NDAKAZYALILWA mu Queensland, mucisi ca Australia, mumwaka wa 1955. Kwiinde buyo ciindi cisyoonto kuzwa leelyo, bamaama, ba Estelle, bakatalika kwiiya Bbaibbele a Bakamboni ba Jehova. Bakabbapatizyigwa mumwaka iwakatobela, mpoonya bataata, ba Ron, bakaba Bakamboni nokwakainda myaka iili 13. Ndakabbapatizyigwa mu 1968 mumunzi umwi iwakali mu Queensland.

Kuzwa kaindi nondakacili musyoonto, ndilakkomana kubala alimwi ndilaikkomanina myaambo. Ciindi notwakali kuya mukweendeenda mbuli mukwasyi kubelesya mootokala, ambweni cakali kubacima bazyali bangu kundibona kandikkede musyule kumwi kandibala bbuku muciindi cakweebelela zintu zibotu izyakali mumasena motwakali kwiinda. Pele kuyandisisya kubala kwakandigwasya kapati kucikolo. Nondakali kusekondali ku Glenorchy, dolopo lili ansumbu ya Tasmania, ndakalumbulwa kwaziindi zili mbozibede akaambo kakucita kabotu kucikolo.

Nokuba boobo, cakasika ciindi nondakeelede kusala cakucita mumakani amwi. Sena ndakeelede kuzumina kubbadelelwa kuyunivesiti? Nokuba kuti ndakali kuyandisya kapati kubala mabbuku alimwi akwiiya, ndilalumba kuti bamaama bakandigwasya kuyandisya Jehova. (1Kor. 3:18, 19) Aboobo, kwiinda mukuzumizyigwa abazyali bangu, ndakaleka kwiiya akutalika mulimo wabupainiya mu January 1971 kandijisi myaka yakuzyalwa iili 15, nkaambo ndakalimanizyide lwiiyo lwakusekondali.

 Kwamyaka iili lusele iyakatobela, ndakajisi coolwe cakubeleka kandili mupainiya mu Tasmania. Muciindi eeci, ndakakwata musimbi weebeka waku Tasmania, Jenny Alcock, alimwi kwamyaka yosanwe twakabeleka antoomwe katuli bapainiya baalubazu mumasena aakule ku Smithton aku Queenstown.

Mu 1978 twakaunka kunze aacisi kwaciindi cakusaanguna kutegwa tukajanike kumuswaangano wamasi mu Port Moresby, mu Papua New Guinea. Ndiciyeeyede kuswiilila ciindi misyinali umwi naakali kupa makani mumwaambo waci Hiri Motu. Nokuba kuti taakwe ncondakali kukonzya kumvwa mumwaambo ooyu, makani aakwe akandikulwaizya kuyanda kuba misyinali, kuyanda kwiiya myaambo imbi, alimwi akupa makani mbubwenya mbuli nguwe. Kumamanino ndakajana nzila mbondakali kukonzya kweendelanya luyando lwangu kuli Jehova alimwi akuyanda kwiiya myaambo.

Twakagambwa kuzyiba kuti, mbotwakasikila buyo ku Australia, twakatambwa kuyoobeleka katuli bamisyinali kunsumbu ya Funafuti, ku Tuvalu, kaindi iyakali kwiitwa kuti Ellice Islands. Twakasika mu Tuvalu mu January 1979. Kwakali buyo basikumwaya bambi babbapatizyidwe botatwe mu Tuvalu yoonse mbwiizulwa.

Tiicakali cuuba-uba pe kwiiya mwaambo waci Tuvalu. Mumwaambo ooyu kwakali buyo bbuku lyomwe, “Cizuminano Cipya.” Kwakanyina mabbuku aapandulula mabala naa ziiyo zyakwiiya mwaambo, aboobo twakayeeya kuti buzuba abuzuba katwiiya mabala mapya aali 10 kusikila ku 20. Pele cakufwambaana, twakazikuzyiba kuti mabala manji ngotwakali kwiiya tiitwakaazyi kabotu ncaakali kupandulula. Muciindi cakwaambila bantu kuti kusonda nkubi, twakali kubaambila kuti tiibakeelede kubelesya zikkelo zyakupimina alimwi ankoli yakweendela! Nokuba boobo, twakeelede kwiiya mwaambo kutegwa tucikonzye kusololela ziiyo zya Bbaibbele kubantu banji mbotwakakambaukila, aboobo twakazumanana kusoleka kwiiya. Nokwakainda myaka minji, umwi wabaabo mbotwakali kuyiisya wakatwaambila kuti: “Tulikkomene kapati kuti mulakonzya kukanana mwaambo wesu lino. Kumatalikilo cakali kukatazya kapati kuzyiba ncomwakali kusola kwaamba!”

