Amwiiye Kulicesya kwa Jesu Alimwi Aluzyalo Lwakwe
“Kristo lwakwe wakapenga akaambo kandinywe, akumusiila citondezyo kutegwa mwiitobelesye mikondo yakwe.”—1PET. 2:21.
1. Nkaambo nzi kwiiya Jesu ncokukonzya kutuswenya afwaafwi a Jehova?
KANJI-KANJI twiiya baabo ibajisi bube alimwi ibacita zintu nzyotulombozya. Akati kabantu boonse ibakapona anyika, kunyina muntu ngotuyandika kwiiya kapati kunze lya Jesu Kristo. Nkaambo nzi ncocili boobo? Aciindi cimwi Jesu lwakwe mwini wakati: “Kufwumbwa ooyo wandibona wamubona awalo Taata.” (Joh. 14:9) Jesu ulabutondezya bube bwa Bausyi munzila iilondokede cakuti kulangilila Mwana cili mbuli kubona Bausyi. Aboobo notwiiya Jesu, tuswena afwaafwi a Jehova, Mupatikampatila mububumbo boonse. Eelo kaka kuli mpindu mpati mukwiiya bube alimwi ambwaakali kucita zintu Mwanaakwe!
2, 3. (a) Nkaambo nzi Jehova ncaakatupeda makani aalembedwe aajatikizya cikozyanyo ncaakatusiila Mwanaakwe, alimwi ncinzi Jehova ncayanda kuti tucite? (b) Ncinzi ncotutiibandike mucibalo eeci alimwi acitobela?
2 Nokuba boobo, mbuti mbotukonzya kuzyiba mbwabede Jesu? Cikkomanisya ncakuti, tulijisi makani aakasololelwa amuuya aalembedwe kujatikizya Jesu. Jehova wakatupa makani aayo, ngotujana mu Magwalo aa Banakristo aa Chigiriki, akaambo kakuti uyanda kuti tumuzyibe Mwanaakwe kutegwa tumwiiye. (Amubale 1 Petro 2:21.) Mu Bbaibbele, cikozyanyo ncaakatusiila Jesu cikozyanisyigwa ‘kumikondo.’ Munzila imwi inga twaamba kuti Jehova utwaambila kuti tweendele musyule lya Jesu akweenda mumikondo yakwe. Mubwini, Jesu wakatusiila cikozyanyo cilondokede, pele swebo tatulondokede pe. Pele Jehova talangili kuti katutobela mikondo ya Jesu munzila iilondokede. Muciindi caboobo, Taata uyanda kuti swebo tumwiiye Mwanaakwe kusikila mpotugolela mbotuli bantu batalondokede.
3 Aboobo atulange-lange bube bumwi bubotu bwa Jesu. Mucibalo eeci, tulabandika kulicesya kwakwe alimwi aluzyalo lwakwe; mucibalo citobela, tuyoolanga-langa busicamba alimwi abupampu bwakwe. Kujatikizya bube bumwi abumwi, tulaingula mibuzyo yotatwe: Ino bube oobu bwaamba nzi? Mbuti Jesu mbwaakabutondezya? Mbuti mbotukonzya kumwiiya?
JESU ULALICESYA
4. Ino kulicesya inga mwakupandulula buti?
4 Ino kulicesya caamba nzi? Munyika eeyi bantu mobalisumpula, ibamwi inga bayeeya kuti kulicesya citondezya kukompama na kulitenga. Pele kanji-kanji, eeci tacili boobu pe. Kulicesya kuyandika kuba anguzu alimwi akuba sicamba. Kulicesya kupandululwa kuti “mbube bwiindene abube bwakulisumpula naa bwamuntu sinkazi.” Kulicesya kutalika ambotuyeeya kujatikizya lwesu kutugama. Ibbuku limwi ilipandulula mabala aamu Bbaibbele lyaamba kuti, “Kulicesya caamba kuzyiba mbotuli bantu baansi kapati kuli Leza.” Ikuti katuli bantu balicesya ncobeni kuli Leza, tuyookutantamuka kulibona kuti tulabainda bantuma. (Rom. 12:3; Flp. 2:3) Tacili cuuba-uba kubantu batalondokede kuba abube bwakulicesya. Pele tulakonzya kwiiya kuba bantu balicesya ikuti naa twalanga mbwatubona Leza akutobela mikondo ya Mwanaakwe.
