Ino Nciyumu Buti Cilongwe Canu a Jehova?
“Amuswene kuli Leza, eelyo awalo ulaswena kulindinywe.”—Jak. 4:8.
1. Nkaambo nzi ncotweelede kuzumanana kuba acilongwe ciyumu a Jehova?
SENA muli Kamboni wa Jehova uulyaabide alimwi uubbapatizyidwe? Ikuti kacili boobo, mulijisi cintu ciyandisi—cilongwe a Leza. Nokuba boobo, cilongwe eeco cilasunkwa ikutali buyo anyika ya Saatani pele alimwi amibili yesu iitalondokede. Banakristo boonse balasunkwa munzila eeyi. Aboobo, cilongwe cesu a Jehova ceelede kuti kacili ciyumu nta.
2. (a) Ino cilongwe ncinzi? (Amubone bupanduluzi buyungizyidwe.) (b) Mbuti mbotukonzya kuciyumya cilongwe cesu a Jehova?
2 Ino nciyumu buti cilongwe canu a Jehova? Sena inga mwayanda kuciyumya? Mboobu mbolwaamba lugwalo lwa Jakobo 4:8 kujatikizya ncomweelede kucita: “Amuswene kuli Leza, eelyo awalo ulaswena kulindinywe.” Amubone kuti aawa kuli zintu zyobilo izyeelede kucitika. * Ciindi notubweza ntaamu kuswena kuli Leza, awalo ulabweza ntaamu kucita mbubwenya oobo kulindiswe. Ikuti naa kuyanzana ooku kakucitwa lyoonse, mukuya kwaciindi kuyumya cilongwe cesu a Jehova. Akaambo kaceeci, cilongwe eeco ciba cilongwe cini-cini kulindiswe. Tuba alusyomo ndwaakajisi Jesu ciindi naakaamba kuti: “Ooyo wakandituma nkwali ncobeni, alimwi . . . Mebo ndilimuzyi.” (Joh. 7:28, 29) Nokuba boobo, ino nintaamu nzi nzyomukonzya kubweza cacigaminina kutegwa muswene kuli Jehova?
Mbuti mbomukonzya kubandika a Leza? (Amubone muncali 3)
3. Ncinzi cipa kuti kubandika a Jehova kukonzyeke?
3 Kubandika a Jehova lyoonse ncintu ciyandika kapati kutegwa tuswene kulinguwe. Mbuti mbomukonzya kubandika a Leza? Ino mubandika buti amulongwe wanu uukkala kulamfwu? Mweelede kuti mulacita oobo kwiinda mukulembelana alimwi akubandika afooni, ambweni mulacita oobo kanji-kanji. Mulabandika a Jehova kwiinda mumipailo yanu kulinguwe njomupaila ciindi aciindi. (Amubale Intembauzyo 142:2.) Alimwi mulamuzumizya Jehova kubandika andinywe ciindi nomubala lyoonse Jwi lyakwe lilembedwe alimwi akuzinzibala kuyeeya nzyomubala. (Amubale Isaya 30:20, 21.) Aboobo, atulange-lange kubandika ooku mbokuyumya cilongwe cesu a Jehova, akupa kuti cilongwe cesu anguwe ciyume kapati.
KUBALA BBAIBBELE—NZILA JEHOVA NJABANDIKA ANDINYWE
4, 5. Mbuti Jehova mbwabandika andinywe kumugama kwiinda mu Jwi lyakwe lilembedwe? Amupe cikozyanyo.
4 Cakutadooneka mulazumina kuti Bbaibbele lilijisi mulumbe wa Leza kubantu boonse. Pele sena Bbaibbele lilaamba ambomukonzya kuswena kuli Jehova nywebo kumugama? Inzya lilaamba. Munzila nzi? Lyoonse nomulibala akuliiya Bbaibbele, amubone ncomweelede kucita kujatikizya zintu nzyolyaamba alimwi amubikkile maano kubona mbomweelede kuzibelesya mubukkale bwanu; mwacita boobo muzumizya Jehova kwaambaula andinywe kwiinda mu Jwi lyakwe. Eeci cimupa kuba acilongwe cibotu anguwe.—Heb. 4:12; Jak. 1:23-25.
