“Oobu Mbookayanda”
“Wazisisa cakulomya zintu eezyi kubasongo abacenjede, pele waziyubunwida bana basyoonto.”—LUKA. 10:21.
1. Ncinzi icakapa kuti Jesu ‘akondwe kapati mumuuya uusalala’? (Amubone cifwanikiso icili kumatalikilo aacibalo.)
AMWEEZYEEZYE kuti muli mubwene Jesu Kristo ‘kakondedwe kapati mumuuya uusalala.’ Ambweni inga mweezyeezya kuti muli mubwene kamwetamweta, kumwi kazingulusya meso akaambo kakukkomana kapati. Ncinzi icakamupa kukkomana kapati? Kwakaindide buyo ciindi cisyoonto kuzwa ciindi naakatumide basikwiiya bakwe ibali 70 kuyakukambauka makani mabotu aa Bwami bwa Leza. Wakali kuyanda kuzyiba mbobakali kuyakuubeleka mulimo ngobakapedwe. Kwakali basinkondo bamakani mabotu ibanji alimwi ibakali kuyoowegwa, basinkondo mbuli balembi alimwi aba Farisi ibakali basongo alimwi ibakayiide kapati. Bakeena bantu banji kutegwa kababona Jesu kuti muntu buyo sikubeza mapulanga alimwi akubona basikwiiya bakwe kuti “tiibakayiide alimwi bakali bantu-bantu buyo.” (Mil. 4:13; Mk. 6:3) Nokuba boobo, basikwiiya bakapiluka kabakkomene kapati. Bakacikonzya kukambauka nokuba kuti bakali kukazyigwa abantu, alimwi buya aalo amadaimona akali kubakazya. Ncinzi icakabapa kukkomana alimwi akuba basicamba?—Amubale Luka 10:1, 17-21.
2. (a) Muunzila nzi basikwiiya ba Jesu mbobakali mbuli bana? (b) Ncinzi cakagwasya basikutobela Kristo kumvwisya kasimpe kakumuuya ikayandika kapati?
2 Amubone Jesu ncaakaamba kuli Jehova, wakati: “Ndakutembaula caantangalala Taata, O Mwami wakujulu aanyika, nkaambo wazisisa zintu eezyi kubasongo abacenjede, pele waziyubunwida bana basyoonto. Inzya Taata, nkaambo oobu mbookayanda.” (Mt. 11:25, 26) Jesu tanaakali kwaamba kuti basikwiiya bakwe bakali bana mumyaka yakuzyalwa. Muciindi caboobo, wakalizyi kuti bakali kubonwa mbuli kuti mbana ikuti beezyanisyigwa abantu ibakali basongo alimwi ibakayiide kapati, balo ibakali basongo mumeso aabo beni. Kwiinda zyoonse, Jesu wakayiisya basikumutobela kuba mbuli bana kwiinda mukulicesya alimwi akulibombya. (Mt. 18:1-4) Mbuti mbobakagwasyigwa akaambo kakulicesya? Kwiinda mumuuya uusalala, Jehova wakabagwasya kumvwisya kasimpe kakumuuya ikayandika kapati, mpoonya bantu basongo ibakali kubafwubaazya, bakazumanana koofwaazyigwa a Saatani alimwi akulisumpula kwabo.
3. Ncinzi ncotutiilange-lange mucibalo eeci?
3 Tacigambyi kuti Jesu wakakondwa kapati! Wakakkomana kubona Jehova mbwaakakayubununa kasimpe kakumuuya kubantu bamisyobo yoonse ibakali kubonwa kuti mbantu-bantu buyo, tacikwe makani naa bakali basongo, bakaliyiide naa pe. Wakakkomana kuzyiba kuti Bausyi bakali kwiikkomanina nzila eeyi yakuyiisya. Sena Jehova wakacinca, alimwi mbuti mbwatondezya kuti uciikkomanina nzila eeyi yakuyiisya? Ciindi notulanga-langa bwiinguzi kumibuzyo eeyi, tulakonzya kukkomana mbubwenya mbuli Jesu mbwaakakkomana.