5, 6. (a) Ino Mikayeli silutwe wabangelo nguni? (b) Mbuti Mikayeli mbwaakatondezya bube bwakulicesya?
5 Mbuti Jesu mbwaakakutondezya kulicesya? Mwana wa Leza wali kulicesya kwaciindi cilamfwu, wakakutondezya kali cilenge canguzu kujulu alimwi anaakali muntu uulondokede anyika. Amubone zikozyanyo zisyoonto.
6 Bube bwakwe. Mulembi wa Bbaibbele Juda wakalemba cikozyanyo cijatikizya Jesu katanaboola anyika. (Amubale Juda 9.) Kali Mikayeli silutwe wabangelo, Jesu ‘wakaimpana a Diabolosi’ alimwi wakali “kukazyanya” amubyaabi ooyo. Kaambo kakali kujatikizya “mubili wa Musa.” Amuyeeye kuti Musa naakafwa, Jehova wakauzikka mubili mubusena butazyibidwe. (Dt. 34:5, 6) Ambweni Diabolosi wakali kuyanda kubelesya mubili wa Musa kutegwa asumpule bukombi bwakubeja. Kufwumbwa makanze mabyaabi Diabolosi ngaakajisi mumizeezo, Mikayeli cabusicamba wakaakazya. Bbuku limwi lyaamba kuti ibbala lya Chigiriki lyakuti ‘wakaimpana’ alyakuti wakali “kukazyanya” alabelesyegwa “kujatikizya kuzwangana mumakani aamulawo” alimwi alakonzya kutondezya “kuti Mikayeli ‘wakakazya nguzu nzyajisi Diabolosi’ zyakubweza mubili wa Musa.” Nokuba boobo, Silutwe Wabangelo wakalizyi kuti tiiwakali mukuli wakwe kumubeteka. Muciindi caboobo, kaambo aaka wakakatola ku Mubetesi Mupati, Jehova. Aboobo Mikayeli wakalikasya kusotoka nguzu nzyaakajisi, noliba leelyo naakakalazyigwa. Eelo kaka tabuliboteli bube bwakulicesya mbwaakatondezya!
7. Mbuti Jesu mbwaakatondezya kulicesya muŋambawido yakwe alimwi amuzintu nzyaakali kucita?
7 Mumulimo wakwe naakali anyika, Jesu wakaamba akucita zintu munzila iyakayubununa kulicesya kwini-kwini. Ŋambawido yakwe. Kunyina naakaliyandawida mpuwo pe. Muciindi caboobo, bulemu boonse wakabugamika kuli Bausyi. (Mk. 10:17, 18; Joh. 7:16) Tanaakabanyansya basikwiiya bakwe naa kubapa kuti balimvwe kubula mpindu. Muciindi caboobo, wakabalemeka, wakabalumbaizya kububotu mbwaakabona mulimbabo alimwi akutondezya lusyomo mulimbabo. (Lk. 22:31, 32; Joh. 1:47) Zintu nzyaakali kucita. Jesu wakasala kupona buumi bwaansi kakunyina kulivwuzizya zintu zinji zyakumubili. (Mt. 8:20) Cakulisungula wakabeleka milimo yaansi kapati. (Joh. 13:3-15) Wakapa citondezyo cilondokede cakulicesya kwiinda mukumvwida kwakwe. (Amubale Bafilipi 2:5-8.) Mukwiimpana abantu balisumpula ibatayandi kumvwida, Jesu cakulicesya wakalyaaba kukuyanda kwa Leza kujatikizya nguwe, alimwi “akumvwida mane kusikila kulufwu.” Sena tacisalede kuti Jesu, Mwana aamuntu wakali “mubombe moyo”?—Mt. 11:29.
AMWIIYE KULICESYA KWA JESU
8, 9. Mbuti mbotukonzya kutondezya kulicesya?
