1, 2. Ncinzi Leza ncayanda kubakombi bakwe boonse, babe bana naa bapati?

SENA muli mukubusi? Kuti kacili boobo, amusyome kuti nywebo, mbomuli akati kambunga ya Jehova yanyika yoonse, mulayandika kapati. Muzisi zinji, bunji bwabaabo ibabbapatizyigwa mbakubusi. Eelo kaka cilayumya-yumya kubona bakubusi banji kabali akati kabantu ibakasala kubelekela Jehova!

² Mbomuli mukubusi, sena mulakkomana kuba abakubusinyoko bambi? Cakutadooneka, mulakkomana. Kuli lukkomano ndotujana kwiinda mukuba aziindi zikkomanisya antoomwe abaabo bamusela wesu. Nokuba boobo, tacikwe makani naa tuli bana naa tuli bapati alimwi tacikwe makani ambotwakakomezyegwa, Leza uyanda kuti katukamantene mukumukomba. Mwaapostolo Paulo wakalemba kuti Leza uyanda kuti “bantu boonse bafwutulwe akuba aluzyibo lwini-lwini lwakasimpe.” (1Tim. 2:3, 4) Mubbuku lya Ciyubunuzyo 7:9, bakombi ba Leza baambwa kuti “bazwa muzisi zyoonse, mumisyobo yoonse, mumikowa yoonse alimwi amumilaka yoonse.”

3, 4. (a) Muuya uuli buti uudumide akati kabakubusi banji mazuba aano? (b) Nkulanga zintu munzila iili buti ikweendelana acaambidwe mulugwalo lwa Baefeso 4:25?

³ Eelo kaka kuli kwiindana kapati akati kabakubusi ibabelekela  Jehova abakubusi ibali munyika eeyi! Bakubusi banji batabelekeli Jehova bapona buumi bwakuliyanda, babikkila buyo maano kuzintu nzyobayanda. Basikuvwuntauzya bamwi baamba kuti bakubusi mazuba aano balaliyanda kapati kwiinda kaindi. Mbobaambaula alimwi ambobasama, batondezya kuti balabanyansya bamwi, kwaambisya bantu bapati naa bacembeede.

⁴ Muuya uuli boobu ulituzingulukide. Aboobo, babelesi ba Jehova ibacili bana bajana kuti bayandika kubeleka canguzu kutegwa beelebe muuya uuli boobu akulanga zintu mbwazilanga Jehova. Nomuba mumwaanda wamyaka wakusaanguna, Paulo wakabona kuti cakali kuyandika kukulwaizya basyominyina kweeleba “imuuya ooyo lino uubeleka mubana batamvwi” alimwi mwalo ‘mobakali kweenda aciindi cimwi.’ (Amubale Baefeso 2:1-3.) Beelede kulumbwa bakubusi ibabona kuti cilayandika kweeleba muuya ooyu akuti beelede kubeleka calukamantano antoomwe a Banakristonyina. Kulanga zintu munzila iili boobu kuleendelana ancaakaamba Paulo kuti “tuli zizo zyamubili omwe.” (Ef. 4:25) Ciindi mamanino aanyika eeyi nayaabuswena afwaafwi, kubelekela antoomwe calukamantano kuyakuyandika kapati. Atulange-lange zikozyanyo zyamu Bbaibbele zitiitugwasye kubona ncociyandika kujatana antoomwe, nkokuti kukamantana.

5, 6. Nciiyo nzi icijatikizya kukamantana ncotwiiya kumakani aa Loti abana bakwe basimbi?

⁵ Kaindi, Jehova wakakkomana kukwabilila bantu bakwe nobakakamantana kutegwa bagwasyanye umwi amweenzinyina muziindi zyamapenzi. Babelesi ba Leza bamazuba aano, bana naa bapati, balakonzya kwiiya kuzwa kuzikozyanyo zyamu Bbaibbele. Cikozyanyo cimwi cijatikizya Loti.

