1. (a) Nkaambo nzi nkondo eeyi yakulwana Saatani ncoiyandika kapati lino? (b) Ino tuzyi buti kuti cilakonzyeka kulindiswe kuzunda munkondo eeyi yakulwana Saatani?

SAATANI ulwana bananike basyeede alimwi ‘abambelele zimbi.’ (Joh. 10:16) Makanze aa Diabolosi ngakumena buumbulu babelesi banji ba Jehova kweelana ambwakonzya mukaindi kaniini kasyeede. (Amubale Ciyubunuzyo 12:9, 12.) Sena inga twamuzunda Saatani munkondo eeyi? Inzya inga twamuzunda! Bbaibbele lyaamba kuti: “Amumukazye Diabolosi eelyo ulamutija.”—Jak. 4:7.

2, 3. (a) Mbuti muzeezo wakuti kuti Saatani tako mboupa kuti makanze aa Diabolosi ayaambele? (b) Ino muzyi buti kuti Saatani nkwali ncobeni?

² Bantu banji balausampaula muzeezo wakuti Saatani nkwali ncobeni. Kubantu bali boobu, Saatani amadaimona mbakuyeeyela buyo ibalembwa mumabbuku, ibatondezyegwa mumavidiyo aayoosya alimwi amuzisobano zyaakkompyuta. Bantu bali boobu bayeeya kuti taakwe muntu musongo uusyoma kuti myuuya mibi nkwiili ncobeni. Sena muyeeya kuti Saatani ulabijilwa ciindi bantu nobatasyomi kuti walo amadaimona aakwe nkobali ncobeni? Peepe! Kayi, ncuubauba kuli Saatani koofwaazya mizeezo yabaabo ibadooneka kuti nkwali. (2Kor. 4:4) Kusumpula muzeezo wakuti myuuya mibi taiko njenzila imwi akati kanzila zinji nzyabelesya Saatani kweena bantu.

³ Mbotuli babelesi ba Jehova, tatuli akati kabantu aabo beenwa. Tulizyi kuti Diabolosi nkwali ncobeni, nkaambo ngonguwe Saatani  iwakaambaula a Eva kwiinda munzoka. (Matl. 3:1-5) Saatani wakasampaula Jehova kujatikizya Jobu. (Job. 1:9-12) Wakali Saatani iwakasola kusunka Jesu. (Mt. 4:1-10) Alimwi ciindi Bwami bwa Leza nobwakatalika kulela mu 1914, wakali Saatani iwakatalika ‘kulwana’ bananike basyeede. (Ciy. 12:17) Saatani uciilwana nkondo eeyi cabukali nkaambo usola kunyonyoona lusyomo lwabaabo basyeede iba 144,000 abambelele zimbi. Kutegwa tuzunde munkondo eeyi, tweelede kumukazya Saatani akuzumanana kwiima nji mulusyomo. Mucibalo eeci tulabandika nzila zyotatwe mbotukonzya kucita oobo.

4. Ino Saatani walitondezya buti kuti ulalisumpula kapati?

⁴ Saatani ulalisumpula kapati. Kutegwa cilenge camuuya cibe abusicamba buli boobu bwakukazya bweendelezi bwa Jehova akulibikka kuba sinkondonyina ncitondezyo cakuti ulalisumpula. Aboobo, nzila imwi mbotukonzya kumukazya Saatani nkwiinda mukuba bantu balicesya alimwi akukaka kulisumpula. (Amubale 1 Petro 5:5.) Sena lyoonse ncibi kulimvwa kabotu akaambo kazintu nzyotucita, kulimvwa kabotu kujatikizya bantu bamwi naa kujatikizya zintu zimwi?

5, 6. (a) Sena cililubide kulimvwa kabotu akaambo kazintu nzyotujisi? Amupandulule. (b) Nzikozyanyo nzi zimwi zyamu Magwalo izitondezya kuti kulisumpula nkubi?

