CIINDI nondakazyalwa mu March 1930, ndakazingulukidwe abacibbululu abalongwe ibakali kubelekela Jehova cakusyomeka. Oomu mwakali mumunzi wa Namkumba, kufwaafwi adolopo lya Lilongwe, mucisi lino iciitwa kuti Malawi. Mumwaka wa 1942, ndakaaba buumi bwangu kuli Leza alimwi ndakabbapatizyigwa mumulonga umwi uujisi masena aaboneka kabotu. Mumyaka iili 70 yakatobela, ndakasolekesya kucita kweelana amwaapostolo Paulo mbwaakakulwaizya Timoteyo kuti “kokambauka jwi; kofwambaana kucita boobo cabusungu muziindi zili kabotu amuziindi zyamapenzi.”—2Tim. 4:2.

Kuswaya kwamukwesu Nathan H. Knorr alimwi amukwesu Milton G. Henschel kumatalikilo aamwaka wa 1948 kwakapa kuti ndibe aaluyandisisyo lwakubelekela Jehova ciindi coonse. Ndicaayeeyede majwi aakulwaizya aabakwesu aaba ibakazwa kumaofesi mapati aa Bakamboni ba Jehova ku Brooklyn, New York. Katwiimvwi mumankandya, bamwi bandiswe notwakali kubalilwa ku 6,000 twakaswiilila cakubikkila maano ciindi Mukwesu Knorr naakali kupa makani aakwe aakulwaizya aakajisi mutwe wakuti “Permanent Governor of All Nations” (Mweendelezi Wamasi Oonse Uuyooyendelezya Mane Kukabe Kutamani.)

Ciindi notwakabonana amucizyi Lidasi, mucizyi weebeka iwakakomenena mumukwasyi wa Bakamboni ba Jehova mbubwenya mbuli ndime, ndakajana kuti awalo wakajisi mbaakani yakubeleka mulimo waciindi coonse. Mu 1950 twakakwatana, mpoonya kuzikusika mu 1953 twakajisi bana bobilo. Nokuba kuti ndakajisi mukuli aumwi wakubakomezya, twakabona kuti ndakali kukonzya kutalika mulimo wabupainiya bwaciindi coonse. Nokwakainda myaka yobilo, ndakatambwa kuti ndibeleke kandili mupainiya waalubazu.

Tiilyakalampa, ndakapegwa coolwe cakunooswaya mbungano kandili mulangizi wabbazu. Akaambo kakugwasyigwa aba Lidasi, ndakali kukonzya kuulanganya kumubili alimwi akumuuya mukwasyi wesu kumwi kandibeleka mulimo ooyu. * Pele ncotwakali kuyandisisya ncakuti toonse tobilo katuli mumulimo waciindi coonse. Kwiinda mukulibambila kabotu alimwi akubelekela antoomwe abana besu, ba Lidasi bakacikonzya kutalika mulimo waciindi coonse mu 1960.

Zyakali kukkomanisya kapati ziindi zili kabotu eezyo, kubelekela bakwesu abacizyi mumbungano ziindene-indene. Mulimo wesu wakatutola kumalundu aa Mulanje nkwaali kumusanza, kusikila kulwizi lwa Lake Malawi, lwizi ilubambalika cisi ca Malawi nkocili kujwe. Twakabona kuyungizyika kwabasikumwaya alimwi ambungano mumabazu motwakabelekela.

 Mu 1962 twakaukkomanina Muswaangano Wacooko iwakajisi mutwe wakuti “Courageous Ministers” (Bakambausi Basicamba.) Twayeeya musyule, miswaangano yakumuuya iili boobu njenjiyo njotwakali kuyandika toonse mu Malawi kutegwa tulibambile ziindi zikatazya izyakali kuboola kumbele. Mwaka wakatobela, Mukwesu Henschel wakaswaya alimwi cisi ca Malawi alimwi muswaangano wacooko waalubazu wakacitika kunze aadolopo lya Blantyre abantu ibabalilwa ku 10,000 bakajanika. Muswaangano uulya wakatuyumya kulwana masunko aakali kuboola kumbele.

Mu 1964 Bakamboni bakasunkwa kapati akaambo kakukaka kutola lubazu mutwaambo twacisi. Maanda aa Bwami aayinda ku 100 alimwi amaanda aa Bakamboni aayinda ku 1,000 akanyonyoonwa ciindi bakwesu nobakali kupenzyegwa. Nokuba boobo, twakacikonzya kuzumanana mumulimo wamubbazu kusikila ciindi mfwulumende ya Malawi noyakaukasya mulimo wa Bakamboni mu 1967. Maofesi aamutabi mu Blantyre akanyangwa, bamisyinali bakatandwa, alimwi Bakamboni banji bamu Malawi bakaangwa kubikkilizya andime aba Lidasi. Notwakaangununwa, cakucenjela twakazumanana mumulimo wamubbazu.

