PETRO wakalila kapati ciindi naakamukaka Jesu. Nokuba kuti mwaapostolo wakali kuyakujana buyumuyumu kutegwa akkalikane kumuuya alimwi, Jesu wakali kuyanda kuti amubelesye kugwasya bamwi. Aboobo, Jesu wakamwaambila kuti: “Eelyo wapiluka, ubayumye ibanyoko.” (Lk. 22:32, 54-62) Petro wakazikuba musemu mumbungano ya Banakristo mumwaanda wamyaka wakusaanguna. (Gal. 2:9) Mbubwenya buyo, mwaalumi iwakali mwaalu ulakonzya kupiluka mumukuli ooyo akukkomana kuyumya basyominyina kumuuya.

Bamwi ibakali balangizi bakagwisyigwa mumikuli, calo icikonzya kubapa kulimvwa kuti baalilwa kuzwidilila. Ba Julio, * ibakali kubeleka kabali baalu ku South America kwamyaka iinda ku 20, bakaamba kuti: “Kulibambila makani, kuswaya bakwesu, alimwi akweembela basimbungano nzyezintu nzyondakali kucita kapati mubuumi bwangu! Cakutayeeyelwa milimo yoonse eeyi yakamana, akundisiya kandinyina cakucita. Eeci cakali ciindi cuusisya.” Mazuba aano, ba Julio balabeleka kabali baalu alimwi.

Sikwiiya Jakobo wakalemba kuti: “Amukondwe bakwesu, nomusikilwa masukusyo aaindene-indene.” (Jak. 1:2) Jakobo wakali kwaamba masukusyo aboola akaambo kakupenzyegwa alimwi akutalondoka kwesu. Wakaamba kulombozya kutali kabotu, lusalululo, azimwi buyo. (Jak. 1:14; 2:1; 4:1, 2, 11) Ikuti Jehova watulaya, lulayo oolo lulakonzya kutucisa. (Heb. 12:11) Pele masukusyo aali boobu taayelede kutupa kubula lukkomano.

Nokuba kuti twagwisyigwa mumikuli mumbungano, tucijisi coolwe cakulilingula kubona mboluli luyumu lusyomo lwesu alimwi akutondezya mbotumuyanda Jehova. Alimwi tulakonzya kulanga-langa kaambo kakatupa kuti tunjile mumikuli. Sena twakali kubeleka kutegwa tujane mpindu lwesu tobeni, naa twakanjila mumikuli eeyo akaambo kakuti tulamuyanda Leza  alimwi akuti tusyoma kuti mbungano njiyakwe akuti iyandika kulanganizyigwa kabotu? (Mil. 20:28-30) Aabo ibakali baalu ibazumanana kubeleka milimo iisalala balatondezya caantangalala kuli boonse, kubikkilizya a Saatani, kuti luyando lwabo kuli Jehova ndwancobeni.

Ciindi Mwami Davida naakapegwa lulayo akaambo kakucita zibi zipati, wakalutambula lulayo alimwi wakalekelelwa. Davida wakaimba kuti: “Uli acoolwe muntu uulekelelwa milandu yakwe, uuvumbilwa zibi zyakwe. Uli acoolwe muntu oyo Jehova ngwatabiki kaambo, uutajisi lweeno mumuuya wakwe.” (Int. 32:1, 2) Lulayo lwakamugwasya kucinca Davida alimwi cakutadooneka lwakamugwasya kuba mweembezi mubotu wabantu ba Leza.

Kanji-kanji, bakwesu ibapiluka alimwi mumikuli akubeleka kabali baalu balaba beembezi babotu kwiinda mbobakabede kaindi. Mwaalu umwi iwakazwide abwaalu wakaamba kuti: “Lino ndilamvwisya kabotu-kabotu mbondeelede kweendelezya baabo ibalubizya.” Umbi mwaalu wakaamba kuti: “Lino ndilabikkila kapati maano kucoolwe cangu cakubelekela bakwesu.”

