1, 2. Ninzila nzi Jehova nzyabelesya kwaambaula ababelesi bakwe?

KAINDI, ciindi Bbaibbele nolyakali kulembwa, bantu bakali kutambula busolozi bwa Jehova munzila ziindene-indene. Bamwi, bakali kubandika a Leza kwiinda mubangelo, zilengaano naa kwiinda muziloto, ikuyubununa izyakali kulangilwa kucitika kumbele. Jehova alimwi wakalibapede mikuli imwi cacigaminina. (My. 7:89; Ezk. 1:1; Dan. 2:19) Bamwi bakali kutambula busolozi kwiinda mubaiminizi ba Jehova baanyika. Kufwumbwa nzila njobakali kutambwida jwi lyakwe, aabo ibakali kutobela malailile aakwe bakalongezyegwa.

² Mazuba aano, Jehova ulabasololela bantu bakwe kwiinda mu Bbaibbele, muuya wakwe uusalala, alimwi amiswaangano yambungano. (Mil. 9:31; 15:28; 2 Ti. 3:16, 17) Busolozi mbotutambula kuzwa kulinguwe bulalimvwisya kapati cakuti buli mbuli kuti ‘matwi eesu amvwa ijwi kusule lyesu liti, Njeeyi inzila, amweende mulinjiyo.’ (Is. 30:21) Jesu awalo upa kuti tumvwe jwi lya Jehova ciindi natusololela mumbungano kwiinda ‘mumuzike musyomesi uucenjede.’ (Mt. 24:45) Tweelede kubutobela busolozi oobu cakulomya, nkaambo kujana buumi butamani kuyeeme aakumvwida kwesu.—Heb. 5:9.

3. Ncinzi cikonzya kunyonganya mbotwaatambula malailile ngapa Jehova? (Amubone cifwanikiso icili kumatalikilo aacibalo.)

³ Saatani Diabolosi ujisi makanze aakuubya-ubya malailile aapa buumi ngotutambula kuzwa kuli Jehova. Kuyungizya waawo, moyo  wesu ‘weena’ ulakonzya kunyonganya mbotwaatambula malailile aazwa kuli Jehova. (Jer. 17:9) Aboobo, atulange-lange mbotukonzya kuzunda buyumuyumu ibupa kuti citukatazye kuswiilila jwi lya Leza. Alimwi atubone kubandika lyoonse aa Jehova mbokukonzya kukwabilila cilongwe cesu kufwumbwa mubukkale motubede.

4. Mbuti Saatani mbwanyonganya mizeezo yabantu?

⁴ Saatani usola kunyonganya mizeezo yabantu kwiinda mukupa makani aakubeja. (Amubale 1 Johane 5:19.) Kunze aamabbuku aasimbwa buya, nyika yoonse—kubikkilizya amasena aakuminzi—ilatambula makani aamwaigwa muli sikapepele, acipekupeku, alimwi aa Intaneti. Nokuba kuti nzila eezyi zyakumwaila makani zilakonzya kuti kazijisi makani aatukkomanisya, kanji-kanji zisumpula zyeelelo ziteendelani azyeelelo zya Jehova. (Jer. 2:13) Mucikozyanyo, makkampani aamwaya makani aacitika munyika alimwi ayaayo aatondezya zyakulikondelezya aamba kuti kukwatana kwabantu bakozyenye zizo kuli buyo kabotu, alimwi aamba kuti Bbaibbele lilaciindizya kwaamba kujatikizya koonana kwabantu bakozyenye zizo.—1 Ko. 6:9, 10.

