1. Ncinzi cibelesyegwa munzila iilibedelede mubukombi bwesu?

SENA kuli nkomwakabona kale izina lya Jehova kalilembedwe abwaanda bwaŋanda imwi yabanamaleya? Ikuti kakuli boobo, ambweni mwakagambwa akukkomana. Ino nkaambo nzi? Nkaambo izina lya Leza lilabelesyegwa munzila iilibedelede mubukombi bwesu—kayi tuli Bakamboni ba Jehova. Nyika yoonse mbwiizulwa, kunyina kabunga ikabelesya kapati zina lya Leza kwiinda mbotulibelesya swebo. Nokuba boobo, kuli mukuli uujatikizyidwe kucoolwe cakwiitwa azina lya Leza.

2. Mukuli nzi uujatikizyidwe kucoolwe cakwiitwa azina lya Leza?

² Kubelesya zina lya Jehova kulikke buyo takuzulide pe ikuti katuyanda kukkomaninwa anguwe. Tweelede kupona kweelana azyeelelo zyakwe zyakulilemeka. Nkakaambo kaako Bbaibbele lituyeezya kuti bantu ba Jehova beelede ‘kuleka bubi.’ (Int. 34:14) Mwaapostolo Paulo wakakaamba kaambo aaka cakutainda mumbali naakalemba kuti: “Ooyo wiita zyina lya Jehova akukake kutalulama.” (Amubale 2 Timoteo 2:19.) Mbotuli Bakamboni bakwe, masimpe tulizyibidwe kuti ndiswe tubelesya izina lya kuti Jehova. Pele mbuti mbotweelede kukukaka kutalulama?

3, 4. Ndugwalo nzi lwabakatazya kapati basikwiiya zyamu Bbaibbele kuzwa kaindi, alimwi nkaambo nzi?

³ Amubone kaambo kamu Magwalo kakapa kuti Paulo alembe majwi aajanika mulugwalo lwa 2 Timoteo 2:19. Majwi aaya aamba ‘zyantalisyo njumu ya Leza’ mpoonya akwaamba twaambo tobilo tulembedwe alinjiyo. Kaambo kakusaanguna nkakuti “Jehova ulibazyi aabo babalilwa kulinguwe,” ikaambo ikazulubuludwe kuzwa mulugwalo lwa Myeelwe 16:5. (Amubone cibalo cainda.) Kaambo kabili kakuti “ooyo wiita zyina lya Jehova akukake kutalulama,” kabanyonganya basikwiiya zyamu Bbaibbele kwaciindi cilamfwu. Ino nkaambo nzi?

⁴ Majwi aa Paulo atondezya kuti azubuludwe buya. Nokuba boobo, kuboneka kuti mu Magwalo aa Chihebrayo taakwe majwi aayendelana amajwi ngaakazubulula Paulo. Aboobo, ncinzi ncaakali kwaamba mwaapostolo naakaamba kuti: “Ooyo wiita zyina lya Jehova akukake kutalulama”? Katanaamba majwi aaya, Paulo wakazubulula lugwalo lwa Myeelwe caandaano 16 cibalo icaamba zyakuzanga kwa Kora. Sena akalo kaambo kabili ka Paulo kuli mbokaswaangene atwaambo tujatikizya kuzanga ooko?

5-7. Nzintu nzi zyakacitika mumazuba aa Musa izitondezya nkwaakaajana majwi Paulo ngaakalemba mulugwalo lwa 2 Timoteo 2:19? (Amubone cifwanikiso icili kumatalikilo aacibalo.)

⁵ Bbaibbele lyaamba kuti Datani a Abiramu, bana ba Eliabu, bakamusangana Kora musololi wabantu bakazangila Musa a Aroni. (My. 16:1-5) Caantangalala, bakamufwubaazya Musa akukaka nguzu zyabweendelezi nzyaakapedwe a Leza. Bazangi aaba bakazumanana kukkala akati kabantu ba Jehova, calo icakali kubikka bantu basyomeka muntenda yakumuuya. Buzuba nobwakasika bwakuti Jehova atondezye ibakali bakombi bakwe basyomeka alimwi abakali bazangi, wakaamba cakutainda mumbali.

⁶ Cibalo caamba kuti: “Jehova wakaambila Musa, wati, ambila imbungano eyi kuti, amutantamuke kuzwa kucikalilo ca-Kora aca-Datani aca-Abiramu. Mpawo Musa wakanyamuka, waya kuli-Datani a-Abiramu; abalo bapati ba-Israyeli bakamutobela. Lino wakaambila imbungano kuti, amuzwe kuzilao zyabantu aba babi, alimwi mutagumi cintu niciba comwe cabo, kuti mutanyonyooki muzibi zyabo zyoonse. Bamvwe obo, bakatantamuka kuzwa kuzilao zya Kora a Datani a-Abiramu.” (My. 16:23-27) Mpoonya Jehova wakabajaya boonse ibakazanga. Mukwiimpana, bakombi basyomeka—ibakazwa kwiinda mukukaka kutalulama—tiibakafwa pe.