Bumwi buzuba mu October 1972, bantu ibabalilwa ku 100 ibakali kuzulilwa mukabunga kamwi kabasilikani alimwi kabasitwaambo twacisi ikakali kwiitwa kuti Malawi Youth League kakaboola kuŋanda yesu. Pele umwi akati kabo wakafwambaana kusika akundaambila kuti ndiyube nkaambo bakakanzide kundijaya. Ndakaambila bakaintu bangu abana bangu kuti bayube muzisamu zyamabbanana izyakali afwaafwi. Mpoonya mebo ndakazuza akutanta mucisamu cipati camango. Kandili mucisamu camango, ndakalangilila ciindi ŋanda yesu azintu zyesu zyoonse nozyakali kunyonyoonwa.

Ciindi kupenzyegwa nokwakaindila mu Malawi, bunji bwesu twakatija kuzwa mucisi. Mukwasyi wesu wakakkala munkambi yabazangalisi mucisi ca Mozambique nkocili kumbo kusikila mu June 1974. Aciindi eeci, mebo aba Lidasi twakaambilwa kuyoobelekela ku Dómue, mu Mozambique, kufwaafwi amunyinza acisi ca Malawi katuli bapainiya baalubazu. Twakazumanana mumulimo ooyu kusikila mu 1975, ciindi cisi ca Mozambique nocakalilela akuba alwaanguluko kuzwa kucisi ca Portugal. Mpoonya, antoomwe a Bakamboni bambi, twakayeeya kupiluka ku Malawi ikwakali basikupenzya mbotwakatija.

Notwakapiluka ku Malawi, ndakapegwa mulimo wakuswaya mbungano izyakali mudolopo lipati lya Lilongwe. Nokuba kuti kwakali kupenzyegwa abuyumuyumu bunji, mweelwe wambungano wakayungizyika mumabazu motwakabelekela.

Ciindi cimwi, twakasika mumunzi motwakajana kuti bacita muswaangano iwakali kujatikizya twaambo twacisi. Bantu bamwi ibakali kuzulilwa mukabunga kabasitwaambo twacisi bakajana kuti twakali Bakamboni ba Jehova, alimwi bakatukkazika akati kabantu ibakali kuzulilwa mukabunga  kabasitwaambo twacisi ikakali kwiitwa kuti Malawi Young Pioneers. Twakapaila kuli Jehova kuzwa ansi aamoyo kutegwa atugwasye akutusololela mubukkale oobu bukatazya. Ciindi muswaangano nowakamana, bakatalika kutuuma. Mukaintu umwi mupati wakasika kabalika akoompolola kuti: “Amubaleke ndakomba! Mwaalumi ooyu mujwa wangu. Amumuleke aunke!” Ooyo iwakali kweendelezya muswaangano wakati: “Amubaleke baunke!” Tatuzyi cini ncaakali kuyeeya mukaintu uulya pe nkaambo taakwe naakali mubbululu wesu. Kweelede kuti Jehova wakauswiilila mupailo wesu.

Mu 1981 twakaswaangana alimwi abamukabunga ka Malawi Young Pioneers. Bakatunyanga ncinga zyesu, katuundu, mabbokesi aamabbuku alimwi amafailo aabbazu. Twakatijila kuŋanda yamwaalu umwi. Twakapaila alimwi kujatikizya bukkale oobu. Twakalibilika kapati kujatikizya twaambo toonse itwakali mumafailo ngobakatunyanga. Ciindi bamukabunga ka Young Pioneers nobakalanga-langa mumafailo, bakajana magwalo aakali kulembelwa ndime kuzwa mumasena aindene-indene mucisi ca Malawi. Eeci cakabayoosya, nkaambo bakayeeya kuti ndakali mwiiminizi wamfwulumende. Aboobo cakufwambaana bakaapilusya mafailo oonse mbuli mbobakaajana kumwaalu iwakali kukkala kubusena oobo.

Ciindi cimwi, twakali kuzabuka mulonga mubwato. Mukamwini bwato wakali sicuuno wakabunga kabasitwaambo twacisi mubusena oobo, aboobo wakayanda kuti abone naa bantu boonse ibakatantide mubwato bakajisi tumakkaadi itutondezya cipani cabasitwaambo twacisi nkobazulilwa. Ciindi naakali afwaafwi kusika mpotwakabede, wakabona mubbi umwi ngobakali kuyandaula bamfwulumende. Eeci cakapa kuti kube kuzwangana, cakapa kuti aleke kubuzya kujatikizya tumakkaadi twakabunga kabasitwaambo twacisi. Alimwi twakalimvwa kuti Jehova wakatugwasya caluyando.

