LYAMUSWAANGANO waalubazu ku Nagoya, Japan, mu April 28, 2013, baswiilizi bakagambwa akukkomana kapati ciindi mukwesu Anthony Morris wamu Kabunga Keendelezya naakaambilizya kumwaigwa kwabbuku lipya mumwaambo wa Chijapanizi lyakuti Bbaibbele—Makani Mabotu Aakaluulwa a Matayo. Bantu bainda ku 210,000 ibakaliko alimwi abaabo ibakali kuswiilila pulogilamu kwiinda mukubelesya intaneti bakakamba kwaciindi cilamfwu.

Ibbuku eeli lya Makani Mabotu aa Matayo ilijisi mapeeji aali 128, lililibedelede. Lyakalembwa kuzwa ku Bbaibbele lya Busanduluzi Bwanyika Mpya lyamumwaambo wa Chijapanizi. Mukwesu Morris wakapandulula kuti lyakabambilwa “kugwasya bana Japan.” Ino bbuku eeli lyamu Bbaibbele lijisi zibeela nzi? Nkaambo nzi ncolyakabambilwa? Alimwi ino bantu balitambula buti?

Baswiilizi bakagambwa kubona mbolibambidwe bbuku eeli lya Matayo. Mumwaambo wa Chijapanizi, mabala alakonzya kulembwa kuzwa kulumwensyi kuya kululyo naa kuzwa atala lyapeeji kuya ansi mizila yamabala kayiimvwi, alimwi amabbuku aali mbwaabede—kubikkilizya amabbuku eesu aalino-lino—alalembwa kuzwa kulumwensyi kuya kululyo. Nokuba boobo, mabala mubbuku eeli lipya alembedwe kutalikila atala lyapeeji kuya ansi mizila yamabala kayiimvwi, nzila yalo njobabelesya kulemba miteende mumwaambo wa Chijapanizi alimwi amabbuku aamwi. Bantu banji ibabala Chijapanizi baamba kuti nzila eeyi taikatazyi kubala. Kuyungizya waawo, tutwe twamakani ituli atala aamapeeji twakabikkwa mukati muzibalo kuba tutwe twamakani kutegwa kacuuba-uba kuli basikubala kujana twaambo tupati-pati.

Bakwesu abacizyi baku Japan bakazikkomanina zibeela zyabbuku lya Matayo akutalika kulibelesya mpoonya-mpoonya. Mucizyi umwi uujisi myaka yakuzyalwa iili kuma 80 wakaamba kuti: “Bbuku lya Matayo ndalibala ziindi zinji, pele kulemba kutalikila atala lyapeeji kuya ansi mizila yamabala kayiimvwi alimwi akubikka tutwe twamakani kwandigwasya kumvwisya Mulumbe Waacilundu kwiinda kaindi.” Mucizyi mukubusi umwi wakalemba kuti: “Ndakalimanizya kulibala bbuku lya Matayo mbundakalijatila buyo ciindi comwe. Ndizyibide kulemba kuzwa kulumwensyi kuya kululyo, pele bana Japan banji balombozya bulembo bwakulemba kutalikila atala lyapeeji kuya ansi mizila yamabala kayiimvwi.”

Nkaambo nzi bbuku lyomwe eeli lyamu Bbaibbele ncolikonzya kugwasya bana Japan? Nokuba kuti bana Japan banji tabalizyi kabotu Bbaibbele, balazumina kulibala. Bbuku eeli lya Makani Mabotu aa Matayo liyoobapa coolwe cakubala cibeela eeci camalembe aasetekene aabo ibatanalibona Bbaibbele.

Nkaambo nzi ncokwakasalwa bbuku lya Matayo? Kubana Japan banji, ikumvwa buyo ibbala lyakuti “Bbaibbele,” bayeeya Jesu Kristo. Aboobo, ibbuku lya Matayo lyakasalwa akaambo kakuti lilijisi mulongo wazyalani lya Jesu amakani aajatikizya kuzyalwa kwakwe, Mulumbe wakwe Waacilundu uuzyibidwe kapati, alimwi abusinsimi bwakwe bujatikizya mazuba aamamanino—makani aakonzya kubakkomanisya bana Japan banji.

 Basikumwaya ba Bwami mu Japan bakatalika kwaabila bbuku eeli lipya cabusungu mumulimo wakuŋanda aŋanda alimwi anobacita nyendo zyakupilukila. Mucizyi umwi wakaamba kuti: “Lino ndilijisi coolwe cipati cakwaabila Jwi lya Leza kubantu bamucilawo cangu. Alimwi buya, masyikati, mubuzuba mbubwenya bwamuswaangano waalubazu ndakacikonzya kwaabila bbuku lya Matayo!”

Ino basikumwaya batalisya buti mubandi nobayanda kwaabila bbuku lya Matayo? Bana Japan banji balaazyi majwi aakuti “mulyango uusyanikide,” “kufwusila ngulube ngale,” alimwi amajwi aakuti “mutanoolibiliki zyabuzuba butobela.” (Mt. 6:34; 7:6, 13) Balagambwa kuzyiba kuti ngu Jesu Kristo wakaamba majwi aaya. Ciindi nobabona kuti majwi aaya alajanika mubbuku lya Makani Mabotu aa Matayo, banji baamba kuti: “Lyoonse ndalikulombozya kulibala Bbaibbele nociba ciindi comwe buyo.”

Ciindi basikumwaya nobapilukila kubantu mbobakaabila bbuku lya Matayo, kanji-kanji bamukamwini ŋanda baamba kuti bakabala cibeela cabbuku naa lyoonse mbobakalitambwida buyo. Mwaalumi umwi uujisi myaka yakuzyalwa iili kuma 60 wakaambila sikumwaya umwi kuti: “Ndakalibala cakwiinduluka-induluka alimwi lyakanduumbulizya. Ndalomba kuti undiyiisye azimbi kujatikizya Bbaibbele.”

Bbuku lya Matayo lilaabilwa mubukambausi bwakubuleya. Ciindi naakali kukambauka kubuleya, mucizyi umwi wakapa kkeyala yakwe yaa intaneti mukaintu mukubusi ngwaakaabila bbuku lya Matayo. Nokwakainda buyo woola lyomwe, mukaintu ooyo wakatumina mucizyi kagwalo kaa intaneti kumwaambila kuti wabala cibeela cimwi cabbuku eeli lyamu Bbaibbele alimwi akuti wakali kuyanda kuzyiba zinji. Nokwakainda nsondo yomwe wakatalika kwiiya Bbaibbele, tiilyakalampa, wakatalika kujanika kumiswaangano.

Mabbuku aainda ku 1.6 miliyoni aabbuku eeli lya Bbaibbele—Makani Mabotu Aakaluulwa a Matayo atuminwa mumbungano mucisi ca Japan, alimwi mwezi amwezi Bakamboni balaabila zyuulu-zyuulu zyabbuku eeli. Majwi aantalisyo aabbuku eeli ajisi majwi aakalembwa abasikumwaya bbuku eeli aakuti: “Tulijisi bulangizi bwakuti kubala bbuku eeli kulayumya luyandisisyo lwanu kujatikizya Bbaibbele.”