1, 2. (a) Ino nzilongezyo nzi zyakumubili nzyomulangila kapati mu Paradaiso anyika? (Amubone cifwanikiso icili kumatalikilo aacibalo.) (b) Ino nzilongezyo nzi zyakumuuya iziyooba munyika mpya?

“BUUMI BWINI-BWINI.”Ibunji bwesu, majwi aaya atuyeezya bulangizi bwabuumi butamani mu Paradaiso anyika. Alimwi buya, mwaapostolo Paulo wakaswaanganya “buumi butamani” ‘abuumi bwini-bwini.” (Amubale 1 Timoteyo 6:12, 19.) Tulangila buumi butamani ibuyootupa kukkutila kukabe kutamani alimwi akukondwa. Cilakatazya buya akweezyeezya mbotunoolimvwa twabuka buzuba abuzuba katuli bantu balondokede kumubili alimwi amumizeezo. (Is. 35:5, 6) Amuyeeye buyo mbociyookkomanisya kuyanzana abayandwa besu alimwi abalongwe, kubikkilizya abaabo ibayoobusyigwa! (Joh. 5:28, 29; Mil. 24:15) Alimwi tuyooba acoolwe cakuyungizya luzyibo lwesu mumakani aasaayansi, nyimbo, milimo yakuyaka, naa luzyibo muzintu zimwi.

² Nokuba kuti tulangila zintu zibotu zili boobo kumbele, zilongezyo zyakumuuya nzyezintu ziyootukkomanisya kapati munyika mpya. Eelo kaka cinookkomanisya kapati kuzyiba kuti zina lya Jehova lyakasalazyigwa alimwi abweendelezi bwakwe bwakasumpulwa!  (Mt. 6:9, 10) Tuyookkomana kubona makanze aa Jehova aakumatalikilo aajatikizya bantu alimwi anyika kaali mukuzuzikizyigwa. Alimwi amuyeeye buyo mbocinooli cuuba-uba kuba balongwe ba Jehova mbotuyaabulondoka mane kusikila tukabe bantu balondokede cakumaninina!—Int. 73:28; Jak. 4:8.

3. Ncinzi ncotweelede kulibambila lino?

³ Tulakonzya kuyootambula zilongezyo eezyi, nkaambo Jesu utusyomezya kuti “kuli Leza zintu zyoonse zilakonzyeka.” (Mt. 19:25, 26) Pele ikuti naa tulangila kupona munyika mpya eeyo—alimwi akuzumanana kupona bwaakwiinda Bulelo bwa Kristo bwa Myaka Iili 1,000—tweelede kubweza ntaamu lino ‘kujatisya’ buumi butamani. Tweelede kupona munzila iitondezya kuti tulaalangila mamanino aanyika eeyi mbyaabi, alimwi tweelede kubweza ntaamu zigwasya lino kutegwa tulibambile kuyoopona munyika mpya. Mbuti mbotukonzya kucita boobu notucili mubweende bwazintu oobu bubyaabi?

4. Amupe cikozyanyo icitondezya mbotukonzya kulibambila lino kuyoopona munyika mpya.

⁴ Mbuti mbotukonzya kulibambila lino kuyoopona munyika ya Leza mpya? Atwaambe kuti tulibambila kulongela kucisi cimbi. Ino mbuti mbotukonzya kulibambila kucinca ooko? Tulakonzya kutalika kwiiya mwaambo wabantu bakkala kubusena ooko. Kwiiya kujatikizya zilengwa zyakucisi eeco cilakonzya kugwasya. Tulakonzya kulabila zyakulya zimwi nzyobalya. Munzila imwi, tulakonzya kutalika kupona mbuli kuti twakaba kale bantu bakkala kubusena ooko. Kayi oobo mbotulangila kuyoopona twaakuunka kubusena oobo. Mbubwenya buyo, tulakonzya kulibambila kuyoopona munyika mpya kwiinda mukupona lino, kusikila mpotugolela, kweelana ambotulangila kuyoopona aciindi eeco. Kujatikizya makani aaya, amulange-lange zikozyanyo zitobela.

5, 6. Mbuti kwiiya kulibombya kububambe bwa Leza mbokutugwasya kulibambila kuyoopona munyika mpya?

⁵ Munyika mpya, bweendelezi bwa Leza buyoosumpulwa cakumaninina. Eelo kaka kuyooba kwiindana kapati akuyanda kulyeendelezya ikusumpulwa munyika eeyi yeendelezyegwa a Saatani! Kuyanda kulyeendelezya alimwi akutanyoneka kujatikizya muntu nzyayanda zilakonzya kukkomaninwa kapati abantu bamwi, pele ino ncinzi cacitika akaambo kamuuya ooyu? Ikutatobela busolozi bwa Leza kwaleta mapenzi, macise, alimwi buya antenda. (Jer. 10:23) Eelo kaka tulangila kumbele ciindi bantu boonse nobayoolibombya kubweendelezi bwa Jehova bwaluyando!

