1, 2. Nkaambo nzi bantu banji ibakamvwa Jesu naakali kwaambaula ncobakaalilwa kumvwisya cini ncaakali kwaamba?

MUNTU ulakonzya kumvwa jwi lyamuntu iwaambaula kulinguwe. Mane buya ulakonzya kumvwa ambolilimvwisya jwi. Pele ino inga camugwasya buti ikuti naa katacimvwisyi caambwa mumajwi aayo aali mukukananwa? (1Kor. 14:9) Mbubwenya buyo, bantu banji bakamvwa Jesu ncaakali kwaamba. Mane buya wakaambaula kulimbabo mumwaambo ngobakali kukonzya kumvwa. Nokuba boobo, tabali boonse ibakamvwisya cini ncaakali kwaamba. Akaambo kaceeci, Jesu wakaambila baswiilizi bakwe kuti: “Amundiswiilile nywebo nyoonse, alimwi mumvwisye ncezyaamba zintu eezyi.”—Mk. 7:14.

² Nkaambo nzi bantu banji ncobakaalilwa kumvwisya cini ncaakali kwaamba Jesu? Nkaambo bamwi bakajisi mizeezo iinyongene alimwi amakanze mabi. Kubantu bali boobu, Jesu wakati: “Mubikka ambali mulawo wa Leza kutegwa muzumanane atunsiyansiya twanu.” (Mk. 7:9) Bantu aaba taakwe nobakasola kumvwisya ncaakali kwaamba. Tiibakali kuyanda kucinca nzila zyabo amizeezo yabo. Matwi aabo alakonzya akali kumvwa, pele myoyo yabo yakalijalidwe! (Amubale Matayo 13:13-15.) Aboobo, ino inga twacita buti kutegwa tusinizye kuti lyoonse myoyo yesu ilijukide kutegwa tugwasyigwe azintu Jesu nzyaakali kuyiisya?

3. Nkaambo nzi basikwiiya ncobakali kukonzya kumvwisya ncaakali kwaamba Jesu?

³ Tweelede kutobela cikozyanyo cabasikwiiya ba Jesu ibakali kulicesya. Wakati kulimbabo: “Nywebo mulikkomene nkaambo meso aanu alabona, alimwi amatwi aanu alamvwa.” (Mt. 13:16) Nkaambo nzi balo ncobakali kukonzya kumvwisya ciindi bamwi nobakali kwaalilwa kumvwisya? Cakusaanguna, bakali kuyandisisya kubuzya mibuzyo alimwi akuvwuntauzya cini cakali kwaambwa mumajwi aa Jesu. (Mt. 13:36; Mk. 7:17) Cabili, bakali kuyandisisya kuyungizya luzyibo kuzintu eezyo nzyobakazumide kale mumyoyo yabo. (Amubale Matayo 13:11, 12.) Catatu, bakali kuyandisisya kuzibelesya mubuumi bwabo alimwi akuzibelesya kugwasya bamwi nzyobakamvwa akumvwisya.—Mt. 13:51, 52.

4. Kutegwa tuzimvwisye zikozyanyo zya Jesu, ino nzintu nzi zyotatwe nzyotweelede kucita?

⁴ Ikuti katuyanda kuzimvwisya zikozyanyo zya Jesu, tweelede kutobela cikozyanyo cabasikwiiya bakwe basyomeka. Kucita boobu akwalo kubikkilizya kucita zintu zyotatwe. Cakusaanguna, tweelede kuyandisisya kwiiya akuzinzibala kuyeeya nzyaakaamba Jesu, tweelede kuvwuntauzya, alimwi akubuzya mibuzyo yeelede. Kucita boobu kupa kuti tube aluzyibo. (Tus. 2:4, 5) Cabili, tweelede kubona luzyibo oolo mboluswaangene azintu nzyotuzyi kale, kumvwisya mbotukonzya kugwasyigwa andulo. Kucita boobu kupa kuti tumvwisye. (Tus. 2:2, 3) Mpoonya camamanino, tweelede kuzibelesya mubuumi bwesu eezyo nzyotwaiya. Kucita boobu citondezya kuti tuli basongo.—Tus. 2:6, 7.