Kulubazu lumwi, twakali mubukkale bugwasya kapati mukwiiya mwaambo mupya. Mbwaanga kwakacinyina maanda aaleenti, twakatalika kukkala amukwasyi umwi wa Bakamboni mumunzi. Twakali kukkala abantu ibakali kukanana mwaambo ooyo akupona buumi bwakumunzi. Nokwakainda myaka iili mbwiibede katutabelesyi Chingisi, mwaambo waci Tuvalu wakazikuba mwaambo ngotwakali kubelesya lyoonse.

Tiilyakalampa, bantu banji bakatalika kutondezya luyandisisyo mukasimpe. Pele ino ncinzi ncotwakali kukonzya kubelesya kwiiya ambabo? Twakanyina mabbuku mumwaambo wabo. Ino bakali kukonzya kucita buti  ciiyo cabo beni? Ciindi nobakatalika kusika kumiswaangano, ino ninyimbo zili nzyobakali kukonzya kwiimba, mabbuku nzi ngobakali kukonzya kubelesya, alimwi mbuti mbobakali kukonzya kulibambila miswaangano? Ino bakali kukonzya buti kuyaambele kutegwa babbapatizyigwe? Bantu aaba babombe myoyo bakali kuyandika cakulya cakumuuya mumwaambo wabo! (1Kor. 14:9) Twakali kulibuzya kuti: ‘Mwati mabbuku kuli naayoomwaigwa mumwaambo waci Tuvalu, imwaambo uukananwa buyo abantu ibatasiki ku 15,000? Jehova wakaingula mibuzyo eeyi, wakasinizya kulindiswe zintu zyobilo: (1) Uyanda kuti Jwi lyakwe lyaambilizyigwe “akati kansumbu zili kulamfwu,” alimwi (2) uyanda kuti bantu aabo nyika mbiibona kuti mbantu ‘ibalicesya alimwi babombe myoyo’ bayubile muzina lyakwe.—Jer. 31:10; Zef. 3:12.

Mu 1980 ofesi yamutabi yakatupa mulimo wakusandulula—mulimo ngotwakalimvwa kuti tatweeleli kuubeleka. (1Kor. 1:28, 29) Kumatalikilo, twakakonzya kuula muncini wakaindi uutegwa mimeograph kuzwa kumfwulumende, alimwi twakali kuubelesya kupulinta zintu nzyotwakali kubelesya kumiswaangano yesu. Alimwi twakasandulula bbuku litegwa The Truth That Leads to Eternal Life mumwaambo waci Tuvalu akulipulinta kubelesya muncini nguwenya ooyu. Ndiciyeeyede mboyakali kununka inki njotwakali kubelesya alimwi ambotwakeelede kubeleka canguzu mubusena ibupya kapati kutegwa tupulinte mabbuku oonse amaanza. Aciindi eeco tiitwakajisi magesi!

Tiicakali cuuba-uba kusandulula mumwaambo waci Tuvalu nkaambo kwakali mabbuku masyoonto aakuvwuntauzya aakutugwasya kusandulula. Pele zimwi ziindi twakali kugwasyigwa abantu mbotwatakali kuyeeyela kuti inga batugwasya. Bumwi buzuba cakutazyiba ndakasika aŋanda yamuntu umwi iwakali kukazya kasimpe. Mukamwini ŋanda, mwaalumi uucembeede iwakali mwiiyi kaindi, cakufwambaana wakandiyeezya kuti tiitwakeelede kusika aŋanda yakwe. Mpoonya, wakati: “Ndiyanda buyo kwaamba cintu comwe. Busanduluzi bwanu buliindene ambobaambaula bantu muci Tuvalu.” Ndakabuzya-buzya bantu bamwi, mpoonya ndakajana kuti ncaakaamba cakaliluzi. Aboobo, twakacinca imwakali kuyandika kucinca. Pele icakandigambya ncakuti Jehova wakatugwasya munzila eeyi kwiinda mukubelesya sikutukazya iwakali kubala mabbuku eesu!