Sintembauzyo wakalemba kuti: “[Jehova] tayandi kupa milandu lyoonse.” (Int. 103:9, BT) Aboobo, tatweelede kuyeeya kuti Leza kunyina nakonzya kuba aalusyomo mulindiswe akaambo kakuti twakacita cibi cipati. Ba Ricardo balo ibakabeleka kabali baalu myaka minji nobakagwisyigwa mumikuli yabwaalu bakaamba kuti: “Ndakatyompwa kapati akaambo kakwaalilwa. Kwaciindi cilamfwu kapati, ndakali kulitenga calo cakapa kuti nditabi mwaalu kwaciindi cilamfwu. Tiindakali kusyoma kuti ndilakonzya kweelela alimwi. Pele akaambo kakuti ndilakkomana kugwasya bamwi, ndakali kucikonzya kusololela ziiyo zya Bbaibbele, kuyumyayumya bakwesu ku Ŋanda ya Bwami, alimwi akubeleka ambabo mumulimo wakukambauka. Eeci cakandipa kuti nditalike alimwi kuba aalusyomo, alimwi lino ndilabeleka kandili mwaalu.”

Kubikkilila bamwi kulakonzya kusinkila mukwesu kuti atabi mwaalu. Eelo kaka inga cainda kubota kuba mbuli Davida mubelesi wa Jehova walo iwakatija Mwami Saulo iwakajisi munyono! Davida tanaakayanda  kujola cibi pe, noliba leelyo naakali acoolwe cakucita boobo. (1 Sam. 24:4-7; 26:8-12) Ciindi Saulo naakafwa munkondo, Davida wakamulila, kaamba nguwe alimwi amwanaakwe Jonatani wakabaamba kuti mbantu “bayandwa alimwi ibakali kukkomanisya.” (2 Sam. 1:21-23) Davida tanaakamubikkilila pe.

Ikuti kamulimvwa mbuli kuti nzyomwaamba tabazibikkili maano naa kulimvwa kuti taakwe nomwacitilwa bululami, mutalekeli kubikkilila kweendelezya mizeezo yanu. Mucikozyanyo, ciindi ba William balo ibakabeleka myaka iitandila kuma 30 abwaalu mucisi ca Britain, nobakagwisyigwa bakali kubabikkilila baalu bamwi. Ncinzi cakabagwasya ba William kuzilanga kabotu zintu alimwi? Bakaamba kuti: “Kubala bbuku lya Jobu kwakandikulwaizya kapati. Ikuti naa Jehova wakamugwasya Jobu kuba aluumuno abalongwe bakwe botatwe, nkokuti andime ulakonzya kundigwasya kuba aluumuno abaalu Banakristo.”—Job. 42:7-9.

Ikuti mwakasala kuleka mukuli wakweembela butanga bwa Leza, inga cainda kubota kulanga-langa twaambo itwakamupa kucita boobo. Sena kuli mapenzi amwi aamugeme aakamupa kucita boobo? Sena kwakali zintu zimwi nzyomwakali kubikkila maano kapati mubuumi bwanu? Sena mwakatyompwa akaambo kakutalondoka kwabamwi? Kufwumbwa mbocibede, mutalubi kuti mwakali kubagwasya bamwi munzila zinji nomwakali baalu. Makani aanu akali kubayumyayumya, cikozyanyo canu cakali kubakulwaizya, alimwi anyendo zyabweembezi zyanu zyakali kubagwasya kuliyumya mumasunko aabo. Mulimo wanu wabwaalu ngomwakali kucita cakusyomeka wakali kumukkomanisya Jehova mbubwenya mbowakali kumukkomanisya nywebo.—Tus. 27:11.

Jehova wabagwasya bamaalumi kuba aalukkomano ndobakajisi alimwi aluyandisisyo lwabo lwakusololela mumbungano. Ikuti mwakacileka mulimo wabwaalu naa mwakagwisyigwa buya, mulakonzya alimwi kubeleka “mulimo wabulangizi.” (1 Ti. 3:1) Paulo ‘tanaakaleka pe kupailila’ Banakristo baku Kolose kutegwa babe aaluzyibo lwini-lwini lwamakanze aa Leza ‘kutegwa beende mbwayanda Jehova akumukkomanisya cakumaninina.’ (Kol. 1:9, 10) Ikuti mwaba acoolwe alimwi cakuba mwaalu, amulange kuli Jehova kuti amupe nguzu, kukkazika moyo, alimwi alukkomano. Mumazuba aano aamamanino, bantu ba Jehova bayandika kugwasyigwa kumuuya abeembezi basiluyando. Sena mulakonzya alimwi sena mulilyaabide kuyumyayumya Banakristonyoko?