5. Mbuti mbotukonzya kwaatantamuka makani aakubeja aa Saatani?

⁵ Mbuti aabo ibayanda bululami bwa Leza mbobakonzya kutantamuka kuyungwa amakani aakubeja avwulide ngamwaya Saatani? Mbuti mbobakonzya kwaandaanya bubotu kububi? Kwiinda ‘mukubamba jwi lya Leza.’ (Int. 119:9) Ijwi lya Leza lijisi busolozi butugwasya kwaandaanya makani aamasimpe kumakani aakubeja. (Tus. 23:23) Kazubulula Magwalo, Jesu wakaamba kuti “muntu teelede kuponena acinkwa calo, pele weelede kuponena amajwi oonse aazwa kumulomo wa Jehova.” (Mt. 4:4) Tweelede kwiiya mbokubelesyegwa njiisyo zyamu Bbaibbele mubuumi bwesu. Mucikozyanyo, kakucili ciindi kuti mulawo wa Jehova uukasya bumambe ulembwe, mwaalumi mwana-mwana Josefa wakalizyi kuti kucita boobu kwakali kulubizya mumeso aa Leza. Kunyina naakasola kutamvwida Jehova ciindi muka Potifara naakasola kumoongelezya kucita cibi. (Amubale Matalikilo 39:7-9.) Nokuba kuti wakali kusungilizyigwa kucita oobo, Josefa kunyina naakalekela jwi lyamukaintu ooyu kuti limupe kutamvwa jwi lya Leza. Icikonzya kutugwasya kapati kutegwa tucikonzye kwaandaanya bubotu kububi nkuswiilila jwi lya Jehova akusinka matwi kutegwa coongo cizwa kuli Saatani tutacimvwi.

6, 7. Ncinzi ncotweelede kucita kutegwa tweelebe lulayo lwa Saatani lubyaabi?

⁶ Nyika izwide njiisyo zyabukombi izikazyanya alimwi nzyobasyoma bantu zibapa kuyeeya kuti nkusowa buyo ciindi kuyandaula bukombi bwakasimpe. Nokuba boobo, Jehova wapa busolozi bulimvwisya kuli baabo ibayanda kububelesya. Tweelede kusala ngotweelede kuswiilila. Mbwaanga nciyumu kuswiilila kumajwi obilo aciindi comwe, tweelede ‘kuzyiba jwi’ lya Jesu alimwi akumumvwida. Ngonguwe Jehova ngwaakasala kuti alanganye mbelele zyakwe.—Amubale Johane 10:3-5.

⁷ Jesu wakaamba kuti: “Amubikkile maano  kuli zyeezyo nzyomutiimvwe.” (Mk. 4:24) Lulayo lwa Jehova lulalimvwisya alimwi luliluzi, pele tweelede kulumvwisya alimwi akuluswiilila kwiinda mukusaanguna kulibambila mumoyo kutegwa tulutambule. Ikuti twatacenjela, tulakonzya kumvwida lulayo lwa Saatani lubyaabi muciindi cakumvwida lulayo lwa Leza lwaluyando. Mutalekeli zintu zyamunyika kweendelezya buumi bwanu, zintu mbuli nyimbo, mavidiyo, mapulogilamu aa aacipekupeku, mabbuku, basikupa lulayo naa bantu baambwa kuti mbaasyaazibwene.—Kol. 2:8.

8. (a) Mbuti moyo wesu mboukonzya kupa kuti tucegwe kubucenjezu bwa Saatani? (b) Ncinzi cikonzya kutucitikila ikuti twaunduluzya zitondezyo zitucenjezya?

⁸ Saatani ulizyi kuti tatulondokede, alimwi ulasola canguzu kubelesya kutalondoka kutegwa atweene. Ciindi Saatani natusunka kwiinda mukubelesya nzila eeyi, cilakonzya kutuyumina kapati kuzumanana kusyomeka. (Joh. 8:44-47) Mbuti mbotukonzya kuzwidilila kulwana buyumuyumu oobu? Amuyeeye buyo kujatikizya muntu uulikondelezya kapati azintu zyaciindi buyo cisyoonto walo kumamanino iwajanika kuti wacita cintu cimwi cibi calo ncaatali kuyeeyela ikuti inga wacicita. (Lom. 7:15) Ncinzi cikonzya kupa kuti acite cintu cuusisya cili boobo? Inga kwajanika kuti muntu ooyo asyoonto-syoonto wakali kuyaabucileka kumvwa jwi lya Jehova. Ambweni wakaalilwa kubona zitondezyo izyakali kumucenjezya kujatikizya icakali kucitika mumoyo wakwe naa wakasala kutazibikkila maano zitondezyo zyakali kumucenjezya. Mucikozyanyo, ambweni wakacileka kupaila, akuunka ansi mumulimo wakukambauka naa kutajanika-janika kumiswaangano. Mukuya kwaciindi, wakacita eeco ncaakali kulombozya alimwi ncaakazyi kuti ncibi. Tulakonzya kweeleba kulubizya kuli boobu ikuti twazumanana kumvwida kweelana acitondezyo cimwi citucenjezya alimwi akululamika zintu mpoonya-mpoonya. Alimwi ikuti twaliswiilila jwi lya Jehova, tuyakucikonzya kukaka muzeezo uuli woonse waluleyo.—Tus. 11:9.