 Zintu zyakasaanguna kusimbwa muci Tuvalu kutegwa zimwaigwe twakali tupepa twakutamba bantu ku Ciibalusyo. Mpoonya twakamwaya Makani aa Bwami Na 30, aakamwaigwa aciindi comwe a Chingisi. Eelo kaka cakali cintu cikkomanisya kupa bantu cintu cimwi icilembedwe mumwaambo wabo! Buce-buce mabroshuwa amwi amabbuku amwi akatalika kujanika mumwaambo waci Tuvalu. Mu 1983 mutabi waku Australia wakatalika kusimba Ngazi Yamulindizi yamapeeji aali 24 ziindi zyone amwaka, eeci cakapa kuti katucikonzya kwiiya mincali iili ciloba nsondo ansondo. Ino bantu bakalimvwa buti? Akaambo kakuti bantu baku Tuvalu bayandisya kubala, bantu banji bakatalika kwaayanda mabbuku eesu. Mbolyasikila bbuku limwi alimwi lipya, mfwulumende yakali kwaambilizya kwiinda muli sikapepele, alimwi zimwi ziindi makani aajatikizya mabbuku eesu akali kuba mutwe wamakani aakali kubalwa asikapepele! *

Kumatalikilo twakali kusandulula kwiinda mukulemba amaanza kubelesya bboopeni amapepa. Mpoonya, izyakali kulembwa amaanza zyakali kutaipwa cakwiinduluka-induluka kazitanatumwa kumutabi ku Australia kutegwa zikasimbwe. Ciindi cimwi, mutabi wakajisi bacizyi bobilo ibakali kutaipa akunjizya zintu izyakalembwa amaanza mukkompyuta, nokuba kuti taakwe nobakauzyi mwaambo waci Tuvalu. Eeyi nzila yakutaipa mabala ziindi zyobilo mpoonya akweezyanisya kubona kwiindana kuliko kwiinda mukubelesya kkompyuta kwakapa kuti kulubizya kuceye kapati. Mapeeji aabbuku aatondezya mboliyooboneka bbuku akali kupilusyigwa kulindiswe kwiinda mukubelesya ndeke kutegwa tulange-lange naa zilembedwe kabotu mpoonya twamana twakali kuzituma alimwi kumutabi kutegwa zikasimbwe.

Pele lino zintu zyacinca kapati! Lino tubunga twabasanduluzi ntotulemba kubelesya makkompyuta. Bunji bwaziindi, aabo ibabamba mabala aakasandululwa akululamikwa kutegwa aboneke mbwaayooboneka lyaakusimbwa bbuku bakkede antoomwe abasanduluzi, alimwi zintu nzyobalemba zilakonzya kutumwa kumitabi iisimba mabbuku kwiinda mukubelesya Intaneti. Takuciyandiki kubinda kuunka kumposo kuyootuma zintu zyakalembwa amaanza.

Myaka noyakali kuyabweenda, ba Jenny andime twakatambula milimo iindene-indene mucooko ca Pacific coonse mbocizulwa. Kuzwa ku Tuvalu twakatumwa kuyoobelekela kumutabi waku Samoa mu 1985. Okuya twakagwasyilizya mumulimo wakusandulula mumwaambo waci Samoa, Tonga, alimwi awaci Tokelau kuyungizya kumulimo ngotwakacili kucita ku Tuvalu. * Mpoonya mu 1996 twakapegwa mulimo nguwenya kumutabi waku Fiji, nkotwakali kukonzya kugwasyilizya mulimo wakusandulula iwakali kucitwa mumwaambo waci Fiji, Kiribati, Naurua, Rotuma, alimwi aci Tuvalu.

Lyoonse ndilagambwa akaambo kabusungu mbobatondezya aabo ibasandulula mabbuku eesu. Mulimo ooyu ulaminya. Nokuba boobo, bakwesu abacizyi aaba ibasyomeka basoleka kwiiya luyandisyo ndwatondezya Jehova kutegwa makani mabotu akambaukwe “kumasi oonse, kumisyobo yoonse, kumilaka yoonse [naa, “kumyaambo,” bupanduluzi buyungizyidwe] alimwi akubantu bamisyobo yoonse.” (Ciy. 14:6) Mucikozyanyo, ciindi nokwakali kubikkwa bubambe bwakuti Ngazi Yamulindizi mumwaambo waci Tongan italike kusandululwa, ndakaswaangana abaalu boonse bamu Tonga kutegwa tujane ibakali kukonzya kuyiisyigwa mulimo wakusandulula. Mwaalu umwi iwakali kubeleka mulimo mubotu wakubamba myootokala wakasala kuuleka mulimo wakwe buzuba bwakatobela, mpoonya-mpoonya  wakatalika mulimo wakusandulula. Ncaakacita cakali cintu cikkomanisya, nkaambo mukwesu ooyu wakajisi mukwasyi alimwi taakwe naakazyi nkwaakali kunoojana mali. Pele Jehova wakamulanganya amukwasyi wakwe alimwi wakazumanana kuubeleka mulimo wakusandulula kwamyaka minji.