⁶ Loti amukwasyi wakwe bakali muntenda nkaambo munzi wa Sodomu mobakali kukkala, wakali kuyakunyonyoonwa. Mungelo wa Leza wakakulwaizya Loti kuti azwe mumunzi akuyakujana lukwabililo mumalundu, wakaambilwa kuti: “Amutije kutegwa mufwutuke!” (Matl. 19:12-22) Loti wakaswiilila, alimwi bana bakwe basimbi bobilo abalo bakazwa mumunzi antoomwe anguwe. Cuusisya ncakuti bamwi bamumukwasyi tiibakaswiilila. Basankwa ibakali kuyanda kukwata bana bakwe basimbi bakali kuyeeya kuti mudaala Loti “usobana buya.” Kuyeeya kuli boobu kwakapa kuti bafwe. (Matl. 19:14) Loti alikke antoomwe abana bakwe basimbi ibakakamantana anguwe mbebakafwutuka.

7. Ino Jehova wakabagwasya buti aabo ibakatondezya muuya walukamantano ciindi bana Israyeli nobakazwa mu Egepita?

⁷ Atulange-lange cikozyanyo acimbi. Ciindi bana Israyeli nobakazwa mu Egepita, tiibakazwa kabali tubunga-bunga tutakamantene, itwakali kugama kumasena aaindene-indene. Alimwi ciindi Musa ‘naakatandabika ijanza lyakwe atala aalwizi’ Jehova wakaandaanya lwizi, Musa taakwe naakazabuka alikke naa abana Israyeli basyoonto buyo. Muciindi caboobo, kwiinda mukukwabililwa a Jehova, nkamu yoonse yakazabuka. (Kul. 14:21, 22, 29, 30) Bakatondezya muuya wakukamantana, alimwi “nkamu mpati yabantu bamisyobo-misyobo,” ibatakali bana Israyeli bakabasangana. (Kul. 12:38) Tatukonzyi kuyeeya kuti bantu bamwi basyoonto, ambweni kakamu kasyoonto kabakubusi, kalakonzya kakalipambula akweenda kalikke kubelesya nzila njokakali kuyeeyela kuti nimbotu. Kucita boobo kwakali kukonzya kuba bufwuba-fwuba alimwi kwakali kukonzya kupa kuti batakwabililwi a Jehova.—1Kor. 10:1.

8. Mumazuba aa Jehosafati, ino bantu ba Leza bakatondezya buti kuti bakalikamantene?

⁸ Mumazuba aa Mwami Jehosafati, bantu ba Leza bakasikilwa sinkondo uyoosya, “nkamu mpati” yabantu ibakazwa mumasena aakabazingulukide. (2Mak. 20:1, 2) Cikkomanisya ncakuti, babelesi ba Leza tiibakasola kuzunda sinkondo munguzu zyabo beni pe. Muciindi caboobo, bakasyoma Jehova akulomba lugwasyo lwakwe. (Amubale 2 Makani 20:3, 4.) Alimwi nobakali  kucita boobo tiibakalizandula, taakwe iwakacita zintu kweelana ambwaakali kuyanda mwini. Cibalo camu Bbaibbele citwaambila kuti: “Lino ba Juda boonse bakaliimvwi kubusyu bwa Jehova atwana twabo tuniini, bamakaintu babo alimwi abana babo.” (2Mak. 20:13) Boonse buyo, bana abapati, bakabelekela antoomwe calusyomo kutobela busolozi bwa Jehova, alimwi Jehova wakabakwabilila kuli basinkondonyina. (2Mak. 20:20-27) Sena eeci tacili cikozyanyo cibotu icitondezya mbotweelede kulwana buyumuyumu mbotuli bantu ba Leza?

9. Ncinzi ncotukonzya kwiiya kujatikizya kukamantana kuzintu nzyobakacita Banakristo bakusaanguna alimwi ambobakali kuzilanga zintu?