KUGWASYA BANTU BOONSE KUTI BAKONZYE KUMVWISYA KASIMPE
4. Muunzila nzi magazini ya Ngazi Yamulindizi yamu Chingisi iilembedwe munzila ngubauba moili cipego caluyando?
4 Mumyaka misyoonto yainda, malailile aakumuuya aapegwa ambunga ya Jehova ali kupegwa munzila ngubauba alimwi iitakatazyi kumvwa. Amubone zikozyanyo eezyi zyotatwe. Cakusaanguna, kuli magazini ya Ngazi Yamulindizi yamu Chingisi iilembedwe munzila ngubauba. * Magazini eeyi yabagwasya kapati bantu ibatazyi kabotu Chingisi naa ibajisi buyumuyumu bwakubala mwaambo wa Chingisi, yaba mbuli cipego caluyando kubantu bali boobu. Basilutwe bamikwasyi bajana kuti bana babo lino balatola lubazu mukwiiya magazini eeyi, inzila iibelesyegwa kapati kutegwa tusaninwe kumuuya. Bantu banji balemba magwalo aakulumba. Mucizyi umwi wakalemba kuti wakalilekede kutola lubazu mu Ciiyo ca Ngazi Yamulindizi. Wakaamba kuti: “Ndakali kuumuna buyo lyaciiyo.” Naakatalika kubelesya magazini ngubauba wakaamba kuti: “Lino ndilatola lubazu kapati, ndakacileka kuyoowa! Ndilamulumba Jehova alimwi andinywe.”
5. Mbubotu nzi bumwi bujanika mu Bbaibbele lya Busanduluzi Bwanyika Mpya ilyakalembululwa?
5 Cabili, kuli Bbaibbele lya Busanduluzi Bwanyika Mpya ilyakalembululwa, ilyakamwaigwa amuswaangano waamwaka mu October 5, 2013. * Magwalo manji lino ajisi mabala masyoonto, pele mulumbe taucincide pe alimwi taakatazyi kumvwa. Mucikozyanyo, mu Bbaibbele lya Chingisi, lugwalo lwa Jobu 10:1 lujisi buyo mabala aali 19 kakuli lyakaindi lyakajisi mabala aali 27; lugwalo lwa Tusimpi 8:6 lujisi mabala aali 13 kakuli lyakaindi lyakajisi mabala aali 20. Magwalo oonse aaya taakatazyi kumvwa mu Bbaibbele eeli ilyakalembululwa. Mukwesu umwi munanike iwabeleka myaka minji cakusyomeka, wakaamba kuti: “Nondakabala bbuku lya Jobu mu Bbaibbele lipya, ndakalimvwa kuti nondalimvwisya lino bbuku eeli.” Bakwesu abacizyi banji abalo balaamba mbubwenya oobu.
6. Ino mulimvwa buti kujatikizya kucinca mukumvwisya lugwalo lwa Matayo 24:45-47?
6 Catatu, amubone kucinca kumwi ikwacitika mukumvwisya magwalo mumyaka misyoonto yainda. Mucikozyanyo, mu Ngazi Yamulindizi ya July 15, 2013, twakakkomana kumuzyiba “muzike uusyomeka alimwi uucenjede.” (Mt. 24:45-47) Kwakapandululwa kuti Kabunga Keendelezya ngomuzike uusyomeka, mpoonya “babelesi bamuŋanda” mbabaabo boonse basaninwa kumuuya, tacikwe makani naa mbananike naa ‘mbambelele zimbi.’ (Joh. 10:16) Eelo kaka cilakkomanisya kuzyiba kasimpe kali boobu alimwi akuyiisya bapya kasimpe aaka! Muunzila nzi azimbi Jehova mwaatondezya kuti uyanda kuti bantu kabayiisyigwa munzila itakatazyi kumvwa?
KUPANDULULA ZIBALO ZYAMU BBAIBBELE MUNZILA IITAKATAZYI KUMVWA
7, 8. Nzikozyanyo nzi zimwi zyabusinsimi bwakasololelwa amuuya uusalala zijatikizya bantu naa zintu zyaambwa mu Bbaibbele?
7 Ikuti naa mwali kubelekela Jehova myaka minji, ambweni mulakonzya kubona kuti kwali kucinca asyoonto-syoonto kujatikizya mabbuku eesu mbwaapandulula zibalo zinji zyamu Bbaibbele. Munzila nzi? Musyule, mabbuku eesu kanji-kanji akali kupandulula zibalo zyamu Bbaibbele munzila iyakali kutondezya kuti zintu naa bantu baambwa muzibalo nzikozyanyo buyo naa nzimvwule iziiminina bantu bamwi naa zintu zini-zini iziyakuzuzikizyigwa kumbele. Sena kuli twaambo tulimvwisya twamu Magwalo tutondezya kuti zintu zyaambwa mu Bbaibbele ziiminina zintu zimwi munzila yabusinsimi? Inzya. Mucikozyanyo, Jesu wakaamba kujatikizya “citondezyo ca Jona musinsimi.” (Amubale Matayo 12:39, 40.) Jesu wakapandulula kuti kukkala kwa Jona mwida lyanswi, mwalo imwakali kukonzya kuba mucuumbwe cakwe ikuti Jehova naatakamufwutula, bwakali businsimi ibwakali kwaamba Jesu ciindi naakali mucuumbwe.