⁵ Kulimvwa kabotu akaambo kazintu nzyotucita kabotu, akaambo kamuntu umwi naa cintu cimwi kupa kuti tulimvwe kuba abulemu. Alimwi kutupa kukkutila akaambo kakuti swebo lwesu naa bantu mbotuyandisya bacita cintu cimwi cibotu naa akaambo kakuti bajisi cintu cimwi cibotu.” Tacili cibi kulimvwa boobu pe. Mwaapostolo Paulo wakaambila bana Tesalonika kuti: “Tulamulumbaizya kumbungano zya Leza akaambo kakuliyumya kwanu, alimwi alusyomo lwanu mukupenzyegwa kwanu koonse kubikkilizya amapenzi aamujisi.” (2Tes. 1:4) Aboobo, kulimvwa kabotu akaambo kamilimo yabamwi alimwi akukkomana akaambo kamilimo yesu kuli buyo kabotu. Tatweelede kufwa nsoni akaambo kamukwasyi wesu, zilengwa zyesu, naa busena nkotwakakomenena.—Mil. 21:39.

⁶ Kulubazu lumwi, kulisumpula kulakonzya kunyonganya zilongwe kwaambisya cilongwe cesu a Jehova. Kulisumpula kulakonzya kupa kuti tunyansye naa kukaka lulayo muciindi cakulutambula cakulibombya. (Int. 141:5) Kulisumpula “nkulilanga munzila iiteelede” naa “bube mbobatondezya bantu ibayeeya kuti balabainda bamwi nokuba kuti kanji-kanji inga kakutakwe twaambo tulimvwisya tubapa kuyeeya boobo.” Jehova ulakusulaika kulisumpula. (Ezk. 33:28; Am. 6:8) Pele Saatani ulakkomana kubona bantu balidunda, nkaambo batondezya bube mbubwenya mbwajisi bwakulisumpula. Kweelede kuti Saatani wakakkomana akulidunda kwabantu bali mbuli Nimrodi, Farao, alimwi a Abisalomu. Bantu aaba boonse bakazundwa abube bwakulisumpula. (Matl. 10:8, 9; Kul. 5:1, 2; 2Sam. 15:4-6) Kulisumpula alimwi nkokwakapa kuti cilongwe ca Kaini a Leza cinyongane. Kaini wakapegwa lulayo a Leza lwakwe mwini, pele kulisumpula kwakwe kwakapa kuti atatambuli lulayo ndwaakapegwa. Cakulisumpula taakacibikkila maano ncaakakulwaizyigwa kucita a Jehova, eeci cakapa kuti alinjizye muntenda.—Matl. 4:6-8.

7, 8. (a) Ino caamba nzi kusalaulana mubala, alimwi nkaambo nzi kucita boobu ncokuli kulisumpula? (b) Amupandulule kulisumpula mbokukonzya kunyonganya luumuno lwambungano.

⁷ Mazuba aano, bantu batondezya muuya wakulisumpula munzila zinji zibyaabi. Zimwi ziindi kulisumpula kupa kuti bantu kabayeeya kuti mubala wabo mubotu kwiinda mubala wabantu bambi. Bbuku limwi ilipandulula mabala lipandulula kuti kusalaulana mubala caamba kusalulula bantu bamwi naa kutayanda bantu bamubala umbi akusyoma kuti bantu bamibala iindene-indene bajisi bube bwiindene-indene anzyobakonzya kucita ziliindene-indene,  akuti bantu bamibala imwi balisumpukide kwiinda bantu bamibala imbi. Kulisumpula akaambo kamubala kwaleta manyongwe, nkondo, alimwi akujayana kutaambiki.

⁸ Tulizyi kuti zintu zili boobu tazyeelede kucitika mumbungano ya Bunakristo. Nokuba boobo, kuzwangana akati ka Banakristo, zimwi ziindi ikutalika akaambo kakulisumpula, kulakonzya kukomena cakuzwa munzila. Mbocakabede aku Banakristo bamwi mumwaanda wamyaka wakusaanguna Jakobo mbaakalembela mubuzyo ooyu uupa kuyeeya wakuti: “Ino ncinzi cileta nkondo akulwana akati kanu?” (Jak. 4:1) Inzya, kusulaikana mumyoyo yesu akulimvwa kuti tulabainda bamwi kulakonzya kujatikizya ŋambawido yesu alimwi anzyotucita, calo cikonzya kubacisa bamwi. (Tus. 12:18) Kwaamba masimpe, kulisumpula kulakonzya kunyonganya luumuno lwambungano.