⁷ Jehova ulabona izili mumoyo! Ulakubona kusyomeka kwabaabo ibabalilwa kulinguwe. Nokuba boobo, bantu bakwe basyomeka bakeelede kubweza ntaamu iili kabotu yakulyaandaanya kubantu ibataluleme. Aboobo, cileelela kwaamba kuti Paulo wakali kwaamba cibalo icili mulugwalo lwa Myeelwe 16:5, 23-27 naakalemba kuti: “Ooyo wiita zyina lya Jehova akukake kutalulama.” Kaambo aaka kaleendelana amajwi aa Paulo aakuti: “Jehova ulibazyi aabo babalilwa kulinguwe.”—2 Ti. 2:19.

8. Nkaambo nzi kubelesya buyo izina lya Jehova naa kuzulilwa mumbungano ya Bunakristo ncokutazulide?

⁸ Naakali kwaamba zintu eezyo izyakacitika mumazuba aa Musa, Paulo wakali kuyeezya Timoteo mbociyandika kubweza ntaamu kutegwa akwabilile cilongwe cakwe cibotu a Jehova. Kuzulilwa buyo mumbungano ya Bunakristo tiikwakazulide pe, mbuli kwiita buyo izina lya Jehova mbokwatakazulide mumazuba aa Musa. Bakombi basyomeka beelede kubweza ntaamu  kukaka kutalulama. Ino eeci cakali kwaamba nzi kuli Timoteo? Alimwi nziiyo nzi nzyobakonzya kwiiya bantu ba Jehova mazuba aano kuzwa kululayo lwa Paulo ilwakasololelwa amuuya?

9. Ino “mibandi yakukazyanya eeyo yabufwubafwuba” yakabajatikizya buti Banakristo bamumbungano yakusaanguna?

⁹ Ijwi lya Leza lilapa lulayo lwacigaminina kujatikizya misyobo yakutalulama Banakristo njobeelede kukaka. Mucikozyanyo, naakamana buyo kwaamba makani aaya aajanika mulugwalo lwa 2 Timoteyo 2:19, Paulo wakaambila Timoteo kuti ‘katalwanini majwi buyo’ alimwi akuti ‘aasosoloke majwi aabuyo.’ (Amubale 2 Timoteo 2:14, 16, 23.) Bantu bamwi bamumbungano bakali kusumpula njiisyo zyaluleyo. Alimwi kuboneka kuti bamwi bakali kutalisya mizeezo iitali kabotu. Nokuba kuti mizeezo eeyo tiiyakali kukasyigwa amagwalo cacigaminina, yakali kukonzya kupa kuti kube kwaandaana. Yakapa kuti bantu kabazwangana akulwanina mabala calo cakapa kuti kabataciti kabotu kumuuya. Nkakaambo kaako Paulo ncaakatondezyela kuti kwakali kuyandika ‘kukaka mibandi yakukazyanya eeyo yabufwubafwuba.’

10. Ncinzi ncotweelede kucita kuti kwaba luleyo?

¹⁰ Mazuba aano, bantu ba Jehova tabavwuli kuba abasiluleyo mumbungano. Nokuba boobo, njiisyo zitali zyamumagwalo, kufwumbwa nkozizwa, tweelede kuzikaka cakucenjela. Tacili camaano kukazyanya abasiluleyo, naa mbantu beni, naa nkwiinda mukwiingula tugwalo aa Intaneti naa kwiinda mukubelesya nzila iili yoonse yakubandika. Nokuba kuti makanze inga kaali aakugwasya muntu, mibandi iili boobo ilakonzya kwiindana amalailile aamu Magwalo ngotwalanga-langa ino-ino aawa. Muciindi caboobo, mbotuli bantu ba Jehova, tulatantamuka cakumaninina alimwi akukaka luleyo.

11. Ncinzi cikonzya kupa kuti kube ‘kukazyanya kwabufwubafwuba,’ alimwi mbuti baalu Banakristo mbobakonzya kuba cikozyanyo cibotu?