8 Mbuti mbotukonzya kwiiya kulicesya kwa Jesu? Bube bwesu. Kulicesya kutupa kutasotoka nguzu nzyotujisi. Ikuti naa twazyiba kuti tatweelede kubeteka, tatukafwambaani kubatongooka bamwi akaambo kakulubizya kwabo naa kudooneka makanze aabo. (Lk. 6:37; Jak. 4:12) Kulicesya kulatugwasya kweeleba ‘kuciindizya kululama,’ kusampaula baabo ibatajisi nguzu naa mikuli njotujisi. (Muk. 7:16) Baalu ibalicesya tabaliboni kuti balabainda basyominyina. Muciindi caboobo, ibeembezi bali boobo ‘babona bamwi kuti balabainda’ alimwi bacita zintu mbuli muniini.—Flp. 2:3; Lk. 9:48.
9 Amubone cikozyanyo caba W. J. Thorn, ibakabeleka kabali balangizi beendeenda kutalikila mu 1894. Nobakabeleka myaka minji mumulimo ooyo, bakaitwa ku Kingdom Farm mudolopo lya New York nkoili kumbo akutalika kubeleka mucaanda cankuku. Mboobu mbobakaamba: “Kufwumbwa buyo ndalimvwa kuti ndatalika kulisumpula, ndilaunka ambali akulyaambauzya kuti: ‘Yebo oolusuko buyo. Ino ncinzi ncojisi icikupa kulisumpula?’” (Amubale Isaya 40:12-15.) Eelo kaka ooku nkulicesya ncobeni!
10. Mbuti mbotukonzya kutondezya kulicesya muŋambawido yesu alimwi amuzintu nzyotucita?
10 Ŋambawido yesu. Ikuti naa masimpe tulalibombya mumoyo, majwi eesu ayootondezya kulicesya. (Lk. 6:45) Notubandika abamwi, tuyakweeleba kubikkila kapati maano kuzintu swebo nzyotwakacita alimwi amikuli njotujisi. (Tus. 27:2) Muciindi caboobo, tuyoobona bubotu mbobajisi bakwesu abacizyi alimwi akubalumbaizya akaambo kabube bwabo bubotu, zintu nzyobakonzya kucita alimwi azintu nzyobali mukuzuzikizya. (Tus. 15:23) Zintu nzyotucita. Banakristo ibalicesya tabayandi kuba ampuwo munyika eeyi. Cilainda kubota kulimbabo kupona buumi buuba-uba, nokuba kucita milimo eeyo bantu bamunyika eeyi njobabona kuti milimo yaansi kutegwa bamubelekele Jehova kusikila mpobagolela. (1Tim. 6:6, 8) Kwiinda zyoonse, tulakonzya kutondezya kulicesya kwiinda mukumvwida kwesu. Kuyandika kulibombya mumoyo kutegwa ‘katubamvwida aabo basololela’ mumbungano alimwi akutobela busolozi mbotupegwa kwiinda mumbunga ya Jehova.—Heb. 13:17.
JESU NGUSILUZYALO
11. Amupandulule ncolwaamba luzyalo.
11 Ino luzyalo ninzi? Ibbala lyakuti “luzyalo” lyaamba “kuba mutete moyo naa kuba mubombe moyo.” Luzyalo ncibeela caluyando alimwi lulakozyanya abube butondezya “kuteta moyo” mbuli lubomba alimwi aluse. Magwalo alaamba kujatikizya “moyo waluzyalo” “luse” alimwi “aluyando lwamumoyo.” (Lk. 1:78; 2Kor. 1:3; Flp. 1:8) Kujatikizya ncaamba Magwalo kumakani aalubomba, bbuku limwi ilyaamba zyamu Bbaibbele lyaamba kuti: “Eeco tacaambi kuti swebo tweelede kubafwida buyo lubomba bacete pe. Pele caamba kubabikkila maano kapati alimwi akubagwasya kwiinda mukubweza ntaamu zikonzya kugwasya bamwi kutegwa zintu zitalike kubeendela kabotu.” Luzyalo mbobube bukonzya kutukulwaizya kucita boobu. Muntu siluzyalo ugwasya bamwi kuba abuumi bubotu.
