1. Ncinzi mwaapostolo Johane ncaakatukulwaizya kuyeeya, alimwi nkaambo nzi?

MWAAPOSTOLO Johane utukulwaizya kuyeeya kapati luyando lwa Jehova kulindiswe. Lugwalo lwa 1 Johane 3:1 lwaamba kuti: “Amubone mboluli lupati luyando ndwaatutondezya Taata.” Ciindi notuzinzibala kuyeeya luyando Jehova ndwatondezya kulindiswe, tulaswena kulinguwe alimwi tulamuyanda kapati.

2. Nkaambo nzi bamwi ncocibayumina kumvwisya kuti Leza ulabayanda?

² Cuusisya ncakuti bantu banji tabazyi Leza mbwabayanda. Bayeeya kuti Leza kunyina nababikkila maano bantu. Bayeeya kuti Leza ubikka buyo milawo alimwi akusubula baabo ibataitobeli. Akaambo kanjiisyo zyakubeja, bamwi bayeeya kuti Leza ngusilunya alimwi akuti inga tacikonzyeki kumuyanda. Bamwi balimvwa kuti Leza ulabayanda bantu boonse, tacikwe makani azintu nzyobacita. Pele akaambo kakwiiya Bbaibbele, mwakazyiba kasimpe kujatikizya Jehova. Mulizyi kuti luyando mbobube bwakwe bulibonya kapati alimwi akuti wakapa Mwanaakwe kuti abe cinunuzyo canu. (Joh. 3:16; 1Joh. 4:8) Nokuba boobo, akaambo kazintu izyamucitikila mubuumi, cilakonzya kumuyumina kuzyiba kuti Jehova ulamuyanda kapati.

3. Ino ncinzi ciyakutugwasya kumvwisya luyando Jehova ndwajisi kulindiswe?

³ Kutegwa tumvwisye Jehova mbwatuyanda, cakusaanguna tweelede kumvwisya kuti Jehova ngowakatulenga. Nguwakatupa buumi. (Amubale Intembauzyo 100:3-5.) Nkakaambo kaako Bbaibbele lipandulula muntu wakusaanguna kuti “mwana wa Leza.” (Lk. 3:38) Alimwi Jesu wakatuyiisya kwiita Jehova kuti “Taateesu ooli kujulu.” (Mt. 6:9) Aboobo, Jehova ngu Taateesu, alimwi ulatuyanda mbubonya mbuli muzyali siluyando mbwayanda bana bakwe.

4. (a) Ino Jehova ngu Taata uuli buti? (b) Ncinzi ncotutiilange-lange mucibalo eeci alimwi ncinzi ncotuyoolanga-langa mucibalo citobela?

⁴ Bantu bamwi cilabayumina kuyeeya kuti usyi muntu siluyando. Inga kabayeeya zintu zibyaabi izyakabacitikila kubwana akaambo kakuti bausyi bakali basilunya. Jehova kunyina nakonzya kuba silunya kubana bakwe. Ngu Taata wiinda boonse kubota. (Int. 27:10) Ulatuyanda kapati alimwi ulatubikkila maano munzila zinji. Ciindi notulimvwa kuti Jehova ulatuyanda, luyando lwesu kulinguwe alwalo lulakomena. (Jak. 4:8) Mucibalo eeci tulalanga-langa nzila zyone Jehova mbwatondezya luyando kulindiswe. Mpoonya mucibalo citobela, tuyoolanga-langa nzila zyone mbotukonzya kutondezya luyando kulinguwe.

5. Ncinzi Leza ncapa bantu boonse?

⁵ Ciindi mwaapostolo Paulo naakali ku Atene, mu Girisi, wakabona kuti kwakali mituni minji alimwi bantu bakali kwiisyoma kuti njeyakali baleza babo ibakali kubapa buumi. Aboobo, wakabaambila makani aajatikizya “Leza iwakalenga nyika azintu zyoonse zili mumo.” Wakaamba kuti Leza “nguupa bantu boonse buumi, muya alimwi azintu zyoonse” alimwi akuti “walo nguutupa buumi, kweenda akupona.” (Mil. 17:24, 25, 28) Jehova ulatupa zintu zyoonse nzyotuyandika kutegwa tupone alimwi akukkomana mubuumi. Amuyeeye buyo kujatikizya zintu zimwi nzyaatupa akaambo kaluyando lwakwe.

