BA Guy Hollis Pierce bamu Kabunga Keendelezya ka Bakamboni ba Jehova, bakamanizya buumi bwabo bwaanyika muli Bwabili, mu March 18, 2014. Bakajisi myaka yakuzyalwa iili 79 ciindi nobwakazuzikizyigwa bulangizi bwabo bwakuba akati kabanyina Kristo bakabusyigwa kale.—Heb. 2:10-12; 1Pet. 3:18.

Ba Guy Pierce bakazyalilwa ku Auburn, mu California, U.S.A., mu November 6, 1934, alimwi bakabbapatizyigwa mumwaka wa 1955. Bakakwatana aba Penny, bakaintu babo mbobakali kuyandisya kapati, mumwaka wa 1977 akuba amukwasyi. Akaambo kaluzyibo ndobakajana kwiinda mukuba silutwe wamukwasyi, cakapa kuti babe abube bubotu bwakuba mbuli muzyali kubantu. Kuzikusika mumwaka wa 1982, balo aba Penny bakajisi bubi mumulimo wabupainiya, mpoonya mumwaka wa 1986 bakatalika mulimo wamubbazu walo ngobakabeleka myaka iili 11 mucisi ca United States.

Mumwaka wa 1997, ba Guy alimwi aba Penny Pierce, bakatalika kubelekela a Bbeteli yaku United States. Mukwesu Pierce wakabeleka mu Dipatimenti ya Mulimo, mpoonya mumwaka wa 1998 wakasalwa kuba sikugwasyilizya mu Kkomiti Iilanganya Babelesi ya Kabunga Keendelezya. Mukwesu Pierce wakaambilizyigwa kuti wasalwa kuba mu Kabunga Keendelezya mu October 2, 1999, lyamuswaangano waamwaka wa Watch Tower Bible and Tract Society of Pennsylvania. Mumyaka yainda, wakabeleka mukkomiti Iilanganya Babelesi, Iilanganya Zilembwa, Iilanganya Ziyiisyigwa alimwi amukkomiti Yabeendelezi.

Bantu ibazwa mubukkale bwiindene-indene alimwi azilengwa ziindene-indene, bakali kumukkomanina kapati Mukwesu Pierce akaambo kakuti wakali muntu uumweta-mweta alimwi wakali kuyanda kuseka abantu. Pele bube ibwakapa kuti ayandwe kapati abantu bwakali luyando lwakwe, kulicesya, kulemeka milawo anjiisyo ziluleme, alimwi wakali kusyoma Jehova cakumaninina. Mukwesu Guy Pierce wakali kwaamba kuti izuba lilakonzya kwaalilwa kupola, pele zisyomezyo zya Jehova tazikonzyi kwaalilwa kuzuzikizyigwa, alimwi wakali kuyandisya kapati kwaambila bantu munyika yoonse mbwiizulwa kasimpe aaka.

Mukwesu Pierce wakali kulitakata kubelekela Jehova, wakali kufwuma kubuka alimwi kanji-kanji wakali kubeleka kusikila masiku. Wakeenda nyika yoonse kayaabukulwaizya bakwesu abacizyi Banakristo, alimwi lyoonse wakali kujana ciindi cakubandika amuntu umwi aumwi wamukwasyi wa Bbeteli alimwi bamwi bakali kuyanda kuyanzana anguwe akulomba lulayo alugwasyo kulinguwe. Nokuba ciindi nokwainda myaka minji kuzwa ciindi naakabacitila zintu zibotu, basyominyina bacimuyeeya akaambo kakuti wakali kusamausya, wakali mulongwe, alimwi wakali kuyumya-yumya kwiinda mukubelesya Magwalo.

Mukwesu ooyu uuyandwa wakasiya bakaintu abana ibali cisambomwe, bazyukulu, alimwi abazyukululwa. Alimwi wakajisi bana banji bakumuuya. Makani aakuyeeya buumi mbwaakali kupona Mukwesu Pierce akapegwa ku Bbeteli yaku Brooklyn mu Mujibelo, March 22, 2014 amukwesu Mark Sanderson, ngobakali kubeleka limwi mu Kabunga Keendelezya. Akati kamakani ngaakabandika, wakaamba kujatikizya bulangizi bwakujulu mbwaakajisi Mukwesu Pierce, mpoonya wakabala majwi aa Jesu aakuti: “Muŋanda ya Taata muli makkalilo manji. . . . Ikuti nduunke kuyoomubambila busena, ndiyooboola alimwi eelyo ndiyoomutolelezya kuŋanda yangu, kutegwa ooko nkondinoobede andinywe mukabe nkuko. Eelyo ooko nkonduunka muliizyi nzila.”—Joh. 14:2-4.

Kwaamba masimpe, tunakumuyeeya kapati Mukwesu Pierce. Nokuba boobo, tulikkomene kuti ‘wakaliizyi nzila’ iitola ‘kumakkalilo’ kwalo nkwayookkala kukabe kutamani.