Sena cakamukkomanisya kubala mamagazini aa Ngazi Yamulindizi aalino-lino? Amubone naa inga mwayiingula mibuzyo eeyi iitobela:

Sena Banakristo Beelede Kupaila Kuli Jesu Kristo?

Peepe. Jesu lwakwe mwini wakatuyiisya kupaila kuli Jehova, alimwi wakatusiila cikozyanyo mukuti wakali kupaila kuli Bausyi. (Mt. 6:6-9; Joh. 11:41; 16:23) Mbubwenya buyo, abasikumutobela bakusaanguna bakali kupaila kuli Leza, ikutali kuli Jesu. (Mil. 4:24, 30; Kol. 1:3)—1/1, peeji 14.

Ncinzi ncotukonzya kucita mwaka amwaka kulibambila kwiibaluka lufwu lwa Jesu?

Cintu cimwi ncotukonzya kucita nkutobela mulongo wakubala Magwalo aamu Bbaibbele aajatikizya Ciibalusyo. Alimwi tulakonzya kusola kuyungizya ciindi mumulimo wesu wakukambauka lya Ciibalusyo. Alimwi tweelede kuzinzibala kuyeeya kujatikizya bulangizi mbwatupede Leza.—1/15, mapeeji 14-16.

Ino zintu zyakabeendela buti baange bobilo bana Egepita ibakaambila Josefa ziloto zigambya?

Josefa wakaambila silutwe wa Farao iwakali kutola zyakunywa kuti wakali kuyoopiluka acuuno ncaakajisi. Pele sikupanga zinkwa, ciloto cakwe cakali kwaamba kuti wakali kuyoojaigwa a Farao kwiinda mukugagailwa acisamu. Zyoonse nzyaakaamba zyakacitika. (Matl. 40:1-22)—2/1, mapeeji 12-14.

Ncipego nzi bakwesu baku Japan ncobakatambula cakutayeeyela?

Bakatambula kabbuku ikajisi bbuku lya Matayo kuzwa mu Bbaibbele lya Busanduluzi Bwanyika Mpya. Kabbuku aaka kalaabilwa mumulimo wakukambauka, alimwi bantu banji ibatalizyi kabotu Bbaibbele balakatambula.—2/15, peeji 3.

Mbukkale buli buti ibwakaliko mumwaanda wamyaka wakusaanguna ibwakagwasya kuti makani mabotu akambaukwe mumasena manji?

Luumuno Lwabana Roma ilwakatola myaka minji, lwakapa kuti kutabi mazwanga manji. Basikwiiya bakusaanguna bakali kukonzya kweenda kubelesya migwagwa mibotu. Mwaambo wa Chigiriki ngowakali kubelesyegwa kapati, calo icakagwasyilizya mulimo wakukambauka, alimwi aba Juda ibakamwaikizyenye mumasena oonse aakali kweendelezyegwa abana Roma. Alimwi basikwiiya bakali kukonzya kubelesya mulawo wabana Roma kukwabilila makani mabotu.—2/15, mapeeji 20-23.

Nkaambo nzi Banakristo bakasimpe ncobatasekeleli pobwe lya Isita?

Jesu wakalailila basikumutobela kwiibaluka lufwu lwakwe, ikutali bubuke bwakwe pe. (Lk. 22:19, 20)—3/1, peeji 8.

Mumyaka yalino-lino, nkaambo nzi mabbuku eesu ncaatavwuli kupandulula ncoziiminina zintu zyaambidwe muzibalo zyamu Bbaibbele?

Ibbaibbele lilaamba kuti bantu bamwi ibaambidwe bakali kwiiminina zintu zimwi. Cikozyanyo cimwi cijanika mulugwalo lwa Bagalatiya 4:21-31. Ikuti kakutali boobo, tacili kabotu kuyeeyela naa kwaamba ncociiminina cintu icaambidwe mucibalo. Nokuba boobo, kuli ziiyo nzyotukonzya kwiiya kubantu baambidwe naa cintu icakacitika icaambidwe mu Bbaibbele. (Rom. 15:4)—3/15, mapeeji 17-18.

Ino nkaambo nzi cibeela cabbuku lyakaindi icakajanika mumulwi wamafwuse mucisi ca Egypt ncociyandika?

Mumwaanda wamyaka wainda, cibeela cabbuku cimwi cili boobu cakajanika icijisi zibeela zyabbuku lya Makani Mabotu aa Johane. Kweelede kuti akalembwa nokwakainda myaka iili mbwiibede kuzwa ciindi Johane naakalemba bbuku lyakwe, alimwi alatondezya kuti makani aa Johane ngotujisi mazuba aano ngamasimpe, calo citondezya kuti Bbaibbele lilasyomeka.—4/1, mapeeji 10-11.

Nkaambo nzi kugwisya muntu mumbungano iwateempwa ncobuli bubambe bwaluyando?

Bbaibbele lilaamba ntaamu ziyandika kapati izyeelede kutobelwa mububambe bwakugwisyigwa mumbungano, ntaamu izigwasya. (1Kor. 5:11-13) Bubambe oobu bupa kuti izina lya Leza lilemekwe, bukwabilila mbungano kuti kaisalala, alimwi bulakonzya kupa kuti ooyo iwacita cibi ayempwe.—4/15, mapeeji 29-30.