5. Amupe cikozyanyo icitondezya kwiindana kuliko akati kaluzyibo, kumvwisya, alimwi abusongo.

⁵ Ino luzyibo, kumvwisya alimwi abusongo ziindene buti? Inga twakozyanisya munzila eeyi: Amweezyeezye kuti muliimvwi akati kamugwagwa mpoonya bbaasi lilaboola kulindinywe kalizuza. Kusaanguna, mulazyiba kuti ndibbaasi—oolu nduzyibo. Citobela ncakuti mulazyiba kuti ikuti naa mwazumanana kwiima mumugwagwa, bbaasi lilamulyata—ooku nkumvwisya! Aboobo cakufwambaana mulazwa munzila mwiinda bbaasi—oobu mbusongo! Aboobo, tacigambyi kuti Bbaibbele lilakankaizya kuti tuyandika ‘kubambilila busongo bugwasya.’ Nkaambo kucita boobo caamba buumi bwesu!—Tus. 3:21, 22; 1Tim. 4:16.

6. Ino tulalanga-langa mibuzyo nzi yone notulanga-langa zikozyanyo zya Jesu izili ciloba? ( Amubone kabbokesi kabikkilizyidwe.)

⁶ Mucibalo eeci alimwi amucibalo citobela, tulalanga-langa zikozyanyo izili ciloba nzyaakabelesya Jesu. Notulanga-langa zikozyanyo eezyi, tulabuzya mibuzyo eeyi iitobela: Ino cikozyanyo eeci caamba nzi? (Eeci cilatugwasya kujana luzyibo.) Nkaambo nzi Jesu ncaakabelesya cikozyanyo eeci? (Eeci cilatugwasya kumvwisya.) Ino inga twagwasyigwa buti atwaambo ootu alimwi ino inga twatubelesya buti kugwasya bamwi? (Oobu mbusongo.) Camamanino, ino eeci cituyiisya nzi kujatikizya Jehova a Jesu?

7. Ino cikozyanyo canseke yamusitada caamba nzi?

⁷ Amubale Matayo 13:31, 32. Ino cikozyanyo ca Jesu canseke yamusitada caamba nzi? Nseke lwayo yiiminina mulumbe wa Bwami kubikkilizya azijanika kwiinda mukukambauka mulumbe ooyo—mbungano ya Bunakristo. Mbubonya mbuli nseke yamusitada mboili “nsyoonto kwiinda nseke zyoonse,” mbungano ya Bunakristo yakatalika kaili nsyoonto mu 33 C.E. Nokuba boobo, mumyaka misyoonto buyo, mbungano yakakomena cakufwambaana. Yakakomena munzila yatakali kuyeeyelwa. (Kol. 1:23) Kukomena ooku kwakagwasya nkaambo Jesu wakaamba kuti “bayuni bauluka mujulu” bakali kukonzya “kujana aakukkala mumitabi yancico.” Bayuni bacikozyanyo aaba baiminina bantu ibajana cakulya cakumuuya, cimvwule, alimwi abusena bwakukkala  mumbungano ya Bunakristo.—Amweezyanisye a Ezekieli 17:23.

8. Nkaambo nzi Jesu ncaakabelesya cikozyanyo canseke yamusitada?

⁸ Nkaambo nzi Jesu ncaakabelesya cikozyanyo eeci? Akaambo kakuti ilagambya mbwiikomena nseke yamusitada, Jesu wakabelesya cikozyanyo eeci kutondezya nguzu nzyobujisi bubambe bwa Bwami bwa Leza, nguzu zyakukomena, zyakukwabilila, alimwi azyakuzunda buyumuyumu boonse. Kutalikila mu 1914, mbunga ya Leza iilibonya ameso yakomena citaambiki! (Is. 60:22) Bantu aabo ibayanzana ambunga eeyi bakwabililwa kapati kumuuya. (Tus. 2:7; Is. 32:1, 2) Kuyungizya waawo, kuyaambele ikuli mukucitwa mukusumpula ziyandika zya Bwami kwasinizya kuti taakwe muntu uukonzya kukulesya, basikukazya boonse bazundwa.—Is. 54:17.