9. Ino Bbaibbele litugwasya buti kulwana penzi lyakusalaulana mubala alimwi akulisumpula? (Amubone cifwanikiso icili kumatalikilo aacibalo.)

⁹ Kuti katujisi cilengwa cakulimvwa kuti tulabainda bamwi, tweelede kuyeeya kuti “muntu uulisumpula mumoyo ncisesemyo kuli Jehova.” (Tus. 16:5) Alimwi inga twacita kabotu kulilingula kujatikizya mbotubabona bantu bamibala imbi, bantu bakucisi cimbi, naa bantu ibajisi zilengwa ziindene azilengwa zyesu. Kuti mumoyo katulimvwa kuti tulabainda bamwi akaambo kamubala wesu naa akaambo kacisi cesu, nkokuti tatukabikkili maano kaambo kakuti ‘kuzwa kumuntu omwe Leza wakalenga bantu ibali muzisi zyoonse.’ (Mil. 17:26) Munzila eeyi kuli buyo musyobo omwe wabantu nkaambo bantu boonse bakazwa kumuntu omwe, Adamu. Aboobo, mbufwubafwuba kusyoma kuti bantu bamibala imbi balisumpukide kwiinda bambi naa kuyeeya kuti bambi tabasumpukide. Kuyeeya kuli boobu inga kweelela Saatani uuyanda kunyonganya luyando lwesu lwa Bunakristo alukamantano. (Joh. 13:35) Kutegwa tumulwane Saatani akumuzunda, tatweelede kuba bantu balisumpula.—Tus. 16:18.

10, 11. (a) Nkaambo nzi ncocitakonzyi kukatazya kutalika kuyandisya nyika? (b) Kulangilwa kuti ncinzi cakapa kuti Dema atalike kuyandisya nyika?

¹⁰ Saatani ‘ngomweendelezi wanyika eeyi,’ alimwi ili mumaanza akwe. (Joh. 12:31; 1Joh. 5:19) Aboobo, bunji bwazintu nyika eeyi nzyoikulwaizya kucita zilakazyanya azyeelelo zilembedwe mu Bbaibbele. Pele tazili zintu zyoonse zibi izili munyika. Nokuba boobo, tweelede kuzyiba kuti Saatani ulakonzya kubelesya nyika yakwe kutegwa tutalike kulombozya zintu zimwi alimwi akusola kutuyunga kutegwa tubisye naa kuyandisya nyika akuleka kukubikkila maano kukomba Jehova.—Amubale 1 Johane 2:15, 16.

¹¹ Cakutadooneka, Banakristo bamwi bamumwaanda wamyaka wakusaanguna bakali kuyandisya nyika. Mucikozyanyo, Paulo wakalemba kuti: “Dema wandilekelezya akaambo kakuyandisya bweende bwazintu obuno.” (2Tim. 4:10) Bbaibbele talyaambi cacigaminina naa zyakali zintu nzi nzyaakayandisya munyika Dema izyakapa kuti alekelezye Paulo. Ambweni Dema wakatalikide kuyandisya zintu zyakumubili kwiinda zintu zyakumuuya. Kuti naa mbocakabede oobo, Dema wakasweekelwa zyoolwe zyakumuuya zikkomanisya. Sena zintu nzyaakajana zyakali kwiinda zintu nzyaakasweekelwa? Sena nyika yakali kukonzya kupa Dema cintu cili coonse icakali kukonzya kwiinda zilongezyo Jehova nzyaakali kukonzya kumupa akaambo kakuba mubelesinyina a Paulo?—Tus. 10:22.