6. Munzi uuli buti Jehova ngwaakatupa? (Amubone cifwanikiso icili kumatalikilo aacibalo.)

⁶ Mucikozyanyo, Jehova wakatubambila munzi mubotu wakukkala. (Int. 115:15, 16) Akati kamapulaneti woonse ngaakalenga, nyika ilibonya kuti ililibedelede. Basayaansi basola kuvwuntauzya kujatikizya mulengalenga alimwi akujana kuti kuli mapulaneti manji, pele tiibacikonzya kujana pulaneti iimbi iijisi zintu zyoonse nzyobayandika bantu kutegwa bapone. Jehova tanaakatupa buyo zintu nzyotuyandika kutegwa tupone, pele alimwi wakailenga nyika munzila mbotu, alimwi akuba busena bubotu oomo motukonzya kupona buumi bukkomanisya. (Is. 45:18) Ciindi notuyeeya kujatikizya munzi Taateesu, Jehova, ngwaakatupa, masimpe tulabona ncobeni mbwatuyanda.—Amubale Jobu 38:4, 7; Intembauzyo 8:3-5.

7. Mbuti Jehova mbwaakatulenga mbokutondezya kuti ulatuyanda ncobeni?

⁷ Nzila aimbi Jehova mwaatondezya kuti ulatuyanda nkwiinda mukutulenga munzila yakuti tulakonzya kumwiiya. (Matl. 1:27) Eeci caamba kuti tulakonzya kubona kuti ulatuyanda alimwi akuti tulakonzya kutondezya luyando lwesu kulinguwe. Ulizyi kuti eeci cilakonzya kutupa kukkomana kapati. Kayi, bana balakkomana kapati ciindi nobabona kuti bazyali babo balabayanda. Mutalubi kuti Jesu wakatuyiisya kuti tuyookkomana ikuti twaba acilongwe a Taateesu, Jehova. (Mt. 5:3) Ulatupa “zintu zyoonse nzyotukkomanina.” Aboobo, cilalibonya ncobeni kuti mwaabi alimwi akuti ulatuyanda kapati.—1Tim. 6:17; Int. 145:16.

8. Nkambo nzi ncotuyanda kuti Jehova atuyiisye?

⁸ Usyi ulabayanda bana bakwe alimwi tayandi kuti beenwe naa kucengwa. Pele bazyali banji mazuba aano tabazitobeli zyeelelo zyamu Bbaibbele zijatikizya cibotu acibi. Aboobo, kunyina mbobakonzya kusololela kabotu bana babo; calo kanji-kanji cikonzya kuleta kutakkomana alimwi akukopana. (Tus. 14:12) Nokuba boobo, Jehova ulabasololela munzila yiinda kubota bana bakwe nkaambo ngu “Leza wakasimpe.” (Int. 31:5) Ulakkomana kutuyiisya kasimpe kajatikizya nguwe. Alimwi ulatuyiisya mbotweelede kumukomba akututondezya mbotweelede kupona munzila yiinda kubota. (Amubale Intembauzyo 43:3.) Aboobo, ino ncinzi Jehova ncatuyiisya icitondezya mbwatuyanda?

9, 10. (a) Nkaambo nzi Jehova ncatwaambila makani aajatikizya nguwe? (b) Ino ncinzi ncatuyiisya kujatikizya makanze aakwe kulindiswe?

⁹ Cakusaanguna, Jehova ulatwaambila makani aajatikizya nguwe. Uyanda kuti tumuzyibe. (Jak. 4:8) Aboobo, ulatwaambila izina lyakwe. Alimwi buya, Bbaibbele lilatwaambila zinji kujatikizya zina lyakwe kwiinda izina lili lyoonse. Alimwi Jehova ulatwaambila mbwabede. Ciindi twalanga zintu nzyaakalenga, tulazyiba kuti ngusinguzu alimwi musongo. (Rom. 1:20) Alimwi ciindi notubala Bbaibbele tulaiya bubotu mbwajisi alimwi ambwatuyanda. Mbotuyaabuzyiba bube bwa Jehova bubotu, cilongwe cesu anguwe cilayuma.