9. (a) Nciiyo nzi ncotwiiya kucikozyanyo canseke yamusitada? (b) Ino eeci cituyiisya nzi kujatikizya Jehova alimwi a Jesu?

⁹ Ncinzi ncotukonzya kwiiya kucikozyanyo canseke yamusitada? Ambweni tukkala kubusena ikuli Bakamboni basyoonto naa kubusena nkuutaunki ambele cakufwambaana mulimo wesu wakukambauka. Pele kuyeeya kuti bubambe bwa Bwami bulakonzya kuzunda buyumuyumu buli boonse ciyakupa kuti tukonzye kuliyumya. Mucikozyanyo, ciindi Mukwesu Edwin Skinner naakasika ku India mu 1926, kwakali buyo Bakamboni basyoonto mucisi eeci. Kumatalikilo, kwakali kuyaambele kusyoonto, alimwi mulimo wakukambauka wakali muyumu. Nokuba boobo, wakazumanana kukambauka alimwi wakabona mulumbe wa Bwami mbowakazunda buyumuyumu bupati. Lino kuli Bakamboni basungu ibainda ku 37,000 mucisi ca India, alimwi bantu ibainda ku 108,000 bakajanika ku Ciibalusyo mwaka wamana. Alimwi amubone cikozyanyo cimbi icitondezya bubambe bwa Bwami mbobwakomena munzila iigambya. Mumwaka nguwenya Mukwesu Skinner naakasika ku India, mulimo wakazwaakutalika mucisi ca Zambia. Lino basikumwaya ibainda ku 170,000 balakambauka mucisi eeci, alimwi bantu ibali 763,915 bakajanika ku Ciibalusyo mu 2013. Eeci caamba kuti muntu omwe akati kabantu ibali 18 mu Zambia wakajanika ku Ciibalusyo. Eelo kaka kukomena ooku kulagambya!

10. Ino cikozyanyo cabumena caamba nzi?

¹⁰ Amubale Matayo 13:33. Ino cikozyanyo  cabumena caamba nzi? Cikozyanyo eeci acalo cijatikizya mulumbe wa Bwami anzyoucita. “Fulaulu woonse” wiiminina zisi zyoonse, alimwi kufwufwumuka kwiiminina kuyandilila kwamulumbe wa Bwami kwiinda mumulimo wakukambauka. Kakuli kukomena kwanseke yamusitada kulalibonya kabotu-kabotu, kuyandilila kwabumena takulibonyi pe kumatalikilo. Kulibonya buyo kwainda ciindi.

11. Nkaambo nzi Jesu ncaakabelesya cikozyanyo cabumena?

¹¹ Nkaambo nzi Jesu ncaakabelesya cikozyanyo eeci? Wakali kutondezya kuti mulumbe wa Bwami ulijisi nguzu zyakuyandilila koonse-koonse akupa kuti kube kucinca. Mulumbe wa Bwami wasika “kumasena aakulamfwu kapati aanyika.” (Mil. 1:8) Nokuba boobo, kucinca ikucitwa amulumbe takulibonyi lyoonse pe; bantu bamwi inga tabalibonyi kumatalikilo mbobajatikizyigwa amulumbe. Nokuba boobo, kucinca inga nkokuli—kutali buyo kucinca ikujatikizya myeelwe, pele alimwi akucinca ikujatikizya bube bwabantu aabo ibautambula mulumbe ooyu uuyandilila.—Rom. 12:2; Ef. 4:22, 23.

12, 13. Amupe zikozyanyo izitondezya mbowakomena mulimo wakukambauka Bwami kweelana ambokupandulwidwe mucikozyanyo cabumena.