8 Bbaibbele lilaamba kujatikizya zintu azimwi munzila yabusinsimi. Mwaapostolo Paulo wakazibandika zintu zili mbozibede zili boobu. Mucikozyanyo, cibalo caamba kujatikizya Abrahamu a Hagare alimwi a Sara ciiminina businsimi bujatikizya cilongwe Jehova ncaakajisi acisi cabana Israyeli alimwi acibeela cambunga ya Leza cakujulu. (Gal. 4:22-26) Mbubwenya buyo, tente lyakubunganina, tempele, Buzuba Bwakumanya Milandu, mupaizi mupati, alimwi azintu zimwi zyaambidwe mu Mulawo wa Musa zyoonse zyakali ‘zimvwule buyo zyazintu zibotu ziboola.’ (Heb. 9:23-25, 10:1) Cilakkomanisya alimwi ciyumya lusyomo kwiiya zibalo eezyi zyabusinsimi. Pele sena inga twaamba kuti bantu boonse, zintu zyoonse, alimwi azintu zyoonse zyakacitika izyaambidwe mu Bbaibbele ziiminina bantu bamwi naa zintu zimwi?
9. Mbuti cibalo camu Bbaibbele cijatikizya Naboti mbocakali kupandululwa musyule?
9 Musyule, eeyi nenzila iyakali kubelesyegwa kanji-kanji mukupandulula zibalo. Mucikozyanyo, amubone cibalo icaamba zya Naboti iwakabetekwa munzila iitaluleme alimwi akujaigwa a Mwami mukaintu Jezebeli kutegwa mulumi wakwe Ahabu abweze muunda wamisaansa wa Naboti. (1Ba. 21:1-16) Mu 1932, cibalo eeci cakapandululwa kuti bwakali businsimi. Ahabu a Jezebeli bakali kwaambwa kuti bakali kwiiminina Saatani alimwi ambunga yakwe; Naboti wakali kwiiminina Jesu; mpoonya lufwu lwa Naboti lwakali kwiiminina kujaigwa kwa Jesu. Nokuba boobo, nokwakainda myaka iili mbwiibede, bbuku lyakuti “Let Your Name Be Sanctified,” ilyakamwaigwa mu 1961, lyakaamba kuti Naboti wakali kwiiminina bananike, alimwi Jezebeli wakali kwiiminina Bunakristo Bwanyika Bwakubeja. Aboobo, kupenzyegwa kwa Naboti mumaanza a Jezebeli kwakali kwiiminina kupenzyegwa kwabananike mumazuba aamamanino. Kwamyaka minji, bantu ba Leza bakajana kuti kupandulula zibalo zyamu Bbaibbele munzila eeyi kwakali kuyumya lusyomo. Pele nkaambo nzi lino zintu ncozyacinca?
10. (a) Ino kucenjela kwagwasya buti mukupandulula zibalo zimwi zyamu Bbaibbele? (b) Ino mabbuku eesu mazuba aano abikkila kapati maano kupandulula nzi?
