MUKWESU umwi uutegwa Julian wakaamba kuti: “Ciindi mwanaangu musankwa naakaambilizyigwa kuti wagwisyigwa mumbungano, ndakanyongana kapati. Ngowakali mwanaangu wakusaanguna, alimwi twakali kumvwana kapati, twakali kucita zintu zinji antoomwe. Wakali musankwa iwakali cikozyanyo cibotu, cakutayeeyela wakatalika kupona munzila iitali kabotu. Bakaintu bangu bakali kulila ziindi zinji, alimwi taakwe ncondakali kukonzya kucita kutegwa ndibaumbulizye. Twakali kulipa mulandu wakuti ambweni kuli mbazu imwi njotwakaalilwa kuzuzikizya mbuli bazyali.”

Pele mbuti mbotukonzya kwaamba kuti kugwisyigwa kwa Munakristo mumbungano mbubambe bwaluyando kakuli ncintu cicisa kapati? Ino Magwalo aamba nzi kujatikizya makani aaya? Alimwi ncinzi cini icipa kuti muntu agwisyigwe mumbungano?

Kuli zintu zyobilo izipa kuti Kamboni wa Jehova agwisyigwe mumbungano. Cakusaanguna ncakuti, Kamboni uubbapatizyidwe wacita cibi cipati. Cabili, muntu ooyo iwacita cibi tatondezyi kweempwa.

Nokuba kuti Jehova ulizyi kuti tatulondokede, ulijisi zyeelelo zisalala nzyayanda kuti babelesi bakwe kabatobela. Mucikozyanyo, Jehova tayandi kuti katucita zibi zipati mbuli bwaamu, kukomba mituni, kubba, bugwebenga, kujaya, alimwi akusyoma mizimo.—1Kor. 6:9, 10; Ciy. 21:8.

Sena taali masimpe kuti zyeelelo zya Jehova tulakonzya kuzitobela alimwi akuti zilatukwabilila? Sena kuli muntu uutakkomani kukkala abantu basiluumuno, balilemeka alimwi basyomeka? Akati kabakwesu abacizyi bakumuuya mpaajanika bantu bali boobu, cili boobu akaambo kakuti tulapona kweelana amalailile aa Leza aajanika mu Jwi lyakwe ngotwakakonkezya kuti tuyakwaatobela ciindi notwakalyaaba kulinguwe.

Pele mbuti kuti Munakristo uubbapatizyidwe wacita cibi cipati akaambo kakutalondoka? Babelesi ba Jehova bakaindi bakali kucita zibi zipati, pele Leza tanaakabakaka cakumaninina. Cikozyanyo cibotu ncikozyanyo ca Mwami Davida. Davida wakacita bumambe alimwi acibi cakujaya muntu; nokuba boobo musinsimi Natani wakamwaambila kuti: “Jehova wakulekelela cibi cako.”—2Sam. 12:13.

Leza wakamulekelela Davida akaambo kakuti wakeempwa kuzwa ansi aamoyo. (Int. 32:1-5) Mbubwenya buyo, awalo mubelesi wa Jehova mazuba aano ulakonzya kugwisyigwa mumbungano ikuti tanaatondezya kweempwa naa ikuti wazumanana kucita cibi. (Mil. 3:19; 26:20) Ikuti naa tanaatondezya kuti weempwa ncobeni kubaalu ibali mukkomiti yalubeta, muntu wacita cibi weelede kugwisyigwa mumbungano.

Akusaanguna inga twalimvwa mbuli kuti kugwisyigwa mumbungano kwamuntu wacita cibi tiikwacitwa munzila iitondezya luse, kwaambisya ikuti naa twali kumvwana amuntu ooyo wagwisyigwa. Nokuba boobo, Jwi lya Jehova lilatugwasya kuzyiba kuti kucita boobu ninzila yaluyando.

Jesu wakaamba kuti “busongo bulabonwa kuti buliluleme kwiinda mumilimo yambubo.” (Mt. 11:19) Kugwisyigwa mumbungano kwamuntu iwacita cibi iwateempwa ninzila yabusongo iizyala micelo iiluleme. Amulange-lange bubotu oobu botatwe:

Kubagwisya mumbungano bantu ibacita zibi kulemeka izina lya Jehova. Akaambo kakuti twiitwa azina lya Jehova, tulapona kweelana azina eeli. (Is. 43:10) Mbubwenya mbuli bukkale bwamwana mbobukonzya kulemeka naa kuleta masampu kubazyali bakwe, abalo bantu balakonzya kulilemeka naa kulisampaula izina lya Jehova kwiinda mubukkale bubotu naa bubi bwabantu ibaitwa azina lyakwe. Izina lya Leza libotu lilasumpulwa ikuti bantu ibaitwa azina lya Jehova kabatobela zyeelelo zyakwe zyakulilemeka. Mbobwakabede bukkale oobu ciindi camusinsimi Ezekieli ciindi bantu bamasi nobakabona kuti ba Juda mbantu ba Jehova. (Ezk. 36:19-23) Mbubwenya buyo amazuba aano, bantu banji balazumina kuti Bakamboni ba Jehova baiminina zina lya Jehova. Aboobo, izina lya Jehova lilalemekwa ciindi notutobela milawo yakwe.