12. Muunzila nzi motukonzya ‘koongelezyegwa alubono’?

¹² Cintu cikozyenye aceeci cilakonzya kutucitikila andiswe. Mbotuli Banakristo, andiswe tulayanda kulijanina zintu ziyandika zyakumubili azyamikwasyi yesu mbubwenya mbuli bantu boonse. (1Tim. 5:8) Tulizyi kuti Jehova  uyanda kuti katukkomana mubuumi nkaambo wakapa ba Adamu a Eva Paradaiso yeebeka kutegwa kabakkala mumo. (Matl. 2:9) Pele Saatani ulakonzya kunyonganya kulombozya kwesu kwiinda ‘mukutoongelezya alubono.’ (Mt. 13:22) Bantu banji bayeeya kuti mali inga abapa kukkomana naa kuti zintu zyakumubili inga zyabapa kuzwidilila. Kuyeeya kuli boobu nkweenwa ncobeni, alimwi inga kwapa kuti tusweekelwe cintu ciyandisi ncotujisi, nkokuti cilongwe cesu a Jehova. Jesu wakacenjezya basikumutobela kuti: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” (Mt. 6:24) Kuti naa twabelekela Lubono cakumaninina, nkokuti twaleka kubelekela Jehova, eeci Saatani ncayanda kuti tucite! Tutalekeli mali naa zintu zikonzya kuulwa amali kunyonganya cilongwe cesu a Jehova. Kutegwa tumulwane Saatani, tweelede kuzibona munzila yeelede zintu zyakumubili.—Amubale 1 Timoteyo 6:6-10.

13. Ino nyika eeyi yabunyonganya buti bubambe bwacikwati alimwi akoonana?

¹³ Kakole akambi ikali munyika ya Saatani mbwaamu. Mazuba aano, bantu banji kusyomeka mucikwati kubikkilizya acikwati cini kucigama bazibona kuti nkubula lwaanguluko akuti mbubambe bwakaindi butabeleki mazuba aano. Mucikozyanyo, mukaintu umwi uuzyibidwe kapati muzisobano wakaamba kuti: “Kukwata naa kukwatwa kumuntu omwe tacikonzyeki pe kumwaalumi akumwanakazi. Tandizyi naa kuli muntu uuli woonse uusyomeka mumakani aaya naa uunga wayanda kusyomeka.” Mwaalumi umwi uusobana zisobano wakaamba kuti: Tandizyi pe naa mbotwakalengwa kuti katukwetene amuntu omwe mubuumi bwesu boonse.” Kweelede kuti Saatani ulakkomana ciindi bantu balaampuwo nobanyansya cipego ca Leza cacikwati. Cakutadooneka, Diabolosi tayandi kusumpula bubambe oobu naa kuyanda kubona kuti bwazwidilila. Aboobo, kutegwa tulwane Saatani akuzwidilila, tweelede kusumpula bubambe bwa Leza bwacikwati.

14, 15. Mbuti mbotukonzya kulwana sunko lyakucita bwaamu?

¹⁴ Tacikwe makani naa tulikwete, tulikwetwe naa pe, tweelede kubeleka canguzu kuzikaka zintu zyoonse zijatikizya kutalilemeka mumakani aakoonana munzila iili yoonse. Sena nkondo eeyi njuubauba? Peepe! Mucikozyanyo, kuti kamuli mukubusi, inga mwamvwa basicikolonyoko kabaamba cakulidunda kujatikizya makani aakoonana naa kutuminana zintu ziletela muzeezo wakoonana afooni, kucita boobu bantu bamwi bakubona kuti kulikozyenye akutuma zifwanikiso zijatikizya mantanda aabana. Bbaibbele lyaamba kuti: “Kufwumbwa ooyo uucita bwaamu ubisizya mubili wakwe mwini.” (1Kor. 6:18) Bantu bapenga akufwa akaambo kakuvwula kwamalwazi aayambukila kwiinda mukoonana. Alimwi bunji bwabakubusi batakwete naa batakwetwe ibasweekelwa bunakalindu bwabo balipa mulandu ancobakacita. Bwini ibujatikizya bwaamu buliindene kapati azitondezyegwa mumafilimu, zyalo izikonzya kutupa kusyoma kuti kunyina bubi buliko akusotoka milawo ya Leza. Kuyeeya kuli boobu kupa bantu “kweenwa anguzu zyacibi.”—Heb. 3:13.

