuba mukutausi, kumane wakatambwa ku Cikolo Cakwiiya Bbaibbele ca Bakwesu Batakwete.

Ikuti Eric naakazumanana kuuma bbola, naakaba aampuwo alimwi naalivwubide. Pele wakazyiba njiisyo yamasimpe iijanika mu Bbaibbele, yakuti: ‘Imbono zyamuntu muvubi ngomunzi wakwe muyumu; zili mbuli bulambo bulamfu bwakumuvwuna mukuyeeya kwakwe.’ (Tus. 18:11) Masimpe, ilukwabililo muntu ndwaboneka kuti ulijisi ciindi navwubide, ndwakubeja. Kuyungizya waawo, bantu basungu kuyandaula buvwubi kanji-kanji ‘balaliyasaula koonse-koonse amacise manji.’—1 Ti. 6:9, 10.

Cilakkomanisya kapati kubona bakubusi banji ibakkomene alimwi bakwabilidwe akaambo kakuba babelesi bamulimo waciindi coonse. Eric wakaamba kuti: “Ndasangana ‘tiimu’ yababelesi ba Jehova baciindi coonse. Netiimu yiinda kubota nkondikonzya kubalilwa, alimwi ndilamulumba Jehova akaambo kakunditondezya nzila ilikke yakujana lukkomano akuzwidilila kwini-kwini mubuumi.”

Mbuti kujatikizya ndinywe? Muciindi cakuba ambaakani zyamunyika, sena inga tiimwabotya ‘inzila zyanu’ kuli Jehova kwiinda mukutola lubazu mumulimo wabupainiya?—Amubone kabbokesi kakuti “ Ikujana Mpindu Zitakonzyi Kujanwa ku Yunivesiti.”

Ciindi nobakali kuswaya kuofesi yamutabi yamucisi ca United States, banabukwetene bamwi bakabona mbobakakkomene aabo ibabelekela Jehova aa Bbeteli. Kumane mucizyi wakalemba kuti: “Twakalibukkede, alimwi twakali kubikkila buyo maano kuzintu zyesu tobeni.” Banabukwetene aaba bakayeeya kuti kabajana ciindi cakucita milimo minji njobakali kunga beelela.

Cimwi ciindi, kucinca nkobali kuyanda kucita banabukwetene aaba kwakali kulibonya kukatazya ncobeni. Pele bumwi buzuba, bakazinzibala kuyeeya Lugwalo lwabuzuba oobo. Lwakali lugwalo lwa Johane 8:31, kwalo Jesu nkwaakaamba kuti: “Ikuti mwazumanana mujwi lyangu, muli basikwiiya bangu ncobeni.” Kabayeeyede majwi aayo, bakaamba kuti: “Kufwumbwa ncotukonzya kucita kuubya-ubya buumi bwesu cilagwasya ncobeni.” Bakasambala ŋanda yabo mpati, bakaleka kucita zintu zimwi, mpoonya bakaunka kumbungano imwi iyakabulide. Lino mbapainiya, alimwi balagwasyilizya mumulimo wakuyaka Maanda aa Bwami alimwi balalisungula kugwasyilizya lyamiswaangano yacooko. Ino balimvwa buti? Bakaamba kuti: “Tuligambidwe kubona mbotukkomene akaambo kakuubya-ubya buumi bwesu, kucita eeco mbunga ya Jehova ncoitukulwaizya kucita.”

Solomoni wakalemba kuti: “Meso aako alulame kulanga kunembo, azikoye zyako zilange kunembo lyako.” (Tus. 4:25) Mbubwenya mbuli namutekenya mbwabikkila maano kulanga nkoitozya nzila, tweelede kutantamuka zintu zinyonganya izikonzya kupa kuti tutabi aambaakani zyakumuuya akuzizuzikizya.

Nimbaakani nzi zyakumuuya nzyomukonzya kubikka akuzizuzikizya? Mbaakani yakunjila mulimo waciindi coonse nimbotu loko. Mbaakani imwi njakugwasyilizya  mbungano iili aafwaafwi iibulide basikumwaya bacibwene ibakonzya kugwasyilizya kukambaukila mucilawo ncoipedwe. Ambweni mbungano inga kaijisi basikumwaya banji ibacita kabotu, pele ijisi buyo baalu naa bakutausi basyoonto. Sena inga mwagwasyilizya mumbazu eezyi? Ikuti kamuyanda, amubandike amulangizi wabbazu kutegwa mubone mbomukonzya kugwasya. Ikuti kamuyanda kuunka kumbungano imwi iili kulamfwu ankomukkala, inga mwabuzya kutegwa muzyibe zinji zijatikizya mbungano iziyandika lugwasyo. *

Lino atupiluke kucibalo cili mulugwalo lwa Isaya 62:10. Kweelede kuti ba Juda bamwi bakabeleka canguzu kubamba nzila iyakali kutozya kucisi cokwabo kutegwa bantu ba Leza bakacikonzye kusika nkobakali kuunka. Ikuti naa mulabeleka canguzu kutegwa muzuzikizye mbaakani mumulimo uusetekene, mutatyompwi pe. Kwiinda mukugwasyigwa a Leza, andinywe mulakonzya kuzizuzikizya mbaakani eezyo. Amuzumanane kulomba busongo kuzwa kuli Jehova kutegwa mugwisye zintu zimusinkila. Mpoonya mukuya kwaciindi, muyakubona mbwakonzya kumugwasya ‘kubotya kweenda kwamaulu aanu.’—Tus. 4:26.