⁶ Cinooli cintu cikkomanisya kuba ansi abubambe bwa Jehova munyika mpya katulangila kubotya nyika, kuyiisya bantu bayoobusyigwa, alimwi akucita ncayanda Jehova. Pele ino kuti naa twaakulaililwa kubeleka mulimo umwi uutatukkomanisyi? Sena tuyoobutobela busolozi kwiinda mukuubeleka mulimo ooyo kusikila mpotugolela alimwi buya akuukkomanina? Ibunji bwesu tulakonzya kwiingula kuti inzya! Aboobo, sena lyoonse tulalibombya kubusolozi bwa Leza lino? Ikuti naa tulacita oobo, tulibambila kuyoopona kukabe kutamani mubulelo bwa Jehova.

7, 8. (a) Nkaambo nzi ncotweelede kuba amuuya walukamantano? (b) Nkucinca nzi kwakabacitikila Banakristo bamwi? (c) Ncinzi ncotukonzya kuba masimpe kujatikizya buumi munyika mpya?

⁷ Tulakonzya kulibambila kuyoopona munyika mpya ikutali buyo kwiinda mukulibombya kububambe bwa Jehova bucitwa mazuba aano pele alimwi akwiinda mukubeleka canguzu lino kuba amuuya wakukkutila amuuya walukamantano. Ikuti naa twabamvwida aabo ibeendelezya mazuba aano, ambweni akukkutila alimwi akukkomana amikuli mipya yamulimo, cakutadooneka tuyooba abube mbubwenya munyika mpya. (Amubale Bahebrayo 13:17.) Munyika Yakasyomezyegwa, lukono lwabana Israyeli lwakali kupegwa kwiinda  mukuuma cisolo. (My. 26:52-56; Jos. 14:1, 2) Mazuba aano, tatuzyi busena umwi aumwi mbwayoopegwa kuti akkale munyika mpya. Nokuba boobo, kubamvwida aabo ibasololela kuyootupa kukkutila alukkomano lupati notucita kuyanda kwa Jehova kufwumbwa nkotunoobede munyika aciindi eeco.

⁸ Eelo kaka ncoolwe citaliboteli kuyoopona munyika mpya ya Leza ansi aabweendelezi bwa Bwami bwakwe! Nkakaambo kaako cilayandika kapati kukamantana ambunga ya Jehova lino alimwi akucita mulimo uuli woonse ngotupedwe. Masimpe, bukkale bwesu bulakonzya kucinca mukuya kwaciindi. Mucikozyanyo, ibamukwasyi wa Bbeteli bamwi ku United States bakatumwa mumulimo wabupainiya alimwi lino bali mukujana zilongezyo zinji mumbazu zimwi zyamulimo waciindi coonse. Akaambo kakucembaala naa zintu zimwi, bamwi ibakali mumulimo wakweendeenda lino bakapegwa mulimo wakubeleka kabali bapainiya baalubazu. Ikuti naa twaba amuuya wakukkutila, kupailila lugwasyo lwa Leza, akucita zyoonse nzyotukonzya mumulimo wakwe, tuyookkomana akutambula zilongezyo zinji nomuba muziindi eezyi zyamamanino izikatazya. (Amubale Tusimpi 10:22.) Ino mbuti kujatikizya bulangizi bwesu bwakumbele? Tulakonzya katujisi mumizeezo busena nkotulombozya kuyookkala munyika mpya, pele tulakonzya kulombwa kulongela kubusena bumbi. Tacikwe makani kufwumbwa nkotunookkala aciindi eeco alimwi ancotuyoocita, tulakonzya kuba masimpe kuti tuyoolumba akukkutila, akuzula lukkomano.—Neh. 8:10.

9, 10. (a) Ino nimbazu zili momukonzya kuyooyandika kukkazika moyo munyika mpya? (b) Mbuti mbotukonzya kutondezya kuti tulakkazika moyo?

⁹ Munyika mpya, kuyooba ziindi nokuyooyandika kukkazika moyo. Mucikozyanyo, tulakonzya kumvwa kuti bamwi bantu babusyigwa kubafwu calo iciyoobakkomanisya kapati banamukwasyi alimwi abalongwe. Pele swebo ambweni tuyooyandika kulindila kubusyigwa kwabayandwa besu. Ikuti naa caba boobo, sena tuyookkomana antoomwe abamwi alimwi akukkazika moyo? (Rom. 12:15) Kwiiya kulindila cakukkazika moyo kujatikizya kuzuzikizyigwa kwazisyomezyo zya Jehova lino kuyootugwasya kukkazika moyo kuciindi eeco.—Muk. 7:8.