⁹ Banakristo bakusaanguna abalo bakatondezya kuti bakali kubelekela antoomwe. Mucikozyanyo, ciindi bama Juda banji abasandule nobakaba Banakristo, bakazumanana kubikkila maano “kukuyiisya kwabaapostolo, ikuyanzana antoomwe, ikulida antoomwe alimwi akupaila.” (Mil. 2:42) Kukamantana ooku kwakalibonya kwaambisya nobakali kupenzyegwa, ciindi nobakali kuyandika lugwasyo lwaumwi amweenzinyina. (Mil. 4:23, 24) Sena tamuzumini kuti muziindi zikatazya, cilayandika kapati kubelekela antoomwe?

10. Ino ndilili kukamantana nokuyakuyandika kapati?

¹⁰ Ciindi cikatazya ncobeni citanabwenwe kuzwa lili cilaafwaafwi. Musinsimi Joeli wakacipandulula kuti “mbuzuba bwamudima akusiya.” (Joel. 2:1, 2; Zef. 1:14) Kubantu ba Leza, ciyakuba ciindi cakukamantana. Amuyeeye majwi aa Jesu aakuti: “Bwami buli boonse bwaandeene bulanyonyooka.”—Mt. 12:25.

11. Nkukozyanya kuli buti ikujanika mulugwalo lwa Intembauzyo 122:3, 4 ikukonzya kubelesyegwa kubantu ba Leza mazuba aano? (Amubone cifwanikiso cili kumatalikilo aacibalo.)

¹¹ Lyamapenzi mapati aaboola aajatikizya bweende bwazintu oobu, tuyakuyandika kukamantana ncobeni. Kukamantana kwakumuuya nkotuyakuyandika akati kesu inga kweezyanisyigwa amaanda aakabambene mu Jerusalemu yansiku. Maanda aayo akayakidwe afwaafwi-fwaafwi cakuti sintembauzyo wakaamba Jerusalemu kuti ‘munzi uuswaanganizyidwe koonse-koonse.’ Eeci cakapa kuti bantu bakali kukkala mumunzi kabagwasyanya akukwabililana. Kuyungizya waawo, kubambana kwabo inga kwaiminina lukamantano lwakumuuya lwacisi coonse ciindi “misyobo ya Ja” noyakali kubungana kuti ikombe. (Amubale Intembauzyo 122:3, 4.) Mazuba aano alimwi amazuba aaboola kumbele, tuyakuyandika kuzumanana ‘kuswaanganizyigwa koonse-koonse.’

12. Ncinzi ciyakutugwasya kufwutuka kulwanwa kwabantu ba Leza ikuboola kumbele?

¹² Nkaambo nzi ‘kuswaanganizyigwa koonse-koonse’ ncokuyakuyandika kapati aciindi eeco? Caandaano 38 cabbuku lya Ezekieli cijisi businsimi bujatikizya kulwanwa kwabantu ba Leza a “Gogo wakucisi ca Magogo.” Eeci tacikabi ciindi cakulekela cintu cili coonse kutwaandaanya. Tatukayandiki kulomba nyika kuti itugwasye. Muciindi caboobo, tuyakuyandika kujatana abakwesu. Masimpe, tatukafwutuki akaambo buyo kakuti tuli munkamu. Ciindi eeco cikatazya ncobeni, Jehova a Jesu bayakufwutula baabo ibaita zina lya Jehova. (Joel. 2:32; Mt. 28:20) Nokuba boobo, sena ncamaano kuyeeya kuti aabo ibaalilwa kuzumanana kukamantana kabali cibeela cabutanga bwa Leza—aabo ibakazanduka lwabo beni—bayakufwutuka?—Mik. 2:12.

13. Nziiyo nzi nzyobakonzya kwiiya bakubusi ibayoowa Leza kuzikozyanyo nzyotwalanga-langa kale?

¹³ Aboobo, sena tacisalede kuti tacili camaano kutobela nzila zyabakubusi ibalizandula? Ciindi caswena afwaafwi notuyakuyandika umwi amweenzinyina. Alimwi eeci caamba ndiswe toonse, bana abapati! Inzya, eeci nceciindi cakwiiya kubelekela antoomwe,  kukamantana ikuyakuyandika kapati mumazuba aali kumbele.

