MULENGI wesu wakabalemeka bantu kwiinda mukubapa cipego citaliboteli, nkokuti nguzu zyakulisalila. Kuyungizya waawo, ulabalongezya kapati aabo ibabelesya nguzu zyabo zyakulisalila kutegwa basumpule bukombi bwakasimpe alimwi abaabo ibacita nzyobeelede kutegwa basalazye zina lisalala akugwasyilizya makanze aakwe mapati. Jehova tayandi kuti bantu kabasinikizyigwa buya naa kabakongwa buya kuti bamumvwide. Muciindi caboobo, ulakkomana kapati kuti bantu kabalyaaba cakuliyandila akaambo kakuti balamuyanda alimwi balamulumba.

Mucikozyanyo, ciindi bana Israyeli nobakali munkanda ya Sinai, Jehova wakabalailila kuti bayake busena bwakukombela. Wakabaambila kuti: “Amupe Jehova zyakusanga kuzwa akati kazintu nzyomujisi. Kufwumbwa muntu iwasungulwa amoyo wakwe aletele Jehova zyakusanga.” (Kul. 35:5) Muna Israyeli umwi aumwi wakali kukonzya kupa kufwumbwa ncaakali kukonzya, alimwi cipego cakuliyandila cimwi acimwi—naa cakali cintu cili buti naa cinji buti—cakali kukonzya kubelesyegwa munzila yeelede kuzuzikizya kuyanda kwa Leza. Ino bantu bakacita buti?

“Boonse aabo ibakasungulwa akukulwaizyigwa amyoyo yabo” bakapa zipo cakuliyandila, “umwi aumwi kalisungwide mumoyo.” Bamaalumi alimwi abamakaintu cakuliyandila bakapa zipo kugwasyilizya mulimo wa Jehova, zipo mbuli: tuntu twakulibotezya, masikkiyo, nweenwe, ngolida, nsiliva, mukuba, ntali zyamubala wajulu, boya bwambelele bwamusyobo wacisombo, milembo iisalala pyu, milembo mibotu myuubauba, boya bwampongo, zikutu zyabagutu izyakanyikwa mumusila uusalala, zikutu ziteteete, mapulanga aamuunga, mabwe mayandisi, mafwuta aamabbona alimwi amafwuta aakumunisya. Muciindi buyo cisyoonto, “zintu nzyobakaleta zyakali kukkwana kumulimo woonse mane akwiindilila.”—Kul. 35:21-24, 27-29; 36:7.

Jehova wakakkomana kapati ikutali akaambo kazintu zyakapegwa, pele wakakkomana akaambo kamuuya wabo wakulyaaba cakuliyandila kugwasyilizya bukombi busalala. Alimwi bakaaba ciindi cabo anguzu zyabo kubeleka mulimo. Cibalo caamba kuti “bamakaintu boonse bacibwene kumutwe kuluka bakali kupanga zintu zyakuluka amaanza aabo.” Inzya, “bamakaintu boonse bacibwene kuluka ibakasungulwa amyoyo yabo bakali kuluka boya bwampongo.” Kuyungizya waawo, Jehova wakapa Bezaleli “busongo, kumvwisya alimwi aluzyibo mumilimo yoonse iibelekwa amaanza.” Alimwi buya, Leza wakapa Bezaleli alimwi a Oholiabu luzyibo ilwakali kuyandika kutegwa babeleke mulimo ngobakapegwa.—Kul. 35:25, 26, 30-35.

Ciindi Jehova naakaambila bana Israyeli kuti basange, wakalisinizyide ncobeni kuti ‘kufwumbwa muntu iwakasungulwa amoyo wakwe’ wakali kuyakugwasyilizya bukombi bwakasimpe. Cakatobela ncakuti wakabalongezya boonse aabo ibakajisi muuya wakulyaaba kwiinda mukubasololela calo icakabapa kuti bakkomane kapati. Aboobo, Jehova wakatondezya kuti ciindi nabalongezya babelesi bakwe akaambo kakulyaaba kwabo, ulasinizya ncobeni kuti ulabapa zyoonse ziyandika kutegwa bazuzikizye makanze aakwe. (Int. 34:9) Ciindi nomubelekela Jehova cakuliyandila, uyakusinizya ncobeni kuti wamulongezya akaambo kakulyaaba kwanu.