¹⁰ Jehova alimwi ulatuyiisya makanze aakwe. Ulatwaambila kuti tuli cibeela camukwasyi wakwe. Alimwi ulapandulula ncayanda kulindiswe kutegwa tubeleke calukamantano alimwi acaluumuno mumukwasyi. Bbaibbele litondezya kuti Leza tanaakatulenga anguzu zyakulisalila cibotu acibi naa zyakulyeendelezya tobeni. (Jer. 10:23) Jehova ulizyi zintu zibotu nzyotuyandika. Ikuti twabuzumina bweendelezi bwakwe alimwi akumumvwida, tulakonzya kuba aluumuno mubuumi alimwi akukkutila. Jehova watuyiisya kasimpe aaka kayandika nkaambo kakuti ulatuyanda.

11. Ncinzi Taateesu siluyando ncaatwaambila kujatikizya zyakumbele?

¹¹ Usyi siluyando ulabikkila kapati maano kujatikizya buumi bwakumbele bwabana bakwe. Uyanda kuti kabapona buumi bwakukkutila. Cuusisya ncakuti bantu banji mazuba aano balalibilika kapati kujatikizya zyakumbele, alimwi banji baile kulipenzya kuyandaula zintu zitakkalilili. (Int. 90:10) Eelo kaka tulamulumba Taateesu, Jehova kuti watuyiisya mbotukonzya kukkutila mubuumi lino alimwi akuti watusyomezya buumi bubotu kapati kumbele!

12. Mbuti Jehova mbwaakasola kugwasya Kaini alimwi a Baruki?

¹² Ciindi Jehova naakabona kuti Kaini uli muntenda yakucita cintu cibi kapati, wakasola kumugwasya Kaini kwiinda mukumubuzya kuti: “Ino nkaambo nzi ncoonyemena boobu akutyompwa? Ikuti naa wacinca akutalika kucita kabotu, sena tokakkomaninwi?” (Matl. 4:6, 7) Kaini wakalukaka lugwasyo lwa Jehova, aboobo wakapenga akaambo kacintu ncaakacita. (Matl. 4:11-13) Aciindi cimbi, Jehova wakabona kuti Baruki wakazikutalika kuba amizeezo iitali kabotu iyakali kumupa kulimvwa kukatala akutyompwa. Aboobo, Jehova wakaambila Baruki kuti mizeezo yakwe tiiyakaluzi pe alimwi akuti wakali kuyandika kucinca. Baruki wakaluswiilila lulayo lwa Jehova, eeci cakapa kuti afwutule buumi bwakwe.—Jer. 45:2-5.

13. Ncinzi babelesi ba Jehova ibasyomeka ncobakaiya kuzwa kumasunko aabo?

¹³ Jehova ulatusololela alimwi akutulaya akaambo kakuti ulatuyanda. Tatululamiki buyo aawo mpotuyandika, pele alimwi ulatuyiisya. (Heb. 12:6) Mu Bbaibbele, kuli babelesi basyomeka mbaakayiisya Jehova kuti babe bantu babotu. Mucikozyanyo, kuli Josefa, Musa, alimwi a Davida, boonse aaba bakayaanya buyumuyumu bukatazya kapati. Ciindi nobakali mumasunko, Jehova wakali ambabo. Alimwi zintu nzyobakaiya ciindi nobakali mumasunko zyakabagwasya ciindi Jehova naakabapa mikuli mipati. Ciindi notubala mu Bbaibbele akubona Jehova mbwabagwasya akubayiisya bantu bakwe, tulazyiba kuti Jehova ulatuyanda ncobeni.—Amubale Tusimpi 3:11, 12.

14. Ikuti twacita cibi, mbuti Jehova mbwatondezya kuti ulatuyanda?

¹⁴ Noliba leelyo notwacita cintu citaluzi, Jehova ulazumanana kutondezya kuti ulatuyanda. Ikuti twalutambula lulayo lwakwe alimwi akweempwa, uyootulekelela “cakumaninina.” (Is. 55:7) Ino eeci caamba nzi? Majwi aa Davida aajatikizya kulekelela kwa Jehova alatutondezya kuti ngu Usyi ulaaluse, majwi aakuti: “Ngonguwe uukulekelela milandu yako yoonse akuponya malwazi aako oonse; ngonguwe uuvwuna buumi bwako kucilindi akukusamika musini waluyando lutamani alimwi aluse. Mbubonya kumapolelo aazuba mbokuli kulamfwu kapati kuzwa kumabbililo aazuba, akwalo nkwabikkide zinyonyoono zyesu mbokubede kulampa kuzwa kulindiswe.” (Int. 103:3, 4, 12) Jehova ulasololela alimwi akutulaya munzila ziindene-indene. Sena mulafwambaana kucinca aawo mpomuyandika kucita boobo? Mutalubi kuti Jehova ulatulaya akaambo kakuti ulatuyanda.—Int. 30:5.