Mu February 1984, ndakali kuunka ku Lilongwe kutola malipooti kumukwesu umwi kuti walo akaatole kuofesi yamutabi ku Zambia. Mupulisa wakandiimika akulanga-langa zintu zyakali mubbeeke lyangu. Wakajana mabbuku aapandulula Bbaibbele, aboobo wakanditola kupolisi akutalika kunduuma. Mpoonya wakandaanga antambo akundibikka mukaanda antoomwe abaange ibakajatwa kabajisi zintu zyakubba.

Buzuba bwakatobela, mupati wabapulisa wakanditola kukaanda kamwi nkwaakalemba kuti: “Mebo, Trophim R. Nsomba, ndacileka kuba Kamboni wa Jehova kutegwa ndaangununwe.” Ndakaingula kuti: “Ndililibambilide kutali buyo kwaangwa pele alimwi akufwa. Ndicili Kamboni wa Jehova.” Ndakaka kusaina. Eeci cakanyemya mupati wabapulisa, wakauma atebulu anguzu ajanza lyakwe calo cakapa kuti mupulisa umwi iwakali muofesi imbi aboole kazuza kutegwa abone cakali kucitika. Mupati wabapulisa wakamwaambila kuti: “Muntu ooyu ukaka kusaina kuti waleka kukambauka. Aboobo, kasaina kuti ngu Kamboni wa Jehova, mpoonya tulamutuma ku Lilongwe kuti akaangwe.” Zyoonse eezyi nozyakali kucitika, bakaintu bangu taakwe ncobakazyi pe. Nokwakainda mazuba one, bakwesu bamwi bakacikonzya kwaambila bakaintu bangu nkondakabede.

Kupolisi ku Lilongwe, bakandibamba kabotu. Mupati wabapulisa wakaamba kuti: “Ngooyu mupunga  nkaambo waangwa akaambo ka Jwi lya Leza. Bantu bamwi omuno balaangidwe akaambo kakuti mbabbi.” Mpoonya wakandilonzya kuya kuntolongo yaku Kachere nkondakakkala myezi yosanwe.

Kapitawu wamuntolongo eeyi wakakkomana kuti ndakasika; wakali kuyanda kuti ndibe “pasita” wamuntolongo eeyi. Wakagwisya pasita iwakaliko akumwaambila kuti: “Tandiyandi kuti koyiisya Jwi lya Leza omuno nkaambo wakaangwa akaambo kakubbida cikombelo cako!” Aboobo, ndakapegwa mulimo wakuyiisya Bbaibbele nsondo ansondo kumiswaangano yakabambilidwe baange.

Kuzwa waawo zintu zyakacinca akubija kapati. Beendelezi bantolongo bakandibuzya-buzya kutegwa bazyibe naa kwakali Bakamboni bongaye mu Malawi. Ciindi nondatakabaingula kweelana ambobakali kuyanda, bakanduuma kusikila mane ndasuntuka. Aciindi cimwi, bakali kuyanda kuzyiba nkwaakabede maofesi eesu mapati. Ndakaamba kuti, “Mwabuzya mubuzyo muuba-uba, alimwi ndilamwiingula.” Bamapulisa bakakkomana alimwi bakayanda kuti balekkoode nzyondakali kuyanda kwaamba. Ndakapandulula kuti maofesi mapati aa Bakamboni ba Jehova alapandululwa mu Bbaibbele. Bakagambwa, mpoonya bakabuzya kuti: “Mpaali mu Bbaibbele aamba boobo?”

Ndakaingula kuti: “Mulugwalo lwa Isaya 43:12.” Bakalujalula, mpoonya bakalubala kabotu-kabotu: “‘Ndinywe bakamboni bangu,’ mbwaamba Jehova, ‘eelyo mebo ndime Leza.’” Bakaabala majwi aaya ziindi zyotatwe. Mpoonya bakandibuzya kuti: “Ino maofesi mapati aa Bakamboni ba Jehova inga aba buti oomu mu Bbaibbele kutali ku America?” Ndakabaambila kuti: “Abalo Bakamboni ba Jehova ku America babona lugwalo oolu kuti lwaamba maofesi aabo mapati.” Mbokunga tiindakali kukonzya kubaambila nzyobakali kuyanda kumvwa, ndakalonzyegwa kuya kuntolongo yaku Dzaleka, dolopo lya Lilongwe nkwiili kunyika.

