1. (a) Ncinzi cakamucitikila Petro ciindi nokwakali guwo mulwizi lwa Galilaya? (Amubone cifwanikiso icili kumatalikilo aacibalo.) (b) Nkaambo nzi Petro ncaakatalika kubbila?

BUSIKU bumwi, mwaapostolo Petro alimwi abasikwiiya bamwi, bakapenga kuti bazabukile kutala limbi lya Lwizi lwa Galilaya akaambo kakuti kwakali guwo. Mpoonya bakabona Jesu keenda atala aameenda. Petro wakaita Jesu akumulomba kuti ayende anguwe atala aameenda. Jesu naakamwaambila kuti boola, Petro wakazwa mubwato akutalika kweenda atala aameenda kuunka kulinguwe. Pele kakutanainda ciindi cilamfwu, Petro wakatalika kubbila. Ino nkaambo nzi? Nkaambo kakuti wakabikkila maano kulanga guwo alimwi amayuwe mpoonya wakayoowa. Petro wakakwiila kutegwa agwasyigwe mpoonya cakufwambaana Jesu wakamujata akumwaambila kuti: “Yebo osilusyomo luniini, nkaambo nzi ncoodooneka?”—Mt. 14:24-32.

2. Nzintu nzi nzyotutiilange-lange?

² Atulange-lange zintu zyotatwe kujatikizya lusyomo nzyotukonzya kwiiya kuli cakacitikila Petro: (1) kumatalikilo Petro mbwaakasyoma kuti Jehova wakali kukonzya kumugwasya, (2) icakapa kuti lusyomo lwa Petro kaluyaabumana, alimwi (3) acakamugwasya Petro kuba alusyomo alimwi. Kulanga-langa twaambo ootu kulakonzya kutugwasya ‘kwiima nji mulusyomo.’—1Kor 16:13.

3. Ino ncinzi cakapa Petro kuti azwe mubwato, alimwi ino mbuti andiswe mbotwacita cintu cimwi cikozyene aceeci?

³ Petro wakalijisi lusyomo luyumu. Ino nkaambo nzi ncotwaambila boobo? Ciindi Jesu naakamwiita, Petro wakazwa mubwato akutalika kweenda atala aameenda. Wakalijisi lusyomo lwakuti nguzu zya Leza zyakali kukonzya kumupa nguzu zyakweenda atala aameenda mbuli Jesu. Mbubwenya buyo, ciindi Jesu naakatutamba kuti tumutobele, twakalyaaba kuli Jehova kwiinda mukubbapatizyigwa. Ino nkaambo nzi? Akaambo kakusyoma Jehova alimwi a Jesu alimwi akuba alusyomo lwakuti balakonzya kutugwasya.—Joh. 14:1; amubale 1 Petro 2:21.

4, 5. Nkaambo nzi lusyomo ncoluyandika kapati?

⁴ Lusyomo ncintu cimwi ciyandika kapati. Lusyomo lwakwe Petro lwakamugwasya kweenda atala aameenda, cintu icakali kulibonya kuti kunyina muntu uulya maila uukonzya kucicita. Lusyomo alimwi lulakonzya kutugwasya kucita zintu zilibonya mbuli kuti tazikonzyeki. (Mt. 21:21, 22) Tobamwi twacinca bube alimwi abukkale bwesu cakuti ibantu ibakatuzyi katutanacinca tabacikonzyi kusyoma kuti ndiswe buya twacinca boobo. Twakacinca akaambo kakuti tulamuyanda Jehova alimwi akaambo kakuti wakatugwasya kutegwa tucince. (Amubale Bakolose 3:5-10.) Lusyomo lwakatukulwaizya kulyaaba kuli Jehova, mpoonya twakaba balongwe bakwe, cintu ncotwatakali kukonzya kucita ikuti naatakatugwasya kucita boobo.—Ef. 2:8.