14, 15. (a) Ino makanze nzi Jehova ngajisi nayiisya bana abapati mazuba aano? (b) Ino Jehova utupa lulayo nzi ilutukulwaizya kukamantana?

¹⁴ Jehova ulatugwasya kuti ‘katumubelekela calukamantano.’ (Zef. 3:8, 9) Ulatuyiisya kulibambila buumi bwakumbele. Ino eeci cibikkilizya nzi? Makanze aakwe ngakuti ‘ayobolole zintu zyoonse antoomwe muli Kristo.’ (Amubale Baefeso 1:9, 10.) Inzya, uyanda kukamantanya zilenge zyakwe zyoonse zilisungwide kujulu aanyika, alimwi uyakuzwidilila kucita boobo. Nobakubusi, sena eeci cilamugwasya kubona mbociyandika kubelekela antoomwe ambunga ya Jehova?

¹⁵ Jehova utuyiisya kukamantana lino, amakanze aakuti katukamantene kukabe kutamani. Cakwiinduluka-induluka Magwalo atwaambila kuti tweelede ‘kubikkilana maano,’ ‘kuyandana kapati,’ “kuumbulizyanya,” alimwi “akuyakana umwi amweenzinyina.” (1Kor. 12:25; Rom. 12:10; 1Tes. 4:18; 5:11) Jehova ulizyi kuti Banakristo tabalondokede, alimwi eeci inga capa kuti cikatazye kukamantana, aboobo tweelede kubeleka canguzu “kulekelelana camoyo woonse.”—Ef. 4:32.

16, 17. (a) Ino nkaambo nzi kamwi ncotucitila miswaangano ya Bunakristo? (b) Ncinzi ncobakonzya kwiiya bakubusi kucikozyanyo ca Jesu naakacili mukubusi?

¹⁶ Jehova alimwi utupa miswaangano ya Bunakristo kuti itugwasye kukamantana. Kanji-kanji tulabala kukulwaizya nkotujana mulugwalo lwa Bahebrayo 10:24, 25. Kaambo kamwi ncotucitila miswaangano eeyi ‘nkakukulwaizyanya kutondezya luyando akucita milimo mibotu.’ Nokuba boobo, cilayandika kapati kuzyiba kuti miswaangano ilabambwa kutegwa ‘katukulwaizyanya umwi amweenzinyina, alimwi akuzumanana kucita boobo ikapati mbotubwene kuti buzuba bwaswena afwaafwi.’

¹⁷ Naakacili mukubusi, Jesu wakapa cikozyanyo cibotu cakulumba bubambe buli boobu. Naakali amyaka yakuzyalwa iili 12, wakali antoomwe abazyali bakwe kumuswaangano mupati wakumuuya. Aciindi cimwi, taakazyibidwe nkwaakabede, pele ikutali kuti wakalipambula abakubusi bamwi. Muciindi caboobo, ba Josefa a Mariya bakamujana mutempele kabandika zintu zyakumuuya abamayi.—Lk. 2:45-47.

18. Ino mipailo yesu inga yagwasya buti kutegwa kube lukamantano?

¹⁸ Kuyungizya akuyandana alimwi akubelesya miswaangano ya Bunakristo kuyumya  lukamantano lwesu, tulakonzya kupaililana. Kwiinda mukuzyaamba cacigaminina mumupailo kuli Jehova zintu nzyotulombela bakwesu, citugwasya kuti katubikkilana maano. Eezyi tazili zintu nzyobeelede kucita Banakristo bapati balikke pe. Kuti kamuli mukubusi, sena mulazibelesya zyoolwe eezyi kutegwa mukamantane amukwasyi wanu wakumuuya? Kucita boobu inga kwamugwasya kutegwa musinizye kuti tamukanyonyoonwi antoomwe anyika eeyi.

19-21. (a) Muunzila nzi iilibedelede motutondezya kuti “tuli zizonyina kuli umwi aumwi”? Amupe zikozyanyo. (b) Nciiyo nzi ncomwiiya kuzwa kubakwesu bamwi kweelana ambobakacita ciindi nokwakacitika ntenda?