¹² Kanji-kanji kulainda myaka minji kutegwa tubone bantu mbobajatikizyigwa amulimo wakukambauka. Mucikozyanyo, ba Franz aba Margit, lino ibabelekela kuofesi yamutabi iimbi, mu 1982 bakali kubelekela aofesi yamutabi mu Brazil. Bakakambauka mukadolopo kamwi kasyoonto. Akati kaziiyo zya Bbaibbele nzyobakatalisya kwakali mukaintu umwi abana bakwe bone. Mwana mupati akati kabana aaba bone wakajisi myaka yakuzyalwa iili 12 aciindi eeco, alimwi wakajisi nsoni kapati alimwi kanji-kanji wakali kuyuba kabatanatalika ciiyo. Akaambo kakuti bakacincwa kuyakubelekela kubusena bumbi, banabukwetene aaba tiibakali kukonzya kuzumanana kubayiisya. Nokuba boobo, bakacikonzya kuyakuswaya kadolopo aaka nokwakainda myaka iili 25. Ino bakajana nzi? Bakajana kuti kwakali mbungano iyakajisi basikumwaya ibali 69, ibali 13 akati kabo bakali bapainiya baciindi coonse, boonse bakali kuswaanganina mu Ŋanda ya Bwami mpya. Ino mbuti kujatikizya mulombe uulya iwakajisi nsoni? Lino ngusicuuno wakabunga kabaalu! Mbubwenya mbuli bumena bwamucikozyanyo ca Jesu, mulumbe wa Bwami wakakomena akucinca maumi aabantu banji—eelo kaka eeci cakabakkomanisya banabukwetene aaba ibakaswaide!

¹³ Nguzu zyakucinca bantu nzyoujisi mulumbe wa Bwami zyalibonya muzisi oomo mulimo wa Bwami moukasyidwe. Cilakatazya kuzyiba mpousikide mulumbe muzisi zili boobu, alimwi kanji-kanji ibubotu bwajanika bulagambya. Mucikozyanyo, mucisi ca Cuba, mulumbe wa Bwami wakasika mu 1910, alimwi mukwesu Russell wakaswaya cisi eeci mu 1913. Nokuba boobo, kumatalikilo kwakali kuyaambele kusyoonto. Pele ino ncinzi ncotubona lino mucisi ca Cuba? Kuli basikumwaya ibainda ku 96,000 ibakambauka makani mabotu, alimwi bantu ibali 229,726 bakajanika ku Ciibalusyo mu 2013—eeci caamba kuti muntu omwe akati kabantu ibali 48 ibakkala munsumbu eeyi wakajanika ku Ciibalusyo. Nomuba muzisi oomo mulimo wesu mouzumizyidwe, mulumbe wa Bwami ulakonzya wakasika mumasena mwalo Bakamboni ibali kubusena ooko mobayeeyela kuti cilakatazya kukambauka. *—Muk. 8:7; 11:5.

14, 15. (a) Ino swebo kutugama inga twagwasyigwa buti kuciiyo ncotwiiya kucikozyanyo cabumena? (b) Ino eeci cituyiisya nzi kujatikizya Jehova a Jesu?

¹⁴ Ino inga twagwasyigwa buti anzyaakatuyiisya Jesu mucikozyanyo cabumena? Ciindi notuzinzibala kuyeeya kujatikizya ncocaamba cikozyanyo ca Jesu, tulazyiba  kuti tatweelede kulibilika kapati kujatikizya mbouyakubasika mulumbe wa Bwami bantu banji ibatanaumvwa. Jehova nguweendelezya zintu zyoonse. Pele ino swebo tujisi mukuli nzi? Ijwi lya Leza lilaingula kuti: “Kosyanga mbuto zyako cifwumofwumo alimwi utalekeli maanza aako kulyookezya kusikila mane kumangolezya; nkaambo tozyi naa nzili zitiikomene kabotu, ikuti naa nzyeezyi naa nzyeziya, naa zyoonse zyobilo zilakomena kabotu.” (Muk. 11:6) Pele aciindi nciconya, tatweelede kuluba kupailila mulimo wakukambauka kutegwa uzwidilile, kwaambisya muzisi oomo mulimo moutazumizyidwe.—Ef. 6:18-20.

