Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Nciindi nzi kabelele ka Pobwe Lyakwiindilila nokakali kujaigwa mu Nisani 14?

Busanduluzi bumwi bwa Bbaibbele bwaamba kuti kakeelede kujaigwa “kumangolezya,” nkokuti nolyabbila zuba naa ciindi cagoko—nolyabbila zuba, pele mumuni kaucilibonya. (Kul. 12:6)—12/15, mapeeji 18-19.

Ninjiisyo nzi zyamu Bbaibbele nzyobakonzya kubelesya bakubusi kutegwa basale cabusongo?

Kuli njiisyo zyotatwe (1) Kusaanguna kuyandaula Bwami bwa Leza abululami bwakwe. (Mt. 6:19-34) (2) Kuukkomanina mulimo wakugwasya bantu. (Mil. 20:35) (3) Kuukkomanina mulimo wakubelekela Leza mubukubusi. (Muk. 12:1)—1/15, mapeeji 19-20.

Mbaasimabbiza bali bone ibajisi bubi kuzwa mu 1914?

Jesu, ooyo uutantide bbiza lituba, wabweza ntaamu yakutanda Saatani amadaimona aakwe kujulu. Ooyo uutantide bbiza lisalala pyu mbuli mulilo wiiminina nkondo izyapenzya bantu. Ooyo uutantide bbiza lisiya wiiminina nzala. Ooyo uutantide bbiza lituba-tuba uleta cilwazi cijaya, kujaya mamiliyoni aabantu. (Ciy. 6:2-8)—2/1, mapeeji 6-7.

Ino ndilili “lukwatano lwa Mwanaambelele” nolucitwa? (Ciy. 19:7)

“Lukwatano lwa Mwanaambelele” lulacitwa Mwami, Jesu Kristo, naamana kuzunda, nkokuti, amana kunyonyoonwa Babuloni Mupati alimwi ankondo ya Amagedoni noyamana kulwanwa.—2/15, peeji 10.

Nkaambo nzi ba Juda mumazuba aa Jesu ncobakali ‘kumulangila’ Mesiya? (Lk. 3:15)

Tatukonzyi kusinizya kwaamba naa ba Juda bamumwaanda wamyaka wakusaanguna bakali kubumvwisya mbuli mbotubumvwisya businsimi bwa Daniele ibujatikizya Mesiya. (Dan. 9:24-27) Nokuba boobo, kweelede kuti bakamvwa kwaambilizya kwamungelo kubeembezi naa nzyakaamba musinsimi mukaintu Ana ciindi naakamubona Jesu kali muvwanda mutempele. Kunze lyaboobo, basikupandulula bweende bwanyenyeezi bakaboola kulangaula “ooyo wakazyalwa kali mwami waba Juda.” (Mt. 2:1, 2) Nokwakainda ciindi kuzwa leelyo, Johane Mubbapatizi wakatondezya kuti Kristo wakali kuyakulibonya ino-ino.—2/15, mapeeji 26-27.

Mbuti mbotukonzya kweeleba kwaamba Inzya wesu kuba Peepe? (2 Ko. 1:18)

Cakutadooneka, kuli zintu zimwi nzyotutakonzyi kucinca izikonzya kupa kuti tutazuzikizyi ncotwakaamba. Pele ikuti twasyomezya, tweelede kucita zyoonse nzyotukonzya kutegwa tuzuzikizye cisyomezyo cesu.—3/15, peeji 32.

Mbuti mbotukonzya kutantamuka sunko lyakweebelela zintu ziletela muzeezo wakoonana?

Kuli ntaamu zyotatwe izikonzya kugwasya (1) Cakufwambaana kulanga kumbi ikuti twabona zifwanikiso zitali kabotu. (2) Kukwabilila mizeezo yesu kwiinda mukubikkila maano kuzintu zibotu alimwi akupaila kuli Leza. (3) Kukwabilila ntaamu zyesu kwiinda mukutantamuka mafilimu naa ma Web site aajisi zintu ziletela muzeezo wakoonana.—4/1, mapeeji 10-12.

Mbuyumuyumu nzi ibukonzya kuboola cakutayeeyelwa ikuti Munakristo wasiya mukwasyi wakwe akuunka kucisi cimbi kutegwa akajane mali?

Ikuti bazyali basala kuti kabatakkali mubusena bomwe amukwasyi, bana balakonzya kupenga mumizeezo akucileka kulilemeka. Balakonzya kusulaika bazyali. Alimwi banabukwetene ibatakkali antoomwe balangilwa kujana masunko akoonana.—4/15, mapeeji 19-20.

Nkaambo nzi maulu aazigwebenga izyakali kujaigwa acisamu ncaakali kutyolwa?

Bana Roma bakali kujaila aazisamu zigwebenga zimwi. Ba Juda bakalomba kuti atyolwe maulu aazigwebenga izyakali mumbali lya Jesu. Kucita boobo kwakali kuyakupa kuti zipenge kuyoya, akupa kuti zifwambaane kufwa. Kwiinda mukucita oobo, zigwebenga tiizyakali kunga zyacaala azisamu busiku boonse. (Dt. 21:22, 23)—5/1, peeji 11.

Mibuzyo ili yone njotweelede kulibuzya ciindi notusikila bantu mumulimo wesu wakukambauka?

Mbaani mbondiyanda kukambaukila? Nkuli nkondiyanda kubakambaukila bantu? Nciindi nzi cibotu cakubakambaukila? Mbuti mbondeelede kubakambaukila bantu?—5/15, mapeeji 12-15.

Ino kufweba tombwe nkubi buti?

Mumwaanda wamyaka wainda, tombwe wajaya bantu bali 100,000,000. Tombwe ulajaya bantu ibabalilwa ku 6,000,000 mwaka amwaka.—6/1, peeji 3.