Izina lya Jehova lilakonzya kusampaulwa ikuti twatalika kutalilemeka. Mwaapostolo Petro wakacenjezya Banakristo kuti: “Mbomuli bana baswiilila, amuleke kutobela zisusi nzyomwakajisi musyule mukutazyiba kwanu, pele mbuli Yooyo Uusalala iwakamwiita, amusalale mubukkale bwanu boonse, nkaambo kulilembedwe kuti: ‘Mweelede kusalala, nkaambo mebo ndilasalala.’” (1Pet. 1:14-16) Kulilemeka munzila iisalala kupa kuti izina lya Leza lilemekwe.

Nokuba boobo, ikuti Kamboni wa Jehova kacita cibi, kulalangilwa kuti ambweni balongwe alimwi abantu bamwi mbazyibene limwi bayoozyiba ncacita. Bubambe bwakugwisyigwa mumbungano butondezya kuti Jehova ujisi bantu basalala ibatobela malailile aamu Magwalo kutegwa bazumanane kusalala. Muntu umwi kucisi ca Switzerland wakaunka kumiswaangano ku Ŋanda ya Bwami yakubusena ooko akwaamba kuti wakali kuyanda kuyanzana ambungano. Mucizyi wakwe wakaligwisyidwe akaambo kakutalilemeka. Wakaamba kuti wakali kuyanda kuyanzana ambunga “iitalekeli bukkale bubi.”

Kugwisyigwa mumbungano kupa kuti mbungano ya Bunakristo izumanane kusalala. Mwaapostolo Paulo wakacenjezya bana Korinto kujatikizya bubi bwakulekela basizibi bateempwi kuzumanana kuba akati kabo. Wakakozyanisya micito yabasizibi aabo kubumena bwalo bukonzya kupa kuti fulaulu ufwufwumuke. Wakaamba kuti: “Bumena busyoonto bupa kuti mulwi woonse wafulaulu uukandidwe ufwufwumuke.” Mpoonya wakabaambila kuti: “Amumugusye muntu ooyo mubi akati kanu.”—1Kor. 5:6, 11-13.

Kuboneka kuti “muntu ooyo mubi” ngwaakaamba Paulo wakalizyibidwe kuti tanaakali kulilemeka. Alimwi bantu bamwi mumbungano bakazyootalika kubona mbuli kuti tacilubide. (1Kor. 5:1, 2) Ikuti cibi cipati eeci nocakalekelwa, Banakristo abamwi bakali kukonzya kutalika kutobela zilengwa zyakutalilemeka kwalo ikwakadumide kapati mumunzi mobakali kukkala. Kulekela bantu bacita cibi acaali kulakonzya kupa kuti kube muuya wakuleengaana kutobela zyeelelo zya Leza. (Muk. 8:11) Kuyungizya waawo basizibi bateempwi balakonzya kuba mbuli “mabwe aatalibonyi mumaanzi” alimwi akunyonganya lusyomo lwabamwi ibali mumbungano mbuli mabwe mbwaakonzya kunyonyoona bwato.—Jud. 4, 12.

Kugwisyigwa mumbungano kulakonzya kupa muntu wacita cibi kuti eempwe. Jesu wakaamba zyamwana musankwa iwakazwa aŋanda yabausyi walo iwakanyonyoona lubono ooko nkwaakaunka kwiinda mukupona buumi bwakutalilemeka. Mwana mutaka wakaiya ciiyo akaambo kakuzwa amunzi wabausyi. Kumamanino mwana ooyu wakeempwa, alimwi wakapiluka kumukwasyi wakwe. (Lk. 15:11-24) Bupanduluzi bwa Jesu bwausyi siluyando wamucikozyanyo iwakakkomana ciindi naakabona kuti mwanaakwe wacinca, butugwasya kuzyiba Jehova mbwalimvwa. Waamba kuti: “Tandilukkomanini pe lufwu lwamuntu mubi, pele ndiyanda kuti muntu mubi aleke nzila yakwe akuzumanana kupona.—Ezk. 33:11.