Basanduluzi balyaabide ibali boobu batondezya mizeezo njobajisi bamu Kabunga Keendelezya, ibabikkila maano kapati kuzintu zyakumuuya nzyobayandika bantu ibaambaula myaambo iibelesyegwa abantu basyoonto. Mucikozyanyo, ciindi cimwi mubuzyo wakabuzyigwa naa cakali kuyandika kumwaya mabbuku mumwaambo waci Tuvalu. Ndakakulwaizyigwa kapati nondakabala bwiinguzi ibwakapegwa a Kabunga Keendelezya ibwakuti: “Taakwe kaambo kali koonse nkotubona ikakonzya kupa kuti muleke mulimo wakusandulula mumwaambo waci Tuvalu. Nokuba kuti bantu ibakanana mwaambo waci Tuvalu mbasyoonto kweezyanisya abantu ibakanana myaambo iimbi, bantu aabo bayandika kukambaukilwa makani mabotu mumwaambo wabo.”

Mu 2003, mebo aba Jenny twakazwa ku Dipatimenti Yabasanduluzi, kumutabi waku Fiji akuunka kuyoobelekela ku Dipatimenti Iigwasya Basanduluzi ku Patterson, New York. Cakali mbuli kuti nciloto, tiitwakasyoma! Twakaba cibeela cakabunga ikagwasyilizya mulimo wakusandulula mabbuku eesu mumyaambo iimbi iiyungizyidwe. Mumyaka yobilo naa kwiinda waawo iyakatobela, twakaba acoolwe cakuswaya zisi ziindene-indene kuyaabuyiisya basanduluzi.

Lino andipiluke kukaambo aakaya nkondaambide kumatalikilo ikajatikizya mizeezo njotwakeelede kupa. Kuzikusika mumwaka wa 2000, Kabunga Keendelezya kakabona kuti cakali kuyandika kugwasyilizya tubunga twabasanduluzi nyika yoonse mbwiizulwa. Kuzikusika aciindi eeci, basanduluzi banji bakayiisyidwe buyo asyoonto kujatikizya mulimo wabo. Notwakamana kupa mizeezo eeyo ku Kkomiti Iilanganya Zilembwa, Kabunga Keendelezya kakazuminizya kuti kube pulogilamu yakuyiisya basanduluzi nyika yoonse mbwiizulwa. Pulogilamu eeyo yakali kubikkilizya akuyiisya basanduluzi kumvwisya Chingisi, nzila zibelesyegwa mukusandulula, alimwi ambociyandika kubelekela antoomwe abasanduluzi bamwi ibali mukabunga.

Ino kuubikkila maano mulimo wakusandulula munzila eeyi kwagwasya buti? Cintu cimwi cacitika ncakuti, nzyobasandulula lino zilimvwisya kabotu kapati ciindi muntu nabala kwiinda mbocakabede kaindi. Alimwi myaambo mwaasandululwa mabbuku eesu yayungizika kapati. Notwakasika ciindi cakusaanguna katuli bamisyinali mu 1979, Ngazi Yamulindizi yakali kumwaigwa buyo mumyaambo iili 82. Mamagazini aamumyaambo minji akali kutambulwa kakwiindide myezi minji kuzwa ciindi mamagazini aamu Chingisi naakamwaigwa. Pele lino, Ngazi Yamulindizi ilamwaigwa mumyaambo iinda ku 240, alimwi bunji bwamyaambo eeyi imwaigwa aciindi comwe a Chingisi. Cakulya cakumuuya lino cilajanika munzila ziindene-indene mumyaambo iinda ku 700. Myaka yainda musyule, tiitwakali kuyeeyela pe kuti eeci inga cacitika.