¹¹ Kuli zintu azimbi kunze lyaluleyo izikonzya kunyonganya luumuno mumbungano. Mucikozyanyo, mizeezo iindene kujatikizya zyakulikondelezya ilakonzya kupa kuti kube “mibandi yakukazyanya eeyo yabufwubafwuba.” Masimpe, ciindi bantu bamwi nobakulwaizya kulikondelezya ikuteendelani azyeelelo zya Jehova zyakulilemeka, baalu Banakristo tabeelede kulekela bantu bali boobo kutegwa kutabi kwaandaana mumbungano. (Int. 11:5; Ef. 5:3-5) Nokuba boobo, baalu balabikkila maano kutegwa batasumpuli mizeezo yabo beni. Balangizi Banakristo balaatobela cakusyomeka majwi aamu Magwalo aakuti: “Amweembele butanga bwa Leza ibuli mumaanza aanu, . . . ikutali kuba mbuli basimalelo kuli baabo ibali ndukono lwa Leza, pele mube zikozyanyo kubutanga.”—1 Pe. 5:2, 3; amubale 2 Bakolinto 1:24.

12, 13. (a) Ncinzi ncobazyi Bakamboni ba Jehova mumakani aakusala zyakulikondelezya, alimwi ninjiisyo nzi zyamu Bbaibbele nzyobatobela? (b) Mbuti njiisyo zyabandikwa mumuncali 12 mbozikonzya kubeleka mutwaambo tujatikizya muntu umwi aumwi?

¹² Mumakani aajatikizya zyakulikondelezya, mbunga yesu tayaambi cacigaminina mafilimu, zisobano zyaavidiyo, mabbuku naa nyimbo zyotweelede kweeleba. Ino nkaambo nzi? Bbaibbele likulwaizya muntu umwi aumwi kuti abelesye “maano aayiisyidwe kwaandaanya ciluzi acitaluzi.” (Heb. 5:14) Magwalo alapa njiisyo zipati-pati Munakristo nzyakonzya kubelesya ciindi nasala zintu zyakulikondelezya. Mumbazu zyabuumi bwanu boonse, mweelede kuba ambaakani ‘yakusinizya naa ncomucita cilatambulika ku Mwami.’ (Ef. 5:10) Bbaibbele liyiisya kuti mitwe yamikwasyi ilijisi nguzu zyakukonzya kusala zyakulikondelezya mumikwasyi yabo.—1 Ko. 11:3; Ef. 6:1-4.

 ¹³ Njiisyo zyamu Bbaibbele izyabandikwa mumincali yainda zilabeleka amuzintu zimbi kutali buyo mumakani aazyakulikondelezya. Mizeezo kujatikizya nsamino, zyakulya abuponi, alimwi amakani aamwi aajatikizya muntu umwi, aalo alakonzya kuleta mazwanga. Aboobo, ikuti kakutakwe njiisyo yamu Magwalo yasotokwa, bantu ba Jehova cabusongo balatantamuka kukazyanya mutwaambo twamusyobo ooyu, “nkaambo muzike wa Mwami teelede kulwana pe, pele weelede kuba amoyo mutete kubantu boonse.”—2 Ti. 2:24.

14. Ncikozyanyo nzi ncaakabelesya Paulo citondezya kuti tuyandika kutantamuka kuyanzana abantu babi?

¹⁴ Muunzila nzi aimwi aabo ‘baita zyina lya Jehova mobakonzya kukaka kutalulama’? Kwiinda mukutayanzana abantu bacita zitaluleme. Amubone kuti Paulo wakaamba alimwi cikozyanyo cimbi citobela cikozyanyo cakwe ‘cantalisyo njumu ya Leza.’ Wakalemba kujatikizya “ŋanda mpati” iijisi “zibelesyo, ikutali buyo zyangolida ansiliva pe, pele azyacisamu abulongo, alimwi zimwi zibelesyegwa mulimo uulemekwa pele zimwi zibelesyegwa mulimo uutakwe bulemu.” (2 Ti. 2:20, 21) Mpoonya wakaambila Banakristo ‘kutantamuka’ naa kulyaandaanya kuzibelesyo “zyamulimo uutakwe bulemu.”

15, 16. Ncinzi ncotukonzya kwiiya kuzwa kucikozyanyo ‘caŋanda mpati’?

¹⁵ Ino cikozyanyo eeci caamba nzi? Paulo ukozyanisya mbungano ya Banakristo ‘kuŋanda mpati,’ alimwi muntu umwi aumwi wamumbungano ‘kuzibelesyo,’ naa zibelesyo zyamuŋanda. Zibelesyo zimwi muŋanda zilakonzya kubisyigwa azintu zimwi zitali kabotu naa abusena butali kabotu. Mukamwini ŋanda ulabikka zibelesyo zili boobo zilikke kuzwa kuli zyeezyo zitajisi tombe, mbuli zibelesyo zibelesyegwa mukujika.