5 Mucikozyanyo, amubale akuzinzibala kuyeeya majwi aa Jesu aakuti “amuleke kuliyobweda lubono anyika.” Ikuti naa mulimvwa kuti mubikkila kale maano kuzintu zya Bwami mubuumi bwanu, mulizyi kuti Jehova ulamulumbaizya. Kulubazu lumbi, ikuti naa mwabona kuti muyandika kuubya-ubya buumi bwanu alimwi akubikkila maano kapati kuzintu zya Bwami, nkokuti Jehova wamusinsimuna kumbazu imwi njomuyandika kubelekela kutegwa muswene afwaafwi anguwe.—Mt. 6:19, 20.
6, 7. (a) Ino kubala Bbaibbele kulujatikizya buti luyando lwesu kuli Jehova alimwi aluyando lwakwe kulindiswe? (b) Ino tweelede kuba amakanze nzi ciindi notucita ciiyo cesu tobeni?
6 Kubala Jwi lya Leza takuyubununi buyo mbazu motukonzya kuyaambele kumuuya. Pele alimwi kutupa kuti tumulumbe kapati Jehova akaambo kanzila zyakwe zilombozyeka, calo icipa kuti luyando lwesu kulinguwe lukomene. Aboobo, ciindi luyando lwesu kuli Leza nolukomena, luyando lwakwe kulindiswe lulayuma, eelyo eeci ciyumya cilongwe cesu anguwe.—Amubale 1 Bakorinto 8:3.
7 Nokuba boobo, ikutegwa swebo tuswene kuli Jehova, cilayandika kapati kuti notubala katujisi makanze mabotu. Lugwalo lwa Johane 17:3 lwaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.” Aboobo makanze eesu taayelede buyo aakuba aluzyibo pe, pele ‘kumuzyiba’ kabotu bwini mbwabede Jehova.—Amubale Kulonga 33:13; Int. 25:4.
8. (a) Ncinzi muntu ncakonzya kuyeeya kujatikizya Jehova mbwaakacita ku Mwami Azariya, kweelana ambokupandulwidwe mulugwalo lwa 2 Bami 15:1-5? (b) Ino kuzyiba Jehova kutugwasya buti kutaizumbauzya milimo yakwe munzila iili yoonse?
8 Mbotuyaabumuzyiba kabotu Jehova, tacikatunyonganyi pe ikuti naa zibalo zimwi zyamu Bbaibbele zyatupa kutalika kweezyeezya ncaakacitila zintu munzila imwi. Mucikozyanyo, ino mulimvwa buti kujatikizya ncaakacita Jehova kuli Azariya Mwami wa Juda? (2Bam. 15:1-5) Amubone kuti nokuba kuti “bantu bakacili kutuula zipaizyo alimwi akuuntumuna busi bwazipaizyo mumasena aakukombela,” Azariya walo “wakazumanana kucita ziluleme mumeso aa Jehova.” Nokuba boobo, “Jehova wakapa kuti mwami aciswe, aboobo wakazumanana kali sicinsenda kusikila buzuba naakafwa.” Ino nkaambo nzi? Cibalo tacaambi pe. Sena makani aaya ayelede kutunyonganya naa kutupa kuyeeya kuti Jehova wakasubula Azariya kakunyina kaambo? Inga tiitwayeeya boobo pe ikuti katuzizyi kabotu nzila zya Jehova. Eeci cilabikkilizya akuzyiba kuti Jehova lyoonse ulalulamika “cansaizi.” (Jer. 30:11) Luzyibo luli boobo lutupa kusinizya kuti nokuba kuti tatuzyi kaambo kakapa kuti Jehova acite mbwaakacita kuli Azariya, tulakonzya kusyoma kuti lubeta lwakwe lwakaliluleme.