¹⁹ Bantu ba Jehova bakatalika kale kupona kweelana anjiisyo iili mulugwalo lwa Baroma 12:5 yakuti: “Tuli zizonyina kuli umwi aumwi.” Tulakonzya kusinizya ncolwaamba lugwalo oolu ciindi nokwacitika ntenda. Mu December 2011, kwakali guwo pati ilyakapa kuti meenda apaye ansumbu ya Philippine itegwa Mindanao. Mubusiku bomwe buyo, meenda akapaya mumaanda aainda ku 40,000, kubikkilizya amaanda aabakwesu. Nokuba boobo, ofesi yamutabi yakatuma lipooti yakuti “nociba ciindi makkomiti aagwasya nokwacitika ntenda kaatanatalika kubeleka, bakwesu Banakristo ibali mumasena aambi bakali kutuma zintu zyakugwasya bakwesu.”

²⁰ Mbubwenya buyo, ciindi nokwakacitika muzuzumo mupati iwakapa kuti maanzi apaye mucisi ca Japan nkocili kujwe, bakwesu abacizyi banji bakasweekelwa zintu zinji. Bamwi bakasweekelwa zintu zyoonse. Ba Yoshiko, ibakasweekelwa ŋanda yabo, bakali kukkala kubusena ikulampa makkilomita aali 40 kuzwa ku Ŋanda ya Bwami. Bakaamba kuti: “Nokwakainda ciindi twakagambwa kuzyiba kuti buzuba ibwakatobela kuzwa muzuzumo nowakacitika, mulangizi wabbazu amukwesu umwi bakasika kuyandaula ndiswe.” Kumwi kabamweta-mweta, bakati: “Twakalumba ncobeni kuti kwiinda mumbungano twakajana zintu zinji zyakumuuya nzyotwakali kuyandika. Kuyungizya waawo, twakapegwa zyakusama, mabbusu azibbeeke.” Mukwesu umwi uubeleka mukkomiti iigwasyilizya nokwacitika ntenda wakati: “Bakwesu kuzwa kumasena oonse mucisi ca Japan bakabeleka calukamantano, kusola kugwasya umwi amweenzinyina. Bakwesu bamwi bakeenda musinzo mulamfwu kuzwa ku United States kutegwa bazikugwasyilizye. Ciindi nobakabuzyigwa ncobakeendela musinzo mulamfwu boobu, bakaamba kuti: ‘Tulikamantene abakwesu mu Japan, alimwi bayandika lugwasyo.’” Sena tamukkomene kuba cibeela cambunga ilanganya bantu ibazulilwa mumo? Mulakonzya kusyoma kuti Jehova ulikkomene kapati kubona muuya uuli boobu walukamantano.

²¹ Kuba amuuya uuli boobu lino kuyakutugwasya kulangana amapenzi aboola kumbele calukamantano nokuba kuti twaandaana abakwesu ibali mumasena aambi munyika. Masimpe ngakuti, muuya uuli boobu utuyiisya kulibambilila limwi kujatikizya ziindi zikatazya nzyotuyakuyaanya bwaakunyonyoonwa bweende bwazintu oobu. Ba Fumiko, ibakafwutuka guwo lipati mu Japan bakati: “Mamanino ali afwaafwi. Tweelede kuzumanana kugwasya basyomima notulangila ciindi nokutakabi ntenda zilicitikila.”

22. Nimpindu nzi iitamani njomukonzya kujana kwiinda mukuba alukamantano lwa Bunakristo?

²² Bana abapati ibaiya kukamantana lino balibambila kufwutuka mamanino aanyika eeyi mbyaabi alimwi iitakamantene. Kweelana ambocakabede kaindi, Leza uyakubafwutula bantu bakwe. (Is. 52:9, 10) Lyoonse kamuyeeya kuti mulakonzya kuba akati kabaabo ibayakufwutuka ikuti mwazumanana kuba akati kabantu ba Leza bakamantene. Cimbi alimwi ciyakutugwasya nkuzumanana kulumba zintu nzyotwakatambula kale. Cibalo citobela ciyakulanga-langa makani aaya.