¹⁵ Kuyungizya waawo, tatweelede kutyompwa kuti naa kumatalikilo tailibonyi mpindu yamulimo ngotubeleka. Tatweelede kunyansya “buzuba bwamatalikilo aazintu zisyoonto.” (Zek. 4:10) Mukuya kwaciindi, mpindu zilakonzya kuti kazili zinji kapati kwiinda mbotwakali kulangila!—Int. 40:5; Zek. 4:7

16. Ino caamba nzi cikozyanyo camusambazi weendeenda alimwi acikozyanyo calubono lusisidwe?

¹⁶ Amubale Matayo 13:44-46. Ino cikozyanyo camusambazi weendeenda acalubono lusisidwe zyaamba nzi? Ciindi Jesu naakali anyika, basambazi bamwi bakali kweenda kusika ku Indian Ocean kutegwa bajane ngale zibotu kapati. Musambazi iwaambwa mucikozyanyo ca Jesu wiiminina bantu babombe myoyo ibacita zyoonse nzyobakonzya kutegwa bajane nzyobayandika kumuuya. “Ngale yomwe iiyandika kapati” yiiminina kasimpe ka Bwami kataliboteli. Ciindi musambazi naakazyiba kuti ngale eeyo yakali kuyandika kapati, musambazi wakali lisungwide kusambala “cakufwambaana” zintu zyoonse nzyaakajisi kutegwa akonzye kuyuula. Jesu alimwi wakaamba kujatikizya muntu iwakali kubeleka mumuunda iwakajana lubono “lusisidwe.” Mukwiimpana amusambazi, muntu ooyu taakwe naakali kuyandaula lubono pe. Pele mbubonya mbuli musambazi, wakalilyaabide kusambala “zintu zyoonse” kutegwa akonzye kulujana lubono.

17. Nkaambo nzi Jesu ncaakaambila cikozyanyo camusambazi weendeenda alimwi acalubono lusisidwe?

¹⁷ Nkaambo nzi Jesu ncaakaambila zikozyanyo eezyi zyobilo? Wakali kutondezya kuti kasimpe kalajanika munzila ziindene-indene. Bantu bamwi balakayandaula, alimwi balacita zyoonse nzyobakonzya kutegwa bakajane. Pele bamwi nokuba kuti tabakayandauli buya, bakajana—ambweni kwiinda mukubakambaukila. Kufwumbwa mbocibede, muntu umwi aumwi wakazyiba kuti ncaakajana cakali cintu ciyandisi alimwi wakaliyandide kusweekelwa zintu zyoonse kutegwa acijatisye cintu ncaakajana.

18. (a) Ino inga twagwasyigwa buti azikozyanyo eezyi zyobilo? (b) Ino eeci cituyiisya nzi kujatikizya Jehova a Jesu?

¹⁸ Ino inga twagwasyigwa buti azikozyanyo eezyi zyobilo? (Mt. 6:19-21) Amulibuzye kuti: ‘Sena zintu ndizilanga mbuli mbobakali kuzilanga bantu aaba? Sena kasimpe ndikabona kuba cintu ciyandika kapati mbubonya mbuli mbobakali kuzibona zintu bantu baambidwe muzikozyanyo eezyi? Sena ndililisungwide kusweekelwa zintu zimbi kutegwa ndijatisye kasimpe aaka, naa ndilekela zintu zimbi mbuli kubikkila maano kubuumi bwabuzuba abuzuba kundinyonganya?’ (Mt. 6:22-24, 33; Lk. 5:27, 28; Flp. 3:8) Kuti lukkomano lwesu mumoyo kaluli lupati kujatikizya kasimpe, nkokuti tunakukanzide kubikka kasimpe mubusena bwakusaanguna mubuumi bwesu.

19. Ino tuyakulanga-langa nzi mucibalo citobela?

¹⁹ Atutondezye kuti twaswiilila akumvwisya ncobeni ncozyaamba zikozyanyo zya Bwami eezyi. Amuyeeye kuti, tulacita oobo kutali buyo kwiinda mukuzyiba ncozyaamba pele akwiinda mukubelesya nzyotwiiya kuzikozyanyo eezyi. Mucibalo citobela, tuyakulanga-langa zikozyanyo azimbi zyotatwe akubona ziiyo nzyotwiiya kuli nzizyo.