TUPONA muciindi cikatazya ncobeni kwiinda lyoonse. (2 Ti. 3:1-5) Luyando lwesu kuli Jehova alimwi amakanze eesu aakupona kweelana azyeelelo zyakwe ziluleme alasunkwa buzuba abuzuba. Jesu wakabonena limwi kuti kuyakuba ziindi zikatazya alimwi wakasyomezya basikumutobela kuti bakali kuyakukulwaizyigwa munzila iiyandika kutegwa bakacikonzye kuliyumya kusikila kumamanino. (Mt. 24:3, 13; 28:20) Kutegwa abayumye-yumye, wakasala muzike musyomesi kutegwa kabapa ‘cakulya cakumuuya aciindi ceelede.’—Mt. 24:45, 46.

Kutalikila mumwaka wa 1919 ciindi muzike musyomesi naakasalwa, mamiliyoni ‘aababelesi bamuŋanda’ bamisyobo yoonse babunganizyigwa mumbunga ya Leza alimwi balasaninwa kumuuya. (Mt. 24:14; Ciy. 22:17) Nokuba boobo, cakulya eeci taceelene kuvwula mumyaambo yoonse, alimwi tabali bantu boonse ibakonzya kujana mabbuku eesu aali aa Intaneti. Mucikozyanyo, banji tabajisi mavidiyo alimwi azibalo zimwi izijanika buyo aa web site ya jw.org. Sena eeci caamba kuti bamwi balaindwa kutambula cakulya ncobayandika kutegwa bazumanane kuyuma kumuuya? Kutegwa tujane bwiinguzi kumubuzyo ooyu, atulange-lange bwiinguzi kumibuzyo yone iiyandika.

Ciindi Saatani naakasunka Jesu kuti asandule mabwe kuba zinkwa, Jesu wakavwiila kuti: “Muntu teelede kuponena acinkwa calo, pele weelede kuponena amajwi oonse aazwa kumulomo wa Jehova.” (Mt. 4:3, 4) Majwi aa Jehova alilembedwe mu Bbaibbele. (2 Pe. 1:20, 21) Aboobo, Bbaibbele ncecintu iciyandika kapati icijanika mucakulya cesu cakumuuya.—2 Ti. 3:16, 17.

Mbunga ya Jehova yasandulula Bbaibbele lya Busanduluzi bwa Nyika Mpya lyoonse mbolizulwa naa kalili cibeela mumyaambo yiinda ku 120, alimwi mwaka amwaka myaambo aimwi ilayungizyigwa. Kuyungizya a Bbaibbele lya Busanduluzi bwa Nyika Mpya, mabbiliyoni aama Bbaibbele aabusanduluzi bwiindene-indene alajanika kaali cibeela naa lyoonse mbolizulwa mumyaambo minji kapati. Kuzwidilila ooku kugambya kuleendelana akuyanda kwa Jehova kwakuti “bantu boonse bafwutulwe akuba aluzyibo lwini-lwini lwakasimpe.” (1 Ti. 2:3, 4) Alimwi akaambo kakuti ‘kunyina cilenge nociba comwe cisisidwe mumeso aa Jehova,’ tulakonzya kuba masimpe kuti uyakubakwela akubaleta mumbunga yakwe aabo “bazyi kuti bayandika zyintu zyakumuuya” alimwi uyakubapa cakulya cakumuuya.—Heb. 4:13; Mt. 5:3, 6; Joh. 6:44; 10:14.

Kutegwa muntu abe alusyomo luyumu, weelede kucita zinji ikutali buyo kubala Bbaibbele. Weelede kumvwa ncabala akutobela ncaiya. (Jak. 1:22-25) Muzibe muna Etiopiya wamumwaanda wamyaka wakusaanguna wakatondezya kulumba kujatikizya makani aaya. Wakali kubala Jwi lya Leza ciindi mukambausi Filipo naakamubuzya kuti: “Sena mubwini ulicizyi eeco ncobala?” Muzibe wakaingula kuti: “Mubwini mbuti mbondinga ndacizyiba ikuti kakunyina umwi wakundipandulwida?” (Mil. 8:26-31) Filipo wakavwiila kwiinda mukugwasya muzibe kujana luzyibo lwini-lwini lwa Jwi lya Leza. Muzibe wakakkomana kapati kujatikizya ncaakaiya cakuti wakabbapatizyigwa. (Mil. 8:32-38) Mbubwenya buyo, mabbuku eesu aamba zya Bbaibbele alatugwasya kujana luzyibo lwini-lwini lwakasimpe. Alatusika amoyo alimwi alatukulwaizya kutobela nzyotwiiya.—Kol. 1:9, 10.

Kwiinda mumabbuku, babelesi ba Jehova balapegwa cakulya cinji cakumuuya kutegwa balye akunywa. (Is. 65:13) Mucikozyanyo, Ngazi Yamulindizi, yalo iijanika mumyaambo yiinda ku 210, ilapandulula businsimi bwamu Bbaibbele, kuyaambele mukumvwisya kasimpe kakumuuya, alimwi akutukulwaizya kupona kweelana anjiisyo zya Leza. Magazini ya Sinsimuka!, yalo iimwaigwa mumyaambo yiinda ku 100, ilatugwasya kuyungizya luzyibo lwesu kujatikizya milimo ya Jehova yakulenga alimwi akutondezya mbotukonzya kutobela lulayo lwamu Bbaibbele lugwasya. (Tus. 3:21-23; Lom. 1:20) Muzike musyomesi ulapa mabbuku aamba zya Bbaibbele mumyaambo yiinda ku 680! Sena mulajana ciindi cakubala Bbaibbele buzuba abuzuba? Sena mulabala magazini iili yoonse mpya alimwi amabbuku mapya aajanika mumwaambo wanu mwaka amwaka?