12. Ncinzi citondezya kuti Jesu wakabafwida luzyalo bantu, alimwi ino luzyalo lwakwe lwakamupa kucita nzi?
12 Mbuti Jesu mbwaakatondezya luzyalo? Luzyalo lwakwe azintu nzyaakali kucita caluzyalo. Jesu wakali kubafwida luzyalo bantu. Ciindi naakabona mulongwaakwe Mariya alimwi abaabo mbaakalilimwi kabalila akaambo kalufwu lwamwanookwabo Lazaro, Jesu caantangalala “yakamweenda misozi.” (Amubale Johane 11:32-35.) Mpoonya, ambweni akaambo kakweetezyegwa mumoyo—mbubonya mbuli ciindi naakabusya mwana wamukamufwu—wakamubusya Lazaro. (Lk. 7:11-15; Joh. 11:38-44) Kwiinda mukutondezya luzyalo munzila eeyi, Jesu wakapa Lazaro bulangizi bwabuumi bwakujulu. Aciindi cimwi musyule, Jesu “wakabeetelela” bantu ibakaboola kulinguwe. Kwiinda mukubafwida lubomba, “wakatalika kubayiisya zintu zinji.” (Mk. 6:34) Eelo kaka bakacinca kapati bantu boonse ibakacita kweelana anzyaakali kuyiisya! Amubone kuti luzyalo lwa Jesu tacili cintu ncaakali kulimvwa buyo; lwakamupa kubweza ntaamu kugwasya bamwi.—Mt. 15:32-38; 20:29-34; Mk. 1:40-42.
13. Muunzila nzi Jesu mbwaakaamba caluzyalo kuli bamwi? (Amubone cifwanikiso icili kumatalikilo aacibalo.)
13 Majwi aakwe aaluzyalo. Moyo wa Jesu waluzyalo wakamupa kwaamba caluzyalo kubantu, kwaambisya kuli baabo ibakadyaaminidwe. Mwaapostolo Matayo wakabelesya majwi aaya aa Isaya ikwaamba Jesu naakati: “Takatyoli tete lipwayikide, alimwi takakazimi katambo kalambe kasuka busi.” (Is. 42:3; Mt. 12:20) Jesu wakabandika munzila iiyakali kukulwaizya baabo ibakali mbuli tete lityokede naa katambo kalambe kasuka busi ikayanda kuzima. Wakakambauka mulumbe iwakali kupa bulangizi kutegwa “aange zilonda zyabaabo batyompedwe mumoyo.” (Is. 61:1) Wakabatamba aabo ‘ibakakatede akulemenwa’ kuti baboole kulinguwe, kabasyomezya kuti bakali ‘kuyookatalusyigwa.’ (Mt. 11:28-30) Wakasyomezya basikumutobela bakwe kuti Leza ulijisi luzyalo kumukombi wakwe umwi aumwi, kubikkilizya “abasyoonto”—aabo ibalibonya kuti tabayandiki kapati kweelana ambobazibona zintu bantu bamunyika eeyi.—Mt. 18:12-14; Lk. 12:6, 7.
AMWIIYE LUZYALO LWA JESU
14. Mbuti mbotukonzya kubafwida luzyalo bamwi?
14 Mbuti mbotukonzya kumwiiya Jesu mukutondezya luzyalo? Kufwida bamwi luzyalo. Kucita boobo takulibooleli buyo, pele Bbaibbele litukulwaizya kubeleka canguzu kutegwa tube abube oobu. “Luyando lwamoyo walubomba” ncibeela cabuntu bupya mbobeelede kusama Banakristo boonse. (Amubale Bakolose 3:9, 10, 12.) Mbuti mbomukonzya kubafwida luzyalo bamwi? Amujalule moyo wanu. (2Kor. 6:11-13) Amuswiililisye ciindi umwi namwaambila mbwalimvwa alimwi azintu zimulibilisya. (Jak. 1:19) Amweezyeezye alimwi akulibuzya kuti: ‘Ikuti nindali mubukkale bwakwe, ino inga ndalimvwa buti? Ino inga ndayandika nzi?’—1Pet. 3:8.