⁵ Lusyomo lupa kuti tuyume. Mucikozyanyo, lulatugwasya kulwana nzila zya Diabolosi, sinkondoma uujisi nguzu kwiinda ndiswe. (Ef. 6:16) Alimwi akaambo kakusyoma Jehova, tatuyandiki kuusa kapati ciindi notujisi mapenzi. Jehova wasyomezya kuti uyootupa nzyotuyandika ikuti katumusyoma alimwi akubikkila maano kapati kuzintu zya Bwami. (Mt. 6:30-34) Alimwi kwiinda zyoonse, Jehova uyootupa buumi butamani akaambo kalusyomo lwesu mulinguwe.—Joh. 3:16.

6, 7. (a) Ino guwo alimwi amayuwe ngaakayoowa Petro inga twaakozyanisya kunzi? (b) Nkaambo nzi ncotuyandika kuzyiba kuti lusyomo lwesu lulakonzya kumana?

⁶ Petro naakali kuyaabweenda atala aa Lwizi lwa Galilaya, wakatalika kuyoowa. Ino nkaambo nzi? Akaambo kaguwo alimwi amayuwe. Zintu eezyi zilakonzya kukozyanisyigwa kumasunko manji ngobayaanya Banakristo mazuba aano. Nokuba kuti mapenzi aaya alakatazya kapati, tulakonzya kuzumanana kuyuma kwiinda mukugwasyigwa a Jehova. Pele amuyeeye icakacitikila Petro. Tanaakabbila akaambo kaguwo alimwi amayuwe pe. Muciindi caboobo, Bbaibbele lyaamba kuti: “Naakabona guwo wakayoowa.”  (Mt. 14:30) Petro wakazikucileka kulanga Jesu mpoonya akutalika kubikkila maano kuguwo ilyakali kuunga canguzu. Mpoonya lusyomo lwakwe lwakatalika kuyaabumana. Mbubwenya buyo, ikuti twatalika kubikkila kapati maano kumapenzi ngotujisi, tulakonzya kutalika kudooneka kuti Jehova ulakonzya kutugwasya.

⁷ Tweelede kuzyiba kuti lusyomo lulakonzya kumana. Ino nkaambo nzi? Nkaambo Bbaibbele lyaamba kuti kusweekelwa lusyomo ‘ncibi eeco cifwambaana kutuzambaila.’ (Heb. 12:1) Mbubwenya mbuli Petro, ikuti twabikkila kapati maano kuzintu zitali kabotu, lusyomo lwesu inga lwamana cakufwambaana. Aboobo, mbuti mbotukonzya kuzyiba kuti lusyomo lwesu luli muntenda? Mibuzyo iitobela ilatugwasya kulilingula mumbazu eeyi.

8. Mbuti mbotukonzya kutalika kudooneka zisyomezyo zya Leza kuti nzyancobeni kwiinda mbotwakali kuzibona kaindi?

⁸ Sena zisyomezyo zya Leza tucizibona kuba nzyancobeni? Mucikozyanyo, Leza wasyomezya kunyonyoona nyika ya Saatani. Nokuba boobo, sena tulanyonganizyigwa azintu zyakulikondelezya ziindene-indene iziliko munyika eeyi? Ikuti naa mbombubo oobo, tulakonzya kutalika kudooneka kuti mamanino ali afwaafwi. (Hab. 2:3) Amubone acikozyanyo cimbi. Jehova wakapa cinunuzyo, alimwi akusyomezya kuti ulatulekelela zibi zyesu. Pele ikuti twazumanana kubikkila maano kuzibi nzyotwakacita musyule, tulakonzya kutalika kudooneka kuti Jehova wakatulekelela ncobeni. (Mil. 3:19) Eeci cilakonzya kupa kuti lukkomano lwesu ndotujisi mukubelekela Leza lumane alimwi akucileka kukambaukila bamwi.