9. Ino makani nzi aatondezya kaambo ikakapa kuti Jehova asubule Azariya acinsenda?
9 Nokuba boobo, kujatikizya makani aaya, kuli twaambo atumbi ntotupedwe mucibalo cimbi cili mu Bbaibbele. Mwami Azariya alimwi wakazyibidwe kuti Mwami Uziya. (2Bam. 15:7, 32) Mucibalo cimwi cikozyenye aceeci mulugwalo lwa 2 Makani 26:3-5, 16-21, twiiya kuti nokuba kuti Uziya wakacita zililume mumeso aa Jehova kwaciindi cili mbocibede, kumbele “moyo wakwe wakalisumpula akulinyonyoona.” Cakulisumpula, wakasola kucita milimo yabapaizi eeyo njaatakazumizyidwe kucita. Bapaizi ibali 81 bakamusikila kutegwa bamululamike. Ino Uziya wakacita buti? Wakatondezya kulisumpula kapati. Uziya “wakanyema” akaambo kalulayo ndwaakapegwa abapaizi. Anu nkakaambo kaako Jehova ncaakamusubula acinsenda!
10. Nkaambo nzi lyoonse ncotutayandiki bupanduluzi kumilimo ya Jehova, alimwi mbuti mbotukonzya kuyumya lusyomo lwesu kujatikizya nzila zya Jehova ziluleme?
10 Lino tutalubi kaambo kapati kali waawa. Ino mbuti kuti twaambo tusalazya makani aaya notwatakabikkilizyigwa mu Jwi lya Leza, mbuli mbocibede muzibalo zimwi zyamu Bbaibbele? Sena inga mwabudooneka bululami bwa Leza? Naa sena inga mwakkazika moyo akuyeeya kuti Bbaibbele lilijisi makani manji aasinizya kuti Jehova lyoonse ucita zintu ziluleme alimwi buya ngonguwe uupa ceelelo cazintu ziluleme alimwi azibyaabi? (Dt. 32:4) Mbotuyaabumuzyiba kabotu Jehova bwini mbwabede, luyando lwesu alimwi akulumba nkotujisi kujatikizya nzila zyakwe ziyookomena cakuti tatunooyandiki bupanduluzi buya kuzintu zyoonse nzyacita. Amusyome kuti ikulumba kuli boobu kuyookomena kweelana akusolekesya kwanu nkomucita kubala alimwi akuzinzibala kuyeeya mbwabandika Leza kwiinda mu Jwi lyakwe lilembedwe. (Int. 77:12, 13) Aboobo, eeci ciyooyumya cilongwe canu a Jehova akupa kuti cibe cilongwe cini-cini.
MUPAILO—NZILA YAKUBANDIKA A JEHOVA
11-13. Ino muzyi buti kuti Jehova ulaiswiilila mipailo? (Amubone cifwanikiso icili kumatalikilo aacibalo.)
11 Kwiinda mumupailo tulaswena kuli Jehova. Tulamutembaula, kumulumba alimwi akulomba busolozi bwakwe. (Int. 32:8) Pele kutegwa cilongwe canu a Jehova cibe cilongwe ciyumu, mweelede kusyoma kuti ulaiswiilila mipailo.
12 Bantu bamwi basyoma kuti mupailo ugwasya buyo mumizeezo. Baamba kuti ikuti naa kamuyeeya kuti mupailo wanu waingulwa, cili boobo akaambo buyo kakuti mwazyaamba nzyomuyeeya mumajwi, mwalizyiba penzi ndyomujisi alimwi mwasolekesya kujana nzila yakumana penzi eelyo. Kunze lyalugwasyo luli loonse luli boobo, mbuti mbomukonzya kuzyiba kuti mipailo yanu njomupaila camoyo woonse ulaiswiilila ncobeni Jehova?
13 Amulange-lange makani aaya: Kuzwa ciindi naakali kujulu, Jesu wakalibonena cigaminina Jehova mbwaakali kwiingula mipailo yababelesi bakwe baanyika. Mpoonya mumulimo wakwe anyika, Jesu wakali kwaamba mbwaakali kulimvwa kuli Usyi wakujulu kwiinda mumupailo. Sena naakacita oobo, nokuba kupaila masiku woonse, ikuti naakali kuyeeya kuti Jehova tanaakali kuswiilila? (Lk. 6:12; 22:40-46) Sena naakayiisya basikwiiya bakwe kupaila ikuti naakali kuyeeya kuti mupailo ndugwasyo buyo lwamumizeezo? Cilisalede kuti, Jesu wakalizyi kuti mupailo ninzila ini yakubandika a Jehova. Aciindi cimwi, Jesu wakaamba kuti: “Taata, ndakulumba nkaambo wandimvwa. Masimpe ndalizyi kuti lyoonse ulandimvwa.” Andiswe tulakonzya kuba alusyomo lwakuti Jehova ‘ngusikuswiilila mipailo.’—Joh. 11:41, 42; Int. 65:2.