9. Nkaambo nzi kufwambaana kuzyiba tumpenda tubi ncokuyandika kapati?

⁹ Muntu ulakonzya kufwutulwa kubulwazi bumwi ikuti bwazyibwa cakufwambaana. Mbubwenya buyo, andiswe tulakonzya kutantamuka ntenda ikuti twafwambaana kuzyiba tumpenda itukonzya kusololela kukusunkwa. Twazyiba buyo kuti tulijisi tumpenda ooto, ncabusongo kufwambaana kubweza ntaamu—‘katutanajatwa bulanga a Saatani ikutegwa tucite kuyanda kwakwe.’ (2 Ti. 2:26) Ncinzi ncotweelede kucita ikuti twazyiba kuti twalekela kuyeeya akulombozya kwesu kutupa kuleya kuzintu Jehova nzyayanda kulindiswe? Kakunyina akuwayawaya, cakulicesya tweelede kupiluka kulinguwe, kujula matwi eesu kukutambula lulayo, alimwi akuswiilila kulinguwe  camoyo woonse. (Is. 44:22) Tweelede kuzyiba kuti kutasala kabotu kulakonzya kutujatikizya munzila mbi akupenga kapati mubweende bwazintu oobu. Eelo kaka cilainda kugwasya kufwambaana kubweza ntaamu kutegwa tutaciti cibi cipati!

10, 11. (a) Mbuti kulisumpula mbokukonzya kuzyibwa? (b) Nciiyo nzi ncotwiiya kunzila mbi njobakabweza ba Kora, Datani, alimwi a Abiramu?

¹⁰ Tweelede kuzyiba kuti moyo wesu ulakonzya kutupa kuti tuleye. Tumpenda twesu tulijisi nguzu kapati zyakutupa kucita cibi. Mucikozyanyo, amubone kulisumpula abusyaacivwulemwangu. Amubone kampenda kamwi akamwi mbokakonzya kunyonganya kuswiilila kwesu kujwi lya Jehova alimwi ambokakonzya kutusololela munzila mbi. Muntu uulisumpula talilangi munzila yeelede pe. Inga ulimvwa kuti ulijisi lwaanguluko lwakucita kufwumbwa ncayanda alimwi akuti kunyina uukonzya kumwaambila cakucita. Aboobo, ulakonzya kulimvwa kuti teelede kupegwa busolozi alulayo a Banakristonyina, baalu, naa mbunga ya Leza. Kumuntu uuli boobu, ijwi lya Jehova inga lyaleka kulimvwisya kapati.

¹¹ Ciindi bana Israyeli nobakali munkanda, Kora, Datani, a Abiramu bakazangila bweendelezi bwa Musa a Aroni. Akaambo kakulisumpula, bazangi aaba bakabikka bubambe bwabo beni bwakukomba Jehova. Ino Jehova wakacita buti? Wakabajaya. (My. 26:8-10) Eelo kaka cibalo eeci cituyiisya ciiyo ciyandika kapati! Kuzangila Jehova kuletela mapenzi. Alimwi tatweelede kuluba kuti “kulisumpula kulazulwida lunyonyooko.”—Tus. 16:18; Is. 13:11.

12, 13. (a) Amupe cikozyanyo citondezya busyaacivwulemwangu mbobukonzya kusololela kumapenzi. (b) Amupandulule busyaacivwulemwangu mbobukonzya kukomena cakufwambaana ikuti bwalekelwa.