¹⁰ Alimwi tulakonzya kulibambila kuyoopona munyika mpya kwiinda mukukkazika moyo ciindi nokwaba kucinca mukumvwisya Magwalo. Sena tuli bankutwe kubala akukkazika moyo ciindi nzila mbotukamvwisya kasimpe noiyaabusalazyigwa mazuba aano? Ikuti kacili boobo, nkokuti tatulangilwi kuyooba abuyumuyumu kukkazika moyo munyika mpya ciindi Jehova nanoozyibya nzyayanda kubantu.—Tus. 4:18; Joh. 16:12.

11. Ncinzi Jehova ncatuyiisya lino kujatikizya mbotubeendelezya bantu, alimwi mbuti eeci mbociyootugwasya munyika mpya?

¹¹ Bube bumbi ibuyootugwasya kulibambila kuyoopona munyika mpya muuya wakulekelela. Mu Bulelo bwa Kristo bwa Myaka Iili 1,000, ciyoobatolela ciindi baluleme abataluleme kuti baleke tumpenda twakutalondoka. (Mil. 24:15) Sena tuyoocikonzya kubeendelezya caluyando bamwi kuciindi eeco? Ikuti naa lino twaiya kulekelela camoyo woonse alimwi akweeleba cilengwa cakutamvwana abantu bamwi, ciyakutuubila kucita boobo kuciindi eeco.—Amubale Bakolose 3:12-14.

12. Amupandulule kweendelana kuliko akati kazintu nzyotulangila kumbele alimwi abuumi mbotupona lino.

¹² Buumi munyika mpya tabukaambi kuti lyoonse tunoojana ncotuyanda kufwumbwa ciindi notuciyanda cintu eeco. Muciindi caboobo, buumi oobo buyoobikkilizya kulumba akukkutila mubukkale buli boonse mbotuzumanana kugwasyigwa kwiinda mukulibombya kubweendelezi bwa Jehova ibwaluyando. Eeci ciyakwaamba kutondezya bube oobo mbubwenya Jehova mbwatuyiisya kuti tube ambubo lino. Kwiinda mukwiiya kupona lino mbubwenya mbotulangila kuyoopona kumbele,  tuba abube oobo mbotuyakuyandika kutondezya lyoonse mane kukabe kutamani. Tuyumya lusyomo lwesu lwakuti nkoili ncobeni “nyika njotwaamba eeyo iiboola.” (Heb. 2:5; 11:1) Kuyungizya waawo, tutondezya mbotuyandisya kupona mubukkale bululeme oobo ibunooliko aciindi eeco munyika. Mubwini, tulibambila kuyoopona kukabe kutamani munyika mpya ya Leza.

¹³Amubone aimbi nzila yomwe mbotulibambila kuyoopona buumi bwini-bwini kumbele. Nokuba kuti tusyomezyegwa kuti kuyooba cakulya cinji munyika mpya azintu zimwi ziyandika anyika, tuyookkomana kapati zyaakuzuzikizyigwa zintu zyakumuuya nzyotuyandika. (Mt. 5:3) Tuyoobikka zintu zyakumuuya mubusena bwakusaanguna, alimwi tuyootondezya kuti tulabotelwa kapati muli Jehova. (Int. 37:4) Kwiinda mukubikkila maano kapati kuzintu zyakumuuya lino, tulibambila kuyoopona buumi bwini-bwini kumbele.—Amubale Matayo 6:19-21.

14. Nimbaakani nzi zyakumuuya izikonzya kugwasya bakubusi kuti kababuyeeya lyoonse buumi butamani?

¹⁴ Mbuti mbotukonzya kuyungizya lukkomano lwesu mumilimo yakumuuya? Nzila imwi nkwiinda mukulibikkila mbaakani zyakumuuya. Ikuti naa mucili mukubusi alimwi muleezyeezya kapati kujatikizya mulimo wa Jehova, sena inga tiimwalanga-langa zibalo zimwi izyakalembwa izyaamba zibeela ziindene-indene zyamulimo waciindi coonse alimwi akuba ambaakani yakucita mulimo umwi wamilimo eeyo? * Mulakonzya kubandika abamwi babaabo ibabeleka myaka minji mumulimo waciindi coonse. Kwiinda mukubikka mulimo wakukambauka kuba mbaakani yanu yamubuumi, mulibambila kuzumanana kubelekela Leza munyika mpya, oomo lwiiyo lwanu lwakumuuya alimwi aluzyibo ndomwajana moziyoogwasya kapati.