15. Ninzila nzi aimwi Jehova mbwatondezya kuti ulatuyanda?

¹⁵ Usyi siluyando ulaukwabilila mukwasyi wakwe kuntenda. Oobu mbombubo Taateesu, Jehova mbwacita. Sintembauzyo wakaamba kujatikizya Jehova kuti: “Walo ulalinda buumi bwabantu bakwe basyomeka; ulabavwuna kuzwa mumaanza aababi.” (Int. 97:10) Amuyeeye buyo kujatikizya kaambo aaka: Mbubwenya mbomufwambaana kukwabilila meso aanu akaambo kakuti alayandika, Jehova awalo ulafwambaana kukwabilila bantu bakwe nkaambo balayandika kulinguwe.—Amubale Zekariya 2:8.

16, 17. Mbuti Jehova mbwaakabakwabilila bantu bakwe musyule alimwi mbuti mbwacita oobo mazuba aano?

¹⁶ Nzila imwi Jehova mbwaakatondezya alimwi ambwatondezya kuti ulabakwabilila bantu bakwe mazuba aano nkwiinda mukubelesya bangelo. (Int. 91:11) Mungelo omwe wakajaya basikalumamba babana Asuri ibali 185,000 mubusiku buyo bomwe mpoonya akufwutula bantu ba Leza. (2Bam. 19:35) Mumwaanda wamyaka wakusaanguna, bangelo bakavwuna Petro, Paulo, alimwi abamwi kuzwa muntolongo. (Mil. 5:18-20; 12:6-11) Calino-lino aawa, kwakali nkondo mbyaabi kapati mucisi cimwi camu Africa. Kwakali manyongwe akaambo kakulwana, kubba, kujata bamakaintu, alimwi akujayana. Nokuba kuti kunyina mukwesu iwakafwa, bunji bwabo bakasweekelwa zintu nzyobakajisi. Nokuba boobo, bakali kulimvwa kuti Jehova ulabayanda alimwi bakalizyi kuti wakali kubalanganya. Nokuba kuti bakapenga munzila iili yoonse, bakalikkomene. Ciindi mwiiminizi wakumaofesi mapati naakabaswaya alimwi akubuzya mbobakali kupona bakwesu abacizyi aaba, bakaamba kuti: “Zyoonse zili buyo kabotu, tulamulumba Jehova!”

¹⁷ Masimpe kuti babelesi ba Jehova bamwi mbuli Stefano alimwi abamwi bakafwa akaambo kakusyomeka. Talili lyoonse Jehova nalesya zintu zili boobu kucitika. Pele ulabakwabilila bantu bakwe mbuli kabunga kwiinda mukubacenjezya kujatikizya nzila zyabucenjezu bwa Saatani ziindene-indene. (Ef. 6:10-12) Kucenjezya ooku kulajanika mu Bbaibbele alimwi amumabbuku aazwa kumbunga ya Jehova. Mucikozyanyo, tulaiya makani aajatikizya ntenda ziliko aa Intaneti, mukuyandisya mali, alimwi antenda zijatikizya kutalilemeka alimwi amafilimu aankondo, mabbuku naa zisobano. Cilisalede kuti Jehova ulatuyanda alimwi akutukwabilila.

18. Ino mulimvwa buti kujatikizya mbwamuyanda Jehova?

¹⁸ Ciindi Musa naakayeeya kujatikizya myaka njaakabelekela Jehova, wakazyiba kuti Jehova ulamuyanda. Musa wakaamba kuti: “Mafwumofwumo kotukkutya luyando lwako lutamani, kutegwa toongolole cakukondwa akusekelela mazuba oonse aabuumi bwesu.” (Int. 90:14) Ncoolwe cipati kumvwisya kuti Jehova ulatuyanda. Eelo kaka ncoolwe citaambiki ikuyandwa a Jehova! Tulimvwa mbuli mwaapostolo Johane iwakaamba kuti: “Amubone mboluli lupati luyando ndwaatutondezya Taata!”—1 Joh. 3:1.