Mbubwenya buyo, bantu bagwisyidwe mumbungano ya Bunakristo, mukwasyi wabo wakumuuya, mukuya kwaciindi balazyiba kuti bakasweekelwa cintu ciyandika kapati. Mapenzi aboola akaambo kakupona munzila iitali kabotu, alimwi akuyeeya mazuba ngobakali kukkomana ciindi nobakajisi cilongwe a Jehova alimwi abantu bakwe, zyoonse eezyi zilakonzya kubapa kucinca.

 Luyando alimwi akukakatila kutobela zyeelelo zyamu Bbaibbele kulayandika kutegwa muntu eempwe. Sintembauzyo Davida wakaamba kuti: “Ikuti mululami wanduuma, nkokuti unditondezya luyando lutamani, ikuti wandisinsa, cili mbuli mafwuta aatilwa amutwe wangu.” (Int. 141:5) Mucikozyanyo: Amweezyeezye muntu uukatede uuli mulweendo kubusena kuli caanda. Mpoonya wafwa mpeyo kapati cakuti uyanda kwaalilwa kuyoya. Ikuti naa woona mubusena oobo muli caanda, ulakonzya kufwa. Nacilindila bantu bakonzya kumufwutula, mweenzinyina ulamuuma mabayi kumeso kutegwa ataoni. Mabayi ngamuuma alakonzya kucisa, pele kucita boobo inga kwamufwutula. Mbubwenya buyo, Davida wakazyiba kuti sikumupa lulayo inga wayandika kupa lulayo lucisa kutegwa sikupegwa lulayo agwasyigwe.

Ziindi zinji, kugwisyigwa mumbungano kulaya muntu ooyo wacita cibi. Nokwakainda myaka iili kkumi, mwana waba Julian iwaambwa kumatalikilo aacibalo, wakabambulula buumi bwakwe, wakapiluka mumbungano, alimwi lino mwaalu. Wakaamba kuti: “Kugwisyigwa mumbungano kwakandipa kuti ndilwane mapenzi akaboola akaambo kabukkale bwangu. Lulayo ndondakapegwa ndolwakali kuyandika.”—Heb. 12:7-11.

Masimpe, kugwisyigwa mumbungano nintenda yakumuuya, pele ntenda eeyi tayeelede kubonwa mbuli kuti taakwe amboikonzya kucitwa. Toonse tulijisi lubazu ndotweelede kubeleka kutegwa bubambe bwakugwisyigwa mumbungano bubeleke.

Baalu ibajisi mukuli wakwaambila yooyo wagwisya kujatikizya kusala kwabo balasolekesya kapati kutondezya luyando lwa Jehova. Ciindi nobaambila muntu ooyo iwali kubetekwa kujatikizya kusala kwabo, munzila yaluzyalo alimwi iilimvwisya balamwaambila muntu ooyo nzila nzyayelede kutobela kutegwa akapiluke alimwi mumbungano. Kutegwa kabayeezya bantu ibakagwisyigwa mumbungano mbobakonzya kupilukila kuli Jehova, baalu balakonzya kunooswaya bantu aabo ibagwisyidwe ibatondezya kucinca nzila zyabo. *

Banamukwasyi balakonzya kutondezya luyando kumbungano akumuntu ooyo uugwisyidwe kwiinda mukulemeka kusala kwakacitwa kwakuti muntu ooyo agwisyigwe. Ba Julian bakaamba kuti: “Wakacili mwanaangu, pele bukkale bwakwe mbobwakali kutwaandaanya anguwe.”

Boonse mumbungano balakonzya kutondezya luyando kwiinda mukutayanzana alimwi akutabandika amuntu ooyo uugwisyidwe. (1Kor. 5:11; 2Joh. 10, 11) Ikuti bacita oobo, nkokuti bapa kuti lulayo lwa Jehova ndwaakapegwa kwiinda mubaalu lubeleke akumugwasya. Kuyungizya waawo, balakonzya kutondezya luyando alimwi akubagwasya banamukwasyi bamuntu uugwisyidwe, ibauside akaambo kacintu cakacitika kutegwa batalimvwi mbuli kuti batantamukwa abasyominyina.—Rom. 12:13, 15.

Ba Julian bakaamba kuti: “Bubambe bwakugwisyigwa mumbungano mbubambe buyandika kapati, bwalo ibutugwasya kupona kweelana azyeelelo zya Jehova. Mukuya kwaciindi nokuba kuti cilacisa, bupa kuti kuzyalwe micelo mibotu. Ikuti nondakabulekela bukkale bubi bwamwanaangu, naatakacikonzya kupiluka mumbungano alimwi.”