15. Ncinzi ncotukonzya kucita kutegwa tubagwasye aabo ibali mbuli tete lipwayikide naa katambo kalambe kasuka busi?
15 Zintu nzyotucita caluzyalo. Luzyalo lutukulwaizya kugwasya bamwi kutegwa babe abuumi bubotu, kwaambisya aabo ibali mbuli tete lipwayikide naa katambo kalambe kasuka busi. Mbuti mbotukonzya kubagwasya? Lugwalo lwa Baroma 12:15 lwaamba kuti: “Amulile abaabo balila.” Ncobayandika kapati bantu ibatyompedwe ndweetelelo ikutali nzila mbwaakonzya kumanizyigwa mapenzi ngobajisi. Mucizyi umwi iwakaumbulizyigwa abasyominyina ciindi naakafwidwa mwanaakwe musimbi wakati: “Ndakalumba kapati ciindi beenzuma nobakaboola akulila antoomwe andime.” Andiswe tulakonzya kubafwida luzyalo bamwi kwiinda mukucita zintu zitondezya luzyalo. Sena kuli mukamufwu ngomuzyi uuyandika kugwasya kubambulula ŋanda yakwe? Sena kuli Munakristo uucembeede uuyandika kugwasya kutegwa aunke kumiswaangano, mumulimo wamumuunda, naa kuunka kucibbadela? Nokaba kantu kasyoonto nkomukonzya kucita caluyando kalakonzya kumukulwaizya kapati mukombinyoko uuyandika lugwasyo. (1Joh. 3:17, 18) Icipati kwiinda, tulakonzya kubafwida luzyalo bamwi kwiinda mukutola lubazu cakumaninina mumulimo wakukambauka. Kunyina nzila iinda yeeyi iisumpula buumi bwabantu babombe myoyo!
Sena mulababikkila maano ncobeni basyominyoko? (Amubone muncali 15)
16. Ncinzi ncotukonzya kwaamba kutegwa tubakulwaizye aabo ibatyompedwe?
16 Majwi eesu aaluzyalo. Luzyalo ndotujisi kuli bamwi lutupa ‘kubaumbulizya aabo ibatyompedwe.’ (1Tes. 5:14) Ncinzi ncotukonzya kwaamba kutegwa tubakulwaizye aabo ibali boobu? Tulakonzya kubakulwaizya kwiinda mukubalanganya akubabikkila maano. Tulakonzya kubalumbaizya kuzwa ansi aamoyo kutegwa tubagwasye kubona bube bwabo bubotu alimwi azintu nzyobakonzya kucita. Tulakonzya kubayeezya kuti Jehova wakabakwela ku Mwanaakwe, aboobo beelede kuti balayandika kapati kulinguwe. (Joh. 6:44) Tulakonzya kubakazikka moyo kwiinda mukubaambila kuti Jehova ulababikkila maano kapati babelesi bakwe “batyompedwe mumoyo” naa “bapengede mumizeezo.” (Int. 34:18) Majwi eesu aaluzyalo alakonzya kubaponya aabo ibayandika luumbulizyo.—Tus. 16:24.
17, 18. (a) Ino Jehova uyanda kuti baalu kabazilanganya buti mbelele zyakwe? (b) Ncinzi ncotuyoolanga-langa mucibalo citobela?
17 Nobaalu, Jehova uyanda kuti kamulanganya mbelele zyakwe caluzyalo. (Mil. 20:28, 29) Amuzyibe kuti, mukuli wanu kusanina, kukulwaizya, alimwi akukatalusya mbelele zyakwe. (Is. 32:1, 2; 1Pet. 5:2-4) Aboobo, mwaalu uujisi luzyalo kubakwesu tanoobeendelezyi munzila iitali kabotu, kubabikkila milawo naa kubapa kuti balimvwe kuba amulandu kutegwa abasinikizye kucita zintu zinji ciindi bukkale bwabo nobutabazumizyi. Muciindi caboobo, ulasolekesya kubakkomanisya, kasyomede kuti luyando ndobajisi kuli Jehova luyakubakulwaizya kumubelekela kusikila mpobagolela.—Mt. 22:37.
18 Mbotuyaabuzumanana kuzinzibala kuyeeya kulicesya alimwi aluzyalo lwa Jesu, masimpe tulakulwaizyigwa kuzumanana kutobela mikondo yakwe. Mucibalo citobela, tuyoolanga-langa zibeela azimbi zyabube bwa Jesu izikulwaizya, nkokuti busicamba alimwi abupampu.