Kuyungizya akusimba mabbuku, mbunga ya Jehova ilabamba ma autulaini aamakani aapegwa lyamiswaangano yesu yambungano, yabbazu, alimwi ayacooko. Sena mulaakkomanina makani, zisobano, zitondezyo alimwi amakani aakubuzya-buzya aapegwa lyamiswaangano? Masimpe, Jehova ulatupa cakulya cakumuuya cinji kapati!—Is. 25:6.

Bwiinguzi mbwakuti peepe. Alimwi tatweelede kugambwa kubona kuti babelesi ba Jehova bamwi zimwi ziindi balakonzya kuba aacakulya cinji kwiinda bamwi. Ino nkaambo nzi? Amubone makani ajatikizya baapostolo. Bakali kutambula malailile manji kwiinda basikwiiya bamwi banji bamumwaanda wamyaka wakusaanguna. (Mk. 4:10; 9:35-37) Nokuba boobo, basikwiiya bambi aabo tiibakafwa nzala yakumuuya pe; bakatambula ncobakali kuyandika.—Ef. 4:20-24; 1 Pe. 1:8.

Alimwi cilayandika kuzyiba kuti bunji bwazintu Jesu nzyaakaamba naakali anyika tiizyakalembwa mumabbuku aa Makani Mabotu. Mwaapostolo Johane wakalemba kuti: “Mubwini kuli zyintu azimbi zinji nzyaakacita Jesu nzyondiyeeya kuti, ikuti nozyakalembwa zyoonse, imabbuku aalembedwe naatakakkwana anyika eeyi.” (Joh. 21:25) Nokuba kuti basikutobela Jesu bamumwaanda wamyaka wakusaanguna bakalijisi makani manji kwiinda ndiswe kujatikizya mwaalumi uulondokede Jesu, tatufwide nzala pe. Jehova ulabikkila maano kubona kuti twazizyiba ziyandika kujatikizya Jesu kutegwa tucikonzye kutobela mikondo yakwe.—1 Pe. 2:21.

Amuyeeye alimwi kujatikizya magwalo aakali kutumwa aabaapostolo kumbungano zyamumwaanda wamyaka wakusaanguna. Kuboneka kuti lugwalo lomwe ndwaakalemba Paulo tiilwakabikkilizyigwa pe mu Bbaibbele. (Kol. 4:16) Sena tujisi cakulya cakumuuya cisyoonto akaambo kakuti lugwalo oolo taluko? Peepe. Jehova ulizyi nzyotuyandika alimwi watupa nzyotweelede kutegwa tuzumanane kuba bayumu kumuuya.—Mt. 6:8.

Mazuba aano, myaambo imwi yabantu ba Jehova ilijisi cakulya cakumuuya cinji kwiinda imwi. Sena mwaambo wanu ujisi buyo mabbuku masyoonto? Ikuti naa mboobo, amuzyibe kuti Jehova ulamulanganya. Amwaaiye mabbuku ngomujisi, alimwi ikuti kacikonzyeka, kamujanika kumiswaangano yamumwaambo ngomumvwa. Alimwi amube aalusyomo lwakuti Jehova uyakuzumanana kumuyumya kumuuya.—Int. 1:2; Heb. 10:24, 25.

Aa Web site yesu kulajanika mamagazini eesu alimwi amabbuku amwi aamba zyamu Bbaibbele. Web site alimwi ilijisi makani aagwasya banabukwetene, bakubusi, alimwi abaabo ibajisi bana baniini. Mikwasyi ilagwasyigwa kwiinda mukulanga-langa makani aaya ciindi Cakukomba Mumukwasyi. Kuyungizya waawo, Web site yesu ilaambilizya mapulogilamu aamwi aalubazu, mbuli basicikolo bamanizya lwiiyo lwabo lwa Cikolo ca Gileadi alimwi amuswaangano waamwaka, alimwi akuzyibya bakwesu nyika yoonse mbwiizulwa kujatikizya ntenda zilicitikila alimwi amakani aamba zyakuzunda akwaangwa kwabantu ba Jehova. (1 Pe. 5:8, 9) Web site yesu alimwi ncibelesyo cibotu kapati cakumwaya mulumbe mubotu nomuba mumasena mulimo wesu moukasyidwe.

Nokuba boobo, mulakonzya kuzumanana kuba bayumu kumuuya kufwumbwa naa mulaibelesya Web site yesu naa pe. Muzike wabeleka canguzu kusimba mabbuku kutegwa umwi aumwi wababelesi bamuŋanda asaninwe kabotu kumuuya. Aboobo, tamweelede kulimvwa kuti mweelede kuula buya muncini kutegwa kamubelesya website ya jw.org. Bamwi balakonzya kubikka bubambe bwabo beni bwakupulinta makani amwi aa Web site alimwi akupa bantu bamwi ibatabelesyi intaneti, pele mbungano taziyandiki buya kucita boobo pe.

Tulikkomene akaambo kakuti Jesu ulacizuzikizya cisyomezyo cakwe cakulanganya nzyotuyandika kumuuya. Mbwaayaabuswena kumamanino mazuba aaya aakatazya, tulakonzya kuba aalusyomo lwakuti Jehova uyakuzumanana kutupa ‘cakulya cakumuuya aciindi ceelede.’