10 Mbubwenya mbotukonzya kulangila, Jehova wamugwasya “muzike uusyomeka alimwi uucenjede” kuti acenjele kapati. Kucenjela kwapa kuti kube kupakamana kapati mumakani aakwaamba cibalo camu Bbaibbele kuti kuli ncociiminina ccita buyo kuti kakuli kaambo kamu Magwalo ikapa kucita boobo. Kuyungizya waawo, kwajanika kuti bupanduluzi bumwi bwakaindi ibwakuti zintu zyaambwa muzibalo zyamu Bbaibbele kuli ncoziiminina, bulabakatazya bantu banji kumvwa. Bupanduluzi bwamusyobo ooyu ibwakuti eeci ciiminina ceeci naa ooyu wiiminina yooyu, bulakatazya kumvwa akupandulula, bulakatazya kubuyeeya, alimwi bulakatazya kujana ciiyo ncotwiiya. Alimwi cilibilisya kapati ncakuti inga cakatazya kapati kuzyiba ziiyo ziyiigwa muzibalo zyamu Bbaibbele zilangwa-langwa akaambo buyo kakusola kuyanda kuzyiba ncoziiminina zintu zyoonse zyaambwa mucibalo. Aboobo, mabbuku eesu mazuba aano abikkila kapati maano kupandulula munzila ngubauba ziiyo nzyotwiiya kujatikizya lusyomo, kuliyumya, kulyaaba kwabunaleza, alimwi abube bumwi buyandika kapati mbotwiiya muzibalo zyamu Bbaibbele. *
Cikozyanyo ca Naboti cijisi ciiyo cibotu kapati kulindiswe (Amubone muncali 11)
11. (a) Mbuti lino mbotucimvwisya cibalo cijatikizya Naboti, alimwi ncinzi ncotwiiya swebo toonse kucikozyanyo camwaalumi ooyu? (b) Nkaambo nzi mazuba aano mabbuku eesu ncaatavwuli kwaamba ncobaiminina bantu naa zintu zyaambwa mucibalo cimwi camu Bbaibbele? (Amubone “Mibuzyo Yabasikubala” mumagazini eeyi.)
11 Ino mazuba aano tucimvwisya buti cibalo cijatikizya Naboti? Tulacimvwisya munzila ngubauba. Muntu ooyu uululeme wakafwa ikutali kuti wakali kwiiminina Jesu naa bananike, pele wakafwa akaambo kakuti wakali mululami. Wakakakatila ku Mulawo wa Jehova mubulelo ibwakali bubyaabi kapati. (My. 36:7; 1Bam. 21:3) Cikozyanyo cakwe cituyiisya kuti uuli woonse akati kesu ulakonzya kupenzyegwa akaambo kabululami. (Amubale 2 Timoteyo 3:12.) Bantu boonse balakonzya kucimvwisya, kuciyeeya, alimwi akutobela ciiyo icili mucibalo eeci ciyumya lusyomo.
12. (a) Ncinzi ncotuteelede kwaamba kujatikizya zibalo zyamu Bbaibbele? (b) Nkaambo nzi ncotukonzya kuzimvwisya zintu zisisidwe? (Amubone bupanduluzi buyungizyidwe.)
12 Sena lino tweelede kwaamba kuti zibalo zyamu Bbaibbele zijisi buyo ziiyo nzyotukonzya kwiiya alimwi akuti tazijisi zintu zimbi nzyoziiminina? Peepe. Mumabbuku eesu mazuba aano tulangila kwiiya kuti cintu cimwi cituyeezya cintu cimwi naa ncikozyanyo cacintu cimwi. Bunji bwaziindi taanakwaambi kujatikizya ncobaiminina bantu naa zintu zyaambwa muzibalo zyamu Bbaibbele. Mucikozyanyo, cililuzi kwaamba kuti kusyomeka kwa Naboti ciindi naakali kupenzyegwa alimwi alufwu lwakwe zituyeezya kusyomeka kwa Kristo alimwi akwabananike bakwe. Nokuba boobo, alimwi tulakonzya kuyeezyegwa kujatikizya kusyomeka ‘kwambelele zimbi’ zinji zya Mwami. Bupanduluzi buli boobu ibutakatazyi butondezya kuti tuyiisyigwa a Leza. *
KUPANDULULA ZIKOZYANYO ZYA JESU MUNZILA IITAKATAZYI KUMVWA
13. Nzikozyanyo nzi zitondezya kuti mazuba aano zikozyanyo zya Jesu tulazipandulula munzila iitakatazyi kumvwa?
13 Jesu Kristo wakali Mwiiyi mupati kwiinda bantu boonse anyika. Nzila imwi yakuyiisya njaakali kuyandisya kapati njakubelesya zikozyanyo. (Mt. 13:34) Zikozyanyo zipa kuti muntu ayezyeezye kujatikizya cintu eeco alimwi akupa kuti amvwisye caambwa. Sena mabbuku eesu ali kuzipandulula zikozyanyo zya Jesu munzila iitakatazyi kumvwa mumyaka yainda? Inzya. Sena tiitwakakkomana kucinca mukumvwisya cikozyanyo ca Jesu cabumena, canseke yamusitada, alimwi acalunsabwe izyakapandululwa mu Ngazi Yamulindizi ya July 15, 2008? Lino tulazimvwisya zikozyanyo eezyi kuti ziiminina Bwami bwa Leza alimwi azintu nzyobucita mukubunganya basikutobela Kristo basyomeka kuzwa munyika eeyi mbyaabi.