15. Ino nimbaakani nzi nzyobakonzya kuzuzikizya basikwaambilizya Bwami?

¹⁵ Mbotuli basikwaambilizya Bwami, nimbaakani nzi zyakumuuya nzyotukonzya kulibikkila? Tulakonzya kulibikkila mbaakani yakuyungizya luzyibo lwesu mucibeela cimwi camulimo wesu wakukambauka. Naa tulakonzya kusolekesya kuyaambele munzila mbotuzimvwisya njiisyo zyamu Bbaibbele alimwi ambotweelede kuzibelesya. Ino mbuti kujatikizya kuyaambele mukubala kabotu kubuleya alimwi akukanana naa kwiingula lyamiswaangano? Cakutadooneka mulakonzya kuyeeya ambazu zimbi. Pele kaambo kapati nkakuti: Kulibikkila mbaakani zyakumuuya kuyooyungizya busungu bwanu kuzintu zyakumuuya, alimwi eeci ciyoomugwasya kulibambila kuyoopona munyika mpya.

16. Nkaambo nzi kubelekela Jehova ncobuli buumi bubotu kwiinda?

¹⁶ Sena kuba aciindi cakulibambila kuyoopona munyika mpya ya Leza caamba kutabikkila maano kubuumi bubotu alimwi ibukkomanisya mazuba aano? Peepe! Kubelekela Jehova mbobuumi bukkomanisya kwiinda. Tabuli buzike naa kusungilizyigwa buya kutegwa tukafwutuke mapenzi mapati. Mbotwakalengelwa kupona, njenzila iiletela lukkomano kapati. Kusololelwa a Jehova akukkomana aluyando lwakwe lutamani zilayandika kapati kwiinda kupona katutajisi cilongwe anguwe. (Amubale Intembauzyo 63:1-3.) Pele tatweelede kulindila nyika mpya buya kutegwa tukakkomane azilongezyo zyakumuuya iziboola akaambo kakubelekela Jehova camoyo woonse—nkozili kale noliba lino! Mubwini, bamwi bandiswe bali kukkomana azilongezyo eezyi kwamyaka minji, alimwi tulizyi kuti kunyina zintu zimbi nzyotukonzya kucita mubuumi izikonzya kuleta lukkomano lupati.—Int. 1:1-3; Is. 58:13, 14.

17. Ino zintu nzyotuyandisya kucita tobeni alimwi akulikondelezya zinoojisi busena nzi mu Paradaiso?

¹⁷ Zintu zikondelezya alimwi izikkomanisya muntu umwi aumwi zinoojisi busena munyika mpya ya Leza. Mwayeeya buyo, nkaambo nzi Jehova ncaakatulenga aluyandisisyo lwakucita zintu nzyotukkomanina alimwi izikondelezya ikuti naatakali makanze aakwe kuti katuzicita zintu eezyi nzyotulombozya cakumaninina? (Muk. 2:24) Munzila eeyi alimwi anzila zimbi, Jehova lyoonse ‘uyookkutya cilenge coonse cipona kwiinda mukucipa ncociyanda.’ (Int. 145:16) Kulikondelezya alimwi akulyookezya zilijisi busena bwanzizyo, pele lukkomano ilujanika kuzwa kulinzizyo lulayungizyika ciindi notubikka cilongwe cesu a Jehova mubusena bwakusaanguna. Oobo mbociyooba amunyika ya Paradaiso. Eelo kaka ncabusongo kwiiya kubikka zintu nzyotuyandisya kucita tobeni mubusena bweelede kumwi katubikka Bwami mubusena bwakusaanguna alimwi akubikkila maano kuzilongezyo zyakumuuya iziliko lino kubantu ba Jehova!—Mt. 6:33.

18. Mbuti mbotukonzya kutondezya kuti tulibambila kuyoopona kukabe kutamani mu Paradaiso?

¹⁸ Mu Paradaiso iiboola, tuyooba alukkomano ndotutana buzuba twaba aandulo. Atutondezye mbotubulombozya kapati buumi bwini-bwini kwiinda mukulibambila lino. Atube abube bwa Leza akujana lukkomano kapati kwiinda mukutola lubazu cabusungu mumulimo wakukambauka Bwami ngotwakapegwa kucita. Kucita zintu zyakumuuya acibe cintu ncotukkomanina. Alimwi katujisi lusyomo muzisyomezyo zya Jehova, atupone lino munzila iitondezya kuti tulangila kuyoopona munyika mpya!