Mu July 1984, ndakabasangana Bakamboni ibali 81 ibakali muntolongo yaku Dzaleka. Ooku, basintolongo ibali 300 bakali kwaatikizyanya koona ansi. Buce-buce, swebo Bakamboni twakacikonzya kulibikka mutubunga tusyoonto-syoonto kutegwa katulanga-langa lugwalo buzuba abuzuba ndobakali kusala bakwesu baindene-indene akati kesu. Eeci cakatuyumya kapati.

Mpoonya kapitawu wamuntolongo wakatwaandaanya kuzwa kuli basintolongo bamwi. Cakusisikizya mulindizi wakatwaambila kuti: “Mfwulumende taimusulide pe. Tumubikka muntolongo akaambo katwaambo tobilo: Mfwulumende iyoowa kuti mulajaigwa abamukabunga ka Young Pioneers, alimwi akaambo kakuti mukambauka kujatikizya nkondo iboola, mfwulumende iyoowa kuti basikalumamba bamfwulumende inga bayoowa akutija.”

Mu October 1984, toonse twakabetekwa munkuta. Nkuta yakakosola kuti umwi aumwi wandiswe aangwe myaka yobilo. Twakabikkwa muntolongo alimwi antoomwe abantu batali Bakamboni. Pele kapitawu wakaambilizya kuliboonse kuti: “Bakamboni ba Jehova tabafwebi tombwe pe. Aboobo, nobalindizi, mutanoobapenzyi kwiinda mukubalomba tombwe naa kubatuma kuti bamuletele mulilo  wakudonekela tombwe. Mbantu ba Leza! Bakamboni ba Jehova boonse beelede kunoopegwa cakulya ziindi zyobilo buzuba abuzuba, nkaambo tiibakaangilwa milandu yakutyola milawo, pele bakaangilwa nzyobasyoma mu Bbaibbele.”

Twakagwasyigwa amunzila zimbi akaambo kakuba ampuwo mbotu. Ciindi camasiku naa nokwakali kuwa mvwula, basintolongo tiibakali kuzumizyigwa kweendeenda. Pele twakali kuzumizyigwa kweendeenda kufwumbwa ciindi notwakali kuyanda. Bakalizyi kuti tiitwakali kukonzya kutija. Ciindi cimwi mulindizi iwakali kutulindilila ciindi notwakali kubeleka mumuunda naakaciswa, twakamunyamuna akumupilusya nkobakali kukkala babelesi bantolongo kutegwa akasilikwe. Beendelezi bantolongo bakalizyi kuti bakali kukonzya kutusyoma. Aboobo, kwiinda mukuzumanana kuba ampuwo iili kabotu, twakalongezyegwa kubona kusumpulwa kwazina lya Jehova kwiinda mumilomo yabaabo ibakatwaangide.—1Pet. 2:12. *

Mu May 11, 1985, ndakaangununwa kuzwa muntolongo yaku Dzaleka. Ndakakkomana kapati kuyanzana alimwi amukwasyi wangu! Tulumba Jehova kuti wakatugwasya kuzumanana kusyomeka muziindi eeziya zikatazya. Kujatikizya ciindi eeciya, tulimvwa mbwaakali kulimvwa mwaapostolo Paulo ciindi naakalemba kuti: “Bakwesu tatuyandi kuti kamutaazyi mapenzi aakatucitikila . . . Nokuba kujatikizya buumi bwesu twakali kuzumbauzya buya kuti naa tulapona. Mubwini, mumyoyo twakalimvwa kuti twapegwa mulandu wakuti tweelede kujaigwa. Cakali boobo kutegwa tutalisyomi tobeni pe, pele kuti tusyome Leza ooyo uubusya bafwide. Kuzwa mubukkale oobo bwalufwu wakatuvwuna.”—2Kor. 1:8-10.

Kwaamba masimpe, zimwi ziindi twakali kubona mbuli kuti tatukoofwutuka. Pele lyoonse twakali kulomba Jehova kuti atugwasye kuba basicamba akutupa busongo kutegwa tuzumanane kulicesya akupa kuti zina lyakwe lipati lilemekwe.

Jehova watulongezya mumulimo wakwe, muziindi zili kabotu amuziindi zyamapenzi. Eelo kaka cilatukkomanisya kubona ofesi yamutabi iyakamana kuyakwa mumwaka wa 2000, kubikkilizya akuyakwa kwa Maanda aa Bwami aayinda ku 1,000 mucisi ca Malawi coonse mbocizulwa! Zilongezyo eezyi izizwa kuli Jehova zilavwubya ncobeni kumuuya cakuti kulindime aba Lidasi, cili mbuli kuti nciloto buya! *