¹² Amubone alimwi makani aabusyaacivwulemwangu. Syaacivwulemwangu ulalipa lwaanguluko alimwi taccilili malailile aakulilemeka kabotu. Ciindi silutwe wabasikalumamba bana Aramu Naamani naakaponesyegwa kucinsenda, wakapa musinsimi Elisha zipego, pele musinsimi ooyo wakazikaka. Nokuba boobo, mubelesi wa Elisha, Gehazi, wakazinyomenena zipego eezyo. Gehazi wakalyaambauzya wati: “Ncobeni Jehova mbali muumi, ndafwambaana kumutobela, nkatambule cintu kulinguwe.” Elisha katazyi, wakamuccilila Naamani akumubeja akulomba “talenta lyansiliva, azyakusama zyobile.” Ncinzi cakamucitikila Gehazi akaambo kazintu nzyaakacita alimwi akubeja musinsimi wa Jehova? Cinsenda ca Naamani cakaboola kuli Gehazi.—2 Bam. 5:20-27.

¹³ Busyaacivwulemwangu bulakonzya kutalika asyoonto-syoonto, pele ikuti bwalekelwa, bulakonzya kukomena cakufwambaana akumuzunda muntu. Makani aamu Bbaibbele aamba zya Akani alatondezya nguzu zyabusyaacivwulemwangu. Amubone busyaacivwulemwangu bwa Akani mbobwakakomena cakufwambaana. Wakaamba kuti: “Akati kazisaalo ndakabona cikobela cibotu camabala mabala, amasyekeli aansiliva aali myaanda yobile, acikoto cangolida cili abulemu bwamasyekeli aali makumi osanwe. Elyo ndakali kuzyeemuzya, ndakazibweza.” Muciindi cakukazya kulombozya kubi, busyaacivwulemwangu bwakapa kuti Akani abbe zintu akuzisisa mutente lyakwe. Ciindi nocakazyibwa cibi ca Akani, Joshua wakamwaambila kuti Jehova ulamusubula. Akani amukwasyi wakwe bakafwuswa mabwe kusikila mane bafwa mubuzuba mbubwenya oobo. (Jos. 7:11, 21, 24, 25) Busyaacivwulemwangu nintenda iiliko lyoonse iikonzya kutuzunda. Aboobo, ‘atucenjele akulikasya kubulyato buli boonse.’ (Lk. 12:15) Nokuba kuti zimwi ziindi tulakonzya kuba amizeezo mibi naa kuyeeya zintu zibi, cilayandika kapati kweendelezya mizeezo yesu akutalekela kulombozya kwesu kutupa kucita cibi.—Amubale Jakobo 1:14, 15.

14. Ncinzi ncotweelede kucita twabona kuti twatalika kulisumpula alimwi akuba basyaacivwulemwangu?

¹⁴ Zyoonse zyobilo, kulisumpula alimwi abusyaacivwulemwangu  zilakonzya kutuletela mapenzi. Kulanga-langa zikonzya kucitika ikuti naa twabweza ntaamu iiteelede kulakonzya kutugwasya kutegwa tutaleki kuswiilila jwi lya Jehova. (Dt. 32:29) Mu Bbaibbele, Leza wakasimpe tatwaambili buyo nzila iiluzi pele alimwi ulatupandulwida bubotu bujanika mukweenda kabotu alimwi amapenzi aajanika mukweendela munzila iitaluzi. Ikuti moyo wesu uyanda kuti tweendele munzila iikulwaizya kulisumpula alimwi abusyaacivwulemwangu, inga caba cabusongo kuyeeya mapenzi aakonzya kuboola. Tweelede kuyeeya mbokukonzya kutujatikizya kucita cibi, mbokukonzya kubajatikizya bayandwa besu, alimwi kwaambisya ambokukonzya kucijatikizya cilongwe cesu a Jehova.