9. Ncinzi cikonzya kucitika ikuti mubuumi bwesu twabikkila maano kapati kuzintu nzyotuyanda lwesu tobeni?

⁹ Sena Jehova ndicimubelekela kusikila mpondigolela? Kubelekela Jehova canguzu kulatugwasya kubikkila maano kapati kubulangizi bwesu bwakumbele. Nokuba boobo, ino mbuti kuti twatalika kubikkila maano kapati kuzintu nzyotuyanda lwesu tobeni? Mucikozyanyo, tulakonzya kuzumina kulembwa mulimo uuvwolwa mali mabotu-botu pele uutatupi ciindi cakubelekela Jehova. Eeci cilakonzya kupa kuti lusyomo lwesu luceye, alimwi tulakonzya kuba “batolo,” kubelekela Jehova asyoonto kwiinda mbotukonzya kumubelekela.—Heb. 6:10-12.

10. Mbuti mbotutondezya lusyomo muli Jehova ciindi notulekelela bamwi?

¹⁰ Sena cilandiyumina kulekelela bamwi? Ciindi bamwi nobatulubizyila naa kutucisizya moyo, sena tulakalala naa kucileka kubaambauzya? Ikuti naa mbombubo oobo, inga kakuli tubikkila maano kapati mbotulimvwa. Tutondezya kuti tulamusyoma Jehova ciindi notulekelela bamwi. Munzila nzi? Ikuti umwi watulubizyila, cili mbuli kuti ujisi cikwelete kulindiswe. Ciindi notwamulubizyila Jehova, tulaba acikwelete kulinguwe. (Lk. 11:4) Aboobo, ciindi notulekelela bamwi, tusyoma Jehova. Tusyoma nguwe kuti atulongezye akaambo kabube bwesu, alimwi zilongezyo zyakwe nzibotu kapati kwiinda cintu ncakonzya kutucitila muntu iwatulubizyila. Basikwiiya ba Jesu abalo bakazyiba kuti lusyomo lulayandika kutegwa tulekelele bamwi. Ciindi Jesu naakabaambila kulekelela bantu ibakabalubizyila ziindi zinji, basikwiiya bakwe bakamulomba kuti: “Kotuyungizyila lusyomo.”—Lk. 17:1-5.

11. Ncinzi cikonzya kupa kuti tutagwasyigwi alulayo ndotwapegwa?

¹¹ Am Sena ndilanyema kuti ndapegwa lulayo? Amuyandaule twaambo tugwasya mululayo ndomwapegwa muciindi cakuyandaula zintu zilubide mululayo naa muciindi cakuyandaula kulubizya kwasikupa lulayo. (Tus. 19:20) Mutaindwi coolwe cakwiiya kuyeeya mbuli mbwayeeya Jehova!

12. Inga ncinzi cilubide ikuti muntu lyoonse kaile kutongooka baabo basololela?

¹² Sena ndilatongooka kujatikizya baabo basololela mumbungano? Ciindi bana Israyeli nobakabikkila maano kumulumbe mubyaabi ngobakaamba basikutwela nyika ibali kkumi, bakatalika kutongooka Musa alimwi a Aroni. Mpoonya Jehova wakabuzya Musa kuti: “Ino bayooleka lili kutandisyoma?” (My. 14:2-4, 11) Masimpe, Jehova wakalizyi kuti bana Israyeli tiibakali kumusyoma nkaambo bakatongooka Musa alimwi a Aroni, baalumi mbaakasalide. Mbubwenya buyo, ikuti lyoonse katutongooka baabo Jehova mbabelesya kusololela bantu bakwe mazuba aano, inga catondezya kuti lusyomo lwesu muli Leza lwaceya.

13. Nkaambo nzi ncotuteelede kutyompwa ikuti naa twabona kuti lusyomo lwesu taluli luyumu?

¹³ Notwalanga-langa mibuzyo eeyi, mutatyompwi ikuti naa mwabona kuti lusyomo lwanu taluli luyumu. Mutalubi kuti naba mwaapostolo Petro wakayoowa akutalika kudooneka. Alimwi zimwi ziindi Jesu wakabapa lulayo baapostolo bakwe akaambo kakuba ‘alusyomo luniini.’ (Mt. 16:8) Nokuba boobo, tulakonzya kwiiya ciiyo cibotu kuli cakacitikila Petro. Amubone ncaakacita naakatalika kudooneka alimwi akubbila.