14. (a) Ino twacipandulula buti cikozyanyo camu Samariya mubotu? (b) Mbuti mbotucimvwisya mazuba aano cikozyanyo ca Jesu eeci?
14 Nokuba boobo, mbuti kujatikizya zikozyanyo nzyaakaamba Jesu zijisi twaambo tunji? Masimpe, zikozyanyo zimwi zijatikizya businsimi alimwi kuli ncoziiminina; zimbi zijisi ziiyo nzyotukonzya kwiiya. Ino inga twazyaandaanya buti? Mumyaka yainda bupanduluzi bwali kuyaabulimvwisya. Mucikozyanyo, amubone mbotwacipandulula cikozyanyo ca Jesu camu Samariya mubotu. (Lk. 10:30-37) Mu 1924, Ngazi Yamulindizi yamu Chingisi yakaamba kuti muna Samariya wakali kwiiminina Jesu; nzila iiselemuka iyakali kuzwa ku Jerusalemu kuya ku Jeriko, yakali kwiiminina buumi bwabantu mbobwaindila kubija kuzwa ciindi nobwakatalika buzangi mu Edeni; babbi bakali kwiiminina mbunga zyabasimakwebo alimwi abantu ibalida bamwi masuku amutwe; mpoonya mupaizi alimwi amu Levi bakali kwiiminina Bunakristo Bwanyika. Mazuba aano, mabbuku eesu abelesya cikozyanyo eeci kuyeezya Banakristo boonse kuti tabeelede kusalulula mukugwasya baabo ibayandika lugwasyo, kwaambisya munzila yakumuuya. Sena tatukkomani kubona kuti Jehova uyanda kuti njiisyo zyakwe kazitakatazyi kumvwa?
15. Ncinzi ncotuyoolanga-langa mucibalo citobela?
15 Mucibalo citobela, tuyakulanga-langa cikozyanyo acimbi ca Jesu—cikozyanyo cabanakalindu ibali kkumi. (Mt. 25:1-13) Ino Jesu wakali kuyanda kuti basikumutobela bacimvwisye buti cikozyanyo eeci cibotu kapati? Sena wakali kuyanda kuti bacimvwisye kuti cikozyanyo eeci cakali kujatikizya businsimi, naa kuti muntu umwi aumwi waambidwe mucikozyanyo, cintu cimwi acimwi alimwi azyakali kucitika zyoonse kuli ncozyakali kwiiminina? Sena wakali kuyanda kuti basikumutobela kababelesya cikozyanyo eeci kujana ziiyo zikonzya kubasololela mumazuba aamamanino? Tuyoobona.
^ par. 4 Magazini ya Ngazi Yamulindizi yamu Chingisi iilembedwe munzila ngubauba yakatalika kumwaigwa mu July 2011. Kuzwa leelyo, ilamwaigwa amumyaambo iimbi misyoonto.
^ par. 5 Ibbaibbele eeli nkolili mumwaambo wa Chitonga. Alimwi kuli bubambe bwakuti Bbaibbele eeli lisandululwe amumyaambo iimbi.
^ par. 10 Mucikozyanyo, bbuku lyakuti Amwiiye Lusyomo Lwabo lyaamba kujatikizya buumi bwabantu baindene-indene bamu Bbaibbele ibali 14. Bbuku eeli lyaamba kujatikizya ziiyo nzyotukonzya kwiiya, ikutali ncoziiminina naa mbozyakazuzikizyigwa zintu zyaambidwe.
^ par. 12 Ijwi lya Leza lilijisi zintu zikonzya kuboneka kuti ‘zilakatazya kumvwa,’ kubikkilizya azibeela zimwi zyamagwalo aa Paulo. Nokuba boobo, balembi ba Bbaibbele boonse bakasololelwa amuuya uusalala. Muuya uusalala nguwenya ooyu nguugwasya Banakristo bakasimpe mazuba aano kumvwisya kasimpe kakumuuya, “noziba zintu zisisidwe zya Leza” tulazimvwisya nokuba kuti tatulondokede.—2Pet. 3:16, 17; 1Kor. 2:10.