Mu 2004, Kabunga Keendelezya kakapanga cakusala acimwi citakalubwi—kufwanzyaanya mulimo wakusandulula Bbaibbele. Kwiinde buyo myezi misyoonto kuzwa ciindi eeci, mulimo wakusandulula Bbaibbele wakaba umwi wamilimo njobabeleka basanduluzi, eeci cakapa kuti Bbaibbele lya Busanduluzi Bwanyika Mpya likonzye kusandululwa mumyaambo minji. Kuzikusika mumwaka wa 2014, Bbaibbele eeli lyasimbwa lyoonse mbolizulwa naa cibeela buyo candilyo mumyaambo iili 128—kubikkilizya amyaambo iili mbwiibede iikananwa mu South Pacific.

 Cintu cimwi cipati icakacitika mubuumi bwangu cakali coolwe ncondakapegwa mu 2011 cakuyooswaangana muswaangano wacooko ku Tuvalu. Kwamyezi minji, mucisi coonse kwakali cilanga, alimwi cakali kulibonya mbuli kuti muswaangano wakali kuyoosumpizyigwa. Nokuba boobo, buzuba mbotwakasika kumangolezya cilanga cakamana ciindi mvwula mpati noyakawa alimwi muswaangano wakacitika! Ndakajisi coolwe cakwaambilizya kumwaigwa kwa Bbaibbele lya Busanduluzi Bwanyika Mpya bwa Magwalo aa Banakilisito aa Chigiliki muci Tuvalu—mwaambo uukananwa abantu basyoonto molyakasandululwa Bbaibbele eeli litaliboteli kalili cipego. Nowakamana muswaangano wacooko, yakawa alimwi mvwula mpati. Aboobo boonse bakamanizya muswaangano kabajisi maanzi manji aakumuuya alimwi amaanzi eeni aakumubili!

Cuusisya ncakuti, ba Jenny, bakaintu bangu mbotwakakwetene limwi myaka iili 35 tiibakapona kuti balangilile cakacitika lyamuswaangano uulya. Bakafwa mu 2009 nobakamana kuciswa bulwazi bwakkansa yakunkolo kwamyaka iili kkumi. Baakubusyigwa, cakutadooneka bayookkomana kumvwa makani aajatikizya kugwisyigwa kwa Bbaibbele mumwaambo waci Tuvalu.

Kuzwa kuciindi eeco, Jehova wandilongezya kwiinda mukundipa mweenzuma uumbi weebeka kapati, ba Loraini Sikivou. Ba Loraini aba Jenny bakali antoomwe ku Bbeteli yaku Fiji, alimwi ba Loraini bakali kubeleka mulimo wakusandulula mumwaambo waci Fiji. Aboobo lino ndilijisi alimwi mukaintu uusyomeka, antoomwe tulakkomana kubelekela Jehova alimwi akukkomanina myaambo!

Ciindi nondilanga myaka yamusyule, ndilayumizyigwa nondibona Taata wakujulu siluyando, Jehova, mbwaazumanana kubikkila maano myaambo ikananwa abantu basyoonto alimwi abantu banji. (Int. 49:1-3) Luyando ndwatondezya kubantu ndalubona ciindi nondibona bantu mbobakkomana ciindi nobabona mabbuku eesu amwi mumwaambo ngobakanana naa nobaimba nyimbo kutembaula Jehova mumwaambo uubasika kumoyo. (Mil. 2:8, 11) Ndicaayeeya majwi ngobakaamba ba Saulo Teasi, mukwesu uucembeede waku Tuvalu. Naakamana kwiimba lwiimbo lwa Bwami ciindi cakusaanguna mumwaambo wakwe, wakati: “Ndiyeeya kuti mweelede kwaambila Kabunga Keendelezya kuti eezyi nyimbo zimvwika kabotu muci Tuvalu kwiinda mu Chingisi.”

Kutalikila mu September 2005, ndaba acoolwe cakubeleka kandili umwi wabakwesu ibali mu Kabunga Keendelezya ka Bakamboni ba Jehova. Nokuba kuti lino tandibeleki mbuli musanduluzi, ndilamulumba Jehova kuti ulandipa coolwe cakugwasyilizya mumulimo wakusandulula uucitwa munyika yoonse mbwiizulwa. Eelo kaka cilakkomanisya kuzyiba kuti Jehova ulababikkila maano bantu bakwe boonse—nobaba baabo ibakkala munsumbu izili kulamfwu mukati ka Pacific Ocean! Inzya, mbubwenya mbwaakaamba sintembauzyo kuti, “Jehova waba Mwami! Inyika aisekelele. Insumbu zinji azikondwe.”—Int. 97:1.