15. Ncinzi ncotukonzya kwiiya kujatikizya kupaila kuzwa kucikozyanyo ca Jesu?

¹⁵ Jehova uyanda kuti zintu kazitweendela kabotu. (Int. 1:1-3) Ulatupa busolozi mbotuyandika aciindi ceelede. (Amubale Bahebulayo 4:16.) Nokuba kuti wakalilondokede, Jesu wakali kusyoma Jehova alimwi wakali kucita oobo kwiinda mukubandika anguwe mumupailo cakutaleka. Jehova wakamugwasya Jesu alimwi akumusololela munzila zigambya. Wakali kutuma bangelo kuti bamubelekele, wakali kumupa muuya wakwe uusalala kutegwa umugwasye, alimwi wakamusololela ciindi naakali kusala baapostolo bali 12. Jwi lya Jehova lyakamvwugwa kuzwa kujulu, kutondezya kuti wakali kumugwasya alimwi akuti wakali kumuyanda Jesu. (Mt. 3:17; 17:5; Mk. 1:12, 13; Lk. 6:12, 13; Joh.12:28) Mbubwenya mbuli Jesu, tweelede kupaila kuli Leza amoyo wesu woonse. (Int. 62:7, 8; Heb. 5:7) Kwiinda mukupaila, tulakonzya kuzumanana kubandika a Jehova alimwi akuzwidilila mubuumi bwesu mukutobela nzila iipa kuti alemekwe.

16. Mbuti mbotukonzya kutambula lugwasyo lwa Jehova ilukonzya kutugwasya kumvwa jwi lyakwe?

¹⁶ Nokuba kuti Jehova ulapa lulayo lwakwe cabuyo, tasinikizyi muntu uuli woonse kulutobela. Tweelede kumulomba muuya uusalala, eelyo uyakutupa cabwaabi. (Amubale Luka 11:10-13.) Nokuba boobo, cilayandika kuti ‘tubikkile maano mbotumvwa.’ (Lk. 8:18) Mucikozyanyo, inga kwaba kuupaupa aameso kulomba kuti Jehova atugwasye kuzunda kulombozya zintu zijatikizya kutalilemeka mukoonana kumwi katuzumanana kulangilila zintu ziletela muzeezo wakoonana naa kweebelela mafilimu aazisapi. Tuyandika kujanika mubusena naa mubukkale mujanika muuya wa Jehova. Tulizyi kuti muuya wakwe ulajanika kumiswaangano yambungano. Babelesi ba Jehova banji beeleba ntenda kwiinda mukuswiilila Jehova lyamiswaangano. Akaambo kakucita boobu, bakuzyiba kulombozya kubyaabi ikuli mumyoyo yabo alimwi babambulula nzila zyabo.—Int. 73:12-17; 143:10.

17. Nkaambo nzi inga kwaba kulibikka muntenda ikuti twasyoma maano eesu tobeni?

¹⁷ Amubone makani aajatikizya Mwami Davida wamu Israyeli yakaindi. Naakacili mukubusi, wakazunda sintanze muna Filisti Goliati. Davida wakaba sikalumamba, mwami, sikukwabilila, alimwi ngowakali kusala cakucita mucisi. Pele Davida ciindi naakasyoma maano aakwe mwini, moyo wakwe wakamweena alimwi akucita cibi cipati kapati cakucita bumambi a Batiseba, alimwi buya akubikka bubambe bwakujaya mulumi wakwe Uriya. Ciindi naakapegwa lulayo, Davida cakulibombya wakazumina kuti wakalubizya alimwi akubambulula cilongwe cakwe a Jehova.—Int. 51:4, 6, 10, 11.

18. Ncinzi cikonzya kutugwasya kuzumanana kuswiilila jwi lya Jehova?

¹⁸ Atutobele lulayo lujanika mulugwalo lwa 1 Bakolinto 10:12 alimwi tutanikuciindizyi kulisyoma. Mbwaanga tatukonzyi ‘kubamba kabotu nzila zyesu,’ tulakonzya kuswiilila jwi lya Jehova naa lya Sinkondo wakwe. (Jer. 10:23) Atuzumanane kupaila, kutobela busolozi bwamuuya uusalala, alimwi akuzumanana kuswiilila jwi lya Jehova cakulomya.