14, 15. (a) Ncinzi Petro ncaakacita ciindi naakatalika kubbila? (b) Mbuti mbotukonzya ‘kugamika meso’ kuli Jesu?

¹⁴ Ncinzi ncaakacita Petro naakatalika kubbila? Petro wakalicizyi kusaya naa kudwaya, aboobo wakali kukonzya kusaya akujokela kubwato. (Joh. 21:7) Pele nkaambo nzi ncaatakacitila boobo? Akaambo kakuti tanaakasyoma nguzu zyakwe mwini. Wakalanga alimwi kuli Jesu akutambula lugwasyo lwakwe. Ikuti twabona kuti lusyomo lwesu talucili luyumu, tweelede kwiiya Petro. Ino mbuti mbotukonzya kumwiiya?

¹⁵ Mbubwenya mbuli Petro mbwaakalanga kuli Jesu kuti amugwasye, andiswe tweelede ‘kugamika meso’ kuli Jesu. (Amubale Bahebrayo 12:2, 3.) Pele tatukonzyi kumubona ameso mbuli Petro mbwaakamubwene. Aboobo, mbuti mbotukonzya ‘kugamika meso’ kuli Jesu? Tulakonzya kwiiya zintu nzyaakayiisya anzyaakacita alimwi akulomya kwiiya cikozyanyo cakwe. Ikuti twacita oobo, tuyoogwasyigwa kutegwa tuyumye lusyomo lwesu. Atulange-lange nzila zimwi mbotukonzya kwiiya Jesu.

16. Mbuti Bbaibbele mbolikonzya kutugwasya kuyumya lusyomo lwesu?

¹⁶ Amuyumye lusyomo lwanu mu Bbaibbele. Jesu wakalisinizyide kuti Bbaibbele ndi Jwi lya Leza alimwi akuti lilijisi lulayo lwiinda kubota. (Joh. 17:17) Kutegwa tumwiiye Jesu, tweelede kubala Bbaibbele buzuba abuzuba, kuliiya, alimwi akuzinzibala kuyeeya zintu nzyotwiiya mulindilyo. Alimwi tweelede kuyandaula bwiinguzi kumibuzyo njotukonzya kuba aanjiyo. Mucikozyanyo, sena mulasyoma ncobeni kuti tupona mumazuba aamamanino? Amuyumye lusyomo lwanu lwakuti mamanino ali afwaafwi kwiinda mukubala businsimi bwamu Bbaibbele ibutondezya kuti tupona mumazuba aamamanino. Sena mulayanda kuyumya lusyomo lwanu muzisyomezyo zya Leza zyakumbele? Nkokuti amubale businsimi bwamu Bbaibbele bumwi ibwakazuzikizyigwa kale. Sena mulasyoma kuti Bbaibbele lilagwasya ncobeni mazuba aano? Mulakonzya kubala makani aajatikizya bakwesu abacizyi ibakacinca buumi bwabo akutalika kupona buumi bubotu kapati akaambo kakugwasyigwa a Bbaibbele. * (Amubone bupanduluzi buyungizyidwe.)—1Tes. 2:13.

17. Nkaambo nzi Jesu ncaakakonzya kuliyumya mumapenzi aataambiki, alimwi mbuti mbotukonzya kumwiiya?

¹⁷ Amubikkile maano kapati kuzilongezyo Jehova nzyaasyomezya. Jesu wakabikkila maano kapati kuzilongezyo nzyaakali kulangila kutambula, alimwi eeci cakamugwasya kuliyumya mumapenzi aataambiki. (Heb. 12:2) Tanaakanyonganizyigwa azintu zyamunyika. (Mt. 4:8-10) Mbuti mbotukonzya kwiiya cikozyanyo ca Jesu? Amuzinzibale kuyeeya zisyomezyo zibotu Jehova nzyaasyomezya. Amuyeeye buyo kuti muli munyika mpya. Sena tamukonzyi kulemba zintu nzyomuyanda kuyoocita mu Paradaiso? Naa sena inga tiimwalemba mazina aabantu bayoobusyigwa mbomuyooyanda kubandika limwi alimwi anzyomuyanda kuyoobaambila? Mbubwenya mbuli Jesu, amuzibone kuba zisyomezyo Leza nzyaasyomezya kulindinywe kumugama, ikutali kunkamu yabantu.