14, 15. (a) Ino tugwasyigwa buti kwiinda mukupaila cacigaminina mumipailo yesu? (b) Ino mipailo yakamugwasya buti mucizyi umwi kuyumya cilongwe cakwe a Jehova?
14 Ciindi nomwaamba zintu zigaminide mumipailo yanu, cilamugwasya kuzyiba Jehova mbwaingula mipailo yanu, nokuba kuti bwiinguzi inga kabutali munzila iigaminide. Mipailo iingulwa iyoopa kuti Jehova mumuzyibe bwini mbwabede. Kuyungizya waawo, mbomuyaabuzumanana kwaambila Jehova zintu nzyomulibilika, uyooswena kulindinywe.
15 Amubone cakacitikila ba Kathy. * Tiibakali kuukkomanina mulimo wamumuunda nokuba kuti lyoonse bakali kutola lubazu mumulimo ooyu. Bakaamba kuti: “Tiindakali kuuyanda mulimo wakukambauka. Ncondaamba ncakuti, mubwini tiindakali kuuyanda mulimo ooyu. Ciindi nondakacileka mulimo wakumubili, mwaalu umwi wakali kulangila kuti ndilaba mupainiya waciindi coonse; mane buya wakandipa afoomu. Ndakasala kucita bupainiya, pele alimwi ndakatalika kupaila buzuba abuzuba kutegwa Jehova andigwasye kuukkomanina mulimo wamumuunda.” Sena Jehova wakayiingula mipailo yabo? Ba Kathy bakati: “Yakkwana lino myaka yotatwe kandicita bupainiya. Akaambo kakuba aciindi cinji mumulimo wakukambauka alimwi akwiiya kubacizyi bambi, mukuya kwaciindi ndayaambele munzila mbondikambauka. Mazuba aano, tanduukkomanini buyo mulimo wamumuunda—pele ndilauyandisya. Iciinda zyoonse, cilongwe cangu a Jehova cayuma kapati kwiinda mbocakabede.” Masimpe, mipailo yabo ba Kathy yakabagwasya kuyumya cilongwe cabo a Jehova.
KUCITA LUBAZU LWESU
16 Kuyumya cilongwe a Jehova ncintu ncotweelede kucita mubuumi bwesu boonse. Tweelede kubweza ntaamu kutegwa tuswene kuli Leza ikuti katuyanda kuti awalo aswene kulindiswe. Aboobo, atusolekesye kusikila mpotugolela kubandika lyoonse a Leza wesu kwiinda mukubala Bbaibbele alimwi akupaila kulinguwe. Ikuti naa twacita oobo, cilongwe cesu a Jehova iciyaabukomena lyoonse ciyootugwasya kuzwidilila mumasunko aatusikila.
Kuyumya cilongwe a Jehova ncintu ncotweelede kucita mubuumi bwesu boonse (Amubone muncali 16 a 17)
16, 17. (a) Ncinzi ncotweelede kucita kutegwa cilongwe cesu a Jehova ciyume akukomena? (b) Ino mbuyumuyumu nzi mbotuyoolanga-langa mucibalo citobela?
17 Nokuba boobo, kulakonzya kuba abuyumuyumu bumwi ciindi mapenzi ngotujisi naazumanana nokuba kuti tulapaila camoyo woonse. Muziindi zili boobo, lusyomo lwesu muli Jehova lulakonzya kuceya. Tulakonzya kutalika kudooneka naa mubwini Jehova ulaiswiilila mipailo yesu alimwi akuti naa utubona kuba balongwe bakwe. Mbuti mbotukonzya kubuzunda buyumuyumu oobo katusinizyide kuti cilongwe cesu a Leza nciyumu? Cibalo citobela ciyookalanga-langa kaambo aaka.