¹⁶ Mbubwenya buyo, abalo bantu ba Jehova mazuba aano, ibasola kuba basalali, beelede kutantamuka kupanga cilongwe  abantu mumbungano ibatalemeki njiisyo zya Jehova lyoonse. (Amubale 1 Bakolinto 15:33.) Ikuti oobu mbocibede ncobeni mumbungano, mbuti kujatikizya ‘kutantamuka’ baabo ibali kunze aambungano, balo bunji bwabo ‘bayandisya mali, batamvwidi bazyali, batasyomeki, basikubejelezya, bakali, batayandi bubotu, basikwaaba bamwi, bayandisya zyakulikondelezya kwiinda kuyandisya Leza’?—2 Ti. 3:1-5.

17. Mbuti mbobakacita cakulomya bana Israyeli ibakali kusyomeka ciindi nobakali kutantamuka kutalulama?

¹⁷ Bbaibbele lilaamba cacigaminina kujatikizya kusala kubotu nkobakacita bana Israyeli nobakaambilwa kuti ‘batantamuke kuzwa kucikalilo ca Kora aca Datani aca Abiramu.’ Cibalo caamba kuti ‘mpoonya-mpoonya bakatantamuka akuzwa.’ (My. 16:24, 27) Tiibakawayawaya pe. Magwalo alimwi alaamba mbobakaatobela cakulomya malailile ngobakaambilwa. ‘Bakatantamuka akuzwa mumabbazu oonse.’ Bantu basyomeka bakaliyandide kumvwida amoyo woonse. Kumvwida kwabo tiikwakali kwakuupaupa aameso naa kwamyoyo yobilo. Bakakakatila kuli Jehova alimwi bakatantamuka kutalulama. Ncinzi ncotukonzya kwiiya kucikozyanyo eeci?

18. Muuya nzi ngwaakali kutondezya Paulo mumajwi ngakaambila Timoteo akuti “kozitija zisusi zyabukubusi”?

¹⁸ Caboola kumakani aakukwabilila cilongwe cesu a Jehova, tweelede kubweza ntaamu cakufwambaana alimwi cabusongo. Ooyu ngomuuya ngwatondezya Paulo mumajwi ngakaambila Timoteo kuti “kozitija zisusi zyabukubusi.” (2 Ti. 2:22) Aciindi eeco, Timoteo wakali mwaalumi mupati kale, ambweni wakajisi myaka yakuzyalwa iili kuma 30. Nokuba boobo, “zisusi zyabukubusi” tazijatikizyi buyo bakubusi pe. Ciindi naakali kuyakuyaanya zisusi zyamusyobo ooyu, Timoteo wakeelede ‘kuzitija.’ Munzila imwi inga twaamba kuti Timoteo wakeelede ‘kukukaka kutalulama.’ Jesu wakakaamba kaambo aaka ciindi naakaamba kuti: “Ikuti liso lyako kalikulebya, kolinonkola akulisowa.” (Mt. 18:9) Mazuba aano, Banakristo aabo ibatobela lulayo oolu balazilwana zintu izikonzya kubabikka muntenda kumuuya kakunyina kuwayawaya.

19. Mbuti bamwi mazuba aano mbobasala cabusongo kutegwa balikwabilile kumuuya?

¹⁹ Bamwi ibakajisi penzi lyakunywa bukoko kabatanaba Bakamboni, basala kulekela limwi kunywa bukoko. Bamwi balaitantamuka misyobo imwi yakulikondelezya nokuba kuti yalo kwiigama taili mibi pele iikonzya kupa kuti muntu umwi aalilwe kulilemeka munzila imwi. (Int. 101:3) Mucikozyanyo, mukwesu umwi katanaba Kamboni, wakali kuyandisya kapati kujanika kumapobwe aakuzyana kwalo bantu nkobatakali kulilemeka. Pele naakaiya kasimpe, wakacilekela limwi kuzyana nokuba mumapobwe aa Bakamboni kuyoowa kuti inga wabusya luyandisisyo naa mizeezo iitali kabotu iijatikizya ncaakali kucita kaindi. Masimpe, Banakristo tabakasyilwi limwi kunywa bukoko, kuzyana, naa zintu zimwi zyalo kuzigama zitali zibi. Nokuba boobo, toonse tweelede kubweza ntaamu cakulomya kulikwabilila kuzintu zikonzya kutubikka muntenda kumuuya.

20. Nokuba kuti tacili cuubauba ‘kukaka kutalulama,’ ncinzi cituumbulizya akutupa lusyomo?

²⁰ Kuli mukuli uujatikizyidwe kucoolwe cakwiitwa azina lya Leza. Tweelede ‘kukukaka kutalulama’ ‘akuleka bubi.’ (Int. 34:14) Masimpe, kucita boobo talili lyoonse nocili cuubauba. Pele cilakulwaizya kuzyiba kuti Jehova lyoonse ulabayanda “aabo babalilwa kulinguwe” alimwi aabaabo ibatobela nzila zyakwe zyabululami.—2 Ti. 2:19; amubale 2 Makani 16:9a.