18. Mbuti mupailo mboukonzya kumugwasya kuyumya lusyomo lwanu?

¹⁸ Amupaile kuti muyungizyilwe lusyomo. Jesu wakayiisya basikwiiya bakwe kulomba muuya uusalala kuli Jehova. (Lk. 11:9, 13) Ciindi nomulomba muuya uusalala, amupaile kuti muyungizyilwe lusyomo. Lusyomo ncibeela cimwi camicelo yamuuya uusalala. Mulakonzya kwaamba zintu zigaminide mumipailo yanu. Mucikozyanyo, ikuti mwabona kuti cilamuyumina kulekelela bamwi, amumulombe Jehova kuti ayumye lusyomo lwanu alimwi akuti amugwasye kulekelela bamwi.

19. Mbuti mbotukonzya kusala balongwe babotu?

¹⁹ Amusale balongwe bajisi lusyomo luyumu. Jesu wakali kubikkila maano kusala balongwe. Balongwe bakwe mbaakali kuyandisya, nkokuti baapostolo bakwe, bakali kusyomeka, alimwi bakali kumumvwida. (Amubale Johane 15:14, 15.) Amumwiiye Jesu alimwi akubikkila maano kusala kabotu balongwe. Balongwe banu beelede kuba bantu bajisi lusyomo luyumu ibamvwida Jesu. Balongwe beni-beni balasyomeka kuli umwi aumwi, noliba leelyo nobayandika kupa lulayo naa kutambula lulayo.—Tus. 27:9.

20. Ncinzi cikonzya kucitika ciindi notugwasya bamwi kuti bayumye lusyomo lwabo?

²⁰ Amubagwasye bamwi kuti bayumye lusyomo lwabo. Jesu wakabagwasya basikwiiya bakwe kuti bayumye lusyomo lwabo kwiinda muzintu nzyaakali kwaamba akucita. (Mk. 11:20-24) Tweelede kwiiya cikozyanyo ca Jesu. Ikuti twacita oobo, tuyooyumya lusyomo lwesu alimwi alwabamwi. (Tus. 11:25) Mbuti mbomukonzya kugwasya bantu bamucilawo canu? Ciindi nomuyiisya bamwi Bbaibbele, amukankaizye kapati bumboni butondezya kuti Leza nkwali, akuti ulatulanganya, alimwi akuti Bbaibbele ndi Jwi lya Leza. Mbuti mbomukonzya kugwasya Banakristonyoko kuti bazumanane kuyuma mulusyomo? Ikuti mwabona umwi katongooka bakwesu basololela, mutafwambaani kutalika kumweeleba. Amubelesye bupampu kubagwasya kutegwa lusyomo lwabo luyume alimwi. (Jud. 22, 23) Ikuti kamucili basicikolo mpoonya bayi banu baamba kujatikizya njiisyo yakusanduka, amube basicamba akwiiminina lusyomo lwanu lujatikizya kulengwa kwazintu. Mulakonzya kugambwa kapati ambobakonzya kujatikizyigwa bayi banu alimwi abasicikolonyoko.

21. Ncinzi Jehova ncaasyomezya umwi aumwi wesu?

²¹ Jehova alimwi a Jesu bakamugwasya Petro kuti acileke kudooneka akuyoowa. Kumbele mubuumi bwakwe, Petro wakaba cikozyanyo cibotu kuli bamwi icakuba alusyomo. Mbubwenya buyo, Jehova ulagwasya umwi aumwi wesu kwiima nji mulusyomo. (Amubale 1 Petro 5:9, 10.) Kuyandika kusolekesya kapati kutegwa tube alusyomo luyumu, pele Jehova uyootulumbula ikuti twasolekesya kusikila mpotugolela.