¹⁵ Kuti naa mulwana sunko lyakucita bwaamu, ino ncinzi ncomukonzya kucita? Amukuzyibe kukompama kwanu. (Rom. 7:22, 23) Amupaile kuli Leza kutegwa amupe nguzu. (Flp. 4:6, 7, 13) Amweelebe bukkale bukonzya kupa kuti mucite bwaamu. (Tus. 22:3) Alimwi ciindi nomwasunkwa, amulikake sunko eelyo mpoonya-mpoonya.—Matl. 39:12.

16. Ino Jesu wakaingula buti ciindi naakali kusunkwa a Saatani, alimwi ncinzi ncotukonzya kwiiya kucikozyanyo eeci?

¹⁶ Jesu wakatusiila cikozyanyo cibotu kapati kujatikizya mbotukonzya kulwana masunko. Taakwe naakeenwa azisyomezyo zya Saatani, alimwi taakwe naakatalika kuyeeya  bubotu abubi bwazisyomezyo eezyo. Muciindi caboobo, wakaingula cakufwambaana kwiinda mukwaamba kuti: “Kulilembedwe kuti.” (Amubale Matayo 4:4-10.) Jesu wakalilizyi Jwi lya Leza, eeci cakapa kuti acikonzye kubweza ntaamu cakufwambaana alimwi akuzubulula magwalo ciindi naakali kusunkwa. Kutegwa tumulwane Saatani akuzunda, tatweelede kulekela kuti tusunkwe mukucita bwaamu.—1Kor. 6:9, 10.

17, 18. (a) Nzilwanyo nzi zimbi nzyajisi Saatani, alimwi nkaambo nzi eeci ncociteelede kutugambya? (b) Ncinzi cilangilwa kumucitikila Saatani, alimwi ino eeci cimukulwaizya buti kuliyumya?

¹⁷ Kulisumpula, kuyandisya zintu zyakumubili, alimwi abwaamu nzilwanyo buyo zyotatwe nzyabelesya Saatani. Kuli zilwanyo azimbi zinji. Mucikozyanyo, Banakristo bamwi balakazyigwa abanamukwasyi, balafwubaazyigwa abasicikolonyina, naa kukasyigwa kukambauka amfwulumende. Buyumuyumu buli boobu tabutugambyi pe, nkaambo Jesu wakacenjezya basikumutobela kuti: “Muyoosulwa abantu boonse akaambo kazina lyangu, pele ooyo uuliyumya kusikila kumamanino uyoofwutulwa.”—Mt. 10:22.

¹⁸ Mbuti mbotukonzya kumulwana Saatani akuzunda? Jesu wakaambila basikwiiya bwakwe kuti: “Kwiinda mukuliyumya kwanu, muyoofwutula buumi bwanu.” (Lk. 21:19) Taakwe cintu ncakonzya kucita muntu cikonzya kutunyonyweeda limwi. Taakwe muntu uukonzya kunyonganya cilongwe cesu a Jehova ccita kuti swebo lwesu twazumizya kuti eeco cicitike. (Rom. 8:38, 39) Noluba lufwu lwababelesi ba Jehova talupi kuti Saatani azunde pe, nkaambo Jehova uyoosinizya kuti bafwide babusyigwa! (Joh. 5:28, 29) Kulubazu lumwi, Saatani takazumanani kupona. Bwaakunyonyoonwa bweende bwakwe bubyaabi, Saatani uyakuwaalwa mumulindi uutagoli kwamyaka iili 1,000. (Ciy. 20:1-3) Yaakumana myaka iili 1,000 ya Bulelo bwa Jesu, Saatani “uyakwaangununwa akugusyigwa muntolongo yakwe” kwakaindi kaniini kutegwa azikweene bantu ciindi camamanino. Kuzwa waawo, Diabolosi uyoonyonyoonwa. (Ciy. 20:7-10) Saatani uyoonyonyoonwa ncobeni, pele nywebo buumi bwanu bwakumbele bulisinizyide! Amumukazye Saatani, muyume mulusyomo. Mulakonzya